RFA Khmer / 03rd-2-2021
សាលាដំបូងរាជធានីភ្នំពេញ បន្តជំនុំជម្រះសំណុំរឿងរបស់លោក រ៉ុង ឈុន និងសកម្មជនពីរនាក់ទៀត នៅព្រឹកថ្ងៃទី០៣ កុម្ភៈ។ ជាមួយគ្នានេះ អាជ្ញាធរបានដាក់ពង្រាយកងកម្លាំងជាច្រើននាក់ ទប់ស្កាត់មិនឱ្យប្រជាពលរដ្ឋ ចូលទៅឈរតាមដាននៅមុខតុលាការឡើយ។ មន្ត្រីសិទ្ធិមនុស្ស ចាត់ទុករឿងនេះថា ជាការរំលោភសិទ្ធិសេរីភាពការជួបជុំរបស់ប្រជាពលរដ្ឋ។
អាជ្ញាធរបានបញ្ជូនជនជាប់ចោទទាំង ៣ នាក់ រួមមានអ្នកឃ្លាំមើលបញ្ហាព្រំដែន លោក រ៉ុង ឈុន សកម្មជនសិទ្ធិការងារ កញ្ញា សរ កណិកា និងអ្នកគាំទ្រគណបក្សសង្គ្រោះជាតិ លោក តុន និមល ចូលតតាំងក្តី នៅក្នុងសវនាការ។
មេធាវីការពារក្ដីឱ្យជនជាប់ចោទ លោក ឡោ ជុនធី ប្រាប់អាស៊ីសេរី នៅរសៀលថ្ងៃទី ៣ កុម្ភៈ ថាតំណាងអយ្យការ និងចៅក្រមជំនុំជម្រះបានសួរសំណួរភាគច្រើន ជាការដាក់បន្ទុកដល់កូនក្ដីរបស់លោក៖ «ឧទាហរណ៍ពាក់ព័ន្ធហ្នឹងហ្វេសប៊ុក យើងសរសេរអីខ្លះអីចឹងទៅ។ អាហ្នឹងសួរអីចឹងវាហាក់បីដូចថាយើងសរសេរអីយើងស៊ាអី អាហ្នឹងគឺលក្ខខណ្ឌមួយដែលដាក់បន្ទុកហើយ។ អាហ្នឹងវាពិបាកកន្លែងហ្នឹងថា យើងបែងចែកបើចង់ឱ្យគេសួរដោះសួរយ៉ាងម៉េច អាហ្នឹងវាពិបាកបន្តិច»។
សវនាការនេះ មានការចូលរួមតាមដានពីសំណាក់មន្ត្រីទូត មន្ត្រីអង្គការសង្គមស៊ីវិល និងអ្នកគាំទ្រជនជាប់ឃុំប្រមាណ ២០នាក់។
សមាជិកសមាគមគ្រូបង្រៀនកម្ពុជាឯករាជ្យ លោក ឯម ប៊ុនណារិទ្ធិ ដែលបានចូលស្ដាប់សវនាការនេះ កត់សម្គាល់ថា អង្គជំនុំជម្រះសួរសំណួរជនជាប់ឃុំ ស៊ីចង្វាក់គ្នា ហាក់មានការត្រៀមទុកជាមុន។ គ្រូបង្រៀនវ័យ ៣៥ឆ្នាំរូបនេះ បន្ថែមថា ពេលខ្លះជនជាប់ចោទឡើងឆ្លើយសំនួរ មិនទាន់ចប់សេចក្ដីផង ត្រូវបានចៅក្រមបង្អាក់ពួកគាត់ឱ្យឈប់និយាយក៏មាន៖ «មើលទៅលំអៀងច្រើនណាស់បានន័យថា សំណួរណាដែលសម្រាប់ជនជាប់ចោទ គាត់មិនសូវលើកមកសួរទេ ពេលខ្លះគាត់ហាមទៀត។ ប៉ុន្តែសំនួរដែលមើលទៅចង់ដាក់ទម្ងន់ទៅលើកូនក្ដីហ្នឹង គាត់ឈ្លេចសួរដដែលៗអីចឹងទៅ។ ពេលខ្លះសួរបំភាន់ចុះឡើង ឱ្យគ្នាហ្នឹងរកឆ្លើយមិនឃើញដូច និមល ដូច កណិកា អីគ្នាមិនសូវមានចំណេះដឹងផ្នែកបច្ចេកវិទ្យាទេ ដល់ពេលអីចឹង គ្នាឆ្លើយត្រឡប់ ត្រឡិន ហើយខ្ញុំមើលទៅ ដូចជាមិនសូវមានវិជ្ជាជីវៈអីប៉ុន្មានទេ»។
ក្រោយបញ្ចប់សវនាការ អាជ្ញាធរបានបញ្ជូនលោក រ៉ុង ឈុន កញ្ញា សរ កណិកា និងលោក តុន និមល ទៅឃុំខ្លួននៅពន្ធនាគារព្រៃសវិញភ្លាមៗ។ តុលាការគ្រោងជម្រះក្ដីលើសំណុំរឿងរបស់អ្នកទាំង៣ នៅថ្ងៃទី១៧ កុម្ភៈ បន្តទៀត។
នៅក្នុងថ្ងៃជំនុំជម្រះក្ដីនេះ អាជ្ញាធររបបក្រុងភ្នំពេញ បានដាក់ពង្រាយកងកម្លាំងចម្រុះជាច្រើននាក់ ដើម្បីហាមឃាត់មិនឱ្យប្រជាពលរដ្ឋ និងអ្នកគាំទ្រលោក រ៉ុង ឈុន ចូលទៅឈរតាមដានស្ថានការណ៍នៅម្ខាងផ្លូវមុខតុលាការបានដូចពេលមុនៗនោះឡើយ។
ទាក់ទងនឹងបញ្ហានេះ អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន ប្រាប់អាស៊ីសេរីថា អាជ្ញាធរដាក់កងកម្លាំងការពារសន្តិសុខសណ្ដាប់ធ្នាប់ ដើម្បីសម្រួលដល់ដំណើរការក្ដីរបស់តុលាការ៖ «រឿងសមត្ថកិច្ចពាក់ព័ន្ធ គេអនុវត្តទៅតាមតែបទបញ្ជាទេ បើមានបញ្ជានៃអង្គ សវនាការឱ្យរៀបចំសណ្ដាប់ធ្នាប់ គឺរៀបចំសណ្ដាប់ធ្នាប់ហើយ។ ទី២ លោកមានដឹងថា នៅក្នុងទីក្រុងភ្នំពេញ នៅកន្លែងតុលាការ ហ្នឹងវាមានមនុស្ស វាត្រូវការឱ្យមនុស្សរៀបចំសណ្ដាប់ធ្នាប់ ឱ្យបានច្បាស់លាស់ទេ»។
ទោះជាយ៉ាងណា អ្នកនាំពាក្យសមាគមការពារសិទ្ធិមនុស្ស អាដហុក (Adhoc) ស៊ឹង សែនករុណា យល់ថា ប្រជាពលរដ្ឋចូលរួមតាមឃ្លាំមើលដំណើរការក្ដីនៅមុខតុលាការ ជាសិទ្ធិសេរីភាពរបស់ពលរដ្ឋដោយស្របច្បាប់។ មន្ត្រីសង្គមស៊ីវិលរូបនេះ ចាត់ទុកវិធានការរបស់អាជ្ញាធរនេះ ថាជាការដើរចាកឆ្ងាយពីគន្លងប្រជាធិបតេយ្យ និងជាការរំលោភបំពានលើសិទ្ធិសេរីភាពរបស់ពលរដ្ឋដោយខុសច្បាប់៖ «ការលើកឡើងបែបនេះ វាហាក់ដូចជាមានភាពអសមត្ថភាពរបស់សមត្ថកិច្ចទៅវិញទេ។ បើគ្រាន់តែការសម្របសម្រួលឱ្យក្រុមទាំងអស់ហ្នឹង គាត់មានទីតាំងក្នុងការសម្ដែងមតិ ឱ្យបានត្រឹមត្រូវ ហើយដំណើរការរបស់តុលាការនៅតែអាចធ្វើទៅបាន ដោយមិនមានការប៉ះពាល់អី ដូចជាមិនមានអីត្រូវពិបាកនោះទេ។ ព្រោះសមត្ថកិច្ចនៅប្រទេសផ្សេង គេមានសមត្ថភាព គេអត់ព្រួយបារម្ភក្នុងចំណុចទាំងអស់ហ្នឹងទេ គេមានវិធានក្នុងការទប់ស្កាត់ដោយជំនាញរបស់គេ»។
លោក ស៊ឹង សែនករុណា បន្តថា សវនាការលើកនេះ មិនខុសពីលើកមុននោះទេ គឺចៅក្រមហាក់បានដើរតួជំនួសឱ្យតំណាងអយ្យការ ដោយបានសួរសំណួរដាក់បន្ទុកលើជនជាប់ចោទបន្ថែមទៀត ដែលធ្វើឱ្យខូចប្រយោជន៍សកម្មជនទាំងបីនាក់។
នេះជាលើកទី២ ហើយ ដែលតុលាការ បានជំនុំជម្រះអង្គសេចក្ដីលើសំណុំរឿងរបស់ លោក រ៉ុង ឈុន។ អាជ្ញាធរបានចាប់ខ្លួនមេសហជីព និងអ្នកឃ្លាំមើលបញ្ហាព្រំដែនរូបនេះ កាលពីយប់ថ្ងៃទី ៣១ កក្កដា ឆ្នាំ ២០២០ ដោយចោទប្រកាន់ពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។ ការចាប់ខ្លួននេះ គឺបន្ទាប់ពីលោកចុះជួបពលរដ្ឋដែលអះអាងថា អាជ្ញាធរវៀត ណាម រំលោភយកដីពលរដ្ឋខ្មែរ នៅខេត្តត្បូងឃ្មុំ។ ចំណែកកញ្ញា សរ កណិកា និងលោក តុន និមល ត្រូវបានអាជ្ញាធរចាប់ខ្លួន ក្រោយពេលពួកគេចូលរួមតវ៉ាឱ្យដោះលែងលោក រ៉ុង ឈុន និងជនជាប់ឃុំមួយចំនួនទៀត។
ចាប់តាំងពីដើមឆ្នាំ២០២០ រហូតមក ដល់ថ្ងៃទី០៣ កុម្ភៈមានសកម្មជនសង្គម ព្រះសង្ឃខ្មែរថាវរៈ សកម្មជននយោបាយ និងក្រុមយុវជនជិត ៧០ នាក់ហើយ ត្រូវបានអាជ្ញាធរចាប់ខ្លួនដាក់ពន្ធនាគារ។ តុលាការបានចោទប្រកាន់ពួកគេពីបទ រួមគំនិតក្បត់ ញុះញង់ និងប្រមាថថ្នាក់ដឹកនាំជាដើម។
អង្គការជាតិនិងអន្តរជាតិជាច្រើនស្ថាប័ន រួមទាំងអង្គការសហប្រជាជាតិ បានថ្កោលទោសចំពោះការចាប់ខ្លួននេះ ថាជាការធ្វើទុក្ខបុកម្នេញផ្នែកនយោបាយ ហើយបានស្នើយ៉ាងទទូចឱ្យរបបលោក ហ៊ុន សែន ដោះលែងអ្នកទោសមនសិការទាំងនេះ ហើយងាកមកគោរពសិទ្ធិពលរដ្ឋវិញ៕
.