អត្ថបទ The Cambodia Daily / 10th-12-2020
មន្ត្រីជាន់ខ្ពស់នៃក្រុមប្រឹក្សាឃ្លាំមើលកម្ពុជា បានថ្កោលទោស អតីតសមាជិកសភា នៃគណបក្សសង្គ្រោះជាតិមួយរូប គឺលោក ឡុង រី ភាគីលោក សម រង្ស៊ី ដែលបានប្រដូចពលរដ្ឋខ្មែរមិនគាំទ្រក្រុមខ្លួន ទៅនឹងសត្វ ថា ជាការប្រមាថយ៉ាងធ្ងន់ធ្ងរក្នុងនាមមនុស្សជាតិដូចគ្នា។
ប្រធានក្រុមប្រឹក្សាឃ្លាំមើលកម្ពុជា និងជាប្រធានក្រុមប្រឹក្សាភិបាលនៃ ចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត ទាមទារឲ្យមន្ត្រីជាន់ខ្ពស់អតីតបក្សប្រឆាំង លោក ឡុង រី សុំទោសជាសាធារណៈ នូវកំហុសឆ្គងរបស់ខ្លួន ដែលបានប្រមាថអ្នកមិនគាំទ្រសេណារីយ៉ូរបស់លោក សម រង្ស៊ី ថាជា សត្វ ដើម្បីបង្ហាញពីការទទួលខុសត្រូវក្នុងនាមជាអ្នកនយោបាយ។
លោក {ម៉ែន ណាត} ជុំរុញឲ្យ លោក សម រង្ស៊ី អតីតប្រធានគណបក្សសង្គ្រោះជាតិ គប្បីណែនាំមន្ត្រីរបស់ខ្លួន ឲ្យគោរពក្រមសីលធម៌វិជ្ជាជីវៈ រក្សាសេចក្តីថ្លៃថ្នូរ និងត្រូវចាត់វិធានការ លើក្រុមសកម្មជនរបស់ខ្លួនណា ដែលតែងតែលាបពណ៌ ជេរប្រមាថ និងប្រើពាក្យអសីលធម៌ ទៅកាន់អ្នកដទៃ ដែលមិនគាំទ្រក្រុមខ្លួនកន្លងមកទៀតផង។
ការរិះគន់នេះ ធ្វើឡើងបន្ទាប់ពីអតីតសមាជិកសភាគណបក្សប្រឆាំង លោក ឡុង រី បានបង្ហោះសារលើគណនីហ្វេសប៊ុករបស់លោក ដែលបានប្រដូចពលរដ្ឋខ្មែរទៅនឹង សត្វធាតុ កាលពីដើម ខែធ្នូ ឆ្នាំ២០២០ នេះ។
មន្ត្រីជាន់ខ្ពស់អតីតគណបក្សសង្គ្រោះជាតិ លោក ឡុង រី កាលពីថ្ងៃទី០៤ ខែធ្នូ បានបង្ហោះសារលើបណ្តាញសង្គមថា «បើមានសត្វខ្លះចង់រស់ក្នុងឋានៈជាសត្វមួយជីវិតនោះ គឺជារឿងរបស់គេ ប៉ុន្តែបើយើងជាមនុស្ស និងជាកូនខ្មែរ យើងត្រូវតែរួបរួមកម្លាំងគ្នាដើម្បីស្ដារប្រទេសកម្ពុជាឡើងវិញ»។
កាលើកឡើងនេះ បន្ទាប់ពីមានការប្រកាសធ្វើមាតុភូមិនិវត្តន៍របស់អនុប្រធានអតីតគណបក្សសង្គ្រោះជាតិ អ្នកស្រី មួរ សុខហួរ កាលពីថ្ងៃទី០១ ខែធ្នូ ឆ្នាំ២០២០ កន្លងទៅ ដើម្បីរកការផ្សះផ្សាជាតិ ដែលរងការរិះគន់ពីមជ្ឈដ្ឋាននានាយ៉ាងធ្ងន់ធ្ងរ។
ក្រុមអ្នកឃ្លាំមើល ទាមទារឲ្យលោក សម រង្ស៊ី ដឹកនាំយុទ្ធនាការនេះដោយផ្ទាល់ជំនួសវិញ ប្រសិនបើ មានផែនការរកការផ្សះផ្សាជាតិនេះ មិនបានប្រគល់ឲ្យលោក កឹម សុខា ជាអ្នកដឹកនាំទេនោះ។ {ថ្វីត្បិតលោក កឹម សុខា មិនទាន់មានសេរីភាពពេញលេញ ប៉ុន្តែលោក គឺជាប្រធានគណបក្សប្រឆាំងនេះ ដែលកំពុងស្ថិតនៅក្នុងប្រទេសកម្ពុជា}។
ពាក់ព័ន្ធនឹងការធ្វើមាតុភូមិនិវត្តន៍នេះ កាលពីថ្ងៃទី ៩ ខែវិច្ឆិកា ឆ្នាំ២០១៩ លោក សម រង្ស៊ី បានប្រកាសធ្វើមាតុភូមិនិវត្តន៍ម្តងរួចមកហើយ ដោយអំពាវនាវឲ្យមន្ត្រីរាជការស៊ីវិល មន្ត្រីយោធា កងកម្លាំងប្រដាប់អាវុធ និងប្រជាពលរដ្ឋខ្មែរ ជាពិសេសសមាជិក និងអ្នកគាំទ្រគណបក្សសង្គ្រោះជាតិ ចូលរួមផ្តួលរំលំរដ្ឋាភិបាលកម្ពុជា ជាមួយរូបលោក ដើម្បីយកអំណាចជូនប្រជាពលរដ្ឋខ្មែរវិញ។ ជាងនេះទៀត លោក សម រង្ស៊ី បានរិះគន់ថា លោកមិនរំពឹងទៅលើស្ថាប័នណាមួយឡើយ ដើម្បីធ្វើការផ្លាស់ប្តូររដ្ឋាភិបាលលោក ហ៊ុន សែន គឺលោករំពឹងតែអ្នកចូលរួមក្នុងព្រឹត្តការណ៍ ៩ វិច្ឆិកា របស់លោកប៉ុណ្ណោះ។
យ៉ាងណាក៏ដោយ លោក មុត ចន្ថា មន្ត្រីជាន់ខ្ពស់ អតីតគណបក្សសង្គ្រោះជាតិ បានប្រាប់សារព័ត៌មាន The Cambodia Daily នៅថ្ងៃនេះថា ពិតជាហួសហេតុណាស់ដែលអ្នកនយោបាយ ប្រមាថពលរដ្ឋខ្មែរទៅនឹងសត្វ បែបនេះ។ លោកថា ការលើកឡើងនេះ បង្ហាញឲ្យឃើញថា មន្ត្រីបក្សប្រឆាំងរូបនេះ ជាអ្នកនយោបាយដែលខ្វះចំណេះដឹង និងគ្មានសតិសម្បជញ្ញៈ ទៀតផង។
ចំណែក បណ្ឌិត ឡៅ ម៉ុងហៃ បានប្រតិកម្មថា ពួកគេគួរតែចំណាយកម្លាំងកាយ កម្លាំងបញ្ញា និងពេលវេលា រកគំនិតថ្មី យុទ្ធសាស្ត្រថ្មី ដើម្បីដោះស្រាយវិបត្តិនយោបាយ ដែលបានកើតមាននៅកម្ពុជាសព្វថ្ងៃនេះ ទើបជាការប្រសើរ៕
.
.