វេទិកាពលរដ្ឋ បានចេញសេចក្តីថ្លែងការណ៍ រំឭកថ្ងៃ ៧ មករា នៃប្រវត្តិវៀតណាមឈ្លានពានកម្ពុជា និងលើកបន្តុបរបបដឹកនាំរបស់លោក ហ៊ុន សែន ឲ្យឡើងកាន់អំណាច ស្របពេលដែលបក្សកាន់អំណាច (CPP) នៃលោក ហ៊ុន សែន ប្រារព្ធទិវានេះ ដើម្បីដឹងគុណវៀតណាម។ សេចក្តីថ្លែងការណ៍នេះ ចុះហត្ថលេខាដោយលោក គឹម សុខ ផ្សព្វផ្សាយកាលពីថ្ងៃទី០៥ ខែមករា ឆ្នាំ២០២៣។ សូមទាញយក សេចក្តីថ្លែងការណ៍ (Download) ឬអានអត្ថបទខាងក្រោម។
សេចក្តីថ្លែងការណ៍
ប្រសិនបើលោក ហ៊ុន សែន ពិតជាមិនបន្តអនុវត្តផែនការឈ្លានពាន របស់វៀតណាមមកលើប្រទេសកម្ពុជា និង ក៏ដូចការអះអាងរបស់គាត់ថា កំពុងដឹកនាំកម្ពុជាឲ្យមានសន្តិភាព និងឯករាជ្យនោះ លោក ហ៊ុន សែន មិនគួរមានហេតុផលអ្វី នៅបន្តឃុំខ្លួនអ្នកទោសមនសិការទាំងឡាយ ជាប្រជាពលរដ្ឋខ្មែរ ដែលពុំមានកំហុសឡើយ ហេីយគួរតែដោះលែងពួកគាត់ ឲ្យមានសិទ្ធិសេរីភាពពេញលេញ នៅចំថ្ងៃទី៧ ខែមករា ឆ្នាំ២០២៣ នេះ។
វេទិកាពលរដ្ឋ សូមរំឭកលោក ហ៊ុន សែន ថាមេដឹកនាំជាតិ គឺជាអ្នកបម្រើប្រជាពលរដ្ឋជាតិខ្លួន មិនមែនបម្រើមហិច្ឆតាឈ្លានពានរបស់បរទេសទេ ទោះដោយហេតុផលអ្វី ឬក្រោមលក្ខខណ្ឌណាក៏ដោយ។ ប្រជាពលរដ្ឋខ្មែរទូទៅ ពិតជាចង់ឃើញលោក ហ៊ុន សែន មានការភ្ញាក់រឭកខ្ពស់នៅពេលនេះ ងាកចេញពីអន្ទាក់ផែនការឈ្លានពានរបស់វៀតណាម ហើយ វិលមកដើរលើផ្លូវផ្សះផ្សា បង្រួមបង្រួមជាតិ និង ប្រមូលកម្លាំងជាតិរួម ដើម្បីអភិវឌ្ឍផ្ដល់ប្រយោជន៍ដល់ប្រជាពលរដ្ឋខ្មែរ និង ការពារជាតិខ្មែរយើង ស្របតាមខ្លឹមសាររដ្ឋធម្មនុញ្ញឆ្នាំ១៩៩៣ និង ស្មារតីកិច្ចព្រមព្រៀងទីក្រុងប៉ារីស៍ឆ្នាំ១៩៩១។
វេទិកាពលរដ្ឋ សូមលើកទឹកចិត្តលោក ហ៊ុន សែន កែខ្លួន ក្នុងដំណាក់កាលនេះ ដើម្បីបន្សល់ឈ្មោះល្អ ក្នុងប្រវត្តិសាស្ត្រជាតិ ហើយក៏ជាកេរមរតកក្រអូប សម្រាប់ក្រុមគ្រួសារ ហ៊ុន ដែរ។
សមិទ្ធផលជ័យជន្នះនៃការឈ្លានពានរបស់វៀតណាម ថ្ងៃទី៧ ខែមករា ឆ្នាំ១៩៧៩ បន្សល់ទុកនូវការឈឺចាប់ណាស់ ដល់ប្រជាជាតិខ្មែរ តាមរយៈកិច្ចព្រមព្រៀង និង សន្ធិសញ្ញាខុសច្បាប់នានា ដែលអនុវត្តដោយរដ្ឋាភិបាលអាយ៉ងមួយ ក្រោមបញ្ជារបស់ក្រុងហាណូយ។ ឥទ្ធិពលមហិច្ឆតាឈ្លានពានរបស់វៀតណាម ធ្វើឲ្យប្រទេសកម្ពុជាប្រឈមហានិភ័យនៃការហូរចូលជនអន្តោប្រវេសន្ដវៀតណាមខុសច្បាប់លើសលប់ ការប៉ុនប៉ងត្រួតត្រាទាំងស្រុងរបស់វៀតណាមលើបណ្ដាខេត្តភាគឦសានខ្មែរ រតនគិរី មណ្ឌលគិរី ក្រចេះ ស្ទឹងត្រែង ក្រោមគម្រោងអភិវឌ្ឍន៍តំបន់ត្រីកោណ និងពេលនេះ ដល់កាលៈទេសៈ នៃចរន្តពង្រីក ភាសាវៀតណាមបែបអាណានិគម ក្នុងប្រព័ន្ធសិក្សាអប់រំជាតិខ្មែរជាដើម។
លើសពីការប្រឈមគ្រោះមហន្តរាយទៅទៀត ប្រទេសកម្ពុជាបាត់បង់ជាក់ស្ដែង នូវដែនដីគោកតាមព្រំដែន ផ្ទៃសមុទ្រជិត៧ម៉ឺនគីឡូម៉ែត្រការេ កោះត្រល់ ចង្កោមកោះក្រចកសេះ ព្រមទាំងការគ្រប់គ្រងផ្នែកសេដ្ឋកិច្ច ដែលមានសក្ដានុពលស្ទើរតែទាំងអស់របស់ប្រទេសកម្ពុជា រាប់តាំងពីធនធានធម្មជាតិ រហូតដល់តំបន់សេដ្ឋកិច្ចពិសេស ទៅក្នុងកណ្ដាប់ដៃវៀតណាម។
លោក ហ៊ុន សែន ប្រាកដជាដឹងថា វិបត្តិធ្ងន់ធ្ងរទាំងនេះ លាក់មិនជិតពីការយល់ដឹងរបស់កូនខ្មែរទូទៅនោះទេ ហើយ មានតែការភ្ញាក់រឭកផ្សះផ្សាជាតិឲ្យទាន់ពេលប៉ុណ្ណោះ ទើបអាចកែស្ថានការណ៍ជាតិ ឲ្យជាប្រយោជន៍ជាតិខ្មែរបាន។
សហរដ្ឋអាមេរិក ថ្ងៃទី៥ ខែមករា ឆ្នាំ២០២៣
គឹម សុខ (ហត្ថលេខា)
ប្រធាន វេទិកាពលរដ្ឋ
.
