ពលរដ្ឋខ្មែរ និងចលនានិស្សិតដើម្បីលទ្ធិប្រជាធិបតេយ្យ ធ្វើបាតុកម្មនៅខាងមុខស្ថានទូតខ្មែរប្រចាំសហរដ្ឋអាមេរិក នៅទីក្រុងវ៉ាស៊ីនតុន ថ្ងៃទី២៨ ខែកញ្ញា ឆ្នាំ២០២០ ក្នុងគោលបំណងទាមទារឲ្យរដ្ឋាភិបាល ហ៊ុន សែន ដោះលែងក្រុមសកម្មជនខ្មែរ ដែលត្រូវបានអាជ្ញាធរចាប់ឃុំខ្លួនជាបន្តបន្ទាប់ នៅក្នុងប្រទេសកម្ពុជា។
អ្នករៀបចំបាតុកម្មនេះ លោក ទូច វិបុល ប្រធានប្រតិបត្តិនៃចលនានិស្សិតដើម្បីលទ្ធិប្រជាធិបតេយ្យ បានបញ្ជាក់ថា មានបងប្អូនខ្មែរចូលរួម ១០នាក់ ខណៈពេលស្ថានភាពមេរោគកូវីដ-១៩ (Covid-19) ជាមេរោគរាតត្បាតជាសកល។ ក្រោយពីក្រុមបាតុករបានថ្លែងសាររួច ពួកគេបានទៅចុចកណ្តឹងផង និងគោះទ្វារស្ថានទូតផង ដើម្បីដាក់ញត្តិ ប៉ុន្តែគ្មានតំណាងណាម្នាក់ ចេញមកទទួលញត្តិទេ។ ក្រុមបាតុករ ក៏សម្រេចចិត្តដាក់ញត្តិនោះ ចូលទៅក្នុងប្រអប់សំបុត្ររបស់ស្ថានទូតខ្មែរតែម្តង។ នេះបើតាមវីដេអូផ្សាយផ្ទាល់របស់ សារព័ត៌មាន ឌីខេមបូឌា ដេលី (The Cambodia Daily) នៅថ្ងៃបាតុកម្ម។
ខាងក្រោមនេះ ជាខ្លឹមសារទាំងនៃញត្តិ ដែលផ្ញើជូនទៅលោក ហ៊ុន សែន។ (អាចទាញយកត្រង់នេះ / Download)។
ញត្តិជូនរដ្ឋាភិបាលកម្ពុជា
តាមរយៈលោក ជុំ សុន្ទរី ឯកអគ្គរាជទូតកម្ពុជាប្រចាំសហរដ្ឋអាមេរិក
យើងខ្ញុំ ជាពលរដ្ឋខ្មែរ-អាមេរិកាំង មកជួបជុំគ្នាសម្តែងមតិនៅថ្ងៃនេះ ដើម្បីផ្ញើសារសំឡេង និងការទាមទាររបស់យើងខ្ញុំ តាមរយៈលោកឯកអគ្គរាជទូតកម្ពុជាប្រចាំសហរដ្ឋអាមេរិក ជូនលោកនាយករដ្ឋមន្ត្រី ហ៊ុន សែន និងរដ្ឋាភិបាលរបស់លោក ។ យើងខ្ញុំ ជម្រុញលោកនាយករដ្ឋមន្ត្រី ឲ្យស្តារមុខមាត់ប្រទេសកម្ពុជាទ្បើងវិញ ដោយដោះលែងអ្នកទោសមនសិការ និងអ្នកទោសនយោបាយទាំងអស់ ដោយគ្មានលក្ខខណ្ឌ និងជាបន្ទាន់។
យើងខ្ញុំ សូមទទូចឲ្យដោះលែងលោក រ៉ុង ឈុន ព្រះភិក្ខុ កើត សារ៉ាយ លោក មាន ព្រហ្មមុនី កញ្ញា អេង ម៉ាឡៃ (ហៅ សូ មេត្តា) លោក មួង សុភក្រ្ត លោក ថា ឡាវី យុវតី ឈឿន ដារ៉ាវី លោក ហ៊ុន វណ្ណៈ យុវតី ស កន្និកា លោក សួង សុភ័ណ្ឌ កញ្ញា សាន ស្រីនិច លោក ថុន រដ្ឋា កញ្ញា ភួង កែវរស្មី កញ្ញា ឡុង គន្ធា លោក គា សុគន្ធ លោក ឡុង ពុទ្ធារ៉ា និងអ្នកឯទៀត ដើម្បីពួកគាត់អាចអនុវត្តសិទ្ធិស្របតាមរដ្ឋធម្មនុញ្ញ ។ យើងខ្ញុំក៏ទទូចឲ្យទម្លាក់ចោលបទចោទនានា ប្រឆាំងនឹងអ្នកនយោបាយ និងផ្ដល់សេរីភាពនយោបាយពេញលេញ ដល់ពួកគាត់ឡើងវិញ រួមមាន លោក កឹម សុខា លោក សម រង្ស៊ី និងសហការីទាំងអស់ នៃគណបក្សសង្គ្រោះជាតិ។
លោក ឯកអគ្គរាជទូតកម្ពុជា និងលោកនាយករដ្ឋមន្ត្រី ហ៊ុន សែន ដឹងច្បាស់ណាស់ថា ក្រៅពីលោក កឹម សុខា លោក សម រង្ស៊ី និងសហការីជាន់ខ្ពស់ នៃគណបក្សសង្គ្រោះជាតិនោះ អ្នកទោសមនសិការគ្រប់រូប សុទ្ធតែជាសកម្មជនសង្គម និងពលរដ្ឋសាមញ្ញ ដែលហ៊ានលះបង់សេចក្ដីសុខផ្ទាល់ខ្លួន ជាពលរដ្ឋល្អថ្លៃថ្នូរ ក្នុងគោលដៅនាំចម្រើនដល់លទ្ធិប្រជាធិបតេយ្យ យុត្តិធម៌សង្គម និងបុព្វហេតុទឹកដីជាតិ ។ សកម្មភាពពលិកម្មរបស់ពួកគាត់ គឺដើម្បីប្រយោជន៍ជាតិយើងទាំងអស់គ្នា ដែលប្រកាសទទួលស្គាល់ដោយក្រុមអ្នកសង្កេតការណ៍គ្រប់មជ្ឈដ្ឋាន ទាំងអ្នកការទូត ជាតំណាងនៃអង្គការសហប្រជាជាតិ សហភាពអឺរ៉ុប និងបណ្ដាប្រទេសប្រជាធិបតេយ្យធំៗ ជាពិសេសសហរដ្ឋអាមេរិក។
សមាជិកសភាអាមេរិក អាទ្បែន ទ្បូវ៉ែនថល (Congressman Alan Lowenthal) មានប្រសាសន៍ថា «សកម្មជនទាំងអស់ គួរទទួលបាននូវការសាទរលេីកទឹកចិត្ត គឺពុំមែនដាក់ពន្ធនាគារទេ។ ពួកគាត់ គឺជាអនាគតកម្ពុជា» ។ ឧបការីរដ្ឋមន្ត្រីក្រសួងការបរទេសអាមេរិក ទទួលបន្ទុកលទ្ធិប្រជាធិបតេយ្យ សិទ្ធិមនុស្ស និងការងារ លោក រ៉ូប៊ឺត អេ. ដេស្ត្រូ (Robert A. Destro) បានរំឭកថា «សិទ្ធិសេរីភាពបញ្ចេញមតិ និងសិទ្ធិសេរីភាពនៃការជួបជុំតវ៉ា មានចែងក្នុងរដ្ឋធម្មនុញ្ញនៃប្រទេសកម្ពុជា ។ សហរដ្ឋអាមេរិក ព្រួយបារម្ភយ៉ាងខ្លាំងចំពោះការចាប់ខ្លួន អ្នកដែលអនុវត្តសេរីភាពទាំងនេះ ហើយយើងទទូចឲ្យ រដ្ឋាភិបាល ដោះលែងពួកគាត់ជាបន្ទាន់ និងអនុញ្ញាតឲ្យពួកគាត់អាចបញ្ចេញមតិបាន»។
លោកស្រី រ៉ូណា ស្មីត ( Rhona Smith ) អ្នករាយការណ៍ពិសេសនៃអង្គការសហប្រជាជាតិ ផ្នែកសិទ្ធិមនុស្សនៅកម្ពុជា និងជាអ្នកតាមដានស្ថានការណ៍កម្ពុជាយ៉ាងដិតដល់ ក៏បានសម្ដែងកង្វល់ ចំពោះការចាប់ខ្លួនសកម្មជនខ្មែរជាបន្តបន្ទាប់ ។ លោកស្រី មានប្រសាសន៍ថា «សិទ្ធិសេរីភាពក្នុងការ បញ្ចេញមតិ បង្កើតសមាគម និងការជួបប្រជុំដោយសន្តិវិធី ត្រូវបានការពារដោយនិយាម និងបទដ្ឋាន សិទ្ធិមនុស្សអន្តរជាតិ ក៏ដូចជារដ្ឋធម្មនុញ្ញកម្ពុជាផងដែរ» ។ លោកស្រី ជម្រុញឲ្យអាជ្ញាធរកម្ពុជា «ធានាថា សិទ្ធិទាំងនេះត្រូវបានគោរព និងការពារ ហើយបង្កើតបរិយាកាសមួយ ដែលបុគ្គលម្នាក់ៗអាចអនុវត្ត សិទ្ធិទាំងនេះ»។
ប្រជាពលរដ្ឋខ្មែរគ្រប់មជ្ឈដ្ឋាន អ្នកស្ថានការណ៍ជាតិនិងអន្តរជាតិ ដៃគូវិនិយោគបរទេសធំៗ និងសហគមន៍ម្ចាស់ជំនួយអន្តរជាតិ ដឹងច្បាស់ណាស់ថា ការចាប់ឃុំខ្លួនព្រះសង្ឃ ក្រុមយុវជន និងយុវតីថ្មីៗនេះ គឺជាការរំលោភលើច្បាប់បាតុកម្មដោយសន្តិវិធី និងជាពិសេសបំពានយ៉ាងធ្ងន់ធ្ងរ លើខ្លឹមសាររដ្ឋធម្មនុញ្ញ នៃព្រះរាជាណាចក្រកម្ពុជា។ ពេលរដ្ឋាភិបាលខ្លួនឯង មិនគោរពច្បាប់ដោយខ្លួនឯង គឺជាការមើលងាយប្រជាពលរដ្ឋខ្មែរម្ចាស់ប្រទេសផង និងជាការចំអកខ្លាំងណាស់ ចំពោះសហគមន៍អន្តរជាតិ ដែលតែងតែមានសមានចិត្តជួយជ្រោមជ្រែងជីវភាពពលរដ្ឋខ្មែរទូទៅផង ។
ប្រជាពលរដ្ឋខ្មែរគ្រប់មជ្ឈដ្ឋាន អ្នកស្ថានការណ៍ជាតិនិងអន្តរជាតិ ដៃគូវិនិយោគបរទសធំៗ និង សហគមន៍ម្ចាស់ជំនួយអន្តរជាតិ ដឹងច្បាស់ណាស់ថា រដ្ឋាភិបាលនៃលោកនាយករដ្ឋមន្ត្រី ហ៊ុន សែន ប្រើប្រាស់បទញុះញង់ឲ្យប្រព្រឹត្តបទល្មើស គន្ថីទី៤ មាតិកាទី១ ជំពូកទី៣ ផ្នែកទី៣ នៃក្រមព្រហ្មទណ្ឌ ដែលមានវិសមិតភាពនឹងខ្លឹមសាររដ្ឋធម្មនុញ្ញ ដើម្បីជាមធ្យោបាយបំភិតបំភ័យពលរដ្ឋស្លូតត្រង់ ដែលចង់បញ្ចេញមតិ និងចាប់អ្នកតវ៉ាអហិង្សា ដាក់គុកងាយៗ ។ ពេលរដ្ឋាភិបាលខ្លួនឯង ប្រើឈ្មោះច្បាប់ដើម្បី ធ្វើទុក្ខបុកម្នេញពលរដ្ឋជាតិឯងបែបនេះ គឺជាការបំបាក់ស្មារតីជាតិឯងផង បន្លាចក្រុមវិនិយោគិនបរទេស ល្អៗផង និងធ្វើឲ្យសហគមន៍ម្ចាស់ជំនួយអន្តរជាតិធំៗ ធុញទ្រាន់នឹងស្ថានភាពកម្ពុជាផង ព្រោះឃើញ តែទង្វើបំភ្លៃ និងការបំភ័ន្ដរបស់រដ្ឋាភិបាលកម្ពុជា។
ប្រជាពលរដ្ឋខ្មែរគ្រប់មជ្ឈដ្ឋាន អ្នកស្ថានការណ៍ជាតិ និងអន្តរជាតិ ដៃគូវិនិយោគបរទសធំៗ និង សហគមន៍ម្ចាស់ជំនួយអន្តរជាតិ ដឹងច្បាស់ណាស់ថា រដ្ឋាភិបាលនៃលោកនាយករដ្ឋមន្ត្រី ហ៊ុន សែន កំពុងតែដឹកនាំប្រាសចាកកាន់តែឆ្ងាយពីគោលការណ៍ប្រជាធិបតេយ្យ និងសន្ដិភាព ដោយការប្រើប្រាស់ វិធីចោទប្រកាន់ខ្មែរជាតិឯង ជាជនក្បត់ជាតិ ឬជាឧទ្ទាមក្រៅច្បាប់ ពេលមានទស្សនៈផ្ទុយគ្នាអំពីវិវត្តន៍សង្គម ។ លទ្ធិប្រជាធិបតេយ្យរឹងមាំ និងសន្ដិភាពសុខសាន្តពិត សម្រាប់ប្រទេសជាតិមួយ ជាសកល គឺទាល់តែមានគោលការណ៍ដំណោះស្រាយនូវរាល់ជម្លោះ និងការខ្វែងគំនិតគ្នា ដោយគ្មានអំពើហិង្សា គ្រប់ទម្រង់ ព្រមទាំងការផ្សះផ្សាគ្នាជាមូលដ្ឋាន គឺពុំមែនទង្វើសម្លុតបំភ័យ ខ្នោះ និងគុកទេ នៅពេល ភាគីណាមួយ គ្រាន់តែសម្ដែងទស្សនៈមតិរបស់ពួកគេនោះ។
ករណីទាំងអស់នេះ កំពុងធ្វើឱ្យអ្នកវិនិយោគធំៗ ដៃគូអភិវឌ្ឍន៍នានា និងសហគមន៍អន្តរជាតិ មើលមកមេដឹកនាំកម្ពុជា ក្នុងផ្លូវកាន់តែអាក្រក់ ។ ពលរដ្ឋខ្មែរកំពុងធ្លាក់ក្នុងស្ថានភាពជូរចត់ បាត់ការងារជាប់បំណុលវ័ណ្ឌក និងរអិលចូលគ្រោះទុរភិក្ស ។ រដ្ឋាភិបាល កំពុងប្រឈមសម្ពាធធ្ងន់ធ្ងរពីសហគមន៍ អន្តរជាតិលោកសេរីប្រជាធិបតេយ្យ ៖ សហភាពអឺរ៉ុបព្យួរប្រព័ន្ធអនុគ្រោះពន្ធពាណិជ្ជកម្ម អ៊ីប៊ីអេ (EBA) ២០% និងនិន្នាការនៃការដាក់កម្ពុជាក្នុងបញ្ជីខ្មៅនៃបណ្ដាប្រទេសលាងលុយកខ្វក់ ព្រមទាំងសហរដ្ឋ អាមេរិក ដាក់ទណ្ឌកម្មលើក្រុមហ៊ុនអាជីកម្មមន្ត្រីជាន់ខ្ពស់ខ្មែរ-ចិន ។ ប្រទេសជាតិកម្ពុជា បាត់កេរ្តិ៍ឈ្មោះ និងលស់ព្រលឹងជាតិ ដែលរុំរុកដោយវិបត្តិបំណុលបរទេស និងជម្ងឺជម្លោះផ្ទៃក្នុងជាតិ។
រដ្ឋមន្ត្រីក្រសួងការបរទេស លោក ម៉ៃឃើល ផុមភេអូ (Michael R. Pompeo) ថ្លែងបញ្ជាក់ច្បាស់ នូវគោលជំហររបស់សហរដ្ឋអាមេរិកថា «យើងនឹងមិនលើកលែងឱ្យសកម្មភាពទាំងទ្បាយណា ដែលប្រឆាំងនឹងជនស្លូតត្រង់ ហើយសហរដ្ឋអាមេរិក នឹងឈរការពារប្រជាពលរដ្ឋខ្មែរជានិច្ច»។ លោក ឯកអគ្គរាជទូតខ្មែរប្រចាំអាមេរិក និងលោកនាយករដ្ឋមន្ត្រី ហ៊ុន សែន ដឹងច្បាស់ណាស់ថា ជំហរការទូត និងការសម្រេចចិត្តនានារបស់សហរដ្ឋអាមេរិក មានលក្ខណៈជា តំណាងឥទ្ធិពលធំណាស់ លើជំហរការទូតនៃអង្គការសហប្រជាជាតិ បណ្ដាប្រទេសក្នុងសហភាពអឺរ៉ុប និងក្រុមប្រទេសសម្ព័ន្ធមិត្តលោកសេរីផ្សេងទៀត ដូចជា កាណាដា អង់គ្លេស ជប៉ុន និងអូស្ត្រាលី ជាដើម។
យើងខ្ញុំ មើលឃើញថា ប្រទេសកម្ពុជាយើង នឹងត្រូវជួបវិបត្តិធំៗច្រើនទៀត ជាពិសេសរងសម្ពាធ ពីភាគីសហគមន៍អន្តរជាតិប្រជាធិបតេយ្យ ប្រសិនបើរដ្ឋាភិបាលនៃលោក ហ៊ុន សែន មិនសម្រួលស្ថានការណ៍នយោបាយ ទៅកាន់ការស្ដារប្រជាធិបតេយ្យដ៏ក្មេងខ្ចីរបស់កម្ពុជាឡើងវិញ។
ដើម្បីស្ដារមុខមាត់កម្ពុជាយើង សូមនាយករដ្ឋមន្ត្រី ហ៊ុន សែន ចាប់ផ្ដើមដោះលែងអ្នកទោស មនសិការ និងអ្នកទោសនយោបាយទាំងអស់ ។ យើងខ្ញុំ ក៏ទាមទារឲ្យរដ្ឋាភិបាលនៃលោក ហ៊ុន សែន ស្នើទៅសភាកម្ពុជា ធ្វើវិសោធនកម្មលុបចោល « បទញុះញង់ឲ្យប្រព្រឹត្តបទល្មើស » ដើម្បីធានា សេរីភាពបញ្ចេញមតិ និងការជួបជុំសម្តែងមតិរបស់ពលរដ្ឋ ដោយគ្មានការភ័យខ្លាច ឲ្យស្របនឹងសេចក្ដី ប្រកាសជាសកលស្ដីពីសិទ្ធិមនុស្ស ព្រមទាំងកតិកាសញ្ញាអន្តរជាតិ ស្តីពីសិទ្ធិពលរដ្ឋ និងនយោបាយ។
សូមលោក ឯកអគ្គរាជទូត បញ្ជូនញត្តិរបស់យើងខ្ញុំ ទៅកាន់រដ្ឋាភិបាលកម្ពុជា ឲ្យបានឆាប់ ហើយយើងខ្ញុំសង្ឃឹមថា លោកឯកអគ្គរាជទូត មានសេចក្ដីក្លាហានគ្រប់គ្រាន់ នឹងបំពេញតួនាទីជូនយោបល់ដល់លោកនាយករដ្ឋមន្ត្រី ហ៊ុន សែន ឲ្យដោះលែងក្រុមអ្នកទោសមនសិការ និង អ្នកទោសនយោបាយគ្រប់រូប ជាបន្ទាន់ និងឲ្យលោកនាយករដ្ឋមន្ត្រី ចេះបន្ទន់ឥរិយាបថរកការផ្សះផ្សាជាតិ ដើម្បីស្ដារកិត្តិយសប្រទេសជាតិកម្ពុជា តាមការចង់បានរបស់ប្រជាពលរដ្ឋខ្មែរទូទៅ ក្រុមវិនិយោគិនបរទេស ដែលមានសក្ដានុពលល្អៗ ដៃគូអភិវឌ្ឍន៍នានា និងសហគមន៍អន្តរជាតិម្ចាស់ជំនួយធំៗរបស់កម្ពុជា។
ធ្វើនៅរដ្ឋធានីវ៉ាស៊ីនតុន ថ្ងៃទី២៨ ខែកញ្ញា ឆ្នាំ២០២០
ហត្ថលេខា និងឈ្មោះ (ទាញយកត្រង់នេះ / Download)
អត្ថបទ៖ ចលនានិស្សិត SMD
.