អត្ថបទ វេទិកាពលរដ្ឋ
ប្រធានវេទិកាពលរដ្ឋ លោក គឹម សុខ បានចេញសេចក្តីថ្លែងការណ៍ ទាមទារឲ្យរដ្ឋាភិបាលលោក ហ៊ុន សែន ធ្វើសមាជជាតិ ដេញដោលអំពីខ្លឹមសារនៃវិសោធនកម្មរដ្ឋធម្មនុញ្ញ ដ៏ចម្រូងចម្រាស ដែលរដ្ឋសភា បានអនុម័តរួចហើយតាមសម្លេង ១០៥ លើ ១០៦ កាលពីថ្ងៃទី២៨ ខែកក្កដា។ សេចក្តីថ្លែងការណ៍នេះ ផ្សព្វផ្សាយនៅថ្ងៃទី ៣០ ខែកក្កដា ឆ្នាំ២០២២។ សូមទាញយក «សេចក្តីថ្លែងការណ៍ / Download»។
សេចក្តីថ្លែងការណ៍
រដ្ឋាភិបាលត្រូវធ្វើសមាជជាតិ ឲ្យប្រជាពលរដ្ឋចូលរួមមតិ អំពីវិសោធនកម្មរដ្ឋធម្មនុញ្ញ
វេទិកាពលរដ្ឋ មើលឃើញច្បាស់ថា វិសោធនកម្មរដ្ឋធម្មនុញ្ញលើកទី១០ នេះ មិនត្រឹមតែប៉ះពាល់ប៉ុណ្ណោះទេ ប៉ុន្តែ បំពានយ៉ាងកំរោល ចំពោះប្រព័ន្ធប្រជាធិបតេយ្យសេរីពហុបក្ស របបរាជានិយមអាស្រ័យដោយរដ្ឋធម្មនុញ្ញ ឬ របបសភានិយម នៅកម្ពុជា។
យើងខ្ញុំ ក៏ធ្លាប់ចេញសេចក្ដីថ្លែងការណ៍ និងបកស្រាយបំភ្លឺថា ការកែរដ្ឋធម្មនុញ្ញនេះ មានគោលដៅត្រឹមតែជាការអនុវត្តផែនការនយោបាយផ្ទេរអំណាចពីលោក ហ៊ុន សែន ទៅលោក ហ៊ុន ម៉ាណែត ប៉ុណ្ណោះ មិនមែនដើម្បីបម្រើបុព្វហេតុជាតិ និង ឧត្តមប្រយោជន៍របស់ប្រជាពលរដ្ឋខ្មែរ ដែលជាម្ចាស់ប្រទេសកម្ពុជាឡើយ។
ឆ្លើយតបនឹងសេចក្ដីប្រកាសព័ត៌មានរបស់ក្រសួងយុត្តិធម៌ នៅថ្ងៃទី ២៩ ខែកក្កដា ដែលបានបង្ហាញសមានចិត្តអញ្ជើញគណបក្សនយោបាយ និង អង្គការសង្គមស៊ីវិល ឲ្យទៅចុះឈ្មោះចូលស្ដាប់ការបកស្រាយដដែលៗរបស់ក្រសួងយុត្តិធម៌នោះ វេទិកាពលរដ្ឋ យល់ឃើញថា រដ្ឋាភិបាលគួរតែរៀបចំសមាជជាតិ ជាជំនួសវិញ និងក៏ជាវិធីប្រសើរជាង ដើម្បីឲ្យសង្គមស៊ីវិល គណបក្សនយោបាយ និង ជាពិសេស ប្រជាពលរដ្ឋដែលជាម្ចាស់វាសនាជាតិ បានចូលរួមសម្ដែងមតិ និង លើកឡើងនូវកង្វល់នានារបស់ពួកគាត់។
ការធ្វើសមាជជាតិ ឲ្យប្រជាពលរដ្ឋខ្មែរទូទៅ ចូលរួមស្ដាប់និងមានយោបល់ មានប្រយោជន៍ធំធេងណាស់ ៖
១. ជាការគោរពស្មារតីរដ្ឋធម្មនុញ្ញ ស្ដីពីសមាជជាតិ ក្នុងជំពូកទី១៤ ថ្មីទាំងមូល ដែលបើកឲ្យប្រជាពលរដ្ឋ ជ្រាបដោយផ្ទាល់ អំពីកិច្ចការផ្សេងៗ ដែលជាប្រយោជន៍ជាតិ និងលើកបញ្ហានិងសំណូមពរ ជូនរដ្ឋអំណាចដោះស្រាយ។
២. ជាការផ្ដល់តម្លៃដល់ការចូលរួមរបស់ប្រជាពលរដ្ឋ ស្របតាមគោលការណ៍ប្រតិបត្តិជាក់ស្ដែង ក្នុងសង្គមប្រជាធិបតេយ្យ។
៣. កាត់បន្ថយការចំណាយពេលច្រើនរបស់រដ្ឋាភិបាល ដែលនឹងត្រូវពន្យល់ច្រំដែល លើចម្ងល់ដូចៗគ្នា ពីមជ្ឈដ្ឋានផ្សេងៗគ្នា។
៤. ជាវេទិកាសាធារណៈ ដែលបង្ហាញតម្លាមតិ និង ជម្រះគ្រប់សេចក្តីមន្ទិលសង្ស័យ ពីគ្រប់មជ្ឈដ្ឋាន។
ប៉ុន្តែការអនុញ្ញាតឲ្យគណបក្សនយោបាយ និងសង្គមស៊ីវិល ចុះឈ្មោះចូលស្ដាប់អ្នកដឹកនាំក្រសួងយុត្តិធម៌ របៀបមិនសាធារណៈបែបនេះ នៅតែរងការចោទប្រកាន់ពីគ្រប់ទិស និងមជ្ឈដ្ឋាននានា ចៀសមិនផុតឡើយ ថាជាល្បិច ឬលេសដោះសាក្នុងផែនការនយោបាយ លាក់ពុតរបស់រដ្ឋាភិបាល ដែលកំពុងដឹកនាំប្រទេស។
វេទិកាពលរដ្ឋ លើកទឹកចិត្តឲ្យរដ្ឋាភិបាល មានសេចក្ដីក្លាហាន រៀបចំសមាជជាតិ កុំបិទបាំងពីប្រជាពលរដ្ឋ ទើបជាផលល្អ ក្នុងការស្ដារមុខមាត់រដ្ឋាភិបាលផង បម្រើសេចក្ដីត្រូវការរបស់ប្រជាពលរដ្ឋផង និង ឆ្លើយតបឧត្តមប្រយោជន៍ជាតិ នៃរបស់ដែលហៅថា ការប្រតិបត្តិនយោបាយសង្គមប្រជាធិបតេយ្យសេរីពហុបក្សបរិសុទ្ធ ដោយស្មារតីសុចរិត មិនបំពានឆន្ទៈរបស់ប្រជាពលរដ្ឋផង។
សហរដ្ឋអាមេរិក ថ្ងៃទី៣០ ខែកក្កដា ឆ្នាំ២០២២
គឹម សុខ (ហត្ថលេខា)
ប្រធាន វេទិកាពលរដ្ឋ
.
CWCI Cambodia 