អត្ថបទចលនានិស្សិត SMD
លោក ទូច វិបុល ប្រធានប្រតិបត្តិនៃចលនានិស្សិតដើម្បីលទ្ធិប្រជាធិបតេយ្យ (Student Movement for Democracy – SMD) បានចេញសេចក្តីថ្លែងការណ៍ ទាមទារឲ្យតុលាការ និងរដ្ឋាភិបាលកម្ពុជា ដោះលែងសកម្មជនបរិស្ថាន។ សេចក្តីថ្លែងការណ៍នេះ បានចេញផ្សាយនៅថ្ងៃទី០៦ ខែឧសភា ឆ្នាំ២០២១។ សូមទាញយកសេចក្តីថ្លែងការណ៍ (Download) ឬអានសេចក្តីថ្លែងការណ៍ទាំងស្រុងខាងក្រោម។
បញ្ជាក់៖ កាលពីថ្ងៃទី០៥ ខែឧសភា ឆ្នាំ២០២១ តុលាការក្រុងភ្នំពេញ បានសម្រេចក្តីលើសកម្មជនបរិស្ថាន លោក ថុន រដ្ឋា ឲ្យជាប់ពន្ធនាគារ ២០ ខែ និងពិន័យជាប្រាក់ ៤លានរៀល ឬប្រហែល ១០០០ ដុល្លារ។ ចំណែកស្ថាបនិកចលនាមាតាធម្មជាតិ លោក អាឡិច ហ្គន់សាឡេស ដេវិតសុន (Alejandro Gonzalez-Davidson) ជនជាតិអេស្បាញ ដែលត្រូវបាននិរទេសចេញពីកម្ពុជា ពីឆ្នាំ២០១៥ ត្រូវបានផ្តន្ទាទោសដូចលោក ថុន រដ្ឋា ដែរ។ ដោយឡែក កញ្ញា ភួន កែវរស្មី និង កញ្ញា ឡុង គន្ធា និងកញ្ញា ជា គន្ធីន ត្រូវបានផ្តន្ទាទោស ឲ្យជាប់ពន្ធនាគាររយៈពេល ១៨ ខែ និងពិន័យជាប្រាក់ ៤លានរៀលដូចគ្នា។ លោក អាឡិច និងកញ្ញា ជា គន្ធីន មិនមានវត្តមាននៅអង្គសវនការទេ។ នេះបើតាមការចុះផ្សាយរបស់គេហទំព័រ វីអូឌី (VOD) ថ្ងៃទី០៥ ខែឧសភា។
សេចក្តីថ្លែងការណ៍
ថ្កោលទោសតុលាការក្រុងភ្នំពេញ ករណីកាត់ក្តីសកម្មជនបរិស្ថានទាំងអយុត្តិធម៌
ចលនានិស្សិតដើម្បីលទ្ធិប្រជាធិបតេយ្យ សូមថ្កោលទោសតុលាការក្រុងភ្នំពេញ ដែលបានកាត់ក្តីទាំងអយុត្តិធម៌ ទៅលើក្រុមសកម្មជនបរិស្ថាន ៣ រូប នៅថ្ងៃទី០៥ ខែឧសភា ឆ្នាំ២០២១ មានលោក ថុន រដ្ឋា កញ្ញា ភួន កែវរស្មី និងកញ្ញា ឡុង គន្ធា ក្រោមបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ចលនានិស្សិតដើម្បីលទ្ធិប្រជាធិបតេយ្យ ចាត់ទុកថា ការកាត់ទោសនេះ គឺជាចេតនា បែបផែនការយុទ្ធសាស្ត្រនយោបាយទុច្ចរិត ក្នុងការបន្ដសង្កត់សង្កិនជ្រុលហួសហេតុ លើសិទ្ធិសេរីភាពស្របច្បាប់ នៃប្រជាពលរដ្ឋម្ចាស់នគរ ដែលមានកាតព្វកិច្ចពេញលេញក្នុងការសម្រេចលើជោគវាសនាជាតិ។
– មាត្រា៣៥ កថាខណ្ឌទី១ នៃរដ្ឋធម្មនុញ្ញកម្ពុជា ចែងថា «ប្រជាពលរដ្ឋខ្មែរទាំងពីរភេទ មានសិទ្ធិ ចូលរួមយ៉ាងសកម្ម ក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងទ្បាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ»។
– មាត្រា៤១ កថាខណ្ឌទី១ នៃរដ្ឋធម្មនុញ្ញកម្ពុជា ចែងថា «ប្រជាពលរដ្ឋខ្មែរ មានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការប្រជុំ»។
– សេចក្ដីប្រកាសជាសកលស្ដីពីសិទ្ធិមនុស្ស និងកតិកាសញ្ញាអន្តរជាតិ ស្តីពីសិទ្ធិពលរដ្ឋ និងនយោបាយ មាត្រា១៩ ចែងថា «មនុស្សគ្រប់រូប មានសិទ្ឋិសេរីភាព ក្នុងការបញ្ចេញមតិ និងការសម្តែងមតិ។ សិទ្ឋិនេះ រាប់បញ្ចូលទាំងសេរីភាពក្នុងការបញ្ចេញមតិ ដោយគា្មនការជ្រៀតជ្រែក និងសេរីភាពក្នុងការស្វែងរកការទទួល និងការផ្សព្វផ្សាយព័ត៌មាន និងគំនិតនានា ដោយ គា្មនព្រំដែន ទោះតាមរយៈមធ្យោបាយសម្តែងមតិណាមួយក៏ដោយ»។
ចលនានិស្សិតដើម្បីលទ្ធិប្រជាធិបតេយ្យ ទាមទារដាច់ខាតឲ្យរដ្ឋាភិបាល និងតុលាការកម្ពុជា ទម្លាក់ចោលបទចោទ និងដោះលែងសកម្មជន លោក ថុន រដ្ឋា កញ្ញា ភួន កែវរស្មី និង កញ្ញា ឡុង គន្ធា ព្រមទាំងអ្នកឯទៀត ឲ្យមានសេរីភាពពេញលេញ ដើម្បីឲ្យពួកគាត់អាចអនុវត្តសិទ្ធិស្របច្បាប់ ដែលមានចែងក្នុងរដ្ឋធម្មនុញ្ញ, សេចក្ដីប្រកាសជាសកលស្ដីពីសិទ្ធិមនុស្ស និងកតិកាសញ្ញាអន្តរជាតិស្តីពីសិទ្ធិពលរដ្ឋ និងនយោបាយ។
ចលនានិស្សិតដើម្បីលទ្ធិប្រជាធិបតេយ្យ ស្នើរដ្ឋសភាកម្ពុជា ធ្វើវិសោធនកម្មលុបចោល «បទញុះញង់ឲ្យប្រព្រឹត្តបទល្មើស» ត្រង់ជំពូកទី៣ ផ្នែកទី៣ នៃក្រមព្រហ្មទណ្ឌ លើករណីនៃសេរីភាពបញ្ចេញមតិ ការសម្ដែងមតិជាសាធារណៈ សេរីភាពនៃការស្រាវជ្រាវនិងផ្សព្វផ្សាយព័ត៌មាន និង គំនិតយោបល់ ទោះតាមមធ្យោបាយណាក៏ដោយ ដើម្បីបើកឱកាសឲ្យកាន់តែទូលាយដល់ប្រជាពលរដ្ឋទូទៅ អាចចូលរួមចំណែកកែលម្អសង្គម។ បើរដ្ឋាភិបាល និងរដ្ឋសភា នៅតែខំបង្រួញលំហសិទ្ធិសេរីភាព ប្រជាពលរដ្ឋ នោះអង្គការរដ្ឋនឹងក្លាយទៅជាឧបករណ៍អំណាចរបស់ក្រុមបុគ្គលប៉ុណ្ណោះ។
រដ្ឋធានីវ៉ាស៊ីនតោន ថ្ងៃទី០៦ ខែឧសភា ឆ្នាំ២០២១
ទូច វិបុល (ហត្ថលេខា)
ប្រធានប្រតិបត្តិ
