អត្ថបទវេទិកាពលរដ្ឋ
វេទិកាពលរដ្ឋ បានចេញសេចក្តីថ្លែងការណ៍ អំពាវនាវលោក ហ៊ុន សែន ឲ្យស្គាល់ពីតួនាទីខ្លួន សមជាមេដឹកនាំជាតិ ដើម្បីផ្សះផ្សាបង្រួបបង្រួមជាតិ។ សេចក្តីថ្លែងការណ៍នេះ ចុះហត្ថលេខាដោយលោក គឹម សុខ ជាប្រធាននៃវេទិកាពលរដ្ឋនេះ ផ្សព្វផ្សាយកាលពីថ្ងៃទី២៣ ខែតុលា ឆ្នាំ២០២២។ សូមទាញយក «សេចក្តីថ្លែងការណ៍ (Download)» ឬអានអត្ថបទខាងក្រោម។
សេចក្តីថ្លែងការណ៍
លោក ហ៊ុន សែន បើនៅស្គាល់ឋានៈខ្លួនជានាយករដ្ឋមន្ត្រី
ត្រូវដើរតួនាទីផ្សះផ្សាជាតិ ឈប់ធ្វើមនោគមវិជ្ជាបំពុលសម្អប់ពង្វក់សង្គម
វេទិកាពលរដ្ឋ មើលឃើញថា រយៈពេលចុងក្រោយនេះ ជម្លោះរវាងលោក ហ៊ុន សែន និង លោក សម រង្ស៊ី ក្លាយជាសង្គ្រាមមនោគមវិជ្ជានយោបាយប្រទូសរ៉ាយ ដណ្ដើមឈ្នះបែបជាបុគ្គល ផ្ទុយពីបំណងប្រាថ្នារបស់ប្រជាពលរដ្ឋខ្មែរទូទៅ ដែលចង់ឃើញការសម្របសម្រួលផ្សះផ្សាគ្នា ដើម្បីដោះស្រាយវិបត្តិធំៗរបស់ជាតិ ជាពិសេស ទុក្ខវេទនារបស់ប្រជាពលរដ្ឋម្ចាស់ប្រទេស។
វេទិកាពលរដ្ឋ យល់ថា លោក ហ៊ុន សែន ក្នុងនាមជាអ្នកដឹកនាំប្រទេស គឺជាអ្នកមានតួនាទីសំខាន់ជាងគេ ក្នុងការនាំមុខ បំពេញកាតព្វកិច្ចផ្សះផ្សាបង្រួបបង្រួមជាតិ ដើម្បីបម្រើសេចក្ដីត្រូវការរបស់ប្រជាពលរដ្ឋ តាមស្មារតីរដ្ឋធម្មនុញ្ញ និង កិច្ចព្រមព្រៀងសន្តិភាពទីក្រុងប៉ារីស៍ ២៣ តុលា ១៩៩១។ ប៉ុន្តែលោក ហ៊ុន សែន បែរជាបង្កើតមនោគមវិជ្ជានយោបាយ «ហ៊ុន សែន និយម» មានលក្ខណៈបំពុលសម្អប់ ដែលមានកត្តាកំណត់ លើចិត្តសាស្ត្រញុះញង់បំបែកបំបាក់ និង ពង្វក់ពលរដ្ឋខ្មែរ ឲ្យស្អប់ខ្ពើមចងអាឃាតគ្នាទៅវិញ។
វេទិកាពលរដ្ឋ អំពាវនាវឲ្យលោក ហ៊ុន សែន បោះបង់មនោគមវិជ្ជាពង្វក់បំពុលសម្អប់នេះ ពីព្រោះនេះគឺជានយោបាយ ដែលងាយធ្វើឲ្យសង្គមខ្មែរបែកបាក់កាន់តែធំ និង ផ្ដល់ផលដ៏ធំធេងដល់មហិច្ឆតាឈ្លានពានរបស់បរទេស។ លោក ហ៊ុន សែន ពិតជាដឹងថា ពេលយើងជាខ្មែរកំពុងវក់ និង ពុលដោយការស្អប់គ្នា ពួកអ្នកដែលពេញចិត្តបំផុតនឹងស្ថានភាពនេះ គឺបរទេសឈ្លានពាន។ ដូច្នេះ បើលោក ហ៊ុន សែន មិនបម្រើមហិច្ឆតាឈ្លានពានរបស់បរទេសណាមួយទេ នោះលោក ហ៊ុន សែន ត្រូវងាកទៅដើរតួនាទីផ្សះផ្សាជាតិ ក្នុងឈ្មោះជានាយករដ្ឋមន្ត្រីរបស់ប្រទេសជាតិ មិនត្រូវឡំឡូកនឹងគំនិតអំណាចបុគ្គល ហួងហែងកាងបក្សសង្កត់ជាតិឡើយ។
ជាការពិតណាស់ថា ការសម្របសម្រួលរវាងលោក ហ៊ុន សែន និង លោក សម រង្ស៊ី ពេលនេះ ជារឿងស្មុគស្មាញពិបាកទៅរួចភ្លាមៗ ដោយសារជម្លោះនៃអ្នកនយោបាយទាំងពីរ ធ្លាក់ចូលលក្ខណៈបុគ្គល វាយប្រហារចោទប្រកាន់គ្នា ដល់ជម្រៅបន្ទុកពូជពង្សគ្រួសារ ជ្រុលពេក។ ប៉ុន្តែ បើលោក ហ៊ុន សែន នៅរក្សាស្មារតីជាអ្នកដឹកនាំជាតិ គាត់គួរពិចារណាថា បច្ចុប្បន្ននេះ ក្រៅពីលោក សម រង្ស៊ី ក៏លោក ហ៊ុន សែន គួរបើកចិត្ត រកការជជែកសម្រួលនយោបាយជាមួយលោក កឹម សុខា ដើម្បីបន្ធូរបន្ទុកវិបត្តិប្រទេសជាតិដែរ។
ជាក់ស្ដែង លោក កឹម សុខា កំពុងធ្វើទុក្ករកម្មនយោបាយ ប្រកាន់ធម៌អហិង្សា និង ការផ្សះផ្សាជាតិជានិច្ច ហើយច្រើនឆ្នាំចុងក្រោយនេះ លោក កឹម សុខា មិនធ្លាប់ប្រើសារប្រទូសនយោបាយបុគ្គលឡើយ។ ហេតុនេះ បើលោក ហ៊ុន សែន នៅតែមានលេសមិន រកដំណោះស្រាយនយោបាយផ្សះផ្សាជាតិ ដោយចាប់ផ្ដើមជាមួយលោក កឹម សុខា ទៀត នោះគឺច្បាស់ណាស់ថា លោក ហ៊ុន សែន គ្រាន់តែជានាយករដ្ឋមន្ត្រី ដែលចេះត្រឹមតែការពារកិត្តិយសបុគ្គលខ្លួន គ្រួសារហ៊ុន និងបំពេញបំណងឈ្លានពានរបស់បរទេស។
វេទិកាពលរដ្ឋ ចង់ឃើញមានការផ្សះផ្សាផ្ទៃក្នុងជាតិទាំងអស់គ្នា ដោយមិនផាត់ចោលបុគ្គលណាទេ ហើយក៏រឹតតែមិនអាច រុញចេញទៅទៀត នូវអ្នកនយោបាយមានសក្ដានុពលដូចលោក សម រង្ស៊ី។ យ៉ាងណា ដំណាក់កាលនេះ យើងខ្ញុំយល់ថា យ៉ាងហោចណាស់ ក៏គួរបើកទំព័រដោះស្រាយនយោបាយ ហ៊ុន សែន-កឹម សុខា ដែរ បើលោក ហ៊ុន សែន នៅចាត់ទុកខ្លួនគាត់ជានាយករដ្ឋមន្ត្រីជាតិ។
សហរដ្ឋអាមេរិក ថ្ងៃទី២៣ ខែតុលា ឆ្នាំ២០២២
គឹម សុខ
ប្រធានវេទិកាពលរដ្ឋ
