អត្ថបទ CWCI Cambodia /10 th-7-2020

ចលនានិស្សិតដើម្បីលទ្ធិប្រជាធិបតេយ្យ  នៅថ្ងៃទី០៩ កក្កដា ២០២០ បានចេញ​​សេចក្តី​បំភ្លឺ ទៅ​​កាន់​លោក ជិន ម៉ាលីន អ្នកនាំពាក្យ​ក្រសួង​យុត្តិធម៌ ដែល​​ចាទប្រកាន់​​សេចក្តីថ្លែងការណ៍​​​របស់​​​ចលនា​​និស្សិត​ ​ជុំវិញ​ការជំរុញ​​ឱ្យ​រដ្ឋាភិបាល​ ស្វែង​​រក​យុត្តិធម៌​​ដល់​​លោក​ប​ណ្ឌិត កែម ឡី និង​​ឃាតកម្ម​ធំៗ​​ផ្សេង​ទៀត​​ថា «មាន​ចេតនា​​វាយ​ប្រហារ​​រដ្ឋាភិបាល បម្រើ​​ផលប្រយោជន៍​​ឱ្យ​​ក្រុម​​ប្រឆាំង»សូមទាញយក (Download) ឬ​អាន​សេចក្តីបំភ្លឺ ទាំងស្រុង​ដូច​តទៅ៖

សេចក្តីបំភ្លឺ
ចំពោះ​លោក ជិន ម៉ាលីន អ្នកនាំពាក្យ​​ក្រសួង​​យុត្តិធម៌

យើងខ្ញុំ សូមបំភ្លឺលោក ជិន ម៉ាលីន ថា «​សេចក្តីថ្លែងការណ៍​ របស់​ចលនានិស្សិត​ដើម្បី​លទ្ធិ​ប្រជា​ធិបតេយ្យ ​ស្តីពី «ខួប​៤​ឆ្នាំនៃ​ឃាតកម្ម​លោកបណ្ឌិត កែម ទ្បី» គឺ«ធ្វើការ​ទាមទា​រ​ឲ្យតុលាការ​​កម្ពុជា ​បង្ហាញ​​របាយការណ៍​ស៊ើបអង្កេត របស់​​ខ្លួន​​ឲ្យ​​ច្បាស់​លាស់ និង​ជាសាធារណៈ ​ទៅ​តាម​​អង្គហេតុ​​នៃព្រឹត្តិការណ៍​​​ធ្វើឃាត​សម្លាប់​លោកបណ្ឌិត កែម ឡី​ ដើម្បី​ជម្រះ​មន្ទិល​សង្ស័យ ពី​មជ្ឈដ្ឋាន​ជាតិ និង​អន្តរជាតិ ដែល​ចោទ​ប្រកាន់​អំពី​ការពាក់ព័ន្ធ​របស់​មន្រ្តី​ជាន់ខ្ពស់​ក្នុង​ជួរអាជ្ញាធរ​រដ្ឋាភិបាល»។ ខ្លឹមសារ​របស់​យើងខ្ញុំ គឺចង់​ឃើញ​យុត្តិធម៌​ពិតប្រាកដ សម្រាប់​ជនរងគ្រោះ​ខ្មែរ​ទូទៅ និង​ពុំមែន​ធ្វើ​អាជីវកម្ម​នយោបាយ​បម្រើ​ភាគី​ណាទេ។ មូលហេតុ ដែលយើងខ្ញុំ​ស្នើ​ទៅតុលាការកម្ពុជា​ ឲ្យ​ចាត់​ការ​រក​យុត្តិធម៌ និងពុំ​បាន​សំណូមពរ​ទៅកាន់​គណបក្ស​នយោបាយ​ណាមួយ ជាពិសេសនោះ គឺដោយសារ​យើងខ្ញុំ​សិក្សាច្បាស់​ថា​ សំណុំ​រឿង​ឃាតកម្ម​លើលោកបណ្ឌិត កែម ឡី និង​ជនរងគ្រោះ​ដទៃ​ទៀត ស្ថិត​ក្នុង​ចំណាត់ការ​តុលាការ និងក៏ជា​កាតព្វកិច្ច​តុលាការ ជា​ស្ថាប័ន​កំពូល​របស់ជាតិ ដែល​ត្រូវ​ធានា​យុត្តិធម៌​ស្មើមុខ​គ្នា​ សម្រាប់ជនរងគ្រោះ​គ្រប់រូប។ 

ការចោទប្រកាន់​មកលើ ចលនានិស្សិត​ដើម្បីលទ្ធិ​ប្រជាធិបតេយ្យ ដោយ​លោក ជិន ម៉ាលីន អ្នក​នាំ​ពាក្យ​នៃ ក្រសួង​យុត្តិធម៌ ស្រង់​សម្ដី​ផ្សាយ​ដោយស្ថាប័ន​​​ព័ត៌​មាន​​វីអូឌី (VOD) ថ្ងៃទី៧ ខែកក្កដា ឆ្នាំ​២០២០ ​ដែល​ថា «សេចក្តី​ថ្លែងការណ៍ ​នោះ ​មាន​ចេតនា​​វាយ​ប្រហារ​រ​ដ្ឋា​ភិបាល​ បម្រើ​ផលប្រយោជន៍​ឱ្យ​ក្រុម​ប្រឆាំង ​មិន​​ឆ្លុះបញ្ចាំង​​ពី​ការ​ខំប្រឹង​​ប្រែង​​របស់​​ស្ថាប័ន​​ពាក់ព័ន្ធ ​ទេ» បែប​នេះ គឺផ្ទុយ​ទាំងស្រុង​ពីមូលដ្ឋាន​ខ្លឹមសារ​នៃ​សេចក្ដីថ្លែងការណ៍​របស់​ចលនានិស្សិត ហើយ​ទាំង​ពុំយល់​ច្បាស់​អំពីការងារ បច្ចេកទេស​ឯករាជ្យ​របស់យើងខ្ញុំ និង​ឆ្លុះបញ្ចាំង​ពីការឆ្លើយ​ដោះសា​របស់​លោក ជិន ម៉ាលីនការអត្ថាធិប្បាយ​របស់លោក ជិន ម៉ាលីន ត្រង់ថា «ក្រសួង​យល់ថា សេចក្តី​ថ្លែងការណ៍​ហ្នឹង ​ជា​អាជីវកម្ម​នយោបាយ សម្រាប់​​ក្រសួង​​គេ​បំពេញ​ភារកិច្ច​​ទៅ​តាមនីតិវិធី​ច្បាប់​ ដែល​​មាន​​ជាធរមាន​​រួចអស់ហើយ» កាន់​តែ​បង្ហាញ​ឲ្យឃើញ​ថា ក្រសួង​យុត្តិធម៌ និង​តុលាការ​ នៅ​តែ​បិទភ្នែក​បន្តធ្វើគ ធ្វើថ្លង់ ចំពោះ​ការស្រែក​ទ្រហោយំ​របស់​ប្រជាពលរដ្ឋ​​ខ្មែរ​​រងគ្រោះធ្ងន់​ធ្ងរ​ជាច្រើន ដែល​ទាំងមជ្ឈដ្ឋាន​ជាតិ និង​អន្តរជាតិ ដឹង​ជាទូទៅ​ថា មិន​ទាន់​ទទួល​បាន​យុត្តិធម៌​នៅ​ឡើយ។

លោក ជិន ម៉ាលីន កំពុង​ព្យាយាម​បង្វែង​ការពិត លើកទឹកចិត្ត​ឲ្យតុលាការ​ មិន​បំពេញ​កាតព្វកិច្ច តាម​គោលការណ៍​ច្បាប់ ហើយ​ដូច្នេះ គឺជា​ការមើលងាយ​ទឹកភ្នែក​ដ៏ឈឺចាប់​នៃ​សាច់ញាតិ​ជនរងគ្រោះ​ខ្មែរ​គ្រប់ក្រុម​គ្រួសារ និង​ការឈឺ​ឆ្អាល​របស់​យើងខ្ញុំ។ ដើម្បីអាចបំពេញ​តួនាទីខ្លួន​ឲ្យបាន​ត្រឹមត្រូវ និង​ប្រសិទ្ធ ក្នុងវិស័យ​យុត្តិធម៌​នៅកម្ពុជា រដ្ឋាភិបាល និង​តុលាការ ត្រូវ​ចេះ​ស្ដាប់​សម្លេង របស់​ពលរដ្ឋ​រងគ្រោះ អ្នកស្រាវ​ជ្រាវ​​គ្រប់​មជ្ឈដ្ឋាន និង​របាយការណ៍​ពីអង្គការ​ជំនាញជាតិ និង​អន្តរជាតិ​ ហើយ​កុំយក​រឿង​យុត្តិធម៌ ផ្លូវ​ច្បាប់ ទៅ​កកូរ​ឲ្យច្របល់​នឹង​ករណី​នយោបាយ។  

របាយការណ៍របស់​គម្រោងយុត្តិធម៌​ពិភពលោក (World Justice Project) ស្តីពី​នីតិរដ្ឋ​នៅ​កម្ពុជា ឆ្នាំ​២០២០ បាន​ផ្តល់ ​ពិន្ទុ​ឲ្យ​កម្ពុជា​ ជាប់​លេខ​ទី១៥ នៃ​ ១៥​ប្រទេស ក្នុងតំបន់​អាសុីប៉ាសុីហ្វិក​ខាង​កើត និងលេខទី ១២៧ ក្នុង​ចំណោម ១២៨ ប្រទេស នៅ​ជុំវិញ​ពិភព​លោក។ របាយការណ៍នេះ​ បាន​រកឃើញថា ការជ្រៀត​ជ្រែក​ពី​អ្នកមាន​អំណាច​ក្នុង​ជួរ​រដ្ឋាភិបាល, អំពើ​ពុករលួយ, តម្លាភាព​នៃ​អភិបាលកិច្ច, សិទ្ធិ​ជាមូលដ្ឋាន, សន្តិសុខ​សណ្តាប់​​ធ្នាប់, ការអនុវត្ត​ច្បាប់, យុត្តិធម៌​រដ្ឋប្បវេណី និង​យុត្តិធម៌​ព្រហ្មទណ្ឌ គឺ​ជា​ប្ញសគល់​ដែល​​ធ្វើឲ្យ​នីតិរដ្ឋ​នៅ​កម្ពុជា ទទួល​បាន​ពិន្ទុអាក្រក់​បំផុត ទាំង​នៅក្នុង​តំបន់ និង​ពិភព​លោក។ 

ទាំងអស់នេះ គឺជាមេរៀន ដែលស្ថាប័នយុត្តិធម៌កម្ពុជា ត្រូវប្រើ​ជាមូលដ្ឋាន ដើម្បី​ធ្វើការឆ្លុះ​បញ្ចាំង​លទ្ធផល​ការងារ ​ខ្វះស្ដង់ដា​យុត្តិធម៌​ត្រឹម​ត្រូវ​របស់​ខ្លួន។ ចលនានិស្សិត​ដើម្បីលទ្ធិប្រជាធិបតេយ្យ សូមបញ្ជាក់​​ជាថ្មី​ថា ការទាមទារ​ឲ្យតុលាការ​​ បង្ហាញ​អង្គចងចាំ​នៃ​ប្រព័ន្ធ​កាមេរ៉ាសុវត្ថិភាព​ ពាក់ព័ន្ធ​នឹងឃាតកម្ម​លោក​បណ្ឌិត កែម ឡី ពុំមាន​មូលហេតុ​នយោបាយ ដូចការ​ចោទប្រកាន់​របស់​លោក ជិន ម៉ាលីន ទេ ប៉ុន្តែ​ជាការស្វែង​រកយុត្តិធម៌​ជូន​ជនរងគ្រោះ ការលើក​កម្ពស់​នីតិរដ្ឋ ការស្តារ​មុខមាត់ ប្រព័ន្ធ​យុត្តិធម៌ និង​កិត្តិយស​រដ្ឋាភិបាល​កម្ពុជា​។

ប្រធានប្រតិបត្តិ
(ហត្ថលេខា)
ទូច វិបុល

អត្ថបទទាក់ទង
– ចលនានិស្សិត ទាមទារយុត្តិធម៌​ជូន​​ជន​​រង​​គ្រោះ​ ក្នុង​​ខួប​​៤​​ឆ្នាំ​​​នៃ​​​ឃាតកម្ម​​​បណ្ឌិត កែម ឡី

.