សេចក្តីព្រាងច្បាប់ ស្តីពីការគ្រប់គ្រងប្រទេសក្នុងគ្រាអាសន្ន ត្រូវបានផ្សព្វផ្សាយលើបណ្តាញសង្គម នៅថ្ងៃទី ០១ ខែមេសា ឆ្នាំ ២០២០។ ពង្រាងច្បាប់នេះ ត្រូវបញ្ជូនទៅកាន់រដ្ឋសភាជាតិ របស់លោក ហេង សំរិន ជាការប្រញាប់ បន្ទាប់ពីមេដឹកនាំកម្ពុជា លោក ហ៊ុន សែន បានដឹកនាំកិច្ចប្រជុំគណៈរដ្ឋមន្ត្រី ពនិត្យ និងសម្រេច នាថ្ងៃទី ៣១ ខែមីនា ម្សិលមិញ។
សេចក្តីព្រាងច្បាប់នេះ ជាច្បាប់ពិសេស ដែលប្រគល់អំណាចទាំងស្រុង ទៅឲ្យរដ្ឋាភិបាល ក្នុងការគ្រប់គ្រងប្រទេសពេលមានភាពអាសន្ន។ វាជាប្រភេទច្បាប់អាជ្ញាសឹក ដែលកាត់បន្ថយសឹងទាំងស្រុង នូវសិទ្ធិសេរីភាពរបស់ពលរដ្ឋ។
លោក នី សុខា មន្រ្តីសិទ្ធិមនុស្សនៃ សមាគមអាដហុក (ADHOC) បានប្រាប់បណ្តាញផ្សព្វផ្សាយជាភាសាខ្មែរ យ៉ាងប្រយ័ត្នប្រយែងថា លោកមិនជំទាស់នឹងការបង្កើតច្បាប់ ស្តីពីការដាក់ប្រទេសក្នុងភាពអាសន្នទេ ព្រោះប្រទេសជាច្រើន លើពិភពលោក ប្រកាសដាក់ភាពអាសន្នរួចទៅហើយ ដើម្បីឆ្លើយតបនឹងការរាតត្បាតជំងឺ កូវីដ-១៩។ លោក នី សុខា បញ្ជាក់ថា «សេចក្ដីព្រាងច្បាប់នេះ មានចំណុចខ្លះ ធ្វើឱ្យប៉ះពាល់ ដល់ដំណើរការលទ្ធិប្រជាធិបតេយ្យ នៅកម្ពុជា»។
មន្ត្រីផ្នែកតស៊ូមតិនៃ អង្គការខុមហ្វ្រែល (COMFREL) លោក កន សាវាង្ស ត្រូវបានវិទ្យុអាស៊ីសេរី ដកស្រង់សំដីថា «វិធានការខ្លះ អាចអនុវត្តបាន ដើម្បីឆ្លើយតបនឹងការរីករាលដាលជំងឺ កូវីដ-១៩។ ប៉ុន្តែវិធានការខ្លះទៀត មានលក្ខណៈរឹតបន្តឹងខ្លាំងពេក ចំពោះសិទ្ធិសេរីភាពរបស់ពលរដ្ឋ»។
ក្រុមអ្នកឃ្លាំមើលនយោបាយខ្មែរ ដែលមានមូលដ្ឋាននៅក្រៅប្រទេស បាននិយាយចំៗថា លោក ហ៊ុន សែន ឆ្លៀតឱកាសយកលេស ប្រើប្រាស់ស្ថានភាពកម្ពុជាសព្វថ្ងៃ ខណៈពេលរីករាលដាលមេរោគកូរ៉ូណា ឬ កូវីដ១៩ នេះ ពិតជាសប្បាយដៃ ក្នុងការបង្រ្កាបក្រុមអ្នកប្រឆាំង បង្រ្កាបអ្នករិះគន់ និង បង្រ្កាបក្រុមមន្រ្តីគ្រាក់ៗគ្នាឯង ក្នុងជួរថ្នាក់ដឹកនាំគណបក្សកាន់អំណាច។ (អត្ថបទទាក់ទង៖ អ្នកឃ្លាំមើល មើលឃើញថា លោក ហ៊ុន សែន ទាញរឿងជំងឺកូរ៉ូណា ជាល្បែងនយោបាយ និងឲ្យចិន ជួយលើកស្ទួយ ហ៊ុន ម៉ាណែត)។
អ្នកវិភាគនយោបាយ លោក គឹម សុខ បានផ្តល់យោបល់ថា «លោក ហ៊ុន សែន យកគ្រោះ ធ្វើជាលាភ»។ លោក ចំអកថា «លោក ហ៊ុន សែន ឆ្លៀតពេលប្រើវិធានការទប់ស្កាត់មេរោគកូរ៉ូណា ឬ Covid-19 គឺលោក ហ៊ុន សែន កាន់តែបង្ក្រាបគេឯង សូម្បីមន្រ្តីក្នុងបក្សកាន់អំណាចរបស់គាត់ ក៏គាត់ បង្ក្រាបដែរ។ ការបង្ក្រាបនេះ គឺមានបំណងតែមួយគាត់ ដើម្បីបើកផ្លូវឲ្យកូនប្រុសគាត់ គឺលោក ហ៊ុន ម៉ាណែត ធ្វើដំណើរជាបណ្តើរៗទៅរកការស្នងតំណែង ពីគាត់»។
ច្បាប់ស្តីពីការគ្រប់គ្រងប្រទេសក្នុងគ្រាអាសន្ន កើតឡើងនៅពេលដែលកម្ពុជា មានការរីករាលដាលមេរោគកូរ៉ូណា ឬ កូវីដ១៩ (Covid-19) យ៉ាងគំហុក ខណៈពេលមេរោគនេះ បានឆ្លងកើនឡើង ជាង ៩១ ម៉ឺននាក់ និង សម្លាប់មនុស្ស ជិត ៥ ម៉ឺននាក់ នៅជុំវិញពិភពលោក មកទល់ថ្ងៃទី ០១ ខែមេសា នេះ។
បទប្បញ្ញតិ្តនៃសេចក្តីព្រាងច្បាប់ ស្តីពីការគ្រប់គ្រងប្រទេសក្នុងគ្រាអាសន្ននេះ មានគោលបំណងកំណត់បែបបទ នីតិវិធី និង លក្ខខណ្ឌ នៃការប្រកាស់ដាក់ និងការគ្រប់គ្រងប្រទេសជាតិក្នុងភាពអាសន្ន នៅពេលប្រជាជាតិ ប្រឈមមុខនឹងគ្រោះថ្នាក់ ដើម្បីការពារសន្តិសុខជាតិ ការពារសណ្តាប់ធ្នាប់សាធារណៈ ការពារអាយុជីវិត និងសុខភាពរបស់ប្រជាពលរដ្ឋ ហើយនិងការពារទ្រព្យសម្បតិ្ត ព្រមទាំងបរិស្ថាន។
មាត្រា ២ និងមាត្រា ៣ (កថាខណ្ឌ ១) នៃសេចក្តីព្រាងច្បាប់នេះ ចែងបញ្ជាក់ឡើងវិញ ទៅលើខ្លឹមសាររដ្នធម្មនុញ្ញ មាត្រា ២២ (ថ្មី) សម្រាប់កាលៈទេសៈប្រទេសជាតិមានភាពអាសន្ន។ មាត្រា ៣ នៃច្បាប់នេះ ចែងថា «នៅពេលប្រជាជាតិប្រឈមមុខគ្រោះថ្នាក់ ព្រះមហាក្សត្រ ទ្រង់ប្រកាសប្រទានដំណឹងជាសាធារណៈ ដាក់ប្រទេសជាតិក្នុងភាពអាសន្ន ក្រោយពីបានមតិឯកភាព ពីនាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភា»៕
CWCI Cambodia /អត្ថបទដោយលោក ម៉ែន ណាត / ០១ មេសា ២០២០
.
Cambodians people have left their own native country due the North Vietnam Vietcong Forces invaded Cambodia in 1979. And their forces have not moved of the Khmers lands. CPP Party under Hun Sen was formed by the North Vietnam Vietcong Forces. Hun Sen and CPP has established a Kanguru Legal systems to eliminated the Cambodian National Rescue Party most of them are the real Khmers blood , that made me upset the most related my mother lands that I have been grown up in my own life. I want to warn Hun Sen and CPP that many Khmers around the country and around will not happy with your actions. I am still alive and watching what are going in my mother lands, will pitcher off.