The Cambodia Daily
09th-3-2023
រដ្ឋាភិបាលវៀតណាម ស្នើកម្ពុជាជាថ្មី ឲ្យជួយដោះស្រាយការលំបាកប្រជាជនវៀតណាម ដែលបានស្នើសុំសញ្ជាតិខ្មែរ និងការតាំងទីលំនៅថ្មីនៅកម្ពុជា ខណៈអ្នកឃ្លាំមើលចាត់ទុកការផ្ដល់សញ្ជាតិ ឲ្យជនជាតិវៀតណាម ដែលមានព្រំដែនជាប់ខ្មែរនេះ ជាហានិភ័យសម្រាប់ប្រទេសជាតិ។
ការស្នើរបស់នាយករដ្ឋមន្ត្រីវៀតណាម លោក Pham Minh Chinh ធ្វើឡើងក្នុងជំនួបទ្វេភាគី ជាមួយរដ្ឋមន្ត្រីក្រសួងមហាផ្ទៃ លោក ស ខេង អំឡុងពេលដែលលោកកំពុងទស្សនកិច្ច នៅទីក្រុងហាណូយ កាលពីថ្ងៃទី៤ ខែមីនា ឆ្នាំ២០២៣ បន្ទាប់ពីមានការអញ្ជើញពីភាគីវៀតណាម។
បើតាមសារព័ត៌មានវៀតណាម VNA ផ្សាយកាលពីថ្ងៃទី០៤ ខែមីនា ឆ្នាំ២០២៣ ឲ្យដឹងថា ក្នុងជំនួបទ្វេភាគី នាយករដ្ឋមន្ត្រីវៀតណាម លោក Pham Minh Chinh បានស្នើឲ្យក្រសួងមហាផ្ទៃកម្ពុជា បន្តពង្រឹងការប្រយុទ្ធប្រឆាំងនឹងឧក្រិដ្ឋកម្មគ្រប់ប្រភេទ ជាពិសេសបទល្មើសឆ្លងដែន។ បន្ថែមពីនេះ លោក Pham Minh Chinh ក៏បានស្នើទៅលោក ស ខេង ឲ្យសម្របសម្រួលក្នុងការជួយសង្គ្រោះពលរដ្ឋវៀតណាម ដែលត្រូវបានឃុំខ្លួន និងបង្ខំឲ្យធ្វើការនៅក្នុងកន្លែងលេងល្បែងខុសច្បាប់ នៅកម្ពុជាផងដែរ។
ក្រៅពីស្នើឲ្យជួយពលរដ្ឋកំពុងជាប់ឃុំ ឬបង្ខំហើយ នាយករដ្ឋមន្ត្រីវៀតណាម បានស្នើជាថ្មីទៀត ទៅកាន់រដ្ឋមន្ត្រីក្រសួងមហាផ្ទៃ លោក ស ខេង ឲ្យបន្តជួយគាំទ្រដល់សហគមន៍វៀតណាមនៅកម្ពុជា និងឲ្យបន្តជួយពលរដ្ឋវៀតណាម ដែលកំពុងរស់នៅខុសច្បាប់នៅកម្ពុជា ជាពិសេសឲ្យជួយដោះស្រាយការលំបាកប្រជាជនវៀតណាម ដែលសុំសញ្ជាតិខ្មែរ ដើម្បីស្នាក់នៅកម្ពុជាទៀតផង។
យ៉ាងណាក៏ដោយ ការអញ្ជើញលោក ស ខេង ទៅទស្សនកិច្ចនៅវៀតណាម ធ្វើឡើងស្របពេលដែលកន្លងមក រដ្ឋមន្ត្រីក្រសួងមហាផ្ទៃ លោក ស ខេង ធ្លាប់បានបញ្ជាទៅសមត្ថកិច្ចឲ្យចាប់បញ្ជូនជនជាតិវៀតណាម ដែលរស់នៅកម្ពុជាខុសច្បាប់ ទៅប្រទេសកំណើតវិញ។ លោកបញ្ជាក់ថា ជនជាតិវៀតណាមខ្លះ ត្រូវបានសមត្ថកិច្ចបញ្ជូនទៅដល់ព្រំដែនហើយ ប៉ុន្តែបែរជាអាជ្ញាធរវៀតណាម មិនទទួលពលរដ្ឋខ្លួនទៅវិញ។
កាលពីថ្ងៃទី២៣ ខែកុម្ភៈ ឆ្នាំ២០២២ អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃ លោក ប៉ោ ភក្តិ លើកឡើងថា អាជ្ញាធរវៀតណាម មិនព្រមទទួលយកជនអន្តោប្រវេសន៍វៀតណាម ដែលរឹងរូស និងជនជាតិវៀតណាម ដែលមានបំណងចង់ត្រឡប់ទៅប្រទេសកំណើតវិញឡើយ ដែលករណីនេះជាបញ្ហាប្រឈមសម្រាប់កម្ពុជា។
លោក ប៉ោ ភក្តិ ស្នើឱ្យរដ្ឋាភិបាលកម្ពុជា ពន្លឿនការធ្វើវិសោធនកម្មច្បាប់អន្តោប្រវេសន៍ ឆ្នាំ១៩៩៤ ដើម្បីធានាអំពីប្រសិទ្ធភាពនៃការគ្រប់គ្រងជនអន្តោប្រវេសន៍ខុសច្បាប់ នៅកម្ពុជា។
ជារឿយៗ មេដឹកនាំវៀតណាម តែងតែស្នើសុំថ្នាក់ដឹកនាំកម្ពុជា ក្នុងនោះមានលោកនាយករដ្ឋមន្ត្រី ហ៊ុន សែន និងប្រធានរដ្ឋសភា លោក ហេង សំរិន ជាដើម ដើម្បីឲ្យជួយផ្ដល់ភាពស្របច្បាប់ ដល់ពលរដ្ឋវៀតណាម ដែលកំពុងរស់នៅខុសច្បាប់ ក្នុងប្រទេសកម្ពុជា អំឡុងពេលរដ្ឋាភិបាលកម្ពុជា ទៅបំពេញទស្សនកិច្ចនៅវៀតណាម ឬក៏វៀតណាម មកបំពេញទស្សនកិច្ចនៅកម្ពុជា។
ប៉ុន្តែការស្នើរបស់មេដឹកនាំវៀតណាមម្ដងហើយម្ដងទៀតនេះ ត្រូវបានប្រធានរាជបណ្ឌិត្យសភាកម្ពុជា បណ្ឌិត សុខ ទូច ធ្លាប់បានលើកឡើង កាលពីខែសីហា ឆ្នាំ២០១៩ ថា ការសម្របសម្រួល និងផ្ដល់សញ្ជាតិដល់ជនអន្តោប្រវេសន៍ ដែលមានព្រំប្រទល់ជាប់គ្នានេះ នឹងធ្វើឲ្យប្រទេសជួបហានិភ័យខ្លាំង។ លោកបន្តថា គ្មានប្រទេសណាមួយដែលនៅជិតខាងគ្នា ឲ្យសញ្ជាតិជនជាតិក្បែរខាងនោះទេ។
លោកបន្តថា ប្រសិនបើជនជាតិវៀតណាម រស់នៅកម្ពុជាស្របច្បាប់ ហើយមានសញ្ជាតិ គឺមានសិទ្ធិអ្វីៗទាំងអស់ ហើយព្រមទាំងមានសិទ្ធិក្នុងការសម្រេចជោគវាសនា មានសិទ្ធិទិញដី និងមានសិទ្ធិបោះឆ្នោត។ ដូច្នេះ តើក្រុមហ្នឹងនឹងក្លាយទៅជាអ្វីនៅថ្ងៃអនាគត? តើពួកគេនឹងក្លាយជាម្ចាស់ជោគវាសនាប្រទេសកម្ពុជាដែរឬទេ?
បណ្ឌិត សុខ ទូច បានទាមទាររដ្ឋាភិបាល ត្រូវបញ្ជូនជនអន្តោប្រវេសន៍ ដែលរស់នៅដោយខុសច្បាប់ទៅប្រទេសដើមវិញ ដោយមិនត្រូវទុកឲ្យពួកគេ រស់នៅប្រទេសកម្ពុជាទាំងខុសច្បាប់នោះទេ៕
.