សហគមន៍ខ្មែរ នៅក្នុងប្រទេសន័រវេស៍ (Norway) សម្រេចលុបចោលគម្រោងរៀបចំពិធីបុណ្យចូលឆ្នាំថ្មីប្រពៃណីជាតិខ្មែរ នៅខែមេសា ខណៈមេរោគកូរ៉ូណា (Covid-19) ឆ្លងកើនឡើង ៧២០ នាក់ (VG -live) ដែលក្នុងនោះ អ្នកឆ្លងថ្មីសម្រាប់ថ្ងៃនេះ មាន ៨៩ នាក់ បើគិតមកទល់ម៉ោង ០៥:១៦ នាទីល្ងាច (ម៉ោងក្នុងតំបន់) ថ្ងៃទី ១២ មីនា ឆ្នាំ២០២០ ត្រូវនឹងម៉ោង ១១:១៦ នាទីយប់ ម៉ោងនៅកម្ពុជា ថ្ងៃទី ១២ មីនា ដដែល។
សេចក្តីជូនដំណឹងរបស់សមាគមពុទ្ធសាសនិកជនខ្មែរ និង សមាគមខ្មែរ ធ្វើនៅទីក្រុងគ្រីស្ទានសាន់ នាថ្ងៃទី ១១ ខែមីនានេះ បានឲ្យដឹងថា គម្រោងរៀបចំពិធីចូលឆ្នាំថ្មី ចំនួន ២ កន្លែងផ្សេងគ្នា នៅក្នុងខែមេសា ត្រូវបានផ្អាកទាំងស្រុង ដើម្បីចូលរួមជាមួយរដ្ឋាភិបាលន័រវេស៍ ក្នុងការទប់ស្កាត់ការរីករាលដានមេរោគ Covid-19។ «គម្រោងកម្មវិធីចូលឆ្នាំនេះ ទាំងនៅពុទ្ធមណ្ឌល សង្កាត់លីឡេសាន់ និង នៅសាលវេណេស្លា សង្កាត់វេណេស្លា នឹងមិនប្រារព្ធធ្វើទេ» នេះបើតាមខ្លឹមសារនៃសេចក្តីជូនដំណឹង ដែលមានសរសេរជាភាសាខ្មែរ និងភាសាន័រវេស៍ ហើយនិងចុះហត្ថលេខាដោយ លោក ម៉ែន ណាត ប្រធានសមាគមពុទ្ធសាសនិកជនខ្មែរ និង លោក ពុធ ប៉ាន ប្រធានសមាគមខ្មែរ (សូមទាញយក ឬ Download)។
នៅប្រទេសន័រវេស៍ មានពលរដ្ឋខ្មែរ សរុប ៦០៦ នាក់ (អ្នកកាន់ពុទ្ធសាសនា មាន ៥៨៧ នាក់) – ត្រង់នេះ សូមអានលំអិត។ នេះបើតាមរបាយការណ៍របស់សហភាពពុទ្ធសាសនា ដែលបានដកស្រង់ពីស្ថាប័នស្ថិតិជាតិ ក្រោយធ្វើបច្ចុប្បន្នភាព កាលពីថ្ងៃទី ១៤ មីនា ២០១៩ កន្លងទៅ។
គួសបញ្ជាក់ថា ពលរដ្ឋន័រវេស៍ កាលពីថ្ងៃទី ២៦ កុម្ភៈ ២០២០ បានឆ្លងមេរោគកូរ៉ូណា តែ ១ ករណីប៉ុណ្ណោះ។ លុះគិតមកដល់ពេលនេះ គឺមានរយៈពេល ២ សប្តាហ៍ ដែលមេរោគនេះ បានឆ្លងកើនឡើងជាង ៦០០ នាក់ នៅក្នុងប្រទេសន័រវេស៍នេះ។ ប៉ុន្តែមិនទាន់មានអ្នកណាម្នាក់ បាត់បង់ជីវិតដោយសាមេរោគកូរ៉ូណានេះនៅឡើយទេ។
នៅថ្ងៃទី ១២ ខែមីនានេះ សាលារៀន និង មេតេយ្យជាច្រើន បានបិទ្វារជាបន្តបន្ទាប់ បន្ទាបន្ទាប់ពីមានសិស្សសាលា និងបុគ្គលិកសិក្សា បានឆ្លងមេរោគកូរ៉ូណា (Covid-19) ក្រោយពីពួកគេ ប្រឡប់ពីសម្រាកវិសមកាល នៅប្រទេសអ៊ីតាលី៕
(អត្ថបទដោយលោក ម៉ែន ណាត)
.