(Update: CWCI Cambodia /អត្ថបទដោយ នគរ / ២៦ មីនា ២០២០)
ក្រុមអ្នកឃ្លាំមើលរឿងនយោបាយ និងសង្គមខ្មែរ បានស្តីបន្ទោសមេដឹកនាំ លោក ហ៊ុន សែន ថា កំពុងប្រើប្រាស់ស្ថានការណ៍ភាពអាសន្ន នៃជំងឺកូរ៉ូណា ឬ Covid-19 ជាល្បែងនយោបាយ ដើម្បីផាត់ចេញការចាប់អារម្មណ៍នានា ចំពោះការបាត់បង់ព្រព័ន្ធអនុគ្រោះពន្ធ (EBA) របស់អឺរ៉ុបផង និង ចង់ឲ្យប្រទេសចិន ជួយសម្រេចបំណងរបស់ខ្លួន ក្នុងការរក្សាអំណាចផង និងលើកស្ទួយកូនប្រុសរបស់គាត់ គឺលោក ហ៊ុន ម៉ាណែត ស្នងតំណែងផង ទៅថ្ងៃក្រោយ។
អតីតសមាជិករដ្ឋសភា រដ្ឋវិតូរីយ៉ា នៃប្រទេសអូស្ត្រាលី លោក ហុង លីម (ដើមកំណើតខ្មែរ) នៅថ្ងៃទី ២៦ ខែមីនា ឆ្នាំ ២០២០ នេះ បានថ្លែងប្រាប់លោក តាំង សារ៉ាដា អ្នកសម្របសម្រួលវេទិកាពិភាក្សា អំពីស្ថានភាពកម្ពុជាក្នុងភាពអាសន្នថា «យើងមានការអាណិតអាសូរ ដល់ពលរដ្ឋខ្មែរ ជាពិសេសអ្នកក្រីក្រនៅទូទាំងប្រទេស និងពលរខ្មែរដែលទើបត្រឡប់ពីប្រទេស ថៃ ក្លាយជាជនរងគ្រោះទ្វេដង ក្នុងអំឡុងពេលការរីករាលដាលមេរោគកូរ៉ូណានេះ។ ចំណែកលោក ហ៊ុន សែន បានតែនិយាយភូតកុហក់ គឺគ្មានវិធានការច្បាស់លាស់ គ្មានការទទួលខុសត្រូវត្រឹមត្រូវ ក្នុងការទប់ស្កាត់មេរោគកូរ៉ូណាទេ»។
លោក គឹម សុខ អ្នកវិភាគនយោបាយ និងសង្គម បានលើកឡើងស្របគ្នា ជាមួយលោក ហុង លីម ដែរថា «បើលោក ហ៊ុន សែន មានវិធានការជាក់លាក់មែននោះ ម្ល៉េះសមលោក ហ៊ុន សែន មិនត្រូវជួបសំណេះសំណាលជាមួយក្រុមគ្រូពេទ្យស្មគ្រចិត្ត ជាង ៤០០ នាក់ ដោយឲ្យពួកគាត់ អង្គុយជាប់ក្បែរៗគ្នាយ៉ាងនេះទេ។ ហើយក្នុងពេលនេះ លោក ហ៊ុន សែន ខំឡង់សេ (អួតបង្ហាញ) ទាំងកូនខ្លួនឯងគឺ ហ៊ុន ម៉ាណែត និងកូនប្រសារ នៅចំពោះមុខមនុស្សរាប់រយនាក់»។ លោក គឹម សុខ បន្តថា «បើសិនជាមានអ្នកម្នាក់ ក្នុងមនុស្សជាង ៤០០ នាក់នោះ មានជំងឺកូរ៉ូណា នោះពួកគេ ច្បាស់ជាឆ្លងមេរោគនេះ បន្តគ្នារដឹកតែម្តង។ តាមក្បួនខ្នាតក្នុងស្ថានការណ៍របៀបនេះ គេមិនត្រូវធ្វើដូចលោក ហ៊ុន សែន បែបហ្នឹងទេ»។
លោក ប៉ា ងួនទៀង នាយកមណ្ឌលព័ត៌មានឯករាជ្យ CCIM បានថ្លែងនៅក្នុងវេទិកាពិភាក្សារបស់សារព័ត៌មាន ឌីខេមបូឌា ដេលី (The Cambodia Daily) ដែលសម្របសម្រួលដោយ លោក តាំង សារ៉ាដា នៅថ្ងៃទី ២៤ ខែមីនា ថា «របាយការណ៍ស្តីពីការរីករាលដាលមេរោគកូរ៉ូណា នៅកម្ពុជា គឺមានស្តង់ដារ ២ ដោយរដ្ឋាភិបាលលោក ហ៊ុន សែន បញ្ជាឲ្យផ្សាយជាចំហ ចំពោះជនបរទេសដែលមកពីអឺរ៉ុប ឬពីលោកខាងលិច។ ចំណែករឿងពាក់ព័ន្ធនឹងជនជាតិ ចិន គឺរដ្ឋាភិបាល លាក់លៀមស្ងាត់ឈឹង។ សម្រាប់ពលរដ្ឋខ្មែរសាមញ្ញ ក៏ផ្សាយជាចំហដែរ ប៉ុន្តែចំពោះករណីមេរោគ ឆ្លងក្រុមមន្រ្តីរដ្ឋាភិបាល ក៏ត្រូវបានលាក់ព័ត៌មាន»។ លោក ងួនទៀង បន្តថា «លោក ហ៊ុន សែន ខំយកចិត្តចិន សូម្បីតែមេរោគកូរ៉ូណា ដែលមានប្រភពមកពីចិន ក៏លោក ហ៊ុន សែន មិនដែលបិទជើងហោះហើរពីចិនផង ប៉ុន្តែសម្រាប់ប្រទេសអឺរ៉ុបមួយចំនួន គឺលោក ហ៊ុន សែន បញ្ជាឲ្យបិទជើងហោះហើរ ចូលកម្ពុជា»។
លោក គឹម សុខ អ្នកវិភាគសង្គម បានថ្លែងប្រាប់សារព័ត៌មាន ឌីខេមបូឌា ដេលី ដែរថា «លោក ហ៊ុន សែន ឆ្លៀតឱកាសយករឿងជំងឺកូរ៉ូណា ឬ Covid-19 ដែលកំពុងរីករាលដាលជុំវិញពិភពលោក និងនៅកម្ពុជានេះ ដីម្បីកាន់តែចូលកៀកជាមួយ ចិន ហើយចិន ក៏ផ្តល់អ្នកជំនាញមួយចំនួន មកកម្ពុជា ជួយប្រយុទ្ធប្រឆាំងមេរោគនេះ»។ លោក គឹម សុខ បន្ថែមថា «លោក ហ៊ុន សែន ធ្វើដូចនេះដើម្បីឲ្យ ចិន ជួយការពារអំណាចគាត់ និងជួយកូនប្រុសគាត់ គឺលោក ហ៊ុន ម៉ាណែត អាចស្នងតំណែងពីគាត់ នៅថ្ងៃក្រោយ»។ លោក គឹម សុខា សង្កត់ធ្ងន់ថា «លោក ហ៊ុន សែន ធ្វើយ៉ាងនេះ ពីព្រោះគាត់ដឹងច្បាស់ថា វៀតណាម មិនអាចជួយ ហ៊ុន ម៉ាណែត ឲ្យស្នងតំណែងពីគាត់បានទេ»។ ទោះបីជាយ៉ាងណា វៀតណាម ក៏មិនពេញចិត្តនឹងលោក ហ៊ុន សែន ដែលស្និទ្ធស្នាលជ្រុលពេក ជាមួយចិន។ ម៉្លោះហើយបានជាវៀតណាម គេបិទច្រកព្រំដែន ដោយមិនជូនដំណឹងដល់លោក ហ៊ុន សែន មួយម៉ាត់សោះនោះ»។
លោក អ៊ាប គឹមសេង អតីតសមាជិកស្ថាបនិកចលនិស្សិតខ្មែរ បានផ្តល់យោបល់នៅក្នុងវេទិកាសារព័ត៌មាន ឌីខេមបូឌា ដេលី ថា «ករណីវៀតណាម បិទច្រកព្រំដែន ក្រោមហេតុផលជំងឺកូរ៉ូណា ឬកូវីដ១៩ ដោយមិនជូនដំណឹងមករដ្ឋាភិបាល លោក ហ៊ុន សែន គឺវៀតណាម គេមិនទុកចិត្តកម្ពុជាផង និង ព្រមានទៅលោក ហ៊ុន សែន ដែលខំអោបចិន ព្រោះតែចង់រក្សាអំណាចតកូនផង»។ លាក គឹមសេង បន្តថា «ការរីកដាល់ជំងឺនេះ មកពីលោក ហ៊ុន សែន ខ្លួនឯងបានធ្វេសប្រហែស និងមើលស្រាលមេរោគនេះ តាំងពីដំបូងៗមកម្ល៉េះ។
លោក ទូច វិបុល អតីតប្រធានអង្គការសម័ន្ធមិត្តខ្មែរអាមេរិកាំង និងជាអតីតអនុប្រធានចលនានិស្សិតខ្មែរ បានផ្តល់យោបល់ថា «រដ្ឋាភិបាលលោក ហ៊ុន សែន នៅមិនទាន់មានផែនការជាក់លាក់ ក្នុងការទប់ស្កាត់មេរោគកូរ៉ូណា ឬកូវីដ១៩ ដែលការឆ្លងនៅកម្ពុជា ជិត ១០០ នាក់ទៅហើយ មកទល់ពេលនេះ»។ លោក វិបុល អំពាវនាវឲ្យរដ្ឋាភិបាល យកចិត្តទុកដាក់បន្ថែមទៀត ក្នុងការបង្ការមេរោគនេះ និងត្រូវបន្តផ្សព្វផ្សាយឲ្យពលរដ្ឋខ្មែរ ជ្រូតជ្រាបទូលំទូលាយ។
លោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា បានប្រាប់វេទិកាពិភាក្សារបស់សារព័ត៌មាន ឌីខេបូឌា ដេលី កាលពីថ្ងៃទី ២១ ខែមីនាថា «រដ្ឋាភិបាលលោក ហ៊ុន សែន មិនអាចបង្ហាញពីអាត្រានៃអ្នកឆ្លងកូរ់ូណា ឬ កូវីដ១៩ ទាំងអស់ទេ គឺគាត់នៅលាក់លៀមព័ត៌មានមួយចំនួន ដោយមិនបង្ហាញតួលេខជនជាតិ ចិន និងមន្រ្តីជាន់ខ្ពស់ ដែលបានឆ្លងមេរោគនេះទេ»។ ឆ្លើយសំណួរអ្នកស្តាប់ លោក ម៉ែន ណាត គូសបញ្ជាក់ថា «ទោះបីលោក ហ៊ុន សែន ជិតស្និទ្ធជាមួយ ចិន យ៉ាងណាក្តី ក៏គាត់មិនអាចដកខ្លួន ចេញពីវៀតណាម បានទេ»។ លោក ម៉ែន ណាត បន្តថា «លោក ហ៊ុន សែន អន់អន់ចិត្តជាមួយ វៀតណាម យ៉ាងណាក៏ដោយ ក៏គាត់នៅតែបន្តគោរពតាមការណែនាំ ពីវៀតណាមដដែល»។
កាលពីថ្ងៃទី ១៩ មីនា សារជាសម្លេងបែកធ្លាយរបស់លោក ហ៊ុន ម៉ាណែត បានឲ្យដឹងថា មានមន្ត្រីជាន់ខ្ពស់ក្រសួងការបរទេស ១ រូប ឆ្លងមេរោគកូរ៉ូណា និងមន្ត្រីយោធាមួយចំនួន នៅក្រសួងការពារជាតិ ក៏បានឆ្លងមេរោគនេះដែរ។ ប៉ុន្តែរបាយការណ៍លទ្ធផល ពីក្រសួងសុខាភិបាល អំពីការឆ្លងមេរោគកូរ៉ូណានេះ មិនមានបញ្ជាក់ថា មន្ត្រីទាំងនោះ ឆ្លងមេរោគទេ។
របាយការណ៍ស្តីពីការរីករាលដាលមេរោគកូរ៉ូណា របស់ក្រសួងសុខាភិបាល ដែលបានធ្វើច្ចុប្បន្នភាព នៅល្ងាចថ្ងៃទី ២៦ ខែមីនា ឆ្នាំ ២០២០ នេះ មានអាត្រាអ្នកឆ្លង បានកើនឡើងដល់ ៩៨ នាក់ហើយ៕
ខាងក្រោមនេះ ជារូបភាពមួយចំនួន ក្នុងពិធីសំណេះសំណាលរបស់លោក ហ៊ុន សែន ជាមួយក្រុមគ្រូពេទ្យស្មគ្រចិត្ត ជាង ៤០០ នាក់ នាថ្ងៃទី ២៥ មីនា ២០២០ ក្នុងស្ថានភាពកម្ពុជា កំពុងជួបហានីភ័យរឿងមេរោគកូរ៉ូណា។
.
.
ខ្មែរនឹងមានគ្រោះមហន្តរាយកាន់តែខ្លាំងបេីលោក ហ៊ុន សែន យករឿងកូរ៉ូណា មកបិទបាំងដេីម្បីរក្សាអំណាចតវង្សត្រកូលរបស់គាត់☝️
កម្ពុជានឹងមានគ្រោះមហន្តរាយកាន់តែខ្លាំង បេីលោក ហ៊ុន សែន យករឿងការរាតត្បាតមេរោគកូរ៉ូណាមកបិទបាំងដេីម្បីរក្សាអំណាចតវង្សត្រកូលរបស់គាត់☝️