សម្រួល និងបញ្ចូលអត្ថបទដោយលោក ម៉ែន ណាត
សេចក្តីថ្លែងការណ៍របស់គណៈកម្មាធិការព្រំដែនកម្ពុជា មានមូលដ្ឋាននៅប្រទេសបារាំង ដែលចុះហត្ថលេខាដោយលោកបណ្ឌិតច្បាប់ ឌី ការ៉េត នៅថ្ងៃទី០៧ ខែសីហា ឆ្នាំ២០២០ បានហៅការធ្វើផែនទីថ្មី ខ្នាត ១/២៥.០០០ និងការបោះបង្គោលព្រំដែន រវាងកម្ពុជា និងវៀតណាម ដោយដាក់ចំណងជើងថា «ផែនទី បង្គោលព្រំដែន នៃអាណានិគមនិយមយួន»។ សូមទាញយកសេចក្តីថ្លែងការណ៍ នៅត្រង់នេះ (Download) ឬអានខ្លឹមសារលំអិតទាំងស្រុងខាងក្រោម។
សេចក្តីថ្លែងការណ៍
ផែនទី បង្គោលព្រំដែន នៃអាណានិគមនិយមយួន
ផែនទីបង្គោលព្រំដែន ឬផែនទីឋានលេខាព្រំដែនគោក ដែលគេប្រកាស កាលពីថ្ងៃទី១ សីហា ២០២០ នេះ ជាផែនទីនៃការរំលោភជាក់ស្តែងមួយទៀត នៃយៀកណាម មកលើឯករាជ្យ អធិបតេយ្យ និងបូរណភាពទឹកដី នៃប្រទេសកម្ពុជាជាប្រាកដ។
នៅក្នុងសេចក្តីប្រកាសព័ត៌មាននៃរដ្ឋាភិបាល ហ៊ុន សែន (ថ្ងៃ០៤/០៨/២០២០) គេថា «ខ្សែព្រំដែន ដែលមាននៅលើផែនទីឋានលេខាព្រំដែន ខ្នាត ១/២៥.០០០ ត្រឹមត្រូវតាមខ្សែព្រំដែន ដូចមាននៅលើផែនទី បោន ខ្នាត ១/១០០.០០០ បោះពុម្ពដោយ ក្រុមភូមិសាស្ត្រឥណ្ឌូចិន ស្របតាមមាត្រា២ នៃរដ្ឋធម្មនុញ្ញនៃព្រះរាជាណាចក្រកម្ពុជា…»។ {ត្រង់នេះ មានខ្លឹមសារលំអិត}។ រីឯនៅក្នុងសេចក្តីប្រកាសព័ត៌មាន នៃទីក្រុងហាណូយវិញ (ថ្ងៃ០១/០៨/២០២០) គេគ្មាននិយាយអំពីផែនទី បោន ខ្នាត ១/១០០.០០០ ហ្នឹងទេ ប៉ុន្តែគេអះអាងថា ជាផែនទីនៃការកំណត់ព្រំដែន និងការបោះបង្គោលព្រំដែនគោក យៀកណាម-កម្ពុជា ដោយយោងតាមសន្ធិសញ្ញាព្រំដែនជាតិ ឆ្នាំ១៩៨៥ និងសន្ធិសញ្ញាបំពេញបន្ថែម ឆ្នាំ២០០៥ លើសន្ធិសញ្ញា ឆ្នាំ១៩៨៥ នោះ (https://fr.vietnamplus.vn/ceremonie-de-reception-de-la-carte-topographique-de-la-frontiere-vietnamcambodge/142771.vnp)។
យើងត្រូវរំលឹកជាថ្មីដែរ អំពីលក្ខណៈច្បាប់ និងទិន្នន័យបច្ចេកទេសនៃសន្ធិសញ្ញាឆ្នាំ១៩៨៥ និងសន្ធិសញ្ញា បំពេញបន្ថែម ឆ្នាំ២០០៥ របស់យួន នោះ ៖
១– សន្ធិសញ្ញាឆ្នាំ១៩៨៥ ត្រូវបានធ្វើឡើង បន្ទាប់ពីកងទ័ពយួន បានមកវាយប្រហារ ឆ្នាំ១៩៧៨ និងកាន់កាប់កម្ពុជា ជាចំហ ហើយបានចាត់តាំងអាជ្ញាធរខ្មែរមួយ ហៅថា «សាធារណរដ្ឋប្រជាមានិតកម្ពុជា (ស.ប.ក.)» ឲ្យ ចុះសន្ធិសញ្ញានយោបាយ និងសន្ធិសញ្ញាទឹកដីថ្មី រវាងយៀកណាម-កម្ពុជា ដែលត្រូវបានអន្តរជាតិ រួមទាំង អ.ស.ប. (UN) ថ្កោលទោស ពីព្រោះវាផ្ទុយនឹងច្បាប់អន្តរជាតិទាំងស្រុង។
២– កិច្ចព្រមព្រៀងទីក្រុងប៉ារីស ឆ្នាំ១៩៩១ និងរដ្ឋធម្មនុញ្ញនៃកម្ពុជា ឆ្នាំ១៩៩៣ ក៏បានឲ្យលុបចោលសន្ធិសញ្ញាទាំងអស់ នៃសម័យយួនកាន់កាប់កម្ពុជានោះ ដែលប៉ះពាល់បូរណភាពទឹកដី នៃប្រទេសកម្ពុជា។
៣– អ្នកជំនាញការផែនទីភូមិសាស្រ្ត នៃគណៈកម្មាធិការយើង បានសិក្សាឃើញថា៖ ក) និយាមកា ភូមិសាស្រ្តទាំងអស់ ដែលគេបានកំណត់ក្នុងសន្ធិសញ្ញាឆ្នាំ ១៩៨៥ នោះ មានលក្ខណៈមិនច្បាស់លាស់ និងមិនអាចប្រើការបាន នៅលើផែនទីភូមិសាស្រ្តណាមួយទេ។ ខ) ផែនទី ដែលយួនបានគូសជាបន្ទាប់ សម្រាប់ការកំណត់ខ្សែព្រំដែន និងការបោះបង្គោលព្រំដែន មិនមានទិន្នន័យបច្ចេកទេស សម្រាប់ការកំណត់នៅលើទីដីបានទេ ហើយវាមិនមែនជាផែនទី«បោន» ខ្នាត ១/១០០.០០០ ដូចអ្នកខ្លះ បានអះអាងនោះទេ។ យើងគួររំលឹកទៀតថា ព្រះករុណា នរោត្តម សីហនុ ក៏លោកបានយល់ថា ផែនទីកម្ពុជា ដែលលោក វ៉ា គិម ហុង បានយកមកថ្វាយលោកទត ជា«ផែនទីក្លែងក្លាយសុទ្ធសាធ» ដែរ។
៤- សន្ធិសញ្ញាបំពេញបន្ថែម ឆ្នាំ២០០៥ ដែលជាការបន្ថែមសេចក្តី លើសន្ធិសញ្ញាឆ្នាំ ១៩៨៥ ដែលជាសន្ធិសញ្ញាខុសច្បាប់ ក៏វាត្រូវជាសន្ធិសញ្ញាខុសច្បាប់ដូចគ្នា។ ភាពខុសច្បាប់មួយទៀត គឺសន្ធិសញ្ញាឆ្នាំ ២០០៥ ត្រូវបានទទួលសច្ចាប័នពីសភា និងពីព្រះមហាក្សត្រ ក្រោមការគម្រាមកំហែងយ៉ាងខ្លាំង នៃនាយករដ្ឋមន្រ្តី ហ៊ុន សែន ថានឹងផ្លាស់ប្តូររបបរដ្ឋ ដោយមានការរំលាយស្ថាប័នរាជាធិបតេយ្យចោល បើព្រះមហាក្សត្រ មិនព្រមផ្តល់សច្ចាប័ន លើសន្ធិសញ្ញា ឆ្នាំ ២០០៥ នោះ ដែល ហ៊ុន សែន បានសម្រេច ជាមួយយួនហាណូយ រួចហើយ។
៥– នៅថ្ងៃទី១៥ កក្កដា ២០១៥ នាយករដ្ឋមន្រ្តី ហ៊ុន សែន បានសរសេរសំបុត្រជាផ្លូវការមួយច្បាប់ ទៅប្រធានាធិបតីបារាំង ហ្រង់ស្វ័រ ហូឡង់ (François Hollande) សុំឲ្យបារាំង បញ្ជូនអ្នកជំនាញការផែនទី ជួយដោះស្រាយ ចំណុចទំនាស់ខ្លះ នៃការកំណត់ខ្សែព្រំដែនយៀកណាម-កម្ពុជា។ លោក ហ្រង់ស្វ័រ ហូឡង់ បានឆ្លើយតបវិញថា នឹងព្រមទទួលសំណើនោះ បើភាគីទាំងពីរធ្វើសេចក្តីស្នើទៅ លោក ដូចគ្នា។ ប៉ុន្តែនៅទីបំផុត ហ៊ុន សែន មិនព្រម ឲ្យអ្នកជំនាញការផែនទីបារាំង មកជួយដោះស្រាយ ចំណុចទំនាស់នោះវិញទេ ដោយពិតជាមិនចង់ឲ្យបារាំង យកផែនទី«បោន» ខ្នាត ១/១០០.០០០ របស់បារាំង មកធ្វើជាមូលដ្ឋាន នៃការដោះស្រាយនោះ ទេ។
៦– ការបោះបង្គោលព្រំដែនថ្មី យៀកណាម-កម្ពុជា បានផ្តើមធ្វើជាសម្ងាត់ នៅបាវឹត (ខែត្រស្វាយរៀង) នៅថ្ងៃ ២៤/០៤/១៩៨៦។ ការសម្ភោធជាផ្លូវការលើកទី១ នៃបង្គោលព្រំដែនថ្មី បានធ្វើឡើងនៅថ្ងៃ ២៧/០៩/២០០៦ នៅបាវឹត ដែលពេលនោះ នាយករដ្ឋមន្រ្តីយួន ង្វៀន តន់យុង បានថ្លែងថា ជា«ព្រឹត្តិការណ៍នៃជ័យជំនះជាប្រវត្តិសាស្ត្រ នៃប្រជាជនយើងទាំងពីរ»។ ទីភ្នាក់ងារព័ត៌មានចិន «ស៊ីនហួ» (XINHUA) ដែលបានទៅទីនោះដែរ បានធ្វើការសង្កេតថា «តាំងពីឆ្នាំ១៩៧៩ មក ការកំណត់ខ្សែបន្ទាត់ព្រំដែនថ្មី យៀកណាម-កម្ពុជា មិនដែលបានធ្វើឡើងដោយប្រជាជនទាំងពីរ ដឹងឮ និងយល់ព្រមទេ»។ ការពិត គឺប្រជាពលរដ្ឋខ្មែរ តាំងពីខែត្ររតនគីរី មណ្ឌល គីរី ចុះរហូតមកដល់ ខែត្រតាកែវ កំពត តែងតែបានជំទាស់ និងស្រែកតវ៉ាឥតឈប់ឈរ នឹងការកំណត់បង្គោលព្រំដែនថ្មី តាមភូមិឃុំរបស់ខ្លួន ជាប់ព្រំដែននោះ ប៉ុន្តែរដ្ឋាភិបាលយួន និង ហ៊ុន សែន ធ្វើមិនដឹងមិនឮទេ បើគេមិនចាប់អ្នកជំទាស់ និងអ្នកស្រែកតវ៉ាទាំងនោះ ទៅធ្វើទុក្ខទោសទេ។ នេះជាការរំលោភអំណាចជាក់ស្តែង ដោយគេមិនគោរពតាមគោលការណ៍ និងការប្រព្រឹត្តអន្តរជាតិ ក្នុងការកំណត់ព្រំដែន ដែលតម្រូវឲ្យមានការយល់ព្រម អំពីអ្នកស្រុក នៅតាមព្រំដែននោះ ជាចាំបាច់។
ជាបញ្ចប់ យើងឃើញច្បាស់ថា យៀកណាមកុម្មុយនីស្ត ដែលអួតអាងខ្លាំងណាស់ ក្នុងជម្លោះទឹកដី ជាមួយចិន ថាខ្លួនជាអ្នកគោរពច្បាប់អន្តរជាតិយ៉ាងហ្មត់ចត់ណាស់ យៀកណាមនេះ មិនបានគោរពច្បាប់អន្តរជាតិអ្វីទាំងអស់ ក្នុងការកំណត់ព្រំដែនទឹកដី ជាមួយកម្ពុជា។ តាំងពីជាង ៤០ឆ្នាំមកនេះ យៀកណាម បានចាត់ការរឿងព្រំដែនទឹកដីហ្នឹង ដូចជាកម្ពុជា ជាដែនអាណានិគមរបស់ខ្លួន ដែលខ្លួនបានវាយប្រហារយកបាន។ រដ្ឋាភិបាល ហ៊ុន សែន ក៏បានខំលាក់បំបាំង និងភរភូតជានិច្ចជាកាល អំពីការកំណត់ព្រំដែនទឹកដីហ្នឹង មិនឲ្យពលរដ្ឋខ្មែរ និង មតិអន្តរជាតិ ដឹងឮទេ ពីព្រោះ… វាបានធ្វើឲ្យខាតបង់ច្រើនណាស់ ដល់កម្ពុជា!។
ប្រជាពលរដ្ឋខ្មែរគ្រប់ស្រករ និងនៅគ្រប់ទិសទី មិនអាចទទួលអំណាចអាណានិគមនិយម នៃយៀកណាមនោះឡើយ។ ខ្សែព្រំដែន និងបង្គោលព្រំដែនទាំងនោះ នឹងត្រូវទុកជាមោឃៈ និងត្រូវកំណត់ជាថ្មី ស្របតាមច្បាប់អន្តរជាតិ នៅក្នុងអនាគតកាល ជាចាំបាច់។
ទីក្រុងប៉ារីស ថ្ងៃទី័៧ សីហា ២០២០
ឌី ការ៉េត
ប្រធានគណៈកម្មាធិការព្រំដែនកម្ពុជា
.
.