(ដោយ៖ KI-Media2 KI Media)
ប្រធានក្រុមប្រឹក្សាឃ្លាំមើលកម្ពុជា ដែលមានមូលដ្ឋាននៅប្រទេសន័រវេស្ស លោក ម៉ែន ណាត បានហៅថ្ងៃ ៧ មករា ឆ្នាំ១៩៧៩ ថាជាថ្ងៃដែលវៀតណាម ចូលមកឈ្លានពាន និងកាន់កាប់ប្រទេសកម្ពុជា ហើយវៀតណាម បានបញ្ជួនពលរដ្ឋរបស់ខ្លួន ឲ្យមករស់នៅក្នុងប្រទេសកម្ពុជា រាប់លាននាក់។ ជាងនេះទៀត វៀតណាម ធ្វើនៅសន្ឋិសញ្ញាខុសច្បាប់ជាច្រើន ដើម្បីរំលោភយកព្រំដែនទឹក ព្រំដែនគោក និងកោះត្រល់ ត្រូវបានវៀតណាម កាន់កាប់ទាំងស្រុងរហូតសព្វថ្ងៃ។
លោកបានបន្តថា វៀតណាម បានលើកបន្តុបឲ្យលោក ហ៊ុន សែន លោក ហេង សំរិន លោក ជា ស៊ីម លោក ប៉ែន សុវណ្ណ (១៩៧៩-១៩៨១) លោក ចាន់ ស៊ី (១៩៨២-១៩៨៥) និងក្រុមខ្មែរក្រហម ជាច្រើនរូបទៀត ដឹកនាំរដ្ឋាភិបាល ចាប់តាំងពីឆ្នាំ១៩៧៩ ដល់ឆ្នាំ១៩៩២ គឺជារដ្ឋាភិបាលខុសច្បាប់ ព្រោះជារដ្ឋាភិបាលខ្មែរនាពេលនោះ មិនមានការទទួលស្គាល់ពី អង្គការសហប្រជាជាតិឡើយ។ ក្នុងករណីដែលរដ្ឋាភិបាលខ្មែរសព្វថ្ងៃ នៅតែយកសន្ឋិសញ្ញាខុសច្បាប់ទាំងនោះ មកអនុវត្តនាពេលនេះ វាគឺជាការរំលោភយ៉ាងធ្ងន់ធ្ងរ លើរដ្ឋធម្មនុញ្ញ នៃព្រះរាជាណាចក្រកម្ពុជា និង កិច្ចព្រមព្រៀងក្រុងប៉ារីស ១៩៩១។
លោក ម៉ែន ណាត បានបន្ថែមថា «ក្នុងនាមជាប្រជាពលរដ្ឋខ្មែរ យើងសូមរក្សាសិទ្ឋិក្នុងការសើរើរឿងបាត់បង់បូណភាពទឹកដីទៅខាងវៀតណាម នៅពេលណាកម្ពុជា មានរដ្ឋាភិបាលមិនបំរើឲ្យវៀតណាម ដូចរដ្ឋាភិបាលសព្វថ្ងៃ»។ លោក បានមានប្រសាសន៍ទៀតថា «របប ហ៊ុន សែន និងគណបក្សប្រជាជនកម្ពុជា ត្រូវតែប្រើមធ្យោបាយគ្រប់យ៉ាង ដើម្បីបំភ្លេចចោលនូវ កិច្ចព្រមព្រៀងទីក្រុងប៉ារីស ថ្ងៃ ២៣ តុលា ឆ្នាំ១៩៩១ ដែលកិច្ចព្រមព្រៀងនេះ ជានិម្មិត្តរូបនៃការបង្រួបបង្រួមជាតិ, ការបង្រួបបង្រួមខ្មែរគ្រប់ភាគី ដើម្បីឈានទៅរកការបោះឆ្នោតជាតិ នៅឆ្នាំ១៩៩៣ តាមគន្លងលទិ្ធប្រជាធិបតេយ្យ»។
លោក បន្តថា «មិនមែនថ្ងៃ ៧ មករា ដែលពលរដ្ឋខ្មែរ ត្រូវដឹងគុណវៀតណាម នោះទេ ។ ក្រោយថ្ងៃ ៧ មករា ១៩៧៩ គឺជាថ្ងៃដែលវៀតណាម បានលើកបន្តុប ជា ស៊ីម, ហ៊ុន សែន, ហេង សំរិន និងក្រុមខ្មែរក្រហមផ្សេងទៀត ដែលមានចំណេះដឹងបន្តិចបន្តួច ហើយក្នុងចំណោមនោះ មានអ្នកខ្លះ ជាអតីតចោរលួចគោក្របីអ្នកស្រុក ឲ្យធ្វើជាមេដឹកនាំកំពូលៗ របស់ប្រទេសកម្ពុជា។
សូមរំលឹកថា លោក ម៉ែន ណាត ជាអតីតស្ថាបនិកនៃ ចលនានិស្សិតដើម្បីប្រជាធិបតេយ្យ នាឆ្នាំ១៩៩៨, អតីតប្រធានរណសិរ្សនិស្សិតបញ្ញវ័ន្តខ្មែរ នាឆ្នាំ២០០២ និង ជាប្រធានសមាគមមន្រ្តីរាជការកម្ពុជា ពីឆ្នាំ២០០៤ ដល់ឆ្នាំ២០០៦ ៕
