Update: ករណីក្រុមហ៊ុនធីង៉ាអភិវឌ្ឍ បំផ្លាញព្រៃឈើនៅខេត្តព្រះវិហារ ត្រូវបានសារព័ត៌មានជាតិ-អន្តរជាតិ ចុះផ្សាយជាញឹកញាប់ ភ្ជាប់សេចក្តីព្រួយបារម្ភរបស់ប្រជាសហគមន៍ និង ក្រុមសកម្មជនបរិស្ថាន អំពីវិនាសកម្មព្រៃឈើខ្មែរ រួចហើយអំពាវនាវយ៉ាងទទូច ឲ្យរដ្ឋាភិបាលរបស់លោក ហ៊ុន សែន ពិនិត្យឡើងវិញ នូវកិច្ចសន្យាផ្តល់ដីសម្បទានសេដ្ឋកិច្ច និងពិនិត្យមើលភាពជាក់ស្តែង ដែលក្រុមហ៊ុននេះ បានរំលោភកិច្ចសន្យា ដើម្បីចាត់ការតាមច្បាប់ ប៉ុន្តែគ្មានមន្រ្តីរដ្ឋាភិបាលណាម្នាក់ យកចិត្តទុកដាក់ចាត់ការនៅឡើយទេ មកទល់ខែ មីនា ២០២០ នេះ។
យោងតាមឯកសារជាភាសាអង់គ្លេសរបស់ ក្រុមហ៊ុនធីង៉ាអភិវឌ្ឍ ជាក្រុមហ៊ុនវៀតណាម បានទទួលការអនុញ្ញាតពីក្រសួងកសិកម្ម អភិវឌ្ឍដីសម្បទានសេដ្ឋកិច្ចរយៈពេល ៧០ ឆ្នាំ មានទំហំដី ៦០៦០ ហិកតា នៅស្រុកវាលវែង ខេត្តព្រះវិហារ។ ឈ្មោះ ឡេង រិទ្ធី (Leng Rithy) ជាជនជាតិវៀតណាម បានចុះឈ្មោះក្រុមហ៊ុននេះ នៅក្រសួងកសិកម្ម តាំងពីថ្ងៃទី ២៥ កញ្ញា ២០០៩។ ក្រុមហ៊ុននេះ មានឈ្មោះអាក្រក់ ក្នុងរកស៊ីការកាប់បំផ្លាញព្រៃឈើខ្មែរ រួចនាំយកទៅលក់នៅប្រទេសវៀតណាម ដូចក្រុមហ៊ុនរកស៊ីឈើ នៅកម្ពុជាដទៃទៀតដែរ។
ជាថ្មីម្តងទៀត របបដឹកនាំរបស់លោក ហ៊ុន សែន គប្បីសើរើកុងត្រា និងត្រួតពិនិត្យឡើងវិញ នូវសកម្មភាពធ្វើអាជីវកម្មរបស់ក្រុមហ៊ុន ធីង៉ាអភិវឌ្ឍ ភ្ជាប់ជាមួយរឿងមិនប្រក្រតីនានា ដែលពលរដ្ឋខ្មែរ នៅខេត្តព្រះវិហារ ធ្វើការចោទប្រកាន់ក្រុមហ៊ុននេះ ថាមានពាក់ព័ន្ធការបំផ្លាញព្រៃឈើនោះ។ ( Update:អត្ថបទបន្ថែមដោយ នគរ / ១៥ មីនា ២០២០)
សហគមន៍ព្រៃឡង់ ខេត្តព្រះវិហារ និងសកម្មជនបរិស្ថាន ស្នើឱ្យអាជ្ញាធរស៊ើបអង្កេតអាជីវកម្មឈើខ្នាតធំ របស់ក្រុមហ៊ុន ធីង៉ា អភិវឌ្ឍន៍
(វិទ្យុអាស៊ីសេរី RFA /ដោយអ្នកស្រី សុ ជីវី /០២ កុម្ភៈ ២០២០)
សហគមន៍ព្រៃឡង់ ខេត្តព្រះវិហារ និងសកម្មជនបរិស្ថាន ស្នើឱ្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ ពិនិត្យពីភាពមិនប្រក្រតី នៃអាជីវកម្មឈើខ្នាតធំ របស់ក្រុមហ៊ុន ធី ង៉ា អភិវឌ្ឍន៍ និងវិនិយោគ (THY NGA CO., LTD. DEVELOPMENT AND INVESTMENT) ដែលកំពុងធ្វើសកម្មភាពដឹកឈើ និងកាប់ឈើយ៉ាងគគ្រឹកគគ្រេង ជាប់តំបន់ព្រៃឡង់ ខេត្តព្រះវិហារ។ សហគមន៍ថា ក្រុមហ៊ុននេះ មានម៉ាស៊ីនអារច្រៀកឈើខ្នាតធំ ក្នុងដីសម្បទានសេដ្ឋកិច្ច និងមានរថយន្តប៉ាកុងដឹកឈើ ៧ គ្រឿង។
សហគមន៍ព្រៃឡង់ ខេត្តព្រះវិហារ និងសកម្មជនបរិស្ថាន សង្ស័យថា ក្រសួងកសិកម្ម មានចេតនាបើកដៃ ឱ្យក្រុមហ៊ុនសម្បទានសេដ្ឋកិច្ច ធីង៉ា អភិវឌ្ឍន៍ ធ្វើអាជីវកម្មឈើខ្នាតធំ នៅជាប់ព្រៃអភិរក្ស។ ពួកគេរកឃើញថា ក្រុមហ៊ុន ធីង៉ា អភិវឌ្ឍន៍ កំពុងធ្វើសកម្មភាពដឹកឈើ និងកាប់ឈើយ៉ាងគគ្រឹកគគ្រេង ផ្អែកតាមលិខិតអនុញ្ញាត ពីក្រសួងកសិកម្ម ធ្វើការឈូសឆាយ ក្នុងអនុតំបន់ ៤ និងអនុតំបន់ ៥ ទោះជាលិខិតនោះ មិនបានកំណត់ទីតាំងឈូសឆាយច្បាស់លាស់ក៏ដោយ។
ប្រជាសហគមន៍ព្រៃឡង់ ខេត្តព្រះវិហារ លោក ស្រី ថី ប្រាប់អាស៊ីសេរីនៅថ្ងៃទី ២ កុម្ភៈ ថា ក្រុមហ៊ុន ធីង៉ា អភិវឌ្ឍន៍ កំពុងធ្វើសកម្មភាពកាប់ឈើមូល មានមុខកាត់ ២ តឹកឡើងទៅ ប្រវែង ៤ ម៉ែត្រ ឋិតនៅជាប់ព្រៃឡង់ ក្នុងឃុំរៀបរយ ស្រុករវៀង ខេត្តព្រះវិហារ។ លើសពីនេះ លោកថា ក្រុមហ៊ុនបានប្រើរថយន្តកែច្នៃ ៧ គ្រឿង និងគ្រឿងចក្រមួយចំនួនទៀត ធ្វើសកម្មភាពដឹកឈើ និងកាប់ឈើ នៅចំណុចអូរឡង់ រួចដឹកចូលការដ្ឋានរបស់ក្រុមហ៊ុន ដើម្បីអារច្រៀកធ្វើអាជីវកម្ម។ លោកថា ក្រុមហ៊ុននេះ បានចាប់ផ្ដើមដំណើរការអាជីវកម្មឈើខ្នាតធំ ជាង ១ ខែមកហើយ ដែលជាហេតុ ធ្វើឱ្យសហគមន៍ព្រៃឡង់ភ័យព្រួយពីជោគវាសនាព្រៃឡង់នៅថ្ងៃអនាគត៖ «ក្រុមហ៊ុនហ្នឹងគេ ប្រមូលកាកសំណល់ចាស់ពីមុន ក៏ប៉ុន្តែមិនប្រមូលកាកសំណល់ចាស់មុនទេ កាប់ឈើសាថ្មីទៀត។ គេដាក់អាថ្មីកណ្ដាល ដាក់អាចាស់ខាងៗ គេកាប់ព្រៃដែលគេស្នើសុំពីមុនមក ក៏ប៉ុន្តែច្បាប់គេមិនទាន់មានសុក្រឹតភាពទេ ពុំទាន់មានការអនុញ្ញាតទេ គ្រាន់តែសុំបន្តិចកាប់ភ្លាមតែម្តង អត់មានពីណាឱ្យទេ។ គេប្រមូលឈើហើយ គេច្រៀករ៉ៃហើយ»។
លិខិតមួយសន្លឹក ដែលអាស៊ីសេរីទទួលបាន មានហត្ថលេខាអ្នកនាំពាក្យ ក្រសួងកសិកម្ម លោក ស្រី វុឌ្ឍី ចុះថ្ងៃទី ៣ ខែមករា ឆ្នាំ ២០២០ ជម្រាបទៅនាយកក្រុមហ៊ុន ធីង៉ា អភិវឌ្ឍន៍ បានបង្ហាញពីកម្មវត្ថុ ដែលក្រុមហ៊ុន សុំការអនុញ្ញាតឈូសឆាយ ក្នុងអនុតំបន់ ៤ និង អនុតំបន់ ៥ ដោយយោងលើរបាយការណ៍ របស់គណៈកម្មការចរចា លក់ផល អនុផលព្រៃឈើ ដែលទទួលបានពីការឈូសឆាយ ក្នុងតំបន់ដីសម្បទានសេដ្ឋកិច្ច។ លិខិតនោះ មិនបានកំណត់ទីតាំង ដែលត្រូវឈូសឆាយ ត្រឹមណាឱ្យជាក់លាក់នោះទេ។
អាស៊ីសេរី បានព្យាយាមទាក់ទង អ្នកនាំពាក្យក្រសួងកសិកម្ម លោក ស្រី វុឌ្ឍី ដើម្បីសុំការបំភ្លឺបន្ថែមបញ្ហានេះ តែទូរស័ព្ទរបស់លោក មិនអាចទាក់ទងបាននៅថ្ងៃទី២ កុម្ភៈ។ ចំណែកភាគីក្រុមហ៊ុន ក៏មិនទាន់អាចទាក់ទងបានដូចគ្នា។
មន្ត្រីតស៊ូមតិនៃ អង្គការពន្លកខ្មែរ លោក ប៉ឹក សោភ័ណ ថ្លែងថា រដ្ឋាភិបាល បានសម្រេចបញ្ជាឱ្យក្រសួងកសិកម្ម បញ្ឈប់ការចេញលិខិតអនុញ្ញាត ឱ្យនាំឈើចេញ ឬហៅថា PC ពីដីសម្បទានសេដ្ឋកិច្ចទាំងអស់ ដូច្នេះលោកថា ភាពមិនប្រក្រតីនៃអាជីវកម្មឈើនេះ អាជ្ញាធរថ្នាក់ជាតិ ឬគណៈកម្មការជាតិ គួរតែប្រញាប់ចុះស៊ើបអង្កេតជាបន្ទាន់ ដើម្បីសង្គ្រោះធនធានធម្មជាតិសល់ចុងក្រោយ៖ «វិធានការរបស់រដ្ឋាភិបាលបានដាក់យ៉ាងកំហិតសម្រាប់ការនាំឈើចេញ ឬក៏បង្ក្រាបបទល្មើសព្រៃឈើអ៊ីចឹង ប៉ុន្តែឃើញតែនៅមានក្រុមហ៊ុនមួយចំនួនហ្នឹង ដូចជា ក្រុមហ៊ុន ធីង៉ា ជាដើម បែរជាទទួលបានសិទ្ធិ មិនដឹងថា ទទួលបានសិទ្ធិពីអាជ្ញាធរកម្រិតណាទេ ទៅដឹកជញ្ជូនឈើ ហើយកាប់ឈើបន្ថែម។ បែបហ្នឹងជារឿងមួយ វាជារឿងមួយ ផ្ទុយពីគោលការណ៍ច្បាប់ ដែលរដ្ឋាភិបាលបានដាក់ចេញមក»។
អ្នកនាំពាក្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ លោក អេង ហ៊ី មិនអធិប្បាយបញ្ហានេះទេ ដោយលើកហេតុផលថា ទាក់ទិនដីសម្បទានសេដ្ឋកិច្ច ជាសមត្ថកិច្ចរបស់ ក្រសួងកសិកម្ម។ តែយ៉ាងណាលោកថា ឱ្យតែមានបទល្មើសព្រៃឈើ គណៈកម្មការជាតិ នឹងបង្ក្រាប៖ «ខ្ញុំបានជម្រាបជូនហើយ ឱ្យតែល្មើសច្បាប់ គឺយើងបង្ក្រាបហើយ តែចំពោះរបស់គេ គេចេញមកមានច្បាប់ត្រឹមត្រូវ ខ្ញុំបង្ក្រាបរបៀបម៉េច? សូមឱ្យសួរទៅក្រសួងកសិកម្ម ដែលគាត់ជា សមត្ថកិច្ចរបស់គាត់គ្រប់គ្រងខាងដីសម្បទានហ្នឹង»។
សកម្មជនបរិស្ថាន លោក ហេង ស្រស់ អះអាងថា ការអនុញ្ញាតរបស់ក្រសួងកសិកម្មឱ្យក្រុមហ៊ុននេះ ធ្វើអាជីវកម្មឈើជាប់ព្រៃឡង់ គឺជាការរួមចំណែកបំផ្លាញទំហំព្រៃឈើទ្រង់ទ្រាយធំនៅកម្ពុជាជាថ្មីទៀត។ លោកថា ក្រសួងកសិកម្មនៅតែប្រើរូបមន្តដដែលៗ ដោយឃុបឃិតជាមួយក្រុមហ៊ុន សម្បទានសេដ្ឋកិច្ច ធ្វើអាជីវកម្មឈើទ្រង់ទ្រាយធំ ព្រោះក្រុមហ៊ុន ធីង៉ា អភិវឌ្ឍន៍ មិនឃើញដាំដំណាំអ្វីនោះទេ ក្រៅតែធ្វើសកម្មភាពកាប់ឈើ និងដឹកជញ្ជូនឈើ៖ «ក្រសួងកសិកម្មគាត់ដឹងហើយ ឮហើយថា ព្រៃឈើស្រុកខ្មែរនៅសល់តែ ២០ភាគរយទេ ប៉ុន្តែក្រសួងនៅតែអនុញ្ញាតនៅតែបើកដៃឱ្យមានដីសម្បទានសេដ្ឋកិច្ច។ នៅតែបើកដៃឱ្យមានការកាប់បំផ្លាញព្រៃឈើ នៅប្រទេសកម្ពុជាដដែល ហើយចំពោះសកម្មភាពក្រុមហ៊ុននេះទៀតសោត យើងមើលទៅមិនឃើញអភិវឌ្ឍន៍អ្វីទាល់តែសោះ សម្រាប់ខ្ញុំ ដែលខ្ញុំដើរសិក្សាស្រាវជ្រាវពីមុនមក មិនដែលឃើញក្រុមហ៊ុនសម្បទានសេដ្ឋកិច្ចទាំងអស់ហ្នឹង អភិវឌ្ឍន៍អ្វីជាដុំកំភួនសោះតែម្តង»។
សកម្មជនបរិស្ថាន អះអាងថា ក្រុមហ៊ុន ធីង៉ា អភិវឌ្ឍន៍ ទទួលសិទ្ធិវិនិយោគបន្ត ពីក្រុមហ៊ុន ដួង ស្រូច គ្រុប (DOUNG SROUCH GROUP) ដែលធ្លាប់រងការចោទប្រកាន់ពីពលរដ្ឋថា ប្រមូលទិញឈើពីខាងក្រៅ បន្លំចូលបរិវេណក្រុមហ៊ុន ដើម្បីបម្លែងជាឈើស្របច្បាប់៕
.
CWCI Cambodia 