វិទ្យុអាស៊ីសេរី RFA /ដោយ ម៉ៅ សុធានី
27-8-2023
ក្រសួងមហាផ្ទៃ ច្រាលចោលរិះគន់របស់អ្នកឃ្លាំមើល ទៅលើការតែងតាំង និងផ្ទេរអំណាច ឱ្យក្រុមគ្រួសារក្នុងរដ្ឋាភិបាលថ្មី របស់ក្រុមគ្រួសារលោក ស ខេង។ អ្នកឃ្លាំមើល ចាត់ទុកការប្រតិកម្មរបស់ក្រសួងមហាផ្ទៃ ថា ជាការចេញមុខការពារអំពើពុករលួយ នៃការឡើងកាន់តំណែងសំខាន់ៗ ក្នុងស្ថាប័នរដ្ឋ។
ក្រោយមានការរិះគន់ពីអ្នកវិភាគ និងអ្នកឃ្លាំមើល លើការតែងតាំងកូនប្រុសទាំងពីររបស់លោក ស ខេង ឱ្យឡើងកាន់តំណែងកំពូលនៅក្រសួងស្ថាប័ន ក្នុងអាណត្តិរដ្ឋាភិបាលថ្មី អ្នកនាំពាក្យក្រសួងមហាផ្ទៃ បានចេញមុខច្រានចោល និងបានប្រមាថអ្នករិះគន់ថា មនុស្សវិកលចរិត ខណៈអ្នកឃ្លាំមើល និងអ្នកវិភាគថា ក្រសួងមហាផ្ទៃ គួរមានភាពខ្មាសអៀន ទៅលើការប្រតិកម្មរបស់ខ្លួនតាមរបៀបនេះ។
ប្រធានក្រុមប្រឹក្សាឃ្លាំមើលកម្ពុជា នៅប្រទេសណ័រវ៉េ (Norway) លោក ម៉ែន ណាត លើកឡើងថា ក្រសួងមហាផ្ទៃ គួរតែបើកចិត្តទទួលយកការរិះគន់ ឬមតិយោបល់ ទាំងវិជ្ជមាន និងអវិជ្ជមាន ទៅពិចារណា ហើយកែលម្អ មិនមែនងាកមកវាយប្រហារ ដៀលត្មះអ្នកវិភាគ ថា ជាមនុស្សវិកលចរិតនោះឡើយ។
លោក ម៉ែន ណាត៖ «គួរណាស់តែក្រសួងហ្នឹង អរគុណដល់អ្នកវិភាគ ក្រុមអ្នកផ្ដល់យោបល់ អរគុណគេទៅ។ ទោះបីគេផ្ដល់យោបល់ក្នុងន័យវិជ្ជមានក៏ដោយ ក្នុងន័យកែទម្រង់ក៏ដោយ ក្នុងន័យអវិជ្ជមានទៅកាន់ក្រសួង ឬរដ្ឋាភិបាលហ្នឹង គួរណាស់តែថ្លែងអំណរគុណគេ។ ដោយគ្រាន់ថា ក្រសួងនឹងកែសម្រួល ពិនិត្យមើល ហើយឆ្លើយតបមកវិញ ដោយសេចក្ដីថ្លៃថ្នូរ ដោយសមរម្យបំផុត។ អាហ្នឹង ទើបយើងអាចជជែកគ្នាបាន»។
ការប្រតិកម្មរបស់អ្នកនាំពាក្យក្រសួងមហាផ្ទៃ ក្រោយពេលមានការរិះគន់ ការតែងតាំងកូនចៅ និងសាច់ញាតិ លោក ស ខេង ស្អេកស្កះក្នុងក្រសួងមហាផ្ទៃ។ ក្រសួងអះអាងថា ការតែងតាំងកូនប្រុសរបស់លោក ស ខេង គឺលោក ស រដ្ឋា ជាអគ្គស្នងការរង នៃអគ្គស្នងការដ្ឋាននគរបាលជាតិ គឺផ្អែកលើចំណេះដឹង បទពិសោធន៍ និងអតីតភាពការងាររបស់លោក មិនមែនលោក ស ខេង ជាឪពុកសម្រេចតែងតាំងកូនខ្លួនឯង តាមចិត្តនោះឡើយ។
ពាក់ព័ន្ធនឹងរឿងនេះ អ្នកវិភាគនយោបាយ លោក គឹម សុខ លើកឡើងថា ការវាយប្រហាររបស់អ្នកនាំពាក្យក្រសួងមហាផ្ទៃ {ទៅលើ}អ្នកវិភាគ គឺដោយសារមន្ត្រីទាំងនោះ បារម្ភថា ការបកអាក្រាតពីអំពើទុច្ចរិត ពុករលួយឱ្យប្រជាពលរដ្ឋបានដឹង។
លោក គឹម សុខ៖ «ហើយបរិយាកាសឧក្រិដ្ឋ និងការដឹកនាំដោយគ្មាន និងគ្មានគុណធម៌ ចំពោះប្រទេសជាតិ ចំពោះប្រជាពលរដ្ឋ ក្រោមស្នាដៃលោក ហ៊ុន សែន រហូតដល់លោក ហ៊ុន ម៉ាណែត នេះ ពេលដែលពលរដ្ឋយល់ វានឹងធ្វើឱ្យពួកគេពិបាកទប់អំណាច។ អ៊ីចឹងហើយ ទើបគេព្យាយាមវាយបកមកវិទ្យុអាស៊ីសេរី មកអ្នកវិភាគ»។
អ្នកវិភាគស្នើឱ្យក្រសួងមហាផ្ទៃ គួរគិតគូរពង្រឹងប្រព័ន្ធរដ្ឋបាល សន្តិសុខសង្គម និងអភិបាលកិច្ចជូនប្រជាពលរដ្ឋ ជាពិសេសគួរទទួលយកមតិរិះគន់ពីមហាជន ដើម្បីសិក្សាពីកំហុស ជាជាងប្រកែក ដើម្បីការពារគ្រួសារថ្នាក់ដឹកនាំ៕