អត្ថវបទដោយ CWCI Cambodia
ក្រុមប្រឹក្សាឃ្លាំមើលកម្ពុជា ដែលមានមូលដ្ឋាននៅប្រទេសន័រវេស៍ បានចេញសេចក្តីថ្លែងការណ៍មួយ ថ្ងៃទី០១ ខែសីហា ឆ្នាំ២០២០ ដោយអំពាវដល់រដ្ឋាភិបាល និងតុលាការកម្ពុជា ដោះលែងលោក រ៉ុង ឈុន ជាបន្ទាន់ និងដោយគ្មានលក្ខខណ្ឌ។ សេចក្តីថ្លែងការណ៍នេះ ចុះហត្ថលេខាដោយលោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា បានសង្កត់ធ្ងន់ថា ការចាប់ឃុំខ្លួនលោក រ៉ុង ឈុន ជារឿងនយោបាយ និងទាក់ទិនប្រព័ន្ធអនុគ្រោះពន្ធ EBA របស់សហភាពអឺរ៉ុប ខិតជិតដល់កាលកំណត់ឱសានវាទ «ផ្តាច់ ឬបន្ត EBA» នៅថ្ងៃទី១២ ខែសីហា ច្រើនជាងហេតុផលបញ្ហាព្រំដែន មកដាក់បន្ទុកនោះ។
សេចក្តីថ្លែងការណ៍
រដ្ឋាភិបាលកម្ពុជាដោះលែងលោក រ៉ុង ឈុន ជាបន្ទាន់
ដោយកត់សម្គាល់ឃើញថា រដ្ឋាភិបាលកម្ពុជា ដែលដឹកនាំដោយនាយករដ្ឋមន្រ្តី ហ៊ុន សែន បន្តដើរផ្ទុយពីគោលការណ៍លទ្ធិប្រជាធិបតេយ្យ និងប្រាសចាកពីខ្លឹមសាររដ្ឋធម្មនុញ្ញទាំងស្រុង ដែលជំនួសដោយការដឹកនាំតាមយន្តការអន់ថយ និងផ្តាច់ការ ជាការរំលោភសិទ្ធិមនុស្សធ្ងន់ធ្ងរ បំបិទសិទ្ធិបញ្ចេញមតិ ជាពិសេសបង្ក្រាបលើសកម្មជនសហជីព ខណៈដែលប្រព័ន្ធអនុគ្រោះពន្ធ EBA របស់សហភាពអឺរ៉ុប ខិតជិតដល់កាលកំណត់ឱសានវាទ «ផ្តាច់ ឬបន្ត EBA» នៅថ្ងៃទី១២ ខែសីហា ខាងមុខនេះផង និងចំពេលដែលស្ថានភាពព្រំដែនកម្ពុជា ត្រូវបានប្រទេសវៀតណាម ចូលបោះតង់កើនឡើងចំនួន ២៨៤ តង់ នៅតាមបណ្តោយព្រំដែន ដែលជាការគំរាមកំហែង និងរំលោភឈ្លានពាន មកលើបូរណភាពទឹកដីកម្ពុជា។
ក្រុមប្រឹក្សាឃ្លាំមើលកម្ពុជា សូមថ្កោលទោសយ៉ាងដាច់អហង្កា ចំពោះអាជ្ញាធររដ្ឋាភិបាលកម្ពុជា ចាប់ខ្លួន លោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជា និងជាប្រធានសហភាពសហជីពកម្ពុជា ក្រោមបទចោទប្រកាន់អំពី«ការបំភ្លៃពិតលើ បញ្ហាព្រំដែន ជាបទល្មើសជាក់ស្តែង តាមមាត្រា៤៩៥ នៃក្រមព្រហ្មទណ្ឌ» កាលពីម៉ោង ៩:៤០ នាទី នៅរាត្រីថ្ងៃទី ៣១ ខែកក្កដា ឆ្នាំ២០២០។ ករណីការចាប់ខ្លួននេះ មិនមែនជាបទល្មើសជាក់ស្តែងដូចការចោទប្រកាន់ឡើយ ប៉ុន្តែជារឿងនយោបាយ និងជាការធ្វើឡើងខុសម៉ោងរដ្ឋបាល ហើយនិងធ្វើទៅតាមទំនើងចិត្តរបស់អាជ្ញាធររដ្ឋាភិបាល ដែលរំលោភយ៉ាងធ្ងន់ធ្ងរលើរដ្ឋធម្មមនុញ្ញកម្ពុជា ជំពូកទី៣ ស្តីអំពីសិទ្ធិ និងករណីយកិច្ចរបស់ប្រជាពលរដ្ឋខ្មែរ ត្រង់កថាខណ្ឌទី១ នៃមាត្រា៤១ ព្រមទាំងរំលោភលើមាត្រា១៩ នៃសេចក្តីប្រកាសជាសកល ស្តីពីសិទ្ធិមនុស្ស។
លោក រ៉ុង ឈុន គឺជាសកម្មជនសហជីព និងសកម្មជនព្រំដែនដ៏ឆ្នើម ដែលចូលរួមជាមួយបងប្អូនកម្មករ ក្រុមគ្រូបង្រៀន ពលរដ្ឋរងគ្រោះដីធ្លី ដើម្បីយុត្តិធម៌សង្គម និងបានចុះអង្កេតសកម្មភាពរំលោភព្រំដែនកម្ពុជា ពីសំណាក់ប្រទេសវៀតណាម ពេលថ្មីៗនេះ។ ជាក់ស្តែង នៅក្នុងសេចក្តីថ្លែងការណ៍ {សូមទាញយក} ក្នុងនាមជាតំណាងក្រុមប្រឹក្សាឃ្លាំមើលកម្ពុជា កាលពីថ្ងៃទី២១ ខែកក្កដា កន្លងទៅ លោក រ៉ុង ឈុន បានធ្វើឡើងដោយផ្អែកលើការចុះអង្កេតផ្ទាល់ ឃើញជាក់ស្តែងថា «ការបោះបង្គោលព្រំដែន លេខ ១១៤ ដល់លេខ ១១៩ មានភាពមិនប្រក្រតីច្រើន ដែលធ្វើឲ្យពលរដ្ឋបាត់បង់ដី ទៅភាគីវៀតណាម ជាច្រើនរយហិកតា» នៅឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ដែលជាដីដូនតាកសិករខ្មែរ។
ក្រុមប្រឹក្សាឃ្លាំមើលកម្ពុជា សូមអំពាវដល់រដ្ឋាភិបាល និងតុលាការកម្ពុជា ដោះលែងលោក រ៉ុង ឈុន ជាបន្ទាន់ និងដោយគ្មានលក្ខខណ្ឌ ដើម្បីរួមចំណែកលើកកម្ពស់សិទ្ធិមនុស្សឡើងវិញ សិទ្ធិបញ្ចេញមតិ សិទ្ធិជួបប្រជុំជាសាធារណៈរបស់ពលរដ្ឋ និងសហជីពកម្មករ ព្រមទាំងរួបរួមគ្នាការពារអធិបតេយ្យជាតិ និងបូរណភាពទឹកដីខ្មែរ ស្របតាមខ្លឹមសាររដ្ឋធម្មនុញ្ញកម្ពុជា គោលការណ៍ច្បាប់អន្តរជាតិ និងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១។
ក្រុងគ្រីស្ទានសាន់ (ប្រទេសន័រវេស៍) ថ្ងៃទី០១ ខែសីហា ឆ្នាំ២០២០
ប្រធានក្រុមប្រឹក្សាឃ្លាំមើលកម្ពុជា
(ហត្ថលេខា និងត្រា)
ម៉ែន ណាត
អត្ថបទភ្ជាប់៖ សូមទាញយកសេចក្តីថ្លែងការណ៍ នៅត្រង់នេះ (Download)។ ហើយមានភ្ជាប់«សេចក្តីថ្លែងការណ៍ របស់លោក រ៉ុង ឈុន» ផែងដែរ។ ហើយក៏មានភ្ជាប់សេចក្តីថ្លែងការណ៍របស់ គណៈកម្មាធិការចម្រុះព្រំដែន(រដ្ឋាភិបាល) {ទាញយក /Download} នាំដល់ការចាប់ខ្លួនលោក រ៉ុង ឈុន។
