តើនាយករដ្ឋមន្ត្រី ហ៊ុន សែន ត្រូវទុកដាក់យ៉ាងណាចំពោះលោក សុខ ទូច ប្រធានរាជបណ្ឌិត្យសភាកម្ពុជា ដែលហ៊ាននិយាយថា ភូមិកំណើតប្រធានរដ្ឋសភា លោក ហេង សំរិន (ឃុំកក់ ស្រុកពញាក្រែក ត្បូងឃ្មុំ) ស្ថិតនៅលើទឹកដីយួន ?
តាមដំណឹងមកថា លោក ហេង សំរិន និងសាច់ញាតិ សំដែងការមិនពេញចិត្ត ចំពោះការលើកឡើងរបស់លោក សុខ ទូច ពីព្រោះទីនោះ ជាស្រុកភូមិរបស់ពួកគេ តាំងពីបូរមបូរាណមក។ លោក សុខ ទូច លើកឡើងមកនោះ បានរំលោភមាត្រា២ និង មាត្រា៥៥ នៃរដ្ឋធម្មនុញ្ញ ដែលមានទោសទណ្ឌ ស្មើនឹងអំពើក្បត់ជាតិ ឬជាតិប្រហារ។ ដូចគ្នានេះដែរ ករណីលោក សុខ ឥសាន និងលោក ផៃ ស៊ីផាន ថ្លែងគាំទ្រការលើកឡើងរបស់លោក សុខ ទូច នោះ ក៏ត្រូវមានទោស ពីបទសមគំនិត ក្នុងការប្រើប្រាស់ទឹកដីកម្ពុជា ដើម្បីគាំទ្រដោយចំហ និងជាការបម្រើមហិច្ឆតារបស់បរទេសជិតខាង ដែលឈ្លានពានទឹកដីខ្មែរជាប់មិនដាច់។
រដ្ឋធម្មនុញ្ញ មាត្រា២៖ «បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានដាច់ខាតក្នុងព្រំដែនរបស់ខ្លួន ដែលមានកំណត់ក្នុងផែនទី ខ្នាត ១/១០០.០០០ ធ្វើនៅចន្លោះឆ្នាំ១៩៣៣-១៩៥៣ ហើយដែលត្រូវបានទទួលស្គាល់ជាអន្តរជាតិ នៅចន្លោះឆ្នាំ១៩៦៣-១៩៦៩»។
រដ្ឋធម្មនុញ្ញ មាត្រា៥៥៖ «សន្ធិសញ្ញា និង កិច្ចព្រមព្រៀងទាំងឡាយណា ដែលមិនស្របនឹងឯករាជ្យ អធិបតេយ្យ បូរណភាពទឹកដី អព្យាក្រឹតភាព និងឯកភាពជាតិរបស់ព្រះរាជាណាចក្រកម្ពុជា ត្រូវលុបចោល»។
បញ្ជាក់៖ ការអនុវត្តសន្ធិសញ្ញាព្រំដែនបំពេញបន្ថែម ឆ្នាំ២០០៥ ព្រមទាំងប្រើផែនទីព្រំដែន ដែលអមសន្ធិសញ្ញាព្រំដែន ឆ្នាំ១៩៨៥ ខ្នាត ១/១០០ពាន់ «បោះពុម្ភឡើងវិញដោយវៀតណាម» និង ផែនទី ខ្នាត ១/៥០ពាន់ នោះវាផ្ទុយនឹងរដ្ឋធម្មនុញ្ញ មាត្រាទី២ និងមាត្រា៥៥ ព្រមទាំងផ្ទុយពីកិច្ចព្រមព្រៀងក្រុងប៉ារីស ឆ្នាំ១៩៩១ ដែលតម្រូវឲ្យរដ្ឋាភិបាល ត្រូវលុបចោល ពីព្រោះវាជា សន្ធិសញ្ញាខុសច្បាប់ ជាកិច្ចព្រមព្រៀងខុសច្បាប់ ដែលធ្វើឡើងនៅក្រោមការត្រួតត្រារបស់វៀតណាម នៅមុនឆ្នាំ១៩៩០។ – (អត្ថបទដោយ ម៉ែន ណាត)
មន្ត្រី CPP (សុខ ឥសាន និង ផៃ ស៊ីផាន) គាំទ្រថាភូមិលោក ហេង សំរិន ស្ថិតក្នុងទឹកដីវៀតណាម
(Mon, 21-8-2017, មាស សុខជា, Phnom Penh Post)
ភ្នំពេញ៖ ខណៈសាធារណជន កំពុងរិះគន់ប្រធានរាជបណ្ឌិត្យសភា លោក សុខ ទូច ដែលនិយាយថាភូមិកំណើតរបស់លោក ហេង សំរិន ប្រធានរដ្ឋសភា ស្ថិតនៅក្នុងទឹកដីវៀតណាម មន្ត្រីគណបក្សកាន់អំណាច បានការពារការលើកឡើងនេះ ដោយថ្លែងថា ការលើកឡើងរបស់លោក សុខ ទូច គឺត្រឹមត្រូវ។
អ្នកនាំពាក្យ គណបក្សប្រជាជនលោក សុខ ឥសាន និងអ្នកនាំពាក្យរដ្ឋាភិបាល លោក ផៃ ស៊ីផាន បានថ្លែងកាលពីម្សិលមិញថា ការលើកឡើងរបស់ លោក សុខ ទូច គឺមិនខុសទេ ពីព្រោះភូមិរបស់លោក ហេង សំរិន ពិតជាស្ថិតនៅក្នុង ទឹកដីវៀតណាម មែន បើយោងតាមផែនទីខ្នាត ១/១០០.០០០ ដែលចេញដោយ ក្រុមភូមិសាស្ត្រឥណ្ឌូចិន និងរៀបចំដោយអាណានិគមបារាំង។ លោក ឥសាន បានប្រាប់ភ្នំពេញប៉ុស្តិ៍ថា៖ «ខ្សែផែនទី ដែលរត់នៅខាងលិច នៃផ្ទះរបស់សម្តេច ហេង [សំរិន] វាជាក់ស្តែងដូចនេះ»។ លោកបន្តថា កាលពីមុន មិនមាននរណាគូសខ្សែផែនទី កាត់កន្លែងណានោះទេ ដោយសារផែនទី ខ្នាត ១/១០០.០០០ ដែលចេញដោយអ្នកជំនាញបារាំង មិនត្រូវបានប្រើប្រាស់សម្រាប់ការគូសបន្ទាត់ព្រំដែន។ លោកបន្តថា៖ «ប្រជាពលរដ្ឋមិនដឹងខ្សែព្រំដែន នៅកន្លែងណាដោយសារយើង នៅលើដីជាក់ស្តែង»។ លោកបន្តថា៖ «លោក សុខ ទូច បាននិយាយត្រឹមត្រូវណាស់លោកបាននិយាយថា សម្តេច ហេង សំរិន បានទៅរស់នៅក្នុង ដីវៀតណាម។ ឯកឧត្តម សុខ ទូច ចូលចិត្តនិយាយខ្លាំងៗ»។ លោក ឥសាន បន្តថា គណបក្សកាន់អំណាច មិនមានប្រតិកម្មអ្វី ចំពោះលោក សុខ ទូច ទេ ដោយសារផ្អែកលើផែនទីបារាំង ភូមិរបស់លោក ហេង សំរិន ឈ្មោះ ភូមិថ្លុកត្រាចដែលស្ថិតនៅក្នុង ស្រុកពញាក្រែក ខេត្តត្បូងឃ្មុំ ពិតជានៅក្នុង ដីវៀតណាម ទោះយ៉ាងណាក្តី លោក ហេង សំរិន នៅតែត្រូវបានអនុញ្ញាត ឲ្យរស់នៅក្នុងភូមិរបស់លោក ដោយសារគ្រួសាររបស់លោក បាននិងកំពុងរស់នៅក្នុងភូមិនោះ ជាយូរមកហើយ។
ជាងនេះទៀត នៅលើហ្វេសប៊ុក របស់លោក កាលពីម្សិលមិញអ្នកនាំពាក្យរដ្ឋាភិបាល លោក ផៃ ស៊ីផាន ក៏បានការពារការថ្លែងរបស់ លោក សុខ ទូច ផងដែរថាផ្អែកតាមផែនទី ខ្នាត ១/១០០.០០០ ភូមិសាស្ត្រផ្ទះរបស់ លោក ហេង សំរិន គឺស្ថិតនៅក្នុង ដីវៀតណាម បច្ចុប្បន្ន និងបានលើកឡើង នូវសំណួរមួយថា ហេតុអ្វីកម្ពុជា អាចកាន់កាប់តំបន់នេះបាន។ លោក ស៊ីផាន សរសេរថា៖ «មានន័យថាក្នុងសម័យកាលអាណានិគមបារាំង មិនបានគូសព្រំដែនរដ្ឋទេ គឺមានតែព្រំដែនរដ្ឋបាល រវាងកម្ពុជា និងកូសាំងស៊ីន ទី ២). ក្នុងន័យនេះបារាំង បានគូសផែនទីព្រំដែនរដ្ឋបាល ដែលយើងធ្លាប់ស្គាល់តាមរយៈផែនទី «បោន Bonne ខ្នាត ១/១០០.០០០» នេះឯង។ ដូច្នេះប្រជាជនទាំងសងខាង នាសម័យកាលនោះ អាចតាំងលំនៅបន្តតាមទម្លាប់តពីដូនតា»។
លោក វ៉ា គឹមហុង ប្រធានគណៈកម្មាធិការព្រំដែនរបស់រដ្ឋាភិបាល និងអនុប្រធានរបស់លោក គឺលោកស្រី កុយ ពិសី នៅពេលទាក់ទងកាលពីម្សិលមិញ បានបដិសេធធ្វើអធិប្បាយលើបញ្ហានេះ ដោយថ្លែងថា កំពុងជាប់រវល់ប្រជុំ។
ពាក់ព័ន្ធនឹងការលើកឡើងដែលថា ស្រុកកំណើតរបស់លោក ហេង សំរិន ស្ថិតនៅក្នុង ទឹកដីវៀតណាម អនុប្រធានគណបក្សសង្គ្រោះជាតិ លោក អេង ឆៃអ៊ាង មិនបានធ្វើអត្ថាធិប្បាយ លើបញ្ហានេះទេ ក៏ប៉ុន្តែបានសរសើរលោក ហេង សំរិន ដែលបានខិតខំប្រឹងប្រែងកសាងផ្ទះជាច្រើន នៅតាមព្រំដែនកម្ពុជា‑វៀតណាម ដោយចាត់ទុក លោក ហេង សំរិន ជាមេដឹកនាំមានមនសិការស្នេហាជាតិ ក្នុងការការពារទឹកដី។ លោក ឆៃអ៊ាង បានសរសេរថា៖ «បើទោះបីជាមានបុគ្គលមួយចំនួន អះអាងថា ស្រុកកំណើតរបស់សម្តេច ស្ថិតនៅក្នុង ដីវៀតណាម ប៉ុន្តែសម្តេច [ហេង សំរិន] មិនដែលនិយាយដូចបុគ្គលមួយចំនួន អះអាងនោះទេ»។ «ផ្ទុយទៅវិញសម្តេច បានខិតខំធ្វើការ ដើម្បីអភិវឌ្ឍផ្ទះ ផ្លូវ ប្រឡាយ និងសាងសង់ផ្ទះ សម្រាប់ប្រជាពលរដ្ឋ ដើម្បីការពារស្រុកកំណើត របស់សម្តេច»។
នៅក្នុងសន្និសីទកាសែតកាលពីថ្ងៃសុក្រ នៅរាជបណ្ឌិត្យសភា នៅពេលឆ្លើយសំណួររបស់ អ្នកកាសែតដែលសួរអំពីស្រុកកំណើតរបស់ លោក ហេង សំរិន លោក សុខ ទូច បានថ្លែងថាភូមិកំណើតរបស់លោក ហេង សំរិន ស្ថិតនៅក្នុងទឹកដីវៀតណាម។ លោក ទូច បានថ្លែងថា៖ «សម្តេច សំរិន ទៅយកដីវៀតណាមនៅដោយសារ De Facto (ជាក់ស្តែង) ព្រោះការទម្លាក់ផែនទីដីរបស់សម្តេច ហេង សំរិន បានទៅវៀតណាម ប៉ុន្តែលោកបាននៅអស់រយៈពេលជាយូរមកហើយ»។
ការថ្លែងរបស់ លោក សុខ ទូច បានធ្វើឲ្យមានការរិះគន់យ៉ាងខ្លាំង នៅតាមបណ្តាញសង្គមហ្វេសប៊ុក ក្នុងរយៈពេលប៉ុន្មានថ្ងៃកន្លងមកនេះ ដោយអ្នកលេងហ្វេសប៊ុកខ្លះ បានចោទសួរថា តើខ្មែរឯណាទៅរស់នៅលើទឹកដីប្រទេសជិតខាង បើកាលពីអតីតកាលទឹកដីខ្មែរ មានទំហំធំល្វឹងល្វើយ ប៉ុន្តែឥឡូវទឹកដីខ្មែរ បានរួមតូចទៅហើយនោះ។ អ្នកលេងហ្វេសប៊ុកខ្លះទៀត លើកឡើងថា «វៀតណាម គេមិនដែលចិត្តល្អ ឲ្យខ្មែរ ទៅសង់ផ្ទះ រស់នៅលើទឹកដីរបស់គេ នោះទេ»៕ PS