អត្ថបទ៖ ឌឹ ខេមបូឌា ដេលី (The Cambodia Daily) / 28-12-2020
ក្រុមបញ្ញវន្តខ្មែរនៅក្រៅប្រទេស ត្អូញត្អែរថា ការដឹកនាំរបស់អ្នកនយោបាយខ្មែរ កំពុងទាញកម្ពុជាឲ្យជួបគ្រោះហានិភ័យយ៉ាងធ្ងន់ធ្ងរ ដែលជាគ្រោះថ្នាក់មិនអាចស្រោចស្រង់បាន និងបណ្តាលឲ្យបាត់អត្តសញ្ញាណជាតិ និងបូរណភាពទឹកដីទៅថ្ងៃអនាគតដោយជៀសមិនផុតនោះឡើយ បើសិនអ្នកនយោបាយដែលមានឥទ្ធិពល មិនប្រញាប់ផ្សះផ្សា និងរកឯកភាពជាតិ ទេនោះ។
ប្រធានក្រុមប្រឹក្សាភិបាលនៃ ចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត បានសរសេរលើទំព័រហ្វេសប៊ុករបស់លោក ថាលោក ហ៊ុន សែន កំពុងលេងល្បែងឈានទៅរកការក្តោបក្តាប់សិទ្ធិអំណាចទាំងស្រុង គឺរំលោភតួនាទីព្រះមហាក្សត្រ ដើម្បីរៀបចំយន្តការបញ្ជាអំណាចរបស់ខ្លួន តាមមធ្យោបាយដាក់កៅអីអង្គុយក្បែររាជបល្លង្គ ដើម្បីបញ្ជាព្រះមហាក្សត្រតែម្តង។ លោក អះអាងថា ជម្រើសបែបនេះ ជាយុទ្ធសាស្ត្រល្អបំផុត ក្រោយចាកចេញពីតំណែងជានាយករដ្ឋមន្ត្រី ដែលអាចជួយឲ្យលោក ហ៊ុន សែន ក្តាប់អំណាចពេញដៃដដែល។ {តម្រុយនេះ លេចចេញតាមរយៈលោក ហ៊ុន សែន ខំសម្រួលដំឡើងតួនាទីឲ្យលោក ហ៊ុន ម៉ាណែត ដែលជាកូនប្រុសច្បងរបស់លោក ឡើងជិតផុតកំពូលទៅហើយ ទាំងក្នុងជួរគណបក្ស និងក្នុងជួររដ្ឋាភិបាល មុននឹងផ្ទេរអំណាចទាំងស្រុង ទៅឲ្យកូនប្រុសរូបនេះ តាមយុទ្ធសាស្ត្ររបស់ខ្លួន}។
លោក ម៉ែន ណាត ព្រមានថា ទោះលោក ហ៊ុន សែន មានអំណាចធំយ៉ាងណាក៏ដោយ ក៏ជាអំណាចនោះ គឺដើម្បីបម្រើមហិច្ឆតាឈ្លានពានរបស់វៀតណាម និងមហាអំណាចចិនកុម្មុយនិស្តប៉ុណ្ណោះ។ លើសពីនេះ ប្រសិនបើមានភាគីនយោបាយប្រឆាំងដែលមានឥទ្ធិពលណាមួយ ចូលរួមលេងល្បែងនេះ នោះកម្ពុជានឹងជួបគ្រោះធ្ងន់ធ្ងរទ្វេដង ហើយពលរដ្ឋខ្មែរ នឹងរងទុក្ខខ្លោចផ្សារជាងនេះបន្ថែមទៀត។
ការអះអាងនេះ ធ្វើឡើងដើម្បីរិះគន់លើការប្រើប្រាស់អំណាចរបស់លោក ហ៊ុន សែន ដែលបានរំលោភស្ថាប័នព្រះមហាក្សត្រ និងរដ្ឋធម្មនុញ្ញនៃព្រះរាជាណាចក្រកម្ពុជា ដើម្បីបើកដៃឲ្យបរទេសឈ្លានពានលុកលុយទឹកដីខ្មែរតាមរយៈសន្ធិសញ្ញាខុសច្បាប់នានា ដែលជាថ្នូរនឹងការកាន់កាប់អំណាចបន្តពូជរបស់ខ្លួន។
ទាក់ទិននឹងបញ្ហានេះ កាលពីឆ្នាំ ២០០៥ លោក ហ៊ុន សែន គម្រាមថា បើព្រះមហាក្សត្រមិនព្រមចុះហត្ថលេខាយល់ព្រមលើសន្ធិសញ្ញាបំពេញបន្ថែមឆ្នាំ២០០៥ ដើម្បីឲ្យរដ្ឋាភិបាលរបស់លោក យកទៅអនុវត្តក្នុងកិច្ចព្រមព្រៀងជាមួយប្រទេសវៀតណាមទេនោះ លោកនឹងរំលាយរបបរាជានិយម ទៅជារបបសាធារណៈរដ្ឋ វិញមិនខាន។
ក្រុមអ្នកឃ្លាំមើលសង្គម ប្រតិកម្មថា សន្ធិសញ្ញបំពេញបន្ថែមឆ្នាំ ២០០៥ និងសន្ធិសញ្ញាបំពេញបន្ថែមឆ្នាំ ២០១៩ ព្រមទាំងកិច្ចព្រមព្រៀងនានា ដូចជាសន្ធិសញ្ញាកំណត់ព្រំដែនរដ្ឋ ឆ្នាំ១៩៨៥ ដែលលោក ហ៊ុន សែន បានចុះហត្ថលេខាព្រមព្រៀងជាមួយប្រទេសវៀតណាម គឺផ្ទុយទៅនឹងស្មារតីនៃ រដ្ឋធម្មនុញ្ញកម្ពុជា និងកិច្ចព្រមព្រៀងសន្តិភាពក្រុងប៉ារីស ឆ្នាំ១៩៩១។
ពួកគេរិះគន់ថា កម្ពុជានឹងរអិលធ្លាក់ជ្រោះកាន់តែជ្រៅ ដែលមិនស្រោចស្រង់បាន បើអំណាចត្រកូល «ហ៊ុន» នៅតែបន្តកាន់កាប់ទឹកដីកម្ពុជា ត្បិតពួកគេបានយកបរទេសឈ្លានពានជាតិឯង ធ្វើជាខ្នងបង្អែក ដើម្បីឈ្នះល្បែងដែលខ្លួនបានរៀបចំឡើង ទោះត្រូវជាន់ពន្លិចកម្ពុជា លិចកប់ក្នុងជ្រោះនយោបាយរបស់ពួកគេក៏ដោយ ក៏ពួកគេមិនញញើតនឹងធ្វើដែរ។
ក្រុមអ្នកឃ្លាំមើលសង្គម ជំរុញឲ្យអ្នកនយោបាយខ្មែរដែលមានឥទ្ធិពលគ្រប់និន្នាការ និងគ្រប់ភាគីទាំងអស់ វិលទៅរកការផ្សះផ្សា និងឯកភាពជាតិ រវាងខ្មែរនិងខ្មែរ ដោយភាពស្មោះត្រង់ ដើម្បីលើកស្ទួយស្មារតីជាតិឲ្យខ្ពង់ខ្ពស់ ដែលជាប្រយោជន៍ដល់ពលរដ្ឋ និងប្រទេសជាតិរបស់ខ្លួន៕
.
.