អត្ថបទ៖ លោក ម៉ែន ណាត
07th-8-2023
ព្រះមហាក្សត្រព្រះ នរោត្តម សីហមុនី នៅថ្ងៃទី០៧ ខែសីហា ឆ្នាំ២០២៣ បានឡាយព្រះហស្ថលេខាលើព្រះរាជក្រឹត្យចាត់តាំងលោក ហ៊ុន ម៉ាណែត ជានាយករដ្ឋមន្រ្តីហើយ សម្រាប់នីតិកាលទី៧ តាមការស្នើសុំរបស់ប្រធានគណបក្សកាន់អំណាច និងជានាយករដ្ឋមន្រ្តីបច្ចុប្បន្ន គឺលោក ហ៊ុន សែន ដែលជាឪពុករបស់គាត់។ បន្ទាប់ពីការចាត់តាំងនេះទៅ លោក ហ៊ុន ម៉ាណែត ត្រូវស្នើសុំសេចក្តីទុកចិត្តពីរដ្ឋសភា ជាមួយបញ្ជីសមាសភាពសមាជិករដ្ឋាភិបាលថ្មីរបស់លោក ទៅតាមនីតិវិធីច្បាប់។
តាមពិត បេក្ខជនឈរឈ្មោះជានាយករដ្ឋមន្រ្តី នៅក្នុងការបោះឆ្នោតជាតិមិនប្រក្រតី និងមិនយុត្តិធម៌ កាលពីថ្ងៃទី២៣ ខែកក្កដា ថ្មីៗនេះ មិនមានឈ្មោះលោក ហ៊ុន ម៉ាណែត ទេ ប៉ុន្តែគឺជាឈ្មោះរបស់លោក ហ៊ុន សែន ដែលជាបេក្ខជននាយករដ្ឋមន្រ្តី តាមការសម្រេចរបស់គណបក្សកាន់អំណចរបស់ខ្លួន។ គណបក្សនេះ និង គណៈកម្មាធិការជាតិរៀបចំការបោះឆ្នោត (គ.ជ.ប.) បានប្រកាសពីជ័យជំនះរហូតដល់ ៨២,៣% ដោយទទួលបានអាសនៈរដ្ឋសភា ១២០ រីឯគណបក្សហ្វ៊ុនស៊ិនប៉ិច ទទួលបាន ៥ កៅអី ឬអាសនៈ ក្នុងចំណោមកៅអីសរុប ១២៥។
លុះដល់ថ្ងៃទី២៦ កក្កដា លោក ហ៊ុន សែន បានប្រកាសផ្ទេរអំណាចឲ្យកូនរបស់គាត់ គឺលោក ហ៊ុន ម៉ាណែត ដោយអត្តនោម័ត ហើយគំរាមធ្ងន់ដល់មន្រ្តីកំពូលៗដោយប្រយោល នៅក្នុងចំណោមមន្រ្តីផ្ទៃក្នុងនៃគណបក្សកាន់អំណាច។
ដោយមានសម្ពាធខ្លាំង នៅថ្ងៃទី០៥ ខែសីហា ឆ្នាំ២០២៣ លោក ស ខេង ជាមន្ត្រីមានអំណាចទី២ បន្ទាប់លោក ហ៊ុន សែន បានចេញប្រកាសគាំទ្រលោក ហ៊ុន ម៉ាណែត ជានាយករដ្ឋមន្រ្តី ដើម្បីបំពេញចិត្តលោក ហ៊ុន សែន។ សព្វថ្ងៃលោក ស ខេង ជាអនុប្រធានគណបក្សប្រជាជនកម្ពុជា ជាឧបនាយករដ្ឋមន្ត្រី និងជារដ្ឋមន្រ្តីក្រសួងមហាផ្ទៃ។
គួរបញ្ជាក់ថា ក្រោយការបោះឆ្នោតជាតិសម្រាប់នីតិកាលទី៧ នេះ របបដឹកនាំរបស់លោក ហ៊ុន សែន បានទទួលការព្រមានដាក់ទណ្ឌកម្ម ពីបណ្តាប្រទេសលោកសេរី នាំមុខដោយសហរដ្ឋអាមេរិក ដែលជាក្រុមប្រទេសបញ្ជាទិញ លើផលិតផលនាំចូលពីកម្ពុជា ដូចជា GSP របស់អាមេរិក និង EBA របស់អឺរ៉ុប។
លោក ហ៊ុន សែន បានបញ្ជាក់ថ្មីៗនេះថា លោកនឹងលែងជានាយករដ្ឋមន្ត្រី ចាប់ពីថ្ងៃទី២២ ខែសីហា ឆ្នាំ២០២៣ តទៅ។ ប៉ុន្តែលោកព្រមានថា បើសិនជាលោក ហ៊ុន ម៉ាណែត មានគ្រោះថ្នាក់ណាមួយដល់ជីវិត លោកនឹងវិលត្រឡប់មកធ្វើនាយករដ្ឋមន្រ្តីវិញ។
លោក ហ៊ុន សែន បានថ្លែងថា រដ្ឋសភានឹងកោះប្រជុំថ្ងៃដំបូង សម្រាប់អាណត្តិថ្មីនេះ នៅថ្ងៃទី២១ ខែសីហា។ រួចហើយនៅថ្ងៃទី២២ ខែសីហា រដ្ឋសភានឹងប្រជុំអនុម័តទទួលស្គាល់សមាភាពគណៈរដ្ឋមន្រ្តី នៃរដ្ឋាភិបាលថ្មីរបស់លោក ហ៊ុន ម៉ាណែត។ ចំណែកលោក ហ៊ុន សែន បានប្រកាសតែងតាំងខ្លួនឯង ជាប្រធានឧត្តមក្រុមប្រឹក្សាព្រះមហាក្សត្រ ជាប្រធានព្រឹទ្ធសភានៅដើមឆ្នាំ២០២៤ និង ជាប្រមុខរដ្ឋស្តីទីពេលអវត្តមានព្រះមហាក្សត្រ។
រដ្ឋាភិបាលរបស់លោក ហ៊ុន ម៉ាណែត ត្រូវបានគេរំពឹងថា ជារដ្ឋាភិបាលផុយស្រួយ ជាការទទួលថ្មបាក់ពីលោក ហ៊ុន សែន និង នៅតែស្ថិតក្រោមការកំណត់ទិសដៅពីលោក ហ៊ុន សែន ដដែល។
ទោះបីយ៉ាងណាក្តី ក្រុមអ្នកវិភាគ និងអ្នកនយោបាយប្រឆាំង បានហៅការផ្ទេរអំណាចនេះថា «ជាការផ្ទេរអំណាចតពូជ តាមបែបផ្តាច់ការ»៕
.
