The Cambodia Daily
24-4-2022
រដ្ឋមន្ត្រីក្រសួងបរិស្ថាន អះអាងថា ក្រោមម្លប់សន្តិភាពដែលដឹកនាំដោយបក្សកាន់អំណាចសព្វថ្ងៃនេះ បានប្រែក្លាយកម្ពុជាពីប្រទេសដែលស្ថិតនៅក្នុងថ្លុកឈាម គំនរឆ្អឹង និងការបំផ្លិចបំផ្លាញ ទៅជាប្រទេសជឿនលឿនដែលអាចប្រកួតប្រជែងលើទីផ្សារក្នុងតំបន់ និងសកលលោក។
រដ្ឋមន្ត្រីក្រសួងបរិស្ថាន លោក សាយ សំអាល់ បានលើកឡើងនៅក្នុងពិធីចុះអនុស្សរណៈយោគយល់គ្នា រវាងក្រសួងបរិស្ថាន ជាមួយនឹងក្រុមហ៊ុន ស្លេមិនស៍ (Slemenss) ស្ដីពីការប្រើប្រាស់បច្ចេកវិទ្យាមួយ កាលពីថ្ងៃទី២១ ខែមេសា ឆ្នាំ២០២២ ថា បច្ចេកវិទ្យាឌីជីថលកំពុងដើរតួនាទីស្នូល សម្រាប់ប្រតិបត្តិការ និងទំនាក់ទំនងក្នុងប្រព័ន្ធសេដ្ឋកិច្ច ដែលត្រូវបានរៀបចំឡើងឲ្យមានសសរស្ដម្ភសម្រាប់កម្ពុជាយ៉ាងសំខាន់ គឺពលរដ្ឋឌីជីថល រដ្ឋាភិបាលឌីជីថល និងធុរកិច្ចឌីជីថល។
លោក សាយ សំអាល់ អះអាងថា កម្ពុជាកំពុងប្រែក្លាយពីប្រទេសមានចំណូលមធ្យមកម្រិតទាប ទៅជាប្រទេសមានចំណូលខ្ពស់នៅឆ្នាំ២០៥០ ដែលជាមោទកភាពជាតិមួយ ក្នុងការប្រែក្លាយកម្ពុជាទៅជាប្រទេសអភិវឌ្ឍន៍ ដែលមានសេដ្ឋកិច្ចរឹងមាំ សង្គមយុត្តិធម៌ត្រឹមត្រូវ និងមានពលរដ្ឋពោរពេញទៅដោយចំណេះដឹង ដែលរស់នៅតាមលក្ខណៈពលរដ្ឋជឿនលឿន ក្នុងសង្គមដែលពោរពេញទៅភាពសុខដុមរមនា។
ការអះអាងនេះ ធ្វើឡើងដើម្បីបង្ហាញពីការដឹកនាំរបស់បក្សកាន់អំណាចដែលកំពុងដឹកនាំរដ្ឋាភិបាលកម្ពុជាដោយឯកបក្សក្នុងពេលបច្ចុប្បន្ននេះ។
ទាក់ទិននឹងបញ្ហានេះ មេដឹកនាំបក្សកាន់អំណាច លោក ហ៊ុន សែន ធ្លាប់បានអះអាងថា កម្ពុជាក្រោមការដឹកនាំរបស់លោកដែលពោរពេញទៅដោយបទពិសោធន៍ និងភាពវៃឆ្លាតជាង ៤០ ឆ្នាំមកនេះ បានដឹកនាំកម្ពុជាទៅរកភាពរីកចម្រើន និងសុខសន្តិភាពពេញលេញសម្រាប់ពលរដ្ឋខ្មែរទូទាំងប្រទេស បន្ទាប់ពីកម្ពុជាបានឆ្លងកាត់នូវភ្លើងសង្គ្រាមប្រមាណជា ២ទសវត្សរ៍កន្លងមកនេះ។
ប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២២ មេសា នេះថា ការលើកឡើងរបស់លោក សាយ សំអាល់ គ្រាន់តែជាការបង្ហាញពីភាពកម្សោយ របស់រដ្ឋាភិបាលកម្ពុជាប៉ុណ្ណោះ។ ពួកគេនៅតែនាំគ្នាយកការដឹកនាំរបស់ខ្លួនសព្វថ្ងៃនេះ ទៅប្រៀបធៀបជាមួយនឹងកម្ពុជាដែលស្ថិតនៅក្នុងឆ្នាំសូន្យ ដែលជាសម័យកាលដ៏អន់ថយបំផុតរបស់កម្ពុជា នៅពេលនោះ។
លោក ម៉ែន ណាត អះអាងថា រដ្ឋាភិបាលដែលកំពុងដឹកនាំដោយលោក ហ៊ុន សែន មានលទ្ធភាពត្រឹមតែប្រកួតប្រជែងជាមួយរបបប្រល័យពូជសាសន៍តែប៉ុណ្ណោះ ប៉ុន្តែបើគេសម្លឹងមើលកម្ពុជាក្នុងពេលបច្ចុប្បន្នដែលកំពុងស្ថិតក្នុងរបបលទ្ធិប្រជាធិបតេយ្យ សេរីពហុបក្សវិញ នោះពលរដ្ឋខ្មែរអាចនឹងវាយតម្លៃបានថា កម្ពុជាក៏កំពុងស្ថិតក្នុងឆ្នាំសូន្យដូចកម្ពុជាស្ថិតក្នុងរបបប្រល័យពូជសាសន៍ដូច្នោះដែរ ត្បិតសិទ្ធិសេរីភាពមូលដ្ឋានរបស់ពលរដ្ឋត្រូវបានរឹតត្បិតស្ទើរតែដូចគ្នាស្រុង។
ប្រធានក្រុមប្រឹក្សាភិបាលនៃចលនាពលរដ្ឋរូបនេះ បញ្ជាក់ថា ការអះអាងរបស់រដ្ឋមន្ត្រីក្រសួងបរិស្ថានបែបនេះ បានបង្ហាញឱ្យឃើញដែរថា គាត់ក៏គ្មានសមត្ថភាពជាងមន្ត្រីបក្សកាន់អំណាចចាស់ៗ ដែលទើបនឹងចេញមកពីក្នុងព្រៃទាំងនោះដែរ។ ជាងនេះទៀត ក៏អាចបញ្ជាក់ពលរដ្ឋខ្មែរឱ្យឃើញយ៉ាងច្បាស់ទៀតថា ឧត្តមមន្ត្រីរបស់កម្ពុជារូបនេះ គ្មានសមត្ថភាព និងឧត្តមគតិដឹកនាំកសាងប្រទេសជាតិឱ្យរីកចម្រើន ឬអាចការពារអធិបតេយ្យភាពជាតិបាននោះទេ។
ក្រុមអ្នកសង្កេតការណ៍រិះគន់ថា ការដឹកនាំរបស់លោក ហ៊ុន សែន មានតែការជាន់ឈ្លីប្រជាធិបតេយ្យ និងការរំលោភសិទ្ធិមនុស្សប៉ុណ្ណោះ ខណៈការប្រឹងបង្អួតនូវការកសាងសមិទ្ធផលនានាដូចជា ស្ពាន ថ្នល់ ជាដើម សព្វថ្ងៃនេះ គឺជាសមិទ្ធផលក្រោមបំណុលរបស់បទេសទាំងអស់។ ជាងនេះទៀត បំណុលក៏សងគេមិនទាន់រួច សមិទ្ធផលទាំងនោះ ក៏រងនូវការខូចខាតទៅវិញគ្រប់ទីកន្លែងផងដែរ៕
.