……………….
(ប្រភពពី Radio VayoFM / ដោយ ទេព កោសល្យ / 06 th-10-2019)
ក្រោយពីការចុះហត្ថលេខារវាងលោក ហ៊ុន សែន នាយករដ្ឋមន្ត្រីកម្ពុជា និងលោក ង្វៀន សួនហ្វ៊ុក នាយករដ្ឋមន្ត្រីវៀតណាម កាលពីថ្ងៃទី០៥ តុលា ឆ្នាំ ២០១៩ ក្នុងការទទួលស្គាល់បង្គោលព្រំដែននៃប្រទេសទាំងពីរ ដែលសម្រេចបានចំនួន ៨៤ភាគរយនោះ ត្រូវបានមជ្ឈដ្ឋានមួយចំនួន ប្រកាសមិនទទួលស្គាល់ការចុះហត្ថលេខានេះ។
ភ្លាមៗក្រោយការចុះហត្ថលេខាទទួលស្គាល់ការបោះបង្គោលព្រំដែន រវាងកម្ពុជា និងវៀតណាម មជ្ឈដ្ឋានមួយចំនួន បានបញ្ចេញប្រតិកម្ម ប្រកាសមិនទទួលស្គាល់ការចុះហត្ថលេខានេះ ដោយបានអះអាងថា ការចុះហត្ថលេខា រវាងលោក ហ៊ុន សែន និង នាយករដ្ឋមន្ត្រីវៀតណាម ស្តីពីការទទួលស្គាល់បង្គោលព្រំដែន នៃប្រទេសទាំងពីរ ដែលបោះបានចំនួន៨៤ ភាគរយ គឺជាការចុះហត្ថលេខាកាត់ទឹកដីខ្មែរ ទៅឲ្យវៀតណាមដោយស្របច្បាប់។
អតីតគណបក្សសង្គ្រោះជាតិ បានចេញសេចក្ដីថ្លែងការណ៍ មិនទទួលស្គាល់ការបោះបង្គោលព្រំដែន រវាងប្រទេសកម្ពុជា និងវៀតណាមនេះទេ ដោយអះអាងថា កិច្ចការនេះ គឺធ្វើឡើងតាមសន្ធិសញ្ញាព្រំដែន ឆ្នាំ ១៩៨៥ ដែលជាសន្ធិសញ្ញាខុសច្បាប់ ហើយត្រូវមោឃភាព ដោយកិច្ចព្រមព្រៀងសន្តិភាព ទីក្រុងប៉ារីស ឆ្នាំ ១៩៩១ និង រដ្ឋធម្មនុញ្ញនៃព្រះរាជាណាចក្រកម្ពុជា ឆ្នាំ ១៩៩៣។ ហើយការចុះហត្ថលេខា រវាងលោក ហ៊ុន សែន និង នាយករដ្ឋមន្ត្រីវៀតណាម ស្ដីពីការទទួលស្គាល់បង្គោលព្រំដែន នៃប្រទេសទាំងពីរ កម្ពុជា វៀតណាម ដែលបោះរួចបាន ៨៤% នោះ គឺជាការកាត់ទឹកដីខ្មែរ ឲ្យវៀតណាមដោយស្របច្បាប់ ដែលគណបក្សសង្គ្រោះជាតិ មិនអាចទទួលយកបានឡើយ។
លោក សួន សូរីដា អតីតតំណាងរាស្ត្រ នៃអតីតគណបក្សសង្គ្រោះជាតិ ស្នើឲ្យរដ្ឋាភិបាលកម្ពុជា បង្ហាញ និងពន្យល់ដល់ពលរដ្ឋខ្មែរឱ្យបានដឹងច្បាស់ថា ការបោះបង្គោលព្រំដែន នឹងមិនបានធ្វើឱ្យបាត់បង់ទឹកដីខ្មែរ ទៅប្រទេសវៀតណាមនោះទេ។ លោកថា បើពុំនោះទេ នេះជាទង្វើកាត់ទឹកដីខ្មែរ ទៅឱ្យវៀតណាម ដែលជា «ទង្វើក្បត់ជាតិ» ហើយដែលលោក ហ៊ុន សែន ត្រូវទទួលខុសត្រូវចំពោះមុខប្រវត្តិសាស្ត្រខ្មែរ ទៅថ្ងៃអនាគត។ លោក សួន សូរីដា ថាលោកមិនគាំទ្រ និងប្រឆាំងដាច់ខាតនូវ ការចុះហត្ថលេខា រវាងលោក ហ៊ុន សែន តំណាងឱ្យតែគណបក្សប្រជាជនកម្ពុជា និងលោក ហ្វៀន សួនហ្វ៊ុក (Nguyen Xuan Phuc) នាយករដ្ឋមន្ត្រីវៀតណាម នៅពេលនេះ។
លោក ម៉ែន ណាត ប្រធាន ក្រុមប្រឹក្សាឃ្លាំមើលកម្ពុជា នៅប្រទេសន័រវេស៍ បានហៅការចុះហត្ថលេខារបស់ «លោក ហ៊ុន សែន នៃការទទួលស្គាល់ការបោះបង្គោលព្រំដែន ជាការប្រគល់ដីខ្មែរទៅឲ្យវៀតណាម»។ លោក ម៉ែន ណាត អះអាងថា លោកនៅតែបន្តស្នើឲ្យ ដោះស្រាយបញ្ហាជម្លោះព្រំដែន ទៅតាមយន្តការអន្តរជាតិ។
សូមបញ្ជាក់ថា ការបោះបង្គោលព្រំដែន នៃប្រទេសទាំងពីរ បានចាប់ផ្តើមធ្វើឡើងតាំងពីឆ្នាំ២០០៥ មក រហូតមកដល់ពេលបច្ចុប្បន្ន។ ការបោះបង្គោលព្រំដែននេះ សម្រេចបានប្រមាណ ៨៤ ភាគរយហើយ បើទោះបីការបោះបង្គោលព្រំដែន មិនទាន់ចប់សព្វគ្រប់យ៉ាងណាក្តី កម្ពុជា និងវៀតណាម កាលពីថ្ងៃទី០៥ តុលា ២០១៩ នេះ បានព្រមព្រៀងគ្នាចុះហត្ថលេខា ទទួលស្គាល់លទ្ធផលការងារ ដែលសម្រេចបាននេះ ដែលការចុះហត្ថលេខា ទទួលស្គាល់បង្គោលព្រំដែននេះ ជាព្រឹត្តិការណ៍ប្រវត្តិសាស្ត្រថ្មីមួយទៀត សម្រាប់កម្ពុជា និងវៀតណាម៕
.