The Cambodia Daily
03rd-5-2022
បញ្ញវន្តខ្មែរនៅក្រៅស្រុក ប្រឆាំងដាច់អហង្ការចំពោះការបោះឆ្នោតក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ខាងមុខនេះ ព្រោះជាការបោះឆ្នោតមួយ ដែលរៀបចំឡើងដោយគណបក្សកាន់អំណាច ដែលធ្វើឲ្យគ្មានយុត្តិធម៌ និងគ្មានតម្លាភាព។
អ្នកវិភាគនយោបាយសង្គម និងជាអនុប្រធានក្រុមប្រឹក្សាភិបាលនៃ ចលនាពលរដ្ឋដើម្បីប្រជាធិបតេយ្យ លោក គឹម សុខ បានសរសេរលើគណនីហ្វេសប៊ុក របស់លោកកាលពីថ្ងៃទី០១ ឧសភា ថា ការបោះឆ្នោតដែលគ្មានយុត្តិធម៌ និងគ្មានតម្លាភាព គ្រាន់តែជាការរៀបចំនូវផែនការមួយ ដើម្បីបោកប្រាស់ពលរដ្ឋខ្មែរម្ចាស់ប្រទេស ឱ្យចូលរួមក្នុងល្បិចកល របស់មេដឹកនាំបក្សកាន់អំណាចប៉ុណ្ណោះ។
លោក គឹម សុខ អះអាងថា ការចូលរួមនូវការបោះឆ្នោត ដែលរំលោភបំពានរដ្ឋធម្មនុញ្ញបែបនេះ គឺជាការជួយលើកតម្កើងនូវសភាវៈអាក្រក់ ដើម្បីសម្លាប់ប្រជាធិបតេយ្យ នៅកម្ពុជាយ៉ាងធ្ងន់ធ្ងរ។ ទង្វើបែបនេះ ក៏ជាអំពើទុច្ចរិតនយោបាយមួយ ដែលពលរដ្ឋខ្មែរម្ចាស់ឆ្នោត ត្រូវតែចូលរួមថ្កោលទោស លើទង្វើអ្នកនយោបាយទាំងនោះ។
ការអះអាងនេះ ធ្វើឡើងស្របពេលដែលដំណើរការនៃការបោះឆ្នោត អាណត្តិទី៥ នៅកម្ពុជា កាន់តែខិតជិតមកដល់នៅដើមខែមិថុនា ឆ្នាំ២០២២ ខាងមុខនេះ។
កាលពីថ្ងៃទី០១ ខែមីនា ឆ្នាំ២០២១ ប្រមុខរដ្ឋាភិបាលកម្ពុជា បានចេញសេចក្តីសម្រេចស្ដីពីការកំណត់កាលបរិច្ឆេទនៃ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដោយកំណត់យកថ្ងៃទី ០៥ ខែមិថុនា ឆ្នាំ២០២២ ជាកំណត់។ ប៉ុន្តែការបោះឆ្នោតនេះ ត្រូវគេមើលឃើញថា គ្រាន់តែជាដំណើរការបង្គ្រប់កិច្ច ឱ្យបក្សកាន់អំណាច ដើម្បីឱ្យពួកគេអាចបន្តការដឹកនាំ នូវអាណត្តិថ្មីទាំងបំពានច្បាប់ប៉ុណ្ណោះ។
ចំណែកប្រធានក្រុមប្រឹក្សាភិបាលនៃ ចលនាពលរដ្ឋដើម្បីប្រជាធិបតេយ្យ លោក ម៉ែន ណាត បានអះអាងកាលពីថ្ងៃម្សិលមិញ (ថ្ងៃទី១ ឧសភា) ថា បើពិនិត្យលើប្រព័ន្ធច្បាប់បោះឆ្នោត ពិនិត្យលើច្បាប់ស្ដីពីគណបក្សនយោបាយ ពិនិត្យលើសមាសភាពអាជ្ញាធរជាតិរៀបចំការបោះឆ្នោត ដែលហៅកាត់ថា គ.ជ.ប និងប្រព័ន្ធដឹកនាំរបស់រដ្ឋាភិបាលកម្ពុជាបច្ចុប្បន្ន ស្របពេលដែលកម្ពុជា កំពុងតែជួបវិបត្តិនយោបាយផងនោះ គេអាចវាយតម្លៃបានថា ដំណើរការនៃការបោះឆ្នោតខាងមុខនេះ ត្រូវបានចាត់ចែងដោយគណបក្សកាន់អំណាចគ្រប់បែបយ៉ាងទាំងអស់។
លោក ម៉ែន ណាត អះអាងថា បើក្រឡេកទៅមើលយន្តការបោះឆ្នោត ដូចជាការបែងចែកអាសនៈ និងដកហូតអាសនៈគណបក្សសង្គ្រោះជាតិ កាលពីឆ្នាំ២០១៧ ដោយការរំលាយបក្សប្រឆាំងដ៏ធំនោះ គណបក្សដែលចូលរួមការបោះឆ្នោតទាំងអស់ គួរតែរៀនសូត្រពីប្រវត្តិដ៏អាក្រក់ របស់បក្សកាន់អំណាចឡើងវិញ ដើម្បីកុំឱ្យខ្លួនដើរជាន់ដានចាស់ ដែលគណបក្សកាន់អំណាច ធ្លាប់បានធ្វើលើគណបក្សប្រឆាំង កាលពីអតីតកាលនោះ។
ក្រុមអ្នកសង្កេតការណ៍ ធ្លាប់បានលើកឡើងជុំវិញការបោះឆ្នោតនេះដែរថា ដើម្បីធានាឯករាជភាព នូវដំណើរការនៃការបោះឆ្នោតទៅបាន លុះត្រាតែរៀបចំ គ.ជ.ប ឱ្យជាស្ថាប័នអព្យាក្រឹតពេញលេញជាមុនសិន ក្នុងនោះគឺមានសមាសភាពប្រធាន អគ្គលេខាធិការ និងអគ្គលេខាធិការរងរបស់ គ.ជ.ប ត្រូវតែតែងតាំងដោយព្រះមហាក្សត្រជាដាច់ខាត។ លើសពីនេះ អនុប្រធាន គ.ជ.ប ត្រូវជ្រើសតាំងដោយព្រឹទ្ធសភា ហើយរដ្ឋសភាមានសិទ្ធិជ្រើសតាំងសមាជិក គ.ជ.ប ១ រូប និងសមាជិក ១ រូបផ្សេងទៀត ត្រូវជ្រើសតាំងដោយរដ្ឋាភិបាល។
យ៉ាងណាក៏ដោយ បច្ចុប្បន្ននេះ សមាសភាពទាំង ៩ រូបរបស់គណៈកម្មាធិការជាតិរៀបចំការបោះឆ្នោត សុទ្ធសឹងតែមកពីគណបក្សកាន់អំណាចទាំងអស់ ក្នុងនោះរួមមាន លោក ប្រាជ្ញ ចន្ទ ជាប្រធាន លោក នុត សុខុម ជាអនុប្រធាន និង លោក ហង្ស ពុទ្ធា ជាសមាជិក ជាដើម ដែលផ្ទុយទាំងស្រុងពីខ្លឹមសាររបស់រដ្ឋធម្មនុញ្ញ ដែលបានចែងពីសមាសភាពរបស់គណៈកម្មាធិការនេះ៕