អត្ថបទដោយចលនានិស្សិត SMD
ចលនានិស្សិតដើម្បីលទ្ធិប្រជាធិបតេយ្យ នៅថ្ងៃទី១៣ ខែសីហា ឆ្នាំ២០២០ បានចេញសេចក្តីថ្លែងការណ៍ ដែលចុះហត្ថលេខាដោយអនុប្រធានប្រតិបត្តិ លោក អ៊ាប សេង ធ្វើការថ្កោលទោសរដ្ឋាភិបាលលោក ហ៊ុន សែន បានបង្រ្កាប និងចាប់ឃាត់ខ្លួនក្រុមយុវជន ដែលទាមទារដោះលែងលោក រ៉ុង ឈុន នៅខាងមុខតុលាការភ្នំពេញ។ ក្រុមយុវជនដែលត្រូវបានឃាត់ខ្លួននោះ រួមមានយុវតី ឈឿន ដារ៉ាវី, លោក ហ៊ុន វណ្ណៈ, លោក យ៉ង សៀងហៃ, យុវតី ថា ឡាវី, យុវតី ជា គន្ធីន និងលោក ស្វាយ សំណាង។ សូមទាញយក សេចក្តីថ្លែងការណ៍ /Download។
សេចក្តីថ្លែងការណ៍
ថ្កោលទោសរដ្ឋាភិបាលភ្នំពេញ ករណីចាប់ឃាត់ខ្លួនយុវជន/យុវតី៦រូប
ចលនានិស្សិតដើម្បីលទ្ធិប្រជាធិបតេយ្យ សូមថ្កោលទោសអាជ្ញាធររដ្ឋាភិបាល ដែលបានចាប់ឃាត់ខ្លួន យុវជន និងយុវតី សរុប ៦នាក់ នៅភ្នំពេញ ដោយសកម្មភាពហឹង្សា និងការរំលោភបំពានយ៉ាងអមនុស្សធម៌ ស្របពេលដែលយុវជន និងយុវតីខ្មែរទាំង ៦រូប គ្រាន់តែប្រើសិទ្ធិស្របរដ្ឋធម្មនុញ្ញរបស់ពួកគាត់ ក្នុងការតវ៉ាទាមទារយុត្តិធម៌ ជូនលោក រ៉ុង ឈុន នៅថ្ងៃទី១៣ ខែសីហានេះ ។
ប្រតិបត្តិការទាំងកម្រោល នៃកម្លាំងសមត្ថកិច្ចភ្នំពេញ គឺជាចេតនាបែបផែនការយុទ្ធសាស្ត្រនយោបាយអសុចរិត ក្នុងការបន្ដសង្កត់សង្កិនយ៉ាងដំណំ លើសិទ្ធិសេរីភាពរបស់ប្រជាពលរដ្ឋ ដែលធានាដោយរដ្ឋធម្មនុញ្ញ នៃព្រះរាជាណាចក្រ កម្ពុជា និងសេចក្តីប្រកាសជាសកលស្តីពីសិទ្ធិមនុស្ស ។
- មាត្រា៣៥ កថាខណ្ឌទី១ នៃរដ្ឋធម្មនុញ្ញកម្ពុជា ចែងថា «ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្ម ក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងទ្បាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ»។
- ត្រង់មាត្រា៤១ កថាខណ្ឌទី១ នៃរដ្ឋធម្មនុញ្ញកម្ពុជា ចែងថា «ប្រជាពលរដ្ឋខ្មែរ មានសេរីភាពខាងការបញ្ចេញមតិ របស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការប្រជុំ»។
- សេចក្តីប្រកាសជាសកលស្តីពីសិទ្ធិមនុស្ស មាត្រា១៩ ចែងថា «មនុស្សគ្រប់រូប មានសិទ្ឋិសេរីភាព ក្នុងការបញ្ចេញមតិ និងការសម្តែងមតិ។ សិទ្ឋិនេះ រាប់បញ្ចូលទាំងសេរីភាពក្នុងការបញ្ចេញមតិ ដោយគា្មនការជ្រៀតជ្រែក និង សេរីភាព ក្នុងការស្វែងរកការទទួលនិងការផ្សព្វផ្សាយព័តមាន និងគំនិតនានា ដោយគា្មនព្រំដែន ទោះតាមរយៈមធ្យោបាយសម្តែងមតិណាមួយក៏ដោយ» ។
ចលនានិស្សិតដើម្បីលទ្ធិប្រជាធិបតេយ្យ ទាមទារអាជ្ញាធររដ្ឋាភិបាលភ្នំពេញ ផ្ដល់សេរីភាពពេញលេញ ដល់យុវជន និងយុវតីទាំង ៦រូប ឲ្យអាចបន្ដសកម្មភាពស្របច្បាប់របស់ពួកគាត់ឡើងវិញ។
រដ្ឋធានីវ៉ាសុីនតុន ថ្ងៃទី១៣ ខែសីហា ឆ្នាំ២០២០
ជ.គណៈកម្មាធិការប្រតិបត្តិ
(ហត្ថលេខា)
អ៊ាប សេង អនុប្រធាន
.
.