អត្ថបទ វេទិកាពលរដ្ឋ
វេទិកាពលរដ្ឋ ដែលមានមូលដ្ឋាននៅសហរដ្ឋអាមេរិក បានសេចក្តីថ្លែងការណ៍ថា លោក ហ៊ុន ម៉ាណែត ជានាយករដ្ឋមន្ត្រីខុសច្បាប់ មិនតំណាងផលប្រយោជន៍ប្រជាពលរដ្ឋខ្មែរឡើយ។ សេចក្តីថ្លែងការណ៍នេះ ចុះហត្ថលេខាដោយលោក គឹម សុខ ប្រធានវេទិកាពលរដ្ឋ ចុះផ្សាយកាលពីថ្ងៃទី២២ ខែសីហា ឆ្នាំ២០២៣។ សូមទាញយក «សេចក្តីថ្លែងការណ៍ (Download)» ឬអានអត្ថបទខាងក្រោម។
សេចក្តីថ្លែងការណ៍
លោក ហ៊ុន ម៉ាណែត ជានាយករដ្ឋមន្ត្រីខុសច្បាប់ មិនតំណាងផលប្រយោជន៍ប្រជាពលរដ្ឋខ្មែរឡើយ
វេទិកាពលរដ្ឋ ប្រឆាំងដាច់ខាតនូវការតែងតាំងលោក ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា ពីព្រោះ វាជាដំណើរការ ដែលកើតពីការបោះឆ្នោតខុសច្បាប់ ជាពិសេសផ្ទុយពីខ្លឹមសាររដ្ឋធម្មនុញ្ញ ដែលជាច្បាប់កំពូលរបស់ប្រទេសជាតិ។ លទ្ធផលនៃការបោះឆ្នោតខុសច្បាប់ កាលពីថ្ងៃទី២៣ កក្កដា ២០២៣ បង្កើតបានត្រឹមតែរដ្ឋសភាដែលខុសច្បាប់ ហើយរដ្ឋសភាខុសច្បាប់ បង្កើតបានតែរដ្ឋាភិបាលខុសច្បាប់ ដែលដឹកនាំដោយនាយករដ្ឋមន្ត្រី និងគណៈរដ្ឋមន្ត្រីខុសច្បាប់។
ជាក់ស្ដែងណាស់ លោក ហ៊ុន ម៉ាណែត គឺជានាយករដ្ឋមន្ត្រីខុសច្បាប់ នៃរដ្ឋាភិបាលខុសច្បាប់ នៅប្រទេសកម្ពុជា។
ការបោះឆ្នោតកាលពីថ្ងៃទី២៣ កក្កដា ២០២៣ មិនអាចចាត់ទុកថា ជាការបោះឆ្នោតជ្រើសតាំងតំណាងរាស្ត្រ ដើម្បីបង្កើតរដ្ឋសភារបស់ប្រទេសជាតិឡើយ ពីព្រោះ គ្មានភាពសេរី មិនត្រឹមត្រូវ អត់យុត្តិធម៌ ពុំមានភាពស្មើភាព និង គំរាមកំហែងភាពសម្ងាត់ នៅពេលក្រុមអ្នកនយោបាយ និង គណបក្សនយោបាយគូប្រជែង ដែលមានសក្ដានុពលនានា ត្រូវបានរុញចេញពីសង្វៀនទាំងអស់ រីឯគណៈកម្មាធិការជាតិរៀបចំការបោះឆ្នោត (គ.ជ.ប.)វិញ នៅក្រោមឥទ្ធិពលផ្តាច់មុខ របស់លោក ហ៊ុន សែន។ គឺផ្ទុយស្រឡះពីខ្លឹមសារ ស្នូលនៃច្បាប់បោះឆ្នោតជ្រើសតាំងតំណាងរាស្ត្រ មាត្រា២ និងមាត្រា៥ និងជាពិសេស ស្មារតីរដ្ឋធម្មនុញ្ញ មាត្រា៧៦ ថ្មី។
កាលណាការបោះឆ្នោតខុសច្បាប់ ដែលបង្កើតបានរដ្ឋសភា និង រដ្ឋាភិបាលខុសច្បាប់ គឺមិនមែនជាស្ថាប័នជាតិតំណាងផលប្រយោជន៍ប្រជាពលរដ្ឋ នោះប្រជាពលរដ្ឋមិនអាចប្រើអំណាចរបស់ពួកគាត់ ជាម្ចាស់ប្រទេស តាមរយៈរដ្ឋសភា និងរដ្ឋាភិបាល ដូចមានចែងក្នុងមាត្រា៥១ ថ្មី នៃរដ្ឋធម្មនុញ្ញ ព្រមទាំង សិទ្ធិ និង ករណីកិច្ច របស់ប្រជាពលរដ្ឋខ្មែរ ត្រង់ជំពូកទី៣ នៃរដ្ឋធម្មនុញ្ញទេ។ ប្រជាពលរដ្ឋបាត់បង់ប្រយោជន៍ទាំងស្រុង ព្រោះតែរដ្ឋសភា និងរដ្ឋាភិបាលខុសច្បាប់ ដែលដឹកនាំដោយនាយករដ្ឋមន្ត្រីខុសច្បាប់។
វេទិកាពលរដ្ឋ អំពាវនាវដល់ប្រជាពលរដ្ឋខ្មែរ នៅគ្រប់ទិសទី ទូទាំងពិភពលោក ស្រុះគ្នាក្រោកឡើង ធ្វើសកម្មភាព តវ៉ាប្រឆាំងនឹងនាយករដ្ខមន្ត្រីខុសច្បាប់ ហ៊ុន ម៉ាណែត និង រដ្ឋាភិបាលខុសច្បាប់របស់គាត់។ គឺយើងធ្វើប្រតិកម្មខ្លាំងៗ តវ៉ារហូតមានការផ្លាស់ប្ដូរជាវិជ្ជមាននៅប្រទេសកម្ពុជា ឬយ៉ាងហោចណាស់ ក៏មានសញ្ញានៃការស្ដារប្រជាធិបតេយ្យកម្ពុជាឡើងវិញដែរ។
សហរដ្ឋអាមេរិក ថ្ងៃទី២២ ខែសីហា ឆ្នាំ២០២៣
(ហត្ថលេខា)
គឹម សុខ
ប្រធានវេទិកាពលរដ្ឋ
