វិទ្យុអាស៊ីសេរី RFA /ដោយ យ៉ង ចាន់តារា
01st-9-2023
អ្នកឃ្លាំមើលថា ការតែងតាំងទីប្រឹក្សា និងជំនួយការតាមក្រសួងស្ថាប័នរដ្ឋ និងរដ្ឋាភិបាល លោក ហ៊ុន ម៉ាណែត មិនបានជួយឱ្យប្រទេសជាតិរីកចម្រើននោះទេ ប៉ុន្តែគឺជាការពង្រីកអំពើពុករលួយ នៅក្នុងស្ថាប័នរដ្ឋ ។ ការលើកឡើងនេះគឺបន្ទាប់ពី លោក ហ៊ុន ម៉ាណែត ថ្លែងថា លោក នឹងកែសម្រួលឡើងវិញនូវការតែងតាំងជាទីប្រឹក្សា និងជំនួយការ។
អ្នកវិភាគនយោបាយ លើកឡើងថា ជារឿងអស់សំណើច ដែលលោក ហ៊ុន ម៉ាណែត ជាអ្នកតែងតាំងទីប្រឹក្សា និងជំនួយការព្រោងព្រាតតាមក្រសួងស្ថាប័នរដ្ឋនានា ដោយផ្ដល់ឋានៈខ្ពស់ៗ បន្ថែមទៀត ក៏ប៉ុន្តែពេលនេះ បែរជាភ្ញាក់ខ្លួន ចង់រុះរើឡើងវិញ។
អ្នកវិភាគនយោបាយ លោក គឹម សុខ ថ្លែងថា ការតែងតាំងទីប្រឹក្សា និងជំនួយការច្រើនសន្ធឹកសន្ធាប់នេះ គឺប្រៀបដូចជាជញ្ជក់ឈាមពលរដ្ឋ តាមរយៈការដំឡើងពន្ធលើទំនិញ ខណៈបច្ចុប្បន្នពលរដ្ឋ កំពុងប្រឈមនឹងបំណុលវ័ណ្ឌក។ លោកបន្ថែមថា ការកែប្រែការតែងតាំងនេះ គឺគ្រាន់តែជាការដោះស្រាយវិបត្តិផ្ទៃក្នុងបក្សប្រជាជនកម្ពុជា ដែលកំពុងដណ្ដើមអំណាចគ្នាតែប៉ុណ្ណោះ។
លោក គឹម សុខ៖ «បង្កើនពន្ធពលរដ្ឋឱ្យទៅចិញ្ចឹមក្បាលធំ នៃរដ្ឋាភិបាល និងទីប្រឹក្សាជាង ១ម៉ឺននាក់។ ទី២ គឺជាការមើលងាយ ដល់ប្រជាពលរដ្ឋខ្លាំងណាស់ ពីព្រោះប្រជាពលរដ្ឋ កំពុងប្រឈមនឹងអត់ការងារ ក្រីក្រលំបាក វ័ណ្ឌកនឹងបំណុល គួរណាស់តែ ហ៊ុន ម៉ាណែត គិតយកលុយទៅចំណាយលើចំនួនទីប្រឹក្សាហ្នឹង ឧទាហរណ៍ថា បង្កើតក្រុមហ៊ុនតូចៗ សហគ្រាស ផ្ដល់ការងារជូនប្រជាពលរដ្ឋ ទើបជាដំណោះស្រាយ»។
ប្រតិកម្មរបស់អ្នកវិភាគនយោបាយរូបនេះ ធ្វើឡើងក្រោយពី លោកនាយករដ្ឋមន្ត្រី ហ៊ុន ម៉ាណែត ថ្លែងក្នុងកម្មវិធីសំណេះសំណាលជាមួយកម្មកររោងចក្រជិត ២ម៉ឺននាក់ ក្នុងខេត្តកណ្ដាល នៅថ្ងៃទី១ កញ្ញាថា ការតែងតាំងទីប្រឹក្សាលើកក្រោយ នឹងមានការផ្លាស់ប្ដូរដោយមន្ត្រី ដែលមានឋានៈតួនាទីនៅក្នុងស្ថាប័នរដ្ឋរួចហើយ គឺមិនទទួលបានឋានៈខ្ពស់ៗ ដូចជា ឋានៈស្មើអគ្គនាយក ឬរហូតដល់រដ្ឋមន្ត្រី ទៀតនោះទេ។
លោក ហ៊ុន ម៉ាណែត៖ «ប៉ុន្តែក្រោយពីការចេញព្រះរាជក្រឹត្យនេះ រាល់ការតែងតាំងទីប្រឹក្សា គឺត្រូវអនុវត្តតាមក្របខ័ណ្ឌនេះ បើមន្ត្រីមានក្របខ័ណ្ឌនៅក្នុងមន្ត្រីស៊ីវិល កងកម្លាំងប្រដាប់អាវុធ គឺអាចឱ្យជំនួយការ ទីប្រឹក្សាតែមិនមានឋានៈស្មើបន្ថែមលើមុខងារបច្ចុប្បន្នទៀតទេ បើសិនជាចង់បានងារ គឺត្រូវបោះបង់ឋានៈចោល ហើយការតែងតាំងនេះមានចេញ ២កម្រិត ព្រះរាជក្រឹត្យអ្នកដែលត្រូវគេតែងតាំង អាចមានងារជាឯកឧត្ដម លោកជំទាវបានអត់បញ្ហា»។
ទាក់ទិនបញ្ហានេះ សមាគមសម្ព័ន្ធនិស្សិតបញ្ញវន្តខ្មែរ ចេញសេចក្ដីថ្លែងការណ៍ បង្ហាញពីក្ដីបារម្ភចំពោះការតែងតាំងមន្ត្រីជាន់ខ្ពស់ ដែលមានឋានៈស្មើអគ្គនាយក រហូតដល់ឧបនាយករដ្ឋមន្ត្រី មានចំនួន ៣.២២៨ នាក់ គិតត្រឹមថ្ងៃទី១ ខែកញ្ញា។ សមាគមសម្ព័ន្ធនិស្សិតបញ្ញវន្តខ្មែរ បញ្ជាក់ថា ដើម្បីអនុវត្តយុទ្ធសាស្ត្របញ្ចកោណ ឱ្យមានប្រសិទ្ធភាព រដ្ឋាភិបាល ត្រូវតែកាត់បន្ថយការតែងតាំងមន្ត្រីជាន់ខ្ពស់ នៅតាមក្រសួង ដែលនាំឱ្យខ្ជះខ្ជាយថវិកាជាតិ និងត្រូវផ្សព្វផ្សាយជាសាធារណៈអំពីមុខងារ ហើយនិងការទទួលខុសត្រូវរបស់មន្ត្រីទាំងនោះ ក្នុងការធានាឱ្យមានគណនេយ្យភាព នៅក្នុងការប្រើប្រាស់ថវិកាជាតិ។
អ្នកឃ្លាំមើលលើកឡើងថា ការផ្ដល់តំណែងតួនាទីក្នុងស្ថាប័នជាតិឱ្យមន្ត្រីគ្រាក់ៗ ទាំងនោះ មិនបានផ្ដល់ផលប្រយោជន៍ដល់ជាតិ និងជួយដោះស្រាយជីវភាពរបស់ប្រជាពលរដ្ឋឡើយ។ ផ្ទុយទៅវិញនេះគ្រាន់តែជាយុទ្ធសាស្ត្ររបស់គណបក្សប្រជាជនកម្ពុជា ក្នុងការកៀរគរមនុស្សឱ្យគាំទ្រ និងលើកទឹកចិត្តឱ្យមានពុករលួយ ក្នុងស្ថាប័នរដ្ឋប៉ុណ្ណោះ៕