អត្ថបទដោយ CWCI Cambodia / 18-11-2020
នៅលើទំព័រហ្វេសប៊ុករបស់ខ្លួន លោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា និងជាប្រធានក្រុមប្រឹក្សាភិបាលនៃ ចលនានិស្សិតដើម្បីលទ្ធិប្រជាធិបតេយ្យ នៅថ្ងៃទី១៧ ខែវិច្ឆិកា ឆ្នាំ២០២០ «បានរំឭកដាស់តឿនរដ្ឋាភិបាលលោក ហ៊ុន សែន ជាថ្មីទៀត» ដោយភ្ជាប់រូបថតពីរសន្លឹក នៃសកម្មភាពយោធាវៀតណាម បោះតង់ ឬបោះជំរំ នៅតាមព្រំដែនកម្ពុជា។ លោក ម៉ែន ណាត បានសរសេរថា៖ «{រូបថត}ទើបទទួលបាន អំពីករណីទាហានវៀតណាម បោះតង់នៅភូមិពោធិ ឃុំមេសថ្ងក ស្រុកចន្រ្ទា ខេត្តស្វាយរៀង»។
គួរកត់សម្គាល់ថា យោធាវៀតណាម បានបោះតង់ចំនួន ២៨៧ កន្លែង នៅតាមព្រំដែនខ្មែរ ក្នុងនោះបានប្រែក្លាយទៅជាសំណង់រឹងមាំ ចំនួន ១៦ កន្លែង នៅខេត្តកណ្តាល, ចំនួន ១ កន្លែង នៅស្រុកបុរីជលសារ ខេត្តតាកែវ និង ១ កន្លែង នៅស្រុកកំពង់ត្រាច ខេត្តកំពត។ កាបោះតង់ទាំងនេះ វៀតណាមបានធ្វើឡើងតាំងពីខែ មេសា ឆ្នាំ២០២០ មកម៉្លេះ ក្រោមហេតុផលថា បង្កាការរីករាលដាលជំងឺកូវីដ-១៩។ នេះបើតាមការផ្សព្វផ្សាយរបស់បណ្តាញព័ត៌មាននានា ជាភាសាខ្មែរ និងអង់គ្លេសនាពេលកន្លងទៅ។
ខាងក្រោមនេះ គឺជាខ្លឹមសារអត្ថបទដើមទាំងស្រុងរបស់លោក ម៉ែន ណាត ៖
យើងខ្ញុំបានជូនយោបល់ទៅមន្រ្តីទទួលខុសត្រូវនានា នៃរដ្ឋាភិបាលលោក ហ៊ុន សែន តាមរយៈបណ្តាញផ្សព្វផ្សាយព័ត៌មាន និងតាមរយៈសេចក្តីថ្លែងការណ៍ជាហូរហែ ដើម្បីក្រើនរំឭកទៅក្រុមមេដឹកនាំកម្ពុជា ឲ្យស្វាហាប់ក្នុងការតវ៉ា លើករណីទាហានវៀតណាម បោះតង់ ឬបោះជំរំ នៅតាមព្រំដែនខ្មែរ តាំងតែពីដំបូង នៅខែមេសា ឆ្នាំ២០២០ ពីព្រោះជាសញ្ញាបង្ហាញការឈ្លានពាន មកលើបូរណភាពទឹកដីខ្មែរ ដែលរំលោភគោលការណ៍ច្បាប់ជាតិ និងអន្តរជាតិនានា។
ជុំវិញករណីនេះ យើងឃើញការឆ្លើយតបរបស់រដ្ឋាភិបាលនៃលោក ហ៊ុន សែន មាន ៣ ចំណុចធំៗ ដែលគួរឲ្យកត់សម្គាល់ថា ÷
– ទី១. ឆ្លើយដាក់គ្នា ក្នុងចំណោមមេដឹកនាំក្រសួងការបរទេស, គណៈកម្មាធិការព្រំដែន នៃលោក វ៉ា គឹមហុង និងក្រុមអភិបាលខេត្តមួយចំនួន ដើម្បីជាលេសដោះសា គេចវេសពីការទទួលខុសត្រូវ។
– ទី២. ខំព្យាយាមសម្រាលរឿងទាហានវៀតណាម បោះតង់ទាំងនោះថា ជារឿងតូចតាច កំប៉ិកកំប៉ុក ដែលផ្ទុយពីការអះអាងរបស់ខ្លួន ក្នុងរឿងជម្លោះជាមួយថៃ នៅតំបន់ប្រាសាទព្រះវិហារ ឆ្នាំ២០០៨ និងជាមួយលាវ ឆ្នាំ២០១៧។
– ទី៣. ធ្វើសន្ធិសញ្ញាព្រំដែនបំពេញបន្ថែមថ្មីៗ ធ្វើផែនទីថ្មីខុសច្បាប់ និងធ្វើច្បាប់ថ្មីៗ ជាមួយវៀតណាម ផ្អែកតាមសន្ធិសញ្ញាខុសច្បាប់ ឆ្នាំ១៩៨៥ ដែលជាការធ្វើសម្បទានថ្មីទៀត ក្នុងការកាត់ឆ្វៀលបូរាណភាពទឹកដីខ្មែរ ទៅឲ្យវៀតណាម។
ទោះបីយ៉ាងណាក៏ដោយ យើងខ្ញុំនៅតែបន្តដាស់តឿន និងអំពាវនាវឲ្យរដ្ឋាភិបាលនៃលោក ហ៊ុន សែន ឲ្យធ្វើមោឃភាព ឬនារាករណ៍ទៅលើសន្ធិសញ្ញា និងឯកសារមិនស្របច្បាប់នានា មិនស្របរដ្ឋធម្មនុញ្ញ ឆ្នាំ១៩៩៣ និងមិនស្របកិច្ចព្រមព្រៀងទីក្រុងប៉ារីស ឆ្នាំ១៩៩១ ដើម្បីបើកផ្លូវក្នុងការប្តឹងប្រទេសវៀតណាម ទៅតាមយន្តការអន្តរជាតិជាធរមាន។
ទីក្រុងគ្រីស្ទានសាន់ (ប្រទេសន័រវេស៍) ថ្ងៃទី១៧ ខែវិច្ឆិកា ឆ្នាំ២០២០
ម៉ែន ណាត
ប្រធានក្រុមប្រឹក្សាឃ្លាំមើលកម្ពុជា
.
.