បញ្ចូលនិងបន្ថែមអត្ថបទដោយ ម៉ែន ណាត / ក្រុមប្រឹក្សាឃ្លាំមើលកម្ពុជា
លោកបណ្ឌិត ឌី ការ៉េត ប្រធានគណៈកម្មាធិការព្រំដែនកម្ពុជា នៅប្រទេសបារាំង កាលពីថ្ងៃទី ០១ ខែសីហា ឆ្នាំ២០២០ បានហៅការចាប់ខ្លួនលោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជា និងជាប្រធានសហភាពកម្ពុជា គឺក្នុងចេតនាបង្ក្រាបការតវ៉ារបស់ក្រុមសហជីព និងក្រុមកម្មករ នៅពេលក្រុមកម្មករបាត់បង់ការងារ ដែលកើតមានឡើងក្នុងស្ថានភាពវិបត្តិសង្គមកម្ពុជាសព្វថ្ងៃ។
លោក រ៉ុង ឈុន ត្រូវបានអាជ្ញាធរចាប់ខ្លួន កាលពីយប់ថ្ងៃទី៣១ ខែកក្កដា ថ្មីៗនេះ ហើយត្រូវបានតុលាការចោទប្រកាន់ជាផ្លូវការ នៅថ្ងៃទី០១ ខែសីហា ឆ្នាំ២០២០ រួចត្រូវបញ្ជូនទៅឃុំខ្លួននៅពន្ធនាគារព្រៃស។
សូមទាញយក «សេចក្តីថ្លែងការណ៍» ឬអានលំអិតខាងក្រោម។
សេចក្តីថ្លែងការណ៍
រ៉ុង ឈុន នៅកម្ពុជា ការទាមទារសិទ្ធិ ត្រូវជាប់គុក
ការទាមទារសិទ្ធិដ៏ត្រឹមត្រូវរបស់ពលរដ្ឋ ឬដើម្បីប្រយោជន៍ពលរដ្ឋ មិនមែនជា«ការញុះញង់» និងមិន មែនធ្វើឲ្យខូចខាត ដល់«សន្តិសុខសង្គម»ទេ។ រឿងជាក់ស្តែងគឺលោក រ៉ុង ឈុន បានរិះគន់រដ្ឋាភិបាល ហ៊ុន សែន ក្នុងបញ្ហាព្រំដែនកម្ពុជា-យៀកណាម ត្រង់ចំណុចឃុំត្រពាំងផ្លុង (ខែត្រត្បូងឃ្មុំ) ថាមិនបានការពារប្រយោជន៍ពលរដ្ឋ ដែលបានបាត់បង់ដីធ្លីរបស់ខ្លួន ដោយសារការកំណត់ព្រំដែនថ្មី នៅទីនោះ ហើយគាត់បានទាមទារ ឲ្យរដ្ឋាភិបាលនេះ រកដីធ្លីជាសំណង ឲ្យពលរដ្ឋទាំងនោះផង ពីព្រោះវាជាករណីយកិច្ចធម្មតា នៃរដ្ឋាភិបាល។
ការរិះគន់ និងការទាមទារនេះ គ្រាន់តែជាការផ្តល់ព័ត៌មាន និងឆន្ទៈរបស់ពលរដ្ឋ ដោយលោក រ៉ុង ឈុន ប៉ុណ្ណោះ ដោយគាត់មិនបានអំពាវនាវ ឲ្យពលរដ្ឋទាំងនោះ បះបោរឡើង ទម្លាក់រដ្ឋាភិបាលនោះទេ។ បើ រដ្ឋាភិបាលនោះ យល់ថា ការផ្តល់ព័ត៌មាន និងឆន្ទៈរបស់ពលរដ្ឋ មិនស្របនឹងការពិតជាផ្លូវការទេ រដ្ឋាភិបាលអាចធ្វើការកែតម្រូវ និងបង្ហាញនូវសភាពការណ៍ ពិតប្រាកដវិញទៅ វាចប់បញ្ហាទៅហើយ។ ដូច្នេះ ការចាប់លោក រ៉ុង ឈុន ដាក់គុក ពីយប់ថ្ងៃសុក្រមុននេះ គឺជាការរំលោភអំណាចជាថ្មីទៀត នៃ រដ្ឋាភិបាល ហ៊ុន សែន ដែលក្រមព្រហ្មទណ្ឌកម្ពុជា គ្មានមាត្រាណាមួយ ថ្កោលទោសបានទេ។
ប៉ុន្តែយើងយល់ថា ការចាប់ខ្លួនលោក រ៉ុង ឈុន ហ្នឹងមិនមែនដោយសារការប៉ះពាល់នឹងបញ្ហាព្រំដែន កម្ពុជា-យៀកណាមនោះទេ ពីព្រោះលោក រ៉ុង ឈុន ក៏ធ្លាប់បានរិះគន់រដ្ឋាភិបាល ក្នុងបញ្ហាព្រំដែន ជារឿយៗ ជាយូរមកហើយ។ ការពិត ដែលយើងមើលឃើញ ក្នុងពេលនេះ គឺរដ្ឋាភិបាល ហ៊ុន សែន បាន ចាប់ឃុំឃាំងលោក រ៉ុង ឈុន ទាំងតក់ក្រហល់ នៅយប់ថ្ងៃទី ៣១ កក្កដា ដោយសារតែ រ៉ុង ឈុន កាលពីថ្ងៃទី២៤ និង ថ្ងៃទី២៩ កក្កដា មុននោះ បានដឹកនាំបាតុកម្មកម្មករ ដែលទាមទារជំនួយពីរដ្ឋាភិបាល បន្ទាប់ពីពួកគេ បានបាត់បង់ការងារ និងប្រាក់ចំណូលចិញ្ចឹមជីវិត នៅពេលនេះ។ គឺបាតុកម្មកម្មករហ្នឹងហើយ ដែលប៉ះពាល់ដល់ «សន្តិសុខសង្គម»របស់គេ។ ដោយសារតែកំហុស និងការធ្វសប្រហែសរបស់ខ្លួន ក្នុងបញ្ហាវិបត្តិកូវិដ-១៩ រដ្ឋាភិបាលជាច្រើនខែមកហើយ បានបញ្ចេញវិធានការគ្រប់បែបបំបាត់សិទ្ធិសេរីភាពគ្រប់យ៉ាងនៃប្រជាពលរដ្ឋ ដោយគេភ័យណាស់ និងការបះបោរ នៃកម្មកររាប់សែននាក់ និងប្រជាពលរដ្ឋអត់ឃ្លានរាប់លាននាក់ទៀតនោះ។ ដូច្នេះការចាប់ រ៉ុង ឈុន ដាក់គុក និងការបំបិទមាត់ កម្មករបាតុករ គឺជាការចាំបាច់បំផុត របស់រដ្ឋាភិបាល ហ៊ុន សែន។
ទីក្រុងប៉ារីស ថ្ងៃទី១ សីហា ២០២០
ឌី ការ៉េត
CWCI Cambodia 