អត្ថបទ The Cambodia Daily / 02nd-12-2020
អ្នកឃ្លាំមើលសង្ស័យថា លោក ហ៊ុន សែន អាចឆ្លងវីរុសកូវីដ១៩ ពីលោក ស ខេង ក្នុងកិច្ចប្រជុំថ្ងៃទី២៥ ខែវិច្ឆិកា ក្នុងបន្ទប់បិទជិតមួយ នៅក្រសួងមហាផ្ទៃ ស្តីពីការជាប់គាំងនយោបាយ របស់គណបក្សកាន់អំណាច។
អ្នកវិភាគនយោបាយសង្គម និងជាអនុប្រធានក្រុមប្រឹក្សាភិបាលនៃ ចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានសរសេរនៅលើគណនីហ្វេសប៊ុករបស់លោក ថាលោក ស ខេង បានដឹកនាំកិច្ចប្រជុំមួយ នៅក្នុងក្រសួងមហាផ្ទៃ កាលពីថ្ងៃទី២៤ ខែវិច្ឆិកា ដោយក្នុងអង្គប្រជុំនោះ មានវត្តមានលោក ឆែម សាវុធ អគ្គនាយកដ្ឋានពន្ធនាគារផងដែរ។ លោកបញ្ជាក់ថា នៅក្នុងអង្គប្រជុំ លោក ឆែម សាវុធ បាននិយាយឆ្លើយឆ្លងជាមួយលោក ស ខេង ខ្លះៗដែរ មុននឹងបិទអង្គប្រជុំនោះ ប៉ុន្តែក្រោយកិច្ចប្រជុំរយៈពេល ៥ ថ្ងៃ លោក ឆែម សាវុធ ត្រូវបានគេរកឃើញ និងបញ្ជាក់ដោយក្រសួងសុខាភិបាលកម្ពុជា ថាវិជ្ជមានវីរុសកូវីដ-១៩ រួមទាំងសមាជិកគ្រួសាររបស់លោកផងដែរ។
លោក គឹម សុខ ថាបើលោក ស ខេង មិនឆ្លងវីរុសកូវីដ-១៩ ហាក់ដូចជាចម្លែកណាស់ ប៉ុន្តែបើក្រសួងសុខាភិបាល ហ៊ានប្រកាសថា លោក ស ខេង វិជ្ជមានវីរុសកូវីដ-១៩ តែបែរជាលោក ហ៊ុន សែន មិនឆ្លងវីរុសកូវីដ-១៩ វិញនោះ ក៏រឹតតែចម្លែក និងគួរឲ្យអស់សំណើចថែមទៀតដែរ។ លោក ចោទជាសំនួរថា តើក្នុងស្ថានការណ៍ចម្លែក លោក ហ៊ុន សែន ចង់ប្រើស្នៀតចម្លែក ឬយ៉ាងណា?
ការអះអាងនេះ ធ្វើឡើងបន្ទាប់ពីលោក ស ខេង ប្រកាសធ្វើចត្តាឡីស័ករយៈពេល ១៤ថ្ងៃ រួមទាំងអ្នកផ្ទះរបស់លោកចំនួន ៩០ នាក់ផងដែរ បន្ទាប់ក្រសួងសុខាភិបាល ពិនិត្យវត្ថុសំណាក និងប្រកាសជាផ្លូវការថា លោក ឆែម សាវុធ និងក្រុមគ្រួសារវិជ្ជមានវីរុសកូវីដ-១៩ កាលពីថ្ងៃទី២៩ ខែវិច្ឆិកា ឆ្នាំ២០២០ នេះ។
ពាក់ព័ន្ធនឹងព្រឹត្តការណ៍ ២៨ វិចិ្ឆកា នេះ លោក ស ខេង បានបង្ហោះសារក្នុងទំព័រហ្វេសប៊ុករបស់លោកថា ជាការចាំបាច់ណាស់ដែលលោក ត្រូវធ្វើចត្តាឡីស័ករយៈពេល ១៤ថ្ងៃ តាមវិធានរបស់ក្រសួងសុខាភិបាល។ យ៉ាងនេះក្តី លោក អះអាងថា លោកនៅតែបន្តបំពេញភារកិច្ចពិនិត្យសម្រេចលើសំណើ និងសំណូមពរនានាពីថ្នាក់ដឹកនាំតាមក្រសួង និងប្រជាពលរដ្ឋជាធម្មតា តាមរយៈគេហទំព័រហ្វេសប៊ុករបស់លោក ពីបន្ទប់ចត្តាឡីស័ក នៅឯផ្ទះរបស់លោកផ្ទាល់។ លោក ត្អូញត្អែរថា ជាការគួរឱ្យសោកស្ដាយណាស់ កាលពីថ្ងៃទី២៨ វិច្ឆិកា កន្លងទៅ ភរិយាលោក ឆែម សាវុធ ត្រូវបានរកឃើញថា វិជ្ជមានវីរុសកូវីដ-១៩ បន្ទាប់ពីមានអាការៈមិនស្រួលខ្លួនរយៈពេលជាងមួយសប្ដាហ៍ ហើយលទ្ធផលជាបន្តបន្ទាប់ បង្ហាញថា លោក ឆែម សាវុធ និងសមាជិកគ្រួសារមួយចំនួនទៀត ក៏បានឆ្លងជំងឺនេះផងដែរ។
នៅថ្ងៃទី៣០ វិច្ឆិកា នេះ ក្នុងពិធីបើកការដ្ឋានសាងសង់ នៅខេត្តសៀមរាប លោក ហ៊ុន សែន ព្រមានថា ត្រូវមានវិធានការការពារខ្លួនជានិច្ច ដោយត្រូវគិតថា ខ្លួនឯងវិជ្ជមានវីរុសកូវីដ-១៩ ប្រសើរជាងគិតថា គ្មានវីរុសកូកូវីដ-១៩ ហើយសុខចិត្តធ្វើតេស្ត ឬធ្វើចត្ថាឡីស័ក ១៤ថ្ងៃ ប្រសើរជាងមិនបានធ្វើ។
ក្រសួងសុខាភិបាល អះអាងថា លទ្ធផលស្រាវជ្រាវអ្នកពាក់ព័ន្ធព្រឹត្តការណ៍សហគមន៍ ២៨ វិច្ឆិកា លទ្ធផលបឋមបានបង្ហាញថា មានរាជធានីខេត្តចំនួន ៧ ដែលកំពុងប្រឈម ដូចជា រាជធានីភ្នំពេញ ខេត្តសៀមរាប កណ្ដាល ឧត្ដរមានជ័យ បន្ទាយមានជ័យ មណ្ឌលគីរី និងខេត្តស្ទឹងត្រែង ខណៈអ្នកពាក់ព័ន្ធដោយផ្ទាល់ និងប្រយោលបានរកឃើញមានចំនួនប្រមាណជាង ៣ ពាន់នាក់ហើយ។
ជាងនេះទៀត ក្រសួងសុខាភិបាល បានរកឃើញ អ្នកវិជ្ជមានវីរុសកូវីដ១៩ ចំនួន ០៨ នាក់ ដែលបានប៉ះពាល់ព្រឹត្តការណ៍សហគមន៍ ២៨ វិច្ឆិកា នេះ ខណៈអ្នកទាំងនោះ ត្រូវបានដាក់ឲ្យសម្រាកព្យាបាលនៅមន្ទីរពេទ្យខ្មែរ-សូវៀត ដើម្បីធ្វើការតាមដានសុខភាព ឲ្យបានទាន់ពេលផងដែរ។
ពាក់ព័ន្ធករណីនេះ ពន្ធនាគាររាជធានីភ្នំពេញ ប៉េហ្ស៊ី (PJ) ព្រមទាំងមណ្ឌលអប់រំកែប្រែ ម១ និង ម២ នៅថ្ងៃនេះ បានដាក់លិខិតមកសាលាដំបូងរាជធានីភ្នំពេញ ស្នើសុំផ្អាកសវនាការរយៈពេល ២សប្តាហ៍ ដើម្បីបង្ការការរីករាលដាលដល់ជនជាប់ឃុំ។ ជាងនេះទៀត មន្ត្រីពន្ធនាគារមួយចំនួន ក៏បានតម្រូវឲ្យធ្វើចត្តាឡីស័កផងដែរ៕
.
.