(អត្ថបទលោក ម៉ែន ណាត នៃ ក្រុមប្រឹក្សាឃ្លាំមើលកម្ពុជា / ២៥ ធ្នូ ២០១៦)
គណៈកម្មាធិការព្រំដែនកម្ពុជា បញ្ជាក់មាត្រដ្ឋាន ផែនទីកម្ពុជា និងមហិច្ឆតាវៀតណាម មកលើកម្ពុជា
សូមអាន ឬទាញយកសេចក្តីថ្លែងការណ៍លំអិត៖ ភាសាខ្មែរ / ភាសាអង់គ្លេស / ឯកសារភ្ជាប់ជាភាសាបារាំង
គណៈកម្មាធិការព្រំដែនកម្ពុជា ដែលមានមូលដ្ឋាននៅប្រទេសបារាំង បានចេញ សេចក្តីថ្លែងការណ៍ ថ្ងៃទី ១៤ ខែ ធ្នូ ឆ្នាំ ២០១៦ ប្រតិកម្មប្រឆាំងជំទាស់នឹងជំហរ រដ្ឋាភិបាលលោក ហ៊ុន សែន ដែលព្រមព្រៀង ជាមួយប្រទេសវៀតណាម អំពី «ការផ្ទេរខ្នាតផែនទី» ពីប្រព័ន្ធបោន (Bonne) ១/១០០ពាន់ មកប្រព័ន្ធ យូធីអឹម (UTM) ១/៥០.០០០។
សេចក្តីថ្លែងការណ៍ ពន្យល់ថា «ការផ្ទេរប្រព័ន្ធ និងមាត្រដ្ឋាន ពីមួយទៅថ្មីទៀតនៃ ផែនទី ភូមិសាស្រ្ត គឺជាវិធីបច្ចេកទេសបន្ទាប់បន្សំ ដែលគេអាចធ្វើបាន នៅគ្រប់ពេលវេលាទាំងអស់ ដោយមានភាពលំអៀងខ្លះៗ ដែលគេអាចកែតម្រូវបាន ជាបន្ទាប់មកទៀត»។ «ប៉ុន្តែ តើផែនទីណាមួយ នៃប្រទេសកម្ពុជា ដែលគេនឹងដាក់ ឲ្យធ្វើការកែប្រែ ដែលគេបានគ្រោង ធ្វើនោះ?»។
លោក វ៉ា គឹមហុង ទេសរដ្ឋមន្រ្តី និងជាប្រធានគណៈកម្មាធិការព្រំដែន របស់រដ្ឋាភិបាល ហ៊ុន សែន កាលពីថ្ងៃទី ០២ កក្កដា ឆ្នាំ ២០១៥ បានបញ្ជាក់ថា «ផែនទីព្រំដែន បានបោះពុម្ព នៅប្រទេសវៀតណាម»។ ក្នុងផែនទីខ្លះ មានបោះត្រា នៅថ្ងៃទី ២៧ ខែ ធ្នូ ឆ្នាំ ១៩៨៥ ដោយ ប្រធានប្រតិភូគណៈកម្មការព្រំដែនខ្មែរ លោក ឌិត មន្ទីរ និង ប្រធានប្រតិភូវៀតណាម លោក លីវ វ៉ាន់ឡឺយ។
លោក ស៊ាន ប៉េងសែ អ្នកជំនាញផែនទីព្រំដែនខ្មែរ និងជាប្រធាន គណៈកម្មាធិការព្រំដែនកម្ពុជា មានមូលដ្ឋាននៅប្រទេស បារាំង បានបញ្ជាក់ថា «ផែនទីប្រព័ន្ធបោន (Bonne) ខ្នាត ១/១០០.០០០ ជាផែនទី ត្រូវបាន កំណត់ដោយមាត្រា២ រដ្ឋធម្មនុញ្ញកម្ពុជា ហើយបានទទួលស្គាល់លើផ្ទៃអន្តរជាតិ រួចហើយ»។ ផែនទីប្រព័ន្ធ យូធីអឹម (UTM) ១/៥០.០០០ ជាផែនទី តាក់តែងដោយកងទ័ពអាមេរិកាំង ក្នុងសម័យ សង្គ្រាមវៀតណាម ទសវត្សទី៦០ ដែល «ប្រទេសកម្ពុជា ពុំដែលបានទទួលស្គាល់ផែនទី យូធីអឹម នេះឡើយ»។
ការបោះបង្គោលព្រំដែនសព្វថ្ងៃ រដ្ឋាភិបាលកម្ពុជា និង វៀតណាម ព្រមព្រៀងប្រើ ផែនទី បោន ១/១០០.០០០ ផង (បោះពុម្ពឡើងវិញដោយ វៀតណាម) និង ប្រើផែនទី យូធីអឹម ១/៥០.០០០ ផង។ នេះបើតាមការបញបញ្ជាក់របស់លោក វ៉ា គឹមហុង ជាទេសរដ្ឋមន្រ្តី ទទួលបន្ទុកកិច្ចការព្រំដែន របស់រដ្ឋាភិបាល កាលពីថ្ងៃទី ០២ ខែ កក្កដា និងថ្ងៃទី ១៤ ខែ កក្កដា ឆ្នាំ ២០១៥។ លោក វ៉ា គឹមហុង បានសារភាពថា «ភាគីកម្ពុជា ទាមទារឲ្យប្រើ ផែនទី ១/១០០.០០០ របស់បារាំង តែភាគីវៀតណាម គេមិនព្រម។ វៀតណាម ទាមទារឲ្យយើង ប្រើផែនទី យូធីអឹម ១/៥០.០០០»។ លោក វ៉ា គឹមហុង ថ្លែងថា «តាំងពីឆ្នាំ ២០០៦ ដល់បច្ចុប្បន្ន បង្គោលព្រំដែនថ្មី បោះបានជាង ៨០% រួចហើយ»។ ប្រទេសទាំងពីរ ប្រើផែនទី យួធីអឹម ១/៥០ ពាន់ និង ផែនទី បោន ១/១០០ ពាន់» ដែលជាផែនអមភ្ជាប់ សន្ធិសញ្ញាកំណត់ព្រំដែនរដ្ឋ ១៩៨៥ ដោយមានបោះត្រា នៅថ្ងៃទី ២៧ ធ្នូ ១៩៨៥ ផងនោះ។
លោក ស៊ាន ប៉េងសែ ថ្លែងសង្កត់ធ្ងន់ថា «បង្គោលព្រំដែនថ្មី ប្រើផែនទី ប្របូកច្របល់ ពីខេត្ត មណ្ឌលគីរី មកដល់ខេត្តកំពត»។ ចំណែកពលរដ្ឋខ្មែរ នៅតាមព្រំដែនវៀតណាម បានបញ្ជាក់ថា «បង្គោលព្រំដែន បោះចូល ជ្រៅក្នុងដីខ្មែរ ចំនួន ១ គីឡូម៉ែត្រ, ២ គីឡូម៉ែត្រ, ៥ គីឡូម៉ែត្រ ឬច្រើនជាងហ្នឹងទៀត ពីចំណុចព្រំដែនរួម ដែលពួកគាត់ ធ្លាប់បានស្គាល់ នាពេលមុន»។ នេះបើតាមការចុះផ្សាយរបស់កាសែតក្នុងស្រុកមួយចំនួនថ្មីៗនេះ។
សេចក្តីថ្លែងការណ៍នៃ គណៈកម្មាធិការព្រំដែនកម្ពុជា បញ្ជាក់ថា កិច្ចព្រមព្រៀងទីក្រុងប៉ារីស ឆ្នាំ ១៩៩១ ជាមូលដ្ឋានដ៏រឹងមាំ ដែលមានវត្តមាន ភាគីវៀតណាម និងលោក ហ៊ុន សែន បានទទួលស្គាល់ថា កិច្ចព្រមព្រៀង ឬសន្ធិសញ្ញាណា ដែលធ្វើឡើងនៅមុនឆ្នាំ ១៩៩១ ត្រូវទុកជាមោឃភាព។ សេចក្តីថ្លែងការណ៍នេះ បានរំលឹកឡើងវិញនូវ មាត្រា ៥៥ នៃរដ្ឋធម្មនុញ្ញថា «សន្ធិសញ្ញា និង កិច្ចព្រមព្រៀងទាំងឡាយណា ដែលមិនស្របនឹងឯករាជ្យ អធិបតេយ្យ បូរណភាពទឹកដី អព្យាក្រឹតភាព និងឯកភាពជាតិ របស់ព្រះរាជាណាចក្រកម្ពុជា ត្រូវលុបចោល»។
រដ្ឋធម្មនុញ្ញ មាត្រា២ មានខ្លឹមសារថា «បូរណភាពទឹកដីរបស់ ព្រះរាជាណាចក្រកម្ពុជា មិនអាចរំលោភបានដាច់ខាត ក្នុងព្រំដែនរបស់ខ្លួន ដែលមានកំណត់ ក្នុងផែនទី ខ្នាត ១/១០០.០០០ ធ្វើនៅចន្លោះ ឆ្នាំ ១៩៣៣-១៩៥៣ ហើយដែលត្រូវបានទទួលស្គាល់ជាអន្តរជាតិ នៅចន្លោះឆ្នាំ ១៩៦៣-១៩៦៩»។
