សារព័ត៌មាន ឌឹ ខេមបូឌា ដេលី (The Cambodia Daily) / 21-2-2021
អ្នកឃ្លាំមើលសង្គម លើកឡើងថា សហគមន៍អន្តរជាតិ អាចនឹងពង្រីកការដាក់ទណ្ឌកម្មទៅលើមន្ត្រីមានអំណាចសំខាន់ៗរបស់លោក ហ៊ុន សែន បន្តទៀត។ ទណ្ឌកម្មទាំងនោះ នឹងធ្វើឱ្យបុគ្គលមានអំណាចទាំងឡាយ មិនពេញចិត្តចំពោះការដឹកនាំរបស់លោក ហ៊ុន សែន កាន់តែខ្លាំង ហើយធ្វើឲ្យលោក ហ៊ុន សែន កាន់តែឯកោ។
ការអះអាងនេះ ធ្វើឡើងស្របពេលដែលមន្ត្រីមានអំណាចក្នុងជួររដ្ឋាភិបាលរបស់បក្សកាន់អំណាច ដែលដឹកនាំដោយលោក ហ៊ុន សែន ត្រូវបានប្រទេសមហាអំណាចធំៗ ដូចជាសហរដ្ឋអាមេរិក បានបង្កកទ្រព្យសម្បត្តិ និងបិទទិដ្ឋាការលើមន្ត្រីទាំងនោះអស់ជាច្រើនរូបកន្លងមក។
ប្រធានប្រតិបត្តិនៃចលនានិស្សិតដើម្បីលទ្ធិប្រជាធិបតេយ្យ លោក ទូច វិបុល បានសរសេរលើគណនីហ្វេសប៊ុករបស់លោក នៅថ្ងៃទី ១៨ ខែកុម្ភៈ នេះថា សហគមន៍អន្តរជាតិអាចនឹងពង្រីកការដាក់ទណ្ឌកម្ម ទៅលើការនាំចេញពីកម្ពុជាថែមមួយកម្រឹតទៀត ដែលនឹងធ្វើឲ្យប៉ះទង្គិចកាន់តែធ្ងន់ធ្ងរដល់សេដ្ឋកិច្ចរបស់កម្ពុជាទាំងមូល ខណៈសេដ្ឋកិច្ចដែលកំពុងស្រុតចុះស្រាប់ បានធ្លាក់ចុះដល់ទៅ ៨% ទៅហើយនោះ ក្នុងពេលបច្ចុប្បន្ននេះ។
លោក អះអាងថា ការពង្រីកការដាក់ទណ្ឌកម្មសេដ្ឋកិច្ចរបស់សហគមន៍អន្តរជាតិមកលើកម្ពុជា ធ្វើឱ្យមុខមាត់កម្ពុជាកាន់តែអាក្រក់ នៅលើឆាកអន្តរជាតិស្ទើរតែដល់បាត ដែលនឹងធ្វើឱ្យប៉ះពាល់ដល់ផែនការជាយុទ្ធសាស្ត្រ ក្នុងការពង្រីកឥទ្ធិពលរបស់ប្រទេសចិន នៅកម្ពុជា ព្រមទាំងបង្កផលប៉ះពាល់ដល់អ្នកវិនិយោគចិន នៅកម្ពុជាយ៉ាងធ្ងន់ធ្ងរផងដែរ ដូច្នេះសេដ្ឋកិច្ចកម្ពុជាអាចនឹងជាប់គាំងទាំងស្រុង។
លោក ទូច វិបុល បញ្ជាក់ថា លោក ហ៊ុន សែន ពិតជាបារម្ភខ្លាំងណាស់អំពីរឿងនេះ ដែលវាពិតជាវិបត្តិដ៏ធ្ងន់ធ្ងរចំពោះរដ្ឋាភិបាលរបស់លោក ក្នុងការគ្រប់គ្រងបៀវត្សរ៍បស់មន្ត្រីរាជការ។ លោកបន្តថា ប្រសិនបើមន្ត្រីរាជការងើបឡើងតវ៉ាជាទ្រង់ទ្រាយធំ នោះអំណាចរបស់លោក ហ៊ុន សែន ប្រាកដជារបូតមិនខាន។ ពេលនោះ គ្រោះដ៏កាចនេះមិនមែនត្រឹមតែធ្លាក់លើគាត់មា្នក់ឯងប៉ុណ្ណោះទេ តែវានឹងធា្លក់ដល់កូនចៅលោក ហ៊ុន សែន តជំនាន់ទៀតផង។
កាលពីថ្ងៃទី១៦ ខែវិច្ឆិកា ឆ្នាំ២០២០ កន្លងទៅ សមាជិកសភា និងព្រឹទ្ធសភាសហរដ្ឋអាមេរិក ចំនួន ៨ រូប រួមមានលោក អាឡែន ឡូវ៉ិនស្សល (Alan Lowenthal) លោក ថិត យ៉ូហូ (Ted Yoho) និងសមាជិកសភា ៦ រូបផ្សេងទៀត បានជុំរុញទៅលោក ម៉ៃ ផុមផេអូ (Mike Pompeo) រដ្ឋមន្ត្រីក្រសួងការបរទេសអាមេរិក ឲ្យអន្តរាគមន៍ទៅក្រសួងសេដ្ឋកិច្ច និងហិរញ្ញវត្ថុ របស់សហរដ្ឋអាមេរិក ប្រើច្បាប់ Magnet Ski Act ដាក់ទណ្ឌកម្មបង្កកទ្រព្យសម្បត្តិ និងបិទទិដ្ឋាការថ្នាក់ដឹកនាំជាន់ខ្ពស់នៃគណបក្សប្រជាជនកម្ពុជា ព្រមទាំងមន្ត្រីយោធា និងមន្ត្រីកងរាជអាវុធហត្ថ ដែលបានចូលរួមយ៉ាងសកម្មក្នុងការរំលោភសិទ្ធិមនុស្ស និងប្រជាធិបតេយ្យនៅកម្ពុជាកន្លងមក។
សមាជិកសភាសហរដ្ឋអាមេរិក បានអនុម័តជាឯកច្ឆ័ន្ទលើសេចក្តីស្នើច្បាប់ស្តីពីលទ្ធិប្រជាធិបតេយ្យកម្ពុជា កាលពីថ្ងៃទី១៦ ខែកក្កដា ឆ្នាំ២០១៩ ដែលមានឈ្មោះថា Cambodia Democracy Act ឬ H.R. 526។ ខ្លឹមសារនៃសេចក្តីស្នើច្បាប់នេះ សំដៅដាក់ទណ្ឌកម្មលើមន្រ្តីជាន់ខ្ពស់នៅកម្ពុជា ដែលស្និទនឹងលោក ហ៊ុន សែន ដែលជាប់ពាក់ព័ន្ធនឹងការរំលោភសិទ្ធិមនុស្សនៅកម្ពុជា។
កាលពីឆ្នាំ២០១៨ សភាសហរដ្ឋអាមេរិក បានសម្រេចអនុម័តច្បាប់ដាក់ទណ្ឌកម្ពុជា លើមន្ត្រីជាន់ខ្ពស់កម្ពុជា ១៧ រូប ដោយហាមមិនឲ្យចូលទឹកដីអាមេរិក និងបង្កកទ្រព្យសម្បត្តិផងដែរ រួមមាន លោក ហ៊ុន សែន លោក ហ៊ុន ម៉ាណែត អ្នកស្រី ហ៊ុន ម៉ាណា លោក ស ខេង លោក ទៀ បាញ់ និងលោក អូនព័ន្ធ មុនីរ័ត្ន រដ្ឋមន្ត្រីក្រសួងសេដ្ឋកិច្ចផងដែរ។ លើសពីនេះ មានលោក ឱម យិ នទៀង ប្រធានអង្គភាពប្រឆាំងអំពើពុករលួយ លោក ប៉ុ ល សារឿន អគ្គមេបញ្ជាការកងយោធពលខេមរភូមិន្ទ លោក នេត សាវឿន អគ្គស្នងការនគរបាលជាតិ លោក គន់ គីម មេបញ្ជាការរងនៃកងយោធពលខេមរភូមិន្ទ និងមន្ត្រីគ្រាក់ៗ ដែលជាដៃជើងបក្ខពួករបស់លោក ហ៊ុន សែន ចំនួន ៧ នាក់ ផ្សេងទៀត។
កាលពីដើម ឆ្នាំ២០២០ គណៈកម្មការអឺរ៉ុប បានសម្រេចដាក់ទណ្ឌកម្មសេដ្ឋកិច្ចលើកម្ពុជា ដោយព្យួរប្រព័ន្ធអនុគ្រោះពន្ធ EBA ២០% ដោយគេមើលឃើញថា រដ្ឋាភិបាលកម្ពុជា បានរំលោភបំពាន ប្រព័ន្ធគោលការណ៍សិទ្ធិមនុស្សដែលមានចែងនៅក្នុងកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយរបស់ពលរដ្ឋ៕
.