អត្ថបទវេទិកាពលរដ្ឋ
វេទិកាពលរដ្ឋ នៅថ្ងៃទី១២ ខែតុលា ឆ្នាំ២០២២ បានចេញសេចក្តីថ្លែងការណ៍ ទាមទារឲ្យតុលាការកម្ពុជា ត្រូវលើកលែងការចោទប្រកាន់លោក គឹម សុខ ទាំងស្រុង។ សេចក្តីថ្លែងការណ៍នេះ ចុះហត្ថលេខាដោយលោក អ៊ាប គឹមសេង (អ៊ាប សែង) ជាអគ្គលេខាធិការនៃវេទិកាពលរដ្ឋ ដែលមានមូលដ្ឋាននៅសហរដ្ឋអាមេរិក។ សូមទាញយក «សេចក្តីថ្លែងការណ៍ (Download)» ឬអានអត្ថបទខាងក្រោម។
សេចក្តីថ្លែងការណ៍
តុលាការកម្ពុជា ត្រូវលើកលែងការចោទប្រកាន់ទាំងអស់លើលោក គឹម សុខ
វេទិកាពលរដ្ឋ អំពាវនាវដល់តុលាការកម្ពុជា ទម្លាក់ចោលនូវសំណង និងលើកលែងការចោទប្រកាន់ទាំងអស់ លើលោក គឹម សុខ ជាអ្នកវិភាគនយោបាយខ្មែរ និងបច្ចុប្បន្នក៏ជាប្រធាន វេទិកាពលរដ្ឋ តាមគំរូតុលាការប្រទេសបារាំង នៅថ្ងៃទី១០ ខែតុលា ឆ្នាំ២០២២ ដែលបានលើកលែងការចោទប្រកាន់លោក សម រង្ស៊ី ពីបណ្ដឹងបរិហារកេរ្តិ៍របស់លោក ហ៊ុន សែន។
វេទិកាពលរដ្ឋ មើលឃើញថា បណ្ដឹងរបស់លោក ហ៊ុន សែន និងលោក ឌី វិជ្ជា នៅតុលាការបារាំង ដែលបានប្ដឹង លោក សម រង្ស៊ី ពីបទបរិហារកេរ្តិ៍ មានចរិតដូចគ្នាសុទ្ធសាធនឹងបណ្ដឹងចំនួន២ របស់លោក ហ៊ុន សែន និង គណបក្សប្រជាជនកម្ពុជា នៅតុលាការកម្ពុជាកន្លងមក ចំពោះលោក គឹម សុខ ដែលបណ្ដឹងទី១ តុលាការកម្ពុជាបានចេញសាលក្រមរួចហើយ បង្ខំឲ្យលោក គឹម សុខ ជាប់ពន្ធនាគារ ១៨ខែ និងពិន័យប្រាក់ ២០ ម៉ឺនដុល្លារអាមេរិកយ៉ាងអយុត្តិធម៌ ហើយ ១ករណីទៀត កំពុងដំណើរការក្ដីនៅឡើយ។
ការចោទប្រកាន់របស់លោក សម រង្ស៊ី ដែលថា លោក ហ៊ុន សែន នៅពីក្រោយខ្នងនៃការសម្លាប់អតីតមេនគរបាលជាតិ លោក ហុក ឡងឌី គឺជាការចង្អុលចំមុខលោក ហ៊ុន សែន ថាជាឃាតក ប៉ុន្តែ តុលាការបារាំងនៅតែវិនិច្ឆ័យថា «ជាសិទ្ធិបញ្ចេញមតិរបស់លោក សម រង្ស៊ី» ទោះបីជាលោក សម រង្ស៊ី គ្មានភ័ស្ដុតាងបញ្ជាក់ក៏ដោយ ហើយលើកលែងការចោទប្រកាន់លោក សម រង្ស៊ី ទៀត។
រីឯលោក គឹម សុខ គ្រាន់តែសម្ដែងមតិឆ្លុះបញ្ចាំងព្រឹត្តិការណ៍ពិត ថានៅកម្ពុជា ក្រោមការដឹកនាំរបស់រដ្ឋាភិបាល នៃគណបក្សប្រជាជនកម្ពុជា ឃើញមានការសម្លាប់បុគ្គលល្បីៗ ហើយរកឃាតកមិនឃើញ ទាំងលោក គឹម សុខ មិនបានចោទថា លោក ហ៊ុន សែន និង គណបក្សប្រជាជនកម្ពុជា ជាអ្នកសម្លាប់នោះទេ ប៉ុន្តែ តើហេតុអ្វីបានជាតុលាការកម្ពុជា នៅតែចងពៀរនឹងលោក គឹម សុខ?
ការសម្រេចសេចក្ដីរបស់តុលាការបារាំង ក៏ត្រូវបានលោក ហ៊ុន សែន សាទរ។ ដូច្នេះ លោក ហ៊ុន សែន និង តុលាការកម្ពុជា គួររៀនសូត្រតាមគំរូតុលាការបារាំង ដោយបញ្ឈប់ការធ្វើបាបលោក គឹម សុខ ព្រោះអ្នកវិភាគរូបនេះ មិនទាន់បានចោទអ្នកណា ឬក្រុមណាមួយ ជាឃាតកសម្លាប់បណ្ឌិត កែម ឡី ទេ។ លោក គឹម សុខ ធ្លាប់បានពន្យល់តុលាការកម្ពុជាថា ដើម្បីរកមុខឃាតកពិត តម្រូវឲ្យមានការស៊ើបអង្កេតហ្មត់ចត់ពីសមត្ថកិច្ចជំនាញ និង បង្ហាញកាមេរ៉ាសុវត្ថិភាព នៅស្ដាម៉ាតស្តុបបូកគោ ចំថ្ងៃឃាតកម្មបណ្ឌិត កែម ឡី។
ពីគំរូតុលាការបារាំង តុលាការកម្ពុជា និង រដ្ឋាភិបាលលោក ហ៊ុន សែន អាចមានមេរៀនយុត្តិធម៌ប្រជាធិបតេយ្យសកលមួយ ហើយថា សេរីភាពសម្តែងមតិត្រូវតែគោរព ហើយគេត្រូវប្រកួតគ្នាដោយការជជែកពិភាក្សាតទល់ មិនមែនប្រើអំណាចតុលាការបំផ្លាញអ្នកសម្ដែងមតិឡើយ។ ហេតុនេះ តុលាការកម្ពុជាគួរពិចារណាទម្លាក់ចោលការចោទប្រកាន់លោក គឹម សុខ និងករណីសកម្មជនទាំងឡាយ ដែលកំពុងជាប់បណ្ដឹងស្រដៀងគ្នា នឹងលោក គឹម សុខ ដែរ ទើបសមគំរូទទួលស្គាល់សាលក្រមតុលាការបារាំង។
សហរដ្ឋអាមេរិក ថ្ងៃទី១២ ខែតុលា ឆ្នាំ២០២២
អ៊ាប គឹមសេង
អគ្គលេខាធិការ
.