ជាមួយប្រតិកម្មថ្កោលទោសធ្ងន់ៗ ទៅលើរដ្ឋាភិបាលកម្ពុជា ពីសំណាក់សហគមន៍អន្តរជាតិនានា រួមទាំងអង្គការសហប្រជាជាតិផងនោះ ពលរដ្ឋខ្មែរនៅជុំវិញពិភពលោក ក៏បានប្រកាសធ្វើមហាបាតុកម្ម ដោយឡែកពីគ្នា នៅតាមប្រទេសរៀងៗខ្លួន ដើម្បីទាមទារឲ្យរដ្ឋាភិបាល ហ៊ុន សែន ដោះលែងលោក កឹម សុខា មេដឹកនាំគណបក្សប្រឆាំង និងជាសមាជិករដ្ឋសភា ដោយគ្មានលក្ខខណ្ឌ។ លោក កឹម សុខា ត្រូវបានចាប់ខ្លួន នៅយប់រំលងអាធ្រាត ចូលថ្ងៃទី០៣ ខែកញ្ញា ឆ្នាំ២០១៧ ដែលក្រុមអ្នកច្បាប់ឯករាជ្យ និង អ្នកឃ្លាំមើលថា ជាការចាប់ខ្លួន ដោយរំលោភនីតិវិធីរដ្ឋបាល (ខុសម៉ោងរដ្ឋបាល) និង រំលោភរដ្ឋធម្មនុញ្ញ មារតា៨០ ។
ក្នុងខ្លឹមសារបន្ថែម នៃគម្រោងមហាបាតុកម្មនោះ ក៏ទាមទាររកយុត្តិ ជូនលោក សម រង្ស៊ី, បណ្ឌិត កែម ឡី, ភិក្ខុ សំ ប៊ុនធឿន, លោក ជា វិជ្ជា, លោក ឈុត វុទ្ធី, លោក គឹម សុខ, សមាជិកសភា អ៊ុំ សំអាន, សមាជិកព្រឹទ្ធសភា ហុង សុខហួរ និង អ្នកទោសមនសិការទាំងអស់ជាង ២០ នាក់ទៀត កំពុងជាប់ឃុំឃាំង យ៉ាងអយុត្តិធម៌។ (07-9-2017, អត្ថបទដោយ ម៉ែន ណាត)
.