រដ្ឋាភភិបាលកម្ពុជា នៅថ្ងៃទី១០ ខែកុម្ភៈ ឆ្នាំ២០២១ បង្ហាញសកម្មភាពជាលើកដំបូងឲ្យមន្រ្តីជាន់ខ្ពស់រដ្ឋាភិបាលរបស់ខ្លួន និងក្រុមអ្នកស្មគ្រចិត្ត ចាក់ថ្នាំវ៉ាក់សាំងរបស់ចិន នៅមន្ទីរពេទ្យមួយចំនួនក្នុងទីក្រុងភ្នំពេញ។ គេឃើញមានរដ្ឋមន្រ្តី អនុរដ្ឋមន្រ្តី និងមន្រ្តីជាន់ខ្ពស់មួយចំនួន រួមទាំងលោក ហ៊ុន ម៉ាណែត កូនប្រុសច្បងរបស់លោក ហ៊ុន សែន បានបង្ហាញខ្លួនក្នុងសកម្មភាពចាក់ថ្នាំវ៉ាក់សាំងនេះ។ ចំណែកលោក ហ៊ុន ម៉ានី កូនប្រពៅ និងលោក ឌី វិជ្ជា កូនប្រសាររបស់លោក ហ៊ុន សែន ត្រូវបានអាក់ខានទៅវិញ ក្រោមហេតុផលបញ្ហាសុខភាព។ ជុំវិញបញ្ហានេះ ក្រុមអ្នកឃ្លាំមើលនយោបាយសង្គម បានហៅសកម្មភាពវ៉ាក់សាំងនោះ ជាការចាក់ថ្នាំប៉ូវកម្លាំង ជំនួសថ្នាំវ៉ាក់សាំងរបស់ចិន ដែលធ្វើឲ្យមានមន្ទិលសង្ស័យច្រើនអន្លើ ដល់ប្រជាពលរដ្ឋ។ – (អត្ថបទបន្ថែមដោយ នគរ) / 11th-2-2021
អ្នកឃ្លាំមើលនិយាយថា ការទទួលយកវ៉ាក់សាំងចិន ជាហេតុផលនយោបាយ ជាជាងបញ្ហាការពារអាយុជីវិតពលរដ្ឋ
09th-2-2021
The Cambodia Daily
ប្រធានក្រុមប្រឹក្សាឃ្លាំមើលកម្ពុជា និងជាប្រធានក្រុមប្រឹក្សាភិបាលនៃ ចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃនេះថា «ការទទួលវ៉ាក់សាំងពីរដ្ឋាភិបាលចិន របស់លោក ហ៊ុន សែន ធ្វើឡើងក្នុងចេតនានយោបាយ ជាជាងដើម្បីសុវត្ថិភាពអាយុជីវិតពលរដ្ឋខ្មែរ»។
លោក ប្រតិកម្មថា វ៉ាក់សាំងស៊ីណូហ្វាម (Sinopharm vaccine) របស់ចិន មិនទាន់ទទួលស្គាល់ដោយអង្គការសុខភាពពិភពលោក (WHO) នោះទេ ប៉ុន្តែលោក ហ៊ុន សែន ព្រមទទួលយក និងប្រកាសឲ្យប្រជាពលរដ្ឋប្រើប្រាស់ ដោយគ្មានការធ្វើតេស្តឲ្យបានត្រឹមត្រូវទាល់តែសោះ ដែលខុសពីអ្វីដែលលោក តែងជូនដំណឹង និងដាក់បទបញ្ជាកន្លងមកអំពីការទប់ស្កាត់ជំងឺកូវីដ-១៩ (Covid-19) នេះ។
លោក ម៉ែន ណាត អះអាងថា កុំថាឡើយប្រជាពលរដ្ឋខ្មែរ មិនទុកចិត្តលើថ្នាំវ៉ាក់សាំងនេះ សូម្បីមន្ត្រីរាជការជាន់ខ្ពស់ក្នុងជួររដ្ឋាភិបាល ក៏មិនទុកចិត្តថ្នាំវ៉ាក់សាំងនេះដែរ។
ជាក់ស្តែងដូចជារដ្ឋមន្ត្រីការពារជាតិ លោក ទៀ បាញ់ ជាដើម ដែលបានលួចចាក់វ៉ាក់សាំងដោយស្ងាត់ៗរបស់ប្រទេសណាក៏មិនដឹង ដែលអាចជាចេតនា ដើម្បីជៀសវាងពីការចាក់វ៉ាក់សាំងចិន នេះ។
លោក ម៉ែន ណាត អំពាវនាវឲ្យពលរដ្ឋខ្មែរ រង់ចាំថ្នាំវ៉ាក់សាំង ដែលប្រកាសទទួលស្គាល់ពីអង្គការសុខភាពពិភពលោក (WHO) ជាជាងការប្រថុយចាក់វ៉ាកសាំងរបស់ប្រទេសនានា ដូចជាថ្នាំវ៉ាក់សាំងចិន ជាដើម ព្រោះថា បើចាក់ទៅហើយ ស្រាប់តែលោក ហ៊ុន សែន ប្រកាសថា មិត្តចិនប្រាប់ថា វ៉ាក់សាំងនោះនឹងបង្កជាជំងឺទៅថ្ងៃក្រោយ នោះអ្នកទទួលចាក់វាក់សាំងទាំងនោះ នឹងមានការស្តាយក្រោយអស់មួយជីវិត។
ជាងនេះទៀត លោក ហ៊ុន សែន ក៏បានប្រកាសមិនចាក់វ៉ាក់សាំងស៊ីណូវ៉ាម របស់ចិន នោះឡើយ ក្រោមហេតុផលថា លោកលើសអាយុដែលគេតម្រូវឱ្យចាក់ បើទោះបីជាលោកធ្លាប់ប្រកាសក្តែងៗ ថាលោក និងមន្ត្រីជាន់ខ្ពស់របស់ខ្លួន នឹងចាក់វ៉ាក់សាំងរបស់ចិន មុនគេក៏ដោយ។
លោក ហ៊ុន សែន បានអះអាងថា លោកទើបនឹងទទួលបានលិខិតផ្លូវការរបស់ការិយាល័យនៃ ទីប្រឹក្សាសេដ្ឋកិច្ច និងពាណិជ្ជកម្មរបស់ស្ថានទូតចិនប្រចាំនៅកម្ពុជា ថា វ៉ាក់សាំងដែលជាជំនួយរបស់ចិននេះ មានប្រសិទ្ធិភាពសម្រាប់តែមនុស្សមិនទូទៅនោះទេ។
ការអះអាងនេះ ធ្វើឡើងក្នុងពិធីសន្និសីទកាសែត ទទួលវ៉ាក់សាំងការពារកូវីដ-១៩ ដែលជាជំនួយរបស់រដ្ឋាភិបាលចិន នៅអាកាសយានដ្ឋានអន្តរជាតិភ្នំពេញ កាលពីថ្ងៃទី០៧ ខែកុម្ភៈ ឆ្នាំ២០២១ នេះ។
លោក ហ៊ុន សែន បញ្ជាក់ថា វ៉ាក់សាំងនេះ នឹងមិនមានប្រសិទ្ធិភាពសម្រាប់មនុស្សដែលមានអាយុចាប់ពីអាយុ ៦០ ឆ្នាំ ឡើងនោះទេ ខណៈរូបលោកផ្ទាល់ មានអាយុ ៦០ ឆ្នាំទៅហើយនោះ។ ដូច្នេះគាត់បានសម្រេចលុបចោលផែនការចាក់វ៉ាក់សាំងមុនគេរបស់ខ្លួនវិញ។
យ៉ាងណាក៏ដោយ លោក ហ៊ុន សែន មិនបានបញ្ជាក់ថា លោកនឹងចាក់វ៉ាក់សាំងនៅពេលណា និងវ៉ាក់សាំងរបស់ប្រទេសណានៅឡើយទេ លោកគ្រាន់តែបញ្ជាក់ថា ការិយាល័យនៃទីប្រឹក្សាសេដ្ឋកិច្ច និងពាណិជ្ជកម្មរបស់ស្ថានទូតចិនប្រចាំនៅកម្ពុជា កំពុងតាមដានថ្នាំវ៉ាក់សាំងស៊ីណូហ្វាម បន្តទៀត អំពីប្រសិទ្ធលើវ៉ាក់សាំងនេះ លើមនុស្សដែលមានវ័យលើសពី ៥៩ឆ្នាំឡើងទៅប៉ុណ្ណោះ។
កាលពីថ្ងៃទី០៧ ខែកុម្ភៈ ឆ្នាំ២០២១ លោក ហ៊ុន សែន បានចេញទៅទទួលវ៉ាក់សាំង ស៊ីណូហ្វាម ចំនួន ៦០ ម៉ឺនដូស ដែលមិត្តចិន បញ្ជូនមក។ ជាងនេះ នាយករដ្ឋមន្ត្រីកម្ពុជារូបនេះ បានអះអាងថា វ៉ាក់សាំង ៦០ម៉ឺនដូស ក្នុងជំហានដំបូងនេះ គឺសម្រាប់ក្រសួងសុខាភិបាល ៣០ម៉ឺនដូស និង ៣០ម៉ឺនដូសទៀត សម្រាប់ផ្នែកយោធា ប៉ុណ្ណោះ។
ជុំវិញរឿងនេះ ប្រមុខរដ្ឋាភិបាលកម្ពុជា បានគូសបញ្ជាក់ថា ជំនួយវ៉ាក់សាំងនេះ ជាសក្ខីភាពដែលបញ្ជាក់អំពីចំណងមិត្តភាពដែកថែបយូរអង្វែង រវាងកម្ពុជា-ចិន និងជាកិច្ចសហប្រតិបត្តិការគ្រប់ជ្រុងជ្រោយ ដែលបង្ហាញឲ្យឃើញពីវាសនារួមគ្នាផងដែរចំពោះចិន និងកម្ពុជា។
ក្រសួងសុខាភិបាល នៅថ្ងៃទី ០៨ ខែកុម្ភៈ ឆ្នាំ២០២១ បានចេញសេចក្តីប្រកាសព័ត៌មាន អំពីវ៉ាក់សាំងបង្ការជំងឺកូវីដ-១៩ ថា ពលរដ្ឋដែលអាយុអាចចាក់វ៉ាក់សាំងបាន គឺចាប់ពី ១៨ឆ្នាំ ទៅដល់ ៥៩ ឆ្នាំ ហើយអ្នកដែលមានអាយុចាប់ពី ៦០ ឆ្នាំ ឡើងទៅ ត្រូវរង់ចាំលទ្ធផលនៃការសិក្សាពីអ្នកជំនាញប្រទេសចិន បន្តទៀត។ ការចេញសេចក្តីថ្លែងការណ៍នេះ ធ្វើឡើងដោយផ្អែកលើការអះអាងរបស់នាយករដ្ឋមន្ត្រី តែប៉ុណ្ណោះ មិនមែនជាការរកឃើញដោយក្រសួងសុខាភិបាល ខ្លួនឯងនោះទេ៕
.
CWCI Cambodia 