អត្ថបទ CWCI Cambodia / 07th-11-2020
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត បានចាត់ទុករដ្ឋាភិបាលលោក ហ៊ុន សែន ថាបន្តជួយប្រទេសវៀតណាម ក្នុងការឈ្លានពានបូរណភាពទឹកដីខ្មែរ។ ខាងក្រោមនេះ ជាខ្លឹមសារអត្ថបទទាំងស្រុង ៖
យើងខ្ញុំសូមផ្តាំផ្ញើជនរួមជាតិ រឿង«រដ្ឋាភិបាល ហ៊ុន សែន ធ្វើកំហុសមិនព្រមកែ ជុំវិញករណីព្រំដែនជាមួយវៀតណាម»។
មន្ត្រីព្រំដែនរដ្ឋាភិបាលនៃលោក ហ៊ុន សែន បោះបង្គោលព្រំដែនជាមួយវៀតណាម បានរួចរាល់មួយ រាប់ថាជាជោគជ័យមួយ ហើយនាំគ្នាសប្បាយចិត្ត តាមបំណងរបស់វៀតណាម ហើយលោក ហ៊ុន សែន ជាមេគំនិតធ្វើតាមបំណងឈ្លានពានរបស់វៀតណាម។ ពួកគេនាំគ្នាគិតថា ពួកគេអាចបញ្ចប់ភាពចម្រូងចម្រាសរឿងព្រំដែននេះ ទាំងផ្ទៃក្នុងកម្ពុជាខ្លួនឯង និងទាំងជាមួយវៀតណាម។
យើងខ្ញុំកត់សម្គាល់ឃើញថា រឿងរ៉ាវព្រំដែន រឿងបូរណភាពទឹកដីនេះ មិនអាចបញ្ចប់ទៅដោយភាពអយុត្តិធម៌ ដោយរំលោភរដ្ឋធម្មនុញ្ញកម្ពុជា និងកិច្ចព្រមព្រៀងទីក្រុងប៉ារីស ឆ្នាំ១៩៩១ ព្រមទាំងគោលការណ៍ច្បាប់អន្តរជាតិរបៀបនេះបានទេ។ សន្ធិសញ្ញាព្រំដែនរដ្ខ ឆ្នាំ១៩៨៥ ជាមួយវៀតណាម ជាសន្ធិសញ្ញាខុសច្បាប់ ទាំងផ្ទៃក្នុងជាតិ និងទាំងក្នុងឆាកអន្តរជាតិ ដែលភាគីវៀតណាម គីជាភាគីឈ្លានពានកម្ពុជា តម្រូវឲ្យរដ្ឋាភិបាលនៃលោក ហ៊ុន សែន យកមកអនុវត្តឡើងវិញ តាមសន្ធិសញ្ញាបំពេញបន្ថែមថ្មីៗ ដូចជា សន្ធិសញ្ញាបំពេញបន្ថែម ឆ្នាំ២០០៥, ឆ្នាំ២០១៩ និងច្បាប់ពិធីសារខណ្ឌសីមាព្រំដែន ឆ្នាំ២០២០ ព្រមទាំងផែនទីថ្មី ខ្នាត ១លើ២៥ពាន់ (១/២៥.០០០) ផង។ នោះសុទ្ធតែជារឿងធាក់ថយក្រោយខាងផ្លូវច្បាប់ បង្កើតភាពមិនប្រក្រតីនានា ក្នុងយន្តការអនុវត្តជាក់ស្តែង និងធ្វើឲ្យពលរដ្ឋខ្មែរ នៅតាមព្រំដែន បាត់បង់ដីស្រែចំការរបស់ខ្លួន។
ទង្វើរបស់រដ្ឋាភិបាលលោក ហ៊ុន សែន ទាំងអស់នេះ គឺជាការបង្កើតកំហុសប្រវត្តិសាស្ត្រកម្ពុជាដដែលៗ ដើម្បីប្តូរយកអំណាចតែក្នុងមួយរយៈពេលប៉ុណ្ណោះ។ ហើយអំណាចនេះ នឹងបញ្ចប់ទៅវិញ នៅពេលកំណត់មួយយ៉ាងជាក់លាក់ ដែលមិនអាចធានាបាននូវតុល្យភាពរបស់វា។
យើងខ្ញុំសូមរំលឹកជូនពលរដ្ឋខ្មែរថា រឿងរ៉ាវព្រំដែនជាមួយវៀតណាម រឹតតែមិនអាចបញ្ចប់ដោយការបាត់បង់បូរណភាពទឹកដីខ្មែរយ៉ាងនេះបានទេ។ រដ្ឋាភិបាលក្រោយ និងអ្នកជំនាន់ថ្មី ចាំបាច់ត្រូវតែសើរើឡើងវិញជាដាច់ខាត ដើម្បីការពារមូលដ្ឋានជាតិដ៏រឹងមាំ ការពារច្បាប់រដ្ឋធម្មនុញ្ញខ្មែរ ឆ្នាំ១៩៩៣ ការពារខ្លឹមសារកិច្ចព្រមព្រៀងទីក្រុងប៉ារីស និងស្របតាមច្បាប់អន្តរជាតិដ៏រឹងមាំ ក្នុងការផ្តល់យុត្តិធម៌ដល់ប្រជាជាតិខ្មែរ និងផលប្រយោជន៍ខ្មែរ គ្រប់ជំនាន់ទៅមុខទៀត។
ទីក្រុងគ្រីស្ទានសាន់ (ប្រទេសន័រវេស៍) ០៦ វិច្ឆិកា ២០២០
ម៉ែន ណាត
ប្រធានក្រុមប្រឹក្សាឃ្លាំមើលកម្ពុជា
ខាងក្រោមនេះ សូមភ្ជាប់អត្ថបទរបស់លោកស្រី កុយ ពីសី អនុប្រធានគណៈកម្មាធិការចម្រុះកិច្ចការព្រំដែន នៃរដ្ឋាភិបាលកម្ពុជា។
.
.