ក្រុមប្រឹក្សាឃ្លាំមើលកម្ពុជា ដែលមានមូលដ្ឋាននៅប្រទេសន័រវេស៍ បានចេញសេចក្តីថ្លែងការណ៍ ថ្កោលទោសរដ្ឋាភិបាលលោក ហ៊ុន សែន ដែលចាប់ឃាត់ខ្លួនលោក សួង សុភ័ណ្ឌ ប្រធានគណបក្សខ្មែរឈ្នះ នៅថ្ងៃទី១៤ ខែសីហា ឆ្នាំ២០២០ ក្រោមបទចោទប្រកាន់ «ប្រព្រឹត្តបទល្មើសជាក់ស្តែងបង្កអសន្តិសុខសង្គមលើបញ្ហាព្រំដែន» ដូចការចោទប្រកាន់ទៅលើលោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជាដែរ។ សេចក្តីថ្លែងការណ៍នេះ ចុះហត្ថលេខាដោយលោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា ក៏បានថ្កោលទោសផងដែរ ចំពោះអាជ្ញាធររដ្ឋាភិបាល ដែលចាប់ឃាត់ខ្លួនសមាជិកក្រុមខ្មែរថាវរៈ កាលពីថ្ងៃទី១៣ ខែសីហា ដែលរួមមានយុវតី ឈឿន ដារ៉ាវី លោក ហ៊ុន វណ្ណៈ យុវតី ថា ឡាវី យុវតី ជា គន្ធីន លោក យ៉ង សៀងហៃ និងលោក ស្វាយ សំណាង។ សូមទាញយក សេចក្តីថ្លែងការណ៍ (Download)។
មកទាល់ល្ងាចថ្ងៃទី១៤ ខែសីហា ដដែលនេះ យុវជន ៤ នាក់ត្រូវបានអាជ្ញាធរភ្នំពេញ ដោះលែងឲ្យមានសេរីភាពវិញហើយ បន្ទាប់ពីពួកគេបំពេញលក្ខខណ្ឌមួយចំនួន។ យុវជនទាំង ៤ នាក់នោះ រួមមានយុវតី ថា ឡាវី យុវតី ជា គន្ធីន លោក យ៉ង សៀងហៃ និងលោក ស្វាយ សំណាង។ នេះបើតាមការចុះផ្សាយព័ត៌មានចុងក្រោយរបស់គេហទំព័រវីអូឌី (VOD) នៅវេលាម៉ោង ៧ៈ៣៦ នាទីល្ងាចថ្ងៃទី១៤ សីហា។
ដោយឡែក លោក សួង សុភ័ណ្ឌ លោក ហ៊ុន វណ្ណៈ និងយុវតី ឈឿន ដារ៉ាវី ត្រូវបានអាជ្ញាធរបន្តឃុំខ្លួន និងបញ្ជូនសំណុំរឿងទៅកាន់តុលាការក្រុងភ្នំពេញ។
(បញ្ចូលអត្ថបទ និងព័ត៌មានបន្ថែមដោយ នគរ)
ខាងក្រោមនេះ គឺជាខ្លឹមសារទាំងស្រុងនៃសេចក្តីថ្លែងការណ៍របស់ ក្រុមប្រឹក្សាឃ្លាំមើលកម្ពុជា៖
សេចក្តីថ្លែងការណ៍
រដ្ឋាភិបាលកម្ពុជា ដោះលែងសកម្មជនសេរីភាពទាំងអស់ជាបន្ទាន់
ក្រុមប្រឹក្សាឃ្លាំមើលកម្ពុជា សូមថ្កោលទោសយ៉ាងដាច់អហង្កា ចំពោះអាជ្ញាធររដ្ឋាភិបាលកម្ពុជា ដែលចាប់ឃាត់ខ្លួន សមាជិកក្រុមយុវជនខ្មែរថាវរៈជាបន្តបន្ទាប់ នៅថ្ងៃទី១៣ ខែសីហា ឆ្នាំ២០២០ រួមមានយុវតី ឈឿន ដារ៉ាវី, លោក ហ៊ុន វណ្ណៈ, លោក យ៉ង សៀងហៃ, យុវតី ថា ឡាវី, យុវតី ជា គន្ធីន និងលោក ស្វាយ សំណាង ហើយនៅថ្ងៃទី១៤ ខែសីហា លោក សួង សុភ័ណ្ឌ ប្រធានគណបក្សខ្មែរឈ្នះ ក៏ត្រូវបានចាប់ឃាត់ខ្លួនផងដែរ ខណៈពេលពួកគាត់ធ្វើយុទ្ធនាការរួមគ្នា នៅទីក្រុងភ្នំពេញ ដើម្បីទាមទារយុត្តិធម៌ជូន លោក រ៉ុង ឈុន ប្រធានសហភាពសហជីពកម្ពុជា និងជាតំណាងក្រុមប្រឹក្សាឃ្លាំមើលកម្ពុជា ក្នុងរយៈពេល ២សប្តាហ៍មកនេះ។ ករណីការចាប់ឃាត់ខ្លួនក្រុមសកម្មជនទាំងនេះ គឺជាការរំលោភយ៉ាងធ្ងន់ធ្ងរ ទៅលើរដ្ឋធម្មនុញ្ញកម្ពុជា ត្រង់កថាខណ្ឌទី១ នៃមាត្រា៣៥ និងកថាខណ្ឌទី១ នៃមាត្រា៤១ ព្រមទាំងរំលោភលើមាត្រា១៩ នៃសេចក្តីប្រកាសជាសកល ស្តីពីសិទ្ធិមនុស្ស។
រដ្ឋាភិបាលកម្ពុជារបស់លោក ហ៊ុន សែន កំពុងរុញច្រានស្ថានការប្រទេសកម្ពុជា ឲ្យបន្តធ្លាក់ក្នុងវិបត្តិធ្ងន់ធ្ងរ នៃការអនុវត្តអំណាចផ្តាច់ការ ដែលប្រាសចាកពីខ្លឹមសាររដ្ឋធម្មនុញ្ញ ឆ្នាំ១៩៩៣ និងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១។ ទង្វើរបស់រដ្ឋាភិបាលលោក ហ៊ុន សែន គឺជាការរំលោភសិទ្ធិមនុស្ស លទ្ធិប្រជាធិបតេយ្យ និងបំបិទសិទ្ធិបញ្ចេញមតិរបស់ពលរដ្ឋ ដែលអនុវត្តសិទ្ធិសេរីភាពរបស់ខ្លួន ក្នុងការទាមទារយុត្តិធម៌សង្គម ការគោរពសិទ្ធិមនុស្ស សិទ្ធិដីធ្លី និងទាមទារឲ្យមានតម្លាភាពក្នុងការដោះស្រាយបញ្ហាព្រំដែន ជាមួយប្រទេសវៀតណាម។
ក្រុមប្រឹក្សាឃ្លាំមើលកម្ពុជា សូមអំពាវដល់រដ្ឋាភិបាល និងតុលាការកម្ពុជា ត្រូវដោះលែងក្រុមសកម្មជនទាំងអស់ ជាបន្ទាន់ និងដោយគ្មានលក្ខខណ្ឌ ដើម្បីរួមចំណែកលើកកម្ពស់សិទ្ធិមនុស្ស សិទ្ធិបញ្ចេញមតិ សិទ្ធិជួបប្រជុំជាសាធារណៈរបស់ពលរដ្ឋឡើងវិញ ហើយរួបរួមគ្នាការពារអធិបតេយ្យជាតិ និងបូរណភាពទឹកដីខ្មែរ ស្របតាមខ្លឹមសាររដ្ឋធម្មនុញ្ញកម្ពុជា គោលការណ៍ច្បាប់អន្តរជាតិ និងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១។
ក្រុងគ្រីស្ទានសាន់ (ប្រទេសន័រវេស៍) ថ្ងៃទី១៤ ខែសីហា ឆ្នាំ២០២០
ម៉ែន ណាត
ប្រធានក្រុមប្រឹក្សាឃ្លាំមើលកម្ពុជា
.