លោក ហ៊ុន សែន ថ្លែងក្នុងសន្និសីទសារព័ត៌មាន នៅទីស្តីការគណៈរដ្ឋមន្រ្តី ថ្ងៃទី ០៧ ខែមេសា ឆ្នាំ ២០២០ យ៉ាងដូច្នេះថា «សូមអធ្យាស្រ័យចំពោះពលរដ្ឋកម្ពុជា ១៥០ នាក់ ដែលត្រៀមហោះចេញពីប្រទេស ម៉ាឡេស៊ី តាមជើងហោះហើរ នៅព្រឹកនេះ មិនអនុញ្ញាត ឲ្យត្រឡប់មកកម្ពុជាវិញទេ ក្នុងស្ថានភាពនេះ {ការរីករាលដាលមេរោគកូរ៉ូណា ឬកូវីដ១៩ (Covid-19)}»។ លោក បានស្នើឲ្យពលរដ្ឋខ្មែរ ទាំង ១៥០ នាក់នោះ បន្តស្នាក់នៅប្រទេសម៉ាឡេស៊ី ជាបណ្តោះអាសន្ន។
មេដឹកនាំកម្ពុជា លោក ហ៊ុន សែន ធ្លាប់បានអនុញ្ញាតឲ្យកប់ាល់ទេសចេរណ៍ Westerdam ដែលផ្ទុកអ្នកដំណើរជាង ២០០០ នាក់ ចូលចតនៅ ទីក្រុងព្រះសីហនុ កាលពីថ្ងៃទី ១៤ កុម្ភៈ {ទិវានៃក្តីស្រឡាញ់} ក្រោយពីប្រទេសចំនួន ៦ ( ថៃ ហ្វីលីពីន សិង្ហបុរី វៀតណាម ជប៉ុន និង តៃវ៉ាន់) បានបដិសេធកប៉ាល់នេះ មិនឲ្យចូលចត ដោយសារការភ័យខ្លាចជំងឺកូរ៉ូណា។ ប៉ុន្តែលោក ហ៊ុន សែន និងក្រុមមន្រ្តីរបស់លោក បានទៅស្វាគមន៍អ្នកដំណើរនៃកប៉ាល់ Westerdam ហើយថែមទាំងឲ្យស្នាក់នៅសណ្ឋាគារទំនើបៗ និង ឲ្យមន្រ្តីសាលាក្រុងភ្នំពេញ ជូនអ្នកទេសចរទាំងនោះ ដើរកំសាន្ត ក្នុងទីក្រុងភ្នំពេញផងទៀត។ កាលនោះក្រុមមន្រ្តី និងបណ្តាញសារព័ត៌មានរបស់លោក ហ៊ុន សែន បានបន្ទរថា «សម្តេច ហ៊ុន សែន ជាមេដឹកនាំចិត្តធម៌ ជួយសង្រ្គោះពិភពលោក»។
ខណៈពេលលោក ហ៊ុន សែន មិនអនុញ្ញាតឲ្យពលរដ្ឋខ្មែរ ១៥០ នាក់ វិលចូលកម្ពុជានេះ នាំឲ្យមានសំណួរជាច្រើន ចំពោះវីធានការប្លែកៗ របស់រដ្ឋាភិបាលកម្ពុជា មកលើពលរដ្ឋខ្លួនឯង ដែលបង្កឲ្យមានការព្រួយបារម្ភអំពីលទ្ធភាព បន្តស្នាក់នៅក្នុងប្រទេសម៉ាឡេស៊ី របស់ពួកគេ ទាំងការហូបចុក និងចំណាយផ្សេងៗ។
ក្រុមអ្នកឃ្លាំមើល និងបក្សប្រឆាំងដែលត្រូវបានរំលាយ បានអំពាវឲ្យលោក ហ៊ុន សែន រិះរកមធ្យោបាយជាថ្មី ជួយសង្គ្រោះពលរដ្ឋខ្មែរ ដែលជាប់គាំងនៅប្រទេសម៉ាឡេស៊ី បានត្រឡប់មកកម្ពុជាវិញ ដូចដែលប្រទេស ថៃ និងប្រទេសមួយចំនួន ធ្លាប់បានធ្វើ គឺគេប្រើសេវាហោះហើរ ទៅទទួលពលរដ្ឋរបស់គេ ទៅទទួលពលរដ្ឋរបស់គេ ដែលជាប់គាំងនៅ ទីក្រុងវូហាន ប្រទេសចិន ក្នុងអំឡុងការផ្ទុះជំងឺកូរ៉ូណាដំបូងៗ៕
អត្ថបទដោយ នគរ /០៨ មេសា ២០២០
.