ក្រោយពេលវៀតណាម សម្រេចបិទច្រកព្រំដែន ជាឯកតោភាគី ដោយគ្មានពិគ្រោះយោបល់ជាមួយភាគីកម្ពុជា នៃលោក ហ៊ុន សែន ដោយបានហាមប្រាមមិនឲ្យពលរដ្ឋខ្មែរ ចូលទៅទឹកដីវៀតណាម ជុំវិញការរីករាលដាលមេរោគកូរ៉ូណា ឬ Covid-19 ភ្លាមនោះធ្វើឲ្យរដ្ឋាភិបាលក្រុងភ្នំពេញ លោក ហ៊ុន សែន បង្ហាញការអាក់អន់ចិត្ត ហើយបញ្ជាឲ្យមានការបិទច្រកព្រំដែនកម្ពុជា មិនអនុញ្ញាតពលរដ្ឋវៀតណាម ឲ្យចូលកម្ពុជាវិញដែរ។ ប៉ុន្តែផ្នែកពាណិជ្ជកម្ម ភាគីកម្ពុជា ស្នើឲ្យអាជ្ញាធរនៃប្រទេសទាំងជួយសម្រួល ដោយមានការយោគយល់គ្នា។ នេះបើតាមលិខិតរបស់ក្រសួងការបរទេសខ្មែរ ផ្ញើទៅកាន់ស្ថានទូតវៀតណាម នៅកម្ពុជា នៅថ្ងៃទី ១៩ ខែមីនា ឆ្នាំ ២០២០ នេះ។
តាមរយៈសារជាសម្លេងរបស់លោក ហ៊ុន សែន ដែលត្រូវបានផ្សព្វផ្សាយនៅថ្ងៃទី ១៨ មីនា បានឲ្យដឹងថា កម្ពុជា សម្រេចបិទច្រកព្រំដែនកម្ពុជា-វៀតណាម ចាប់ពីម៉ោង ២៤:០០ ឈានចូលថ្ងៃទី ២០ មីនា តទៅ ក្រោមហេតុផលទប់ស្កាត់មេរោគ Covid-19។ លោក ហ៊ុន សែន និយាយក្នុងសារថា «មិនមែនការសងសឹក តបទៅវៀតណាមវិញទេ ចំពោះការបិទច្រកព្រំដែននេះ តែគឺជាការបង្ការការឆ្លងរីករាលដាល {មេរោគ Covid-19} ទៅវិញទៅមក»។
លោក ហ៊ុន សែន សម្តែងការមិនពេញចិត្ត ចំពោះវៀតណាម ដែលបិទច្រកព្រំដែន ជាឯកតោភាគី ដោយគ្មានការសួរយោបល់ មកកម្ពុជា។ ចំណែកភាគីកម្ពុជា ជារឿយៗតែងតែសួរយោបល់ ទៅ វៀតណាម មុននឹងសម្រេចអ្វីមួយ ដែលពាក់ព័ន្ធបញ្ហាការបិទ ឬបើកច្រកព្រំដែនរួមគ្នា រវាងប្រទេសទាំងពីរ។
កាលពីថ្ងៃទី ០៩ មីនា កន្លងទៅ លោក ហ៊ុន សែន បានមានប្រតិកម្មធ្ងន់ៗម្តងរួចហើយ ចំពោះកាសែតរដ្ឋ វីអិនអេ (VNA) របស់វៀតណាម ដែលចុះផ្សាយថា កម្ពុជា ជាប្រទេសឆ្លងមេរោគ Covid-19 ដ៏គ្រោះថ្នាក់ ក្នុងចំណោមប្រទេសមួយចំនួនពីអឺរ៉ុប ដែលត្រូវហាមប្រាមចូលទឹកដីវៀតណាម។ លោក ហ៊ុន សែន ហៅការចុះផ្សាយនោះ មានន័យថា «ចាត់ទុកកម្ពុជា ជាមនុស្សចម្លែក»។
កាលពីថ្ងៃទី ០៩ មីនាដដែលនោះ លោក ហ៊ុន សែន ថ្លែងបញ្ជាក់ថា វៀតណាម ត្រូវតែដោះស្រាយរឿងចុះផ្សាយរបស់កាសែតរដ្ឋ វីអិនអេ (VNA) ជាមួយកម្ពុជា ឲ្យបានច្បាស់លាស់។ លោកថា «បើមិនមានការដោះស្រាយទេ វាអាចឲ្យមានការបិទច្រកព្រំដែន រវាងប្រទេសទាំងពីរ» ។ លោក បានបញ្ជាឲ្យរដ្ឋមន្រ្តីការបរទេស លោក ប្រាក់ សុខុន «ឲ្យធ្វើកំណត់ទូតតវ៉ា ទៅវៀតណាម»។ ប៉ុន្តែក្រោយបន្តិចមក លោក ហ៊ុន សែន ថា «បានដោះស្រាយជាមួយវៀតណាម រួចរាល់»។
ក្រុមបញ្ញវន្ត និងអ្នកជំនាញនានា ដែលត្រូវបានដកស្រង់ដោយកាសែតក្នុងស្រុក បានផ្តល់យោបល់ថា ការបិទច្រកព្រំដែនកម្ពុជា និងវៀតណាម គឺស្ថិតនៅក្រោមហេតុផលនយោបាយច្រើន ជាជាងករណីមេរោគ Covid-19 ហើយថា កម្ពុជា នឹងខាតបង់សេដ្ឋកិច្ច ច្រើនជាងវៀតណាម។ ករណីបិទច្រកព្រំដែននេះ មានទំនាក់ទំនងទៅនឹងសេណារីយ៉ូមួយចំនួន រវាងកម្ពុជា វៀតណាម និង ចិន ខណៈពេលរដ្ឋបាលលោក ហ៊ុន សែន ដែលពឹងផ្អែកទៅលើរដ្ឋាភិបាល នៃទីក្រុងប៉េកាំង សឹងតែទាំងស្រុង៕
(អត្ថបទដោយលោក ម៉ែន ណាត នៃ ក្រុមប្រឹក្សាឃ្លាំមើលម្ពុជា)
.
.