អត្ថបទ៖ វេទិកាពលរដ្ឋ
អនុប្រធានវេទិកាពលរដ្ឋ លោក ម៉ែន ណាត បានចុះហត្ថលេខាលើកលិខិតចំហ ជូនលោកនាយករដ្ឋមន្ត្រី ហ៊ុន សែន ស្តីពីការបើកផ្លូវឲ្យពលរដ្ឋខ្មែរ ចុះពិនិត្យព្រំដែនវៀតណាមបាន {មានវីដេអូ}។ លិខិតនេះ ចេញផ្សាយនៅថ្ងៃទី២៣ ខែឧសភា ឆ្នាំ២០២២។ សូមទាញយក«លិខិតចំហ / Download» ឬអានអត្ថបទខាងក្រោម។
លិខិតចំហ
ជូនសម្ដេច ហ៊ុន សែន នាយករដ្ឋមន្ត្រី
វេទិកាពលរដ្ឋ កត់សម្គាល់ឃើញថា កន្លងមក មានតែប្រជាពលរដ្ឋវៀតណាម និង សិស្សសាលាវៀតណាមប៉ុណ្ណោះ ដែលត្រូវបានអាជ្ញាធរវៀតណាម បើកទូលាយ ដឹកនាំទៅមើលបង្គោលព្រំដែន។ យើងខ្ញុំទាមទារថា ប្រជាពលរដ្ឋខ្មែរយើង ក៏ត្រូវតែបានឱកាសនេះដូចគ្នាដែរ ចាប់ពីពេលនេះទៅ។
យើងខ្ញុំមានសេចក្តីអំណរ ដែលបានស្ដាប់ឮការថ្លែងរបស់សម្ដេចនាយករដ្ឋមន្ត្រី នៅទីក្រុងដាវ៉ូស ប្រទេសស្វីស យប់ថ្ងៃទី២១ ខែឧសភា ឆ្នាំ២០២២ ប្រាប់ពលរដ្ឋខ្មែរនៅអឺរ៉ុប ថា «… គេនិយាយពីរឿងបាត់ទល់ដែន បាត់ដី មួយថ្ងៃៗ លក់ដីឲ្យ វៀតណាមប៉ុន្មាន អីប៉ុន្មាន ឲ្យគាត់[ក្នុងប្រទេស] ទៅទល់ដែនទៅ ហើយឲ្យគាត់បញ្ចាំងវីដេអូខល (Video Call) ឲ្យយើង [ក្រៅប្រទេស] មើលបានតើ មានស្អី ធ្វើឡាយហ្វេសប៊ុក (Live Facebook) ចេញពីទល់ដែនហ្នឹងមក ដីត្រង់ណាទល់ដែន? ត្រង់ណាមិនទល់ដែន? … »។
វេទិកាពលរដ្ឋ សូមស្វាគមន៍ចំពោះប្រសាសន៍នេះរបស់សម្ដេច។ ផ្អែកតាមប្រសាសន៍របស់សម្ដេច ប្រជាពលរដ្ឋខ្មែរគ្រប់និន្នាការ ទាំងក្នុង និងក្រៅប្រទេស មានសិទ្ធិសេរីភាពពេញលេញ ក្នុងការចុះទៅមើលខ្សែបន្ទាត់ព្រំដែន និង បង្គោលព្រំដែន ដែលបោះរួចហើយ ជាមួយប្រទេសជិតខាងទាំងអស់ ដោយមិនមានភាពតឹងតែងហួសហេតុពេក រហូតដល់គំរាមកំហែងធ្ងន់ៗ និង ចាប់ដាក់គុកទាំងបំពាន ដូចករណីមុនៗទៀតឡើយ។
ដើម្បីបញ្ជាក់ថា សេចក្ដីថ្លែងរបស់សម្ដេច អាចយកជាការបាន ក្នុងរឿងចុះមើលព្រំដែននេះ វេទិកាពលរដ្ឋ ស្នើសុំចំណារអនុញ្ញាតដោយផ្ទាល់ពីសម្ដេចនាយករដ្ឋមន្ត្រី យល់ព្រមឲ្យយើងខ្ញុំ អាចចាត់តំណាងទៅពិនិត្យមើលខ្សែបន្ទាត់ព្រំដែន និង បង្គោលទាំងឡាយ ដែលរដ្ឋាភិបាលនៃសម្ដេច បានសម្រេចជាផ្លូវការកន្លងមក ជាមួយប្រទេសជិតខាង។
ដោយសារបញ្ហាទឹកដីព្រំដែន ជារឿងជាតិនៃយើងទាំងអស់គ្នា ដែលយើងត្រូវរួមគ្នាទទួលខុសត្រូវនោះ វេទិកាពលរដ្ឋ សង្ឃឹមថា សម្ដេច នឹងមិនបដិសេធសំណើរបស់យើងខ្ញុំឡើយ។ នេះគឺជាស្មារតីជាតិ ស្របតាមកិច្ចព្រមព្រៀងសន្តិភាពក្រុងប៉ារីស៍ ២៣ តុលា ១៩៩១ និង រដ្ឋធម្មនុញ្ញកម្ពុជា។
សហរដ្ឋអាមេរិក ថ្ងៃទី២៣ ខែឧសភា ឆ្នាំ២០២២
ម៉ែន ណាត (ហត្ថលេខា)
អនុប្រធាន វេទិកាពលរដ្ឋ
…