អត្ថបទដោយ CWCI Cambodia / 08 th-7-2020
ចលនានិស្សិតដើម្បីលទ្ធិប្រជាធិបតេយ្យ ដែលមានមូលដ្ឋាននៅអាមេរិក បានចេញសេចក្តីថ្លែងការណ៍មួយ មុនពេល ៣ថ្ងៃនៃឃាតកម្មសម្លាប់បណ្ឌិត កែម ឡី ក្នុងខួបគម្រប់ ៤ឆ្នាំ នៅថ្ងៃទី១០ កក្កដា ឆ្នាំ២០២០។ ចុចត្រង់នេះ ជាសេចក្តីថ្លែងការណ៍ ឬអានអត្ថបទទាំងស្រុងនៅខាងក្រោម។
សេចក្តីថ្លែងការណ៍
ខួប៤ឆ្នាំនៃឃាតកម្មលោកបណ្ឌិត កែម ឡី
ចលនានិស្សិតដើម្បីលទ្ធិប្រជាធិបតេយ្យ តាមដានឃើញថា ឃាតកម្មលើលោកបណ្ឌិត កែម ឡី កាល ពីថ្ងៃទី១០ ខែកក្កដា ឆ្នាំ២០១៦ មិនទាន់ត្រូវបានវែកមុខចាប់ខ្លួនឃាតកពិត និងអ្នកពាក់ព័ន្ធ យកទៅផ្តន្ទាទោស តាមផ្លូវច្បាប់នៅឡើយ។ ដោយសិក្សាលេីពត៌មានច្រើនប្រភព យើងសន្និដ្ឋានថាលោក អឿត អាង (ឬ ជួប សម្លាប់) គឺជាឃាតកសិប្បនិម្មិត។ ការពិត លោក អឿត អាង គឺជាជនរងគ្រោះ ដែលអ្នករៀបចំឃាតកម្ម ប្រើប្រាស់តែប៉ុណ្ណោះ។
ចលនានិស្សិតដើម្បីលទ្ធិប្រធិបតេយ្យ ទាមទារតុលាការកម្ពុជា បង្ហាញរបាយការណ៍ស៊ើបអង្កេតរបស់ខ្លួនឲ្យច្បាស់លាស់ និងជាសាធារណៈ ទៅតាមអង្គហេតុនៃព្រឹត្តិការណ៍ធ្វើឃាតសម្លាប់លោកបណ្ឌិត កែម ឡី ដើម្បីជម្រះមន្ទិលសង្ស័យពីមជ្ឈដ្ឋាននានា ទាំងជាតិ និងអន្តរជាតិ ដែលចោទប្រកាន់អំពីការពាក់ព័ន្ធរបស់មន្រ្តី ជាន់ខ្ពស់ក្នុងជួរអាជ្ញាធររដ្ឋាភិបាល។ ក្នុងគោលដៅស្តារមុខមាត់ប្រព័ន្ធយុត្តិធម៌ និងកិត្តិយសរដ្ឋាភិបាលកម្ពុជា តុលាការត្រូវមានសេចក្តីក្លាហានបង្ហាញអង្គចងចាំនៃប្រព័ន្ធកាមេរ៉ាសុវត្ថិភាព នៅស្តាម៉ាត (Star Mart) ស្តុបបូគោ ខណ្ឌចំការមន រាជធានីភ្នំពេញ រយៈពេល ២៤ម៉ោងពេញ ក្នុងថ្ងៃទី១០ ខែកក្កដា ឆ្នាំ២០១៦ ចំថ្ងៃឃាតកម្មលោកបណ្ឌិត កែម ឡី។
តុលាការកម្ពុជានៅជំពាក់ពលរដ្ឋខ្មែរទូទៅ និងជាពិសេសក្រុមគ្រួសារជនរងគ្រោះ ដែលកំពុងទ្រហោយំ ចង់បានយុត្តិធម៌ខ្លាំងណាស់។ ដោយហេតុនេះ យើងខ្ញុំក៏សូមទាមទារយ៉ាងទទូចឲ្យតុលាការកម្ពុជា បើកការស៊ើប អង្កេតឡើងវិញលើសំណុំរឿងឃាតកម្ម លោក ហូ សុខ, លោក ចៅ សម្បត្តិ, លោក លី សេងហុង, លោក ក្រូច យឿម, លោក ជា ឫទ្ធីឈុត, លោក ម៉ែន ប៊ុនថន, អ្នកស្រី ពិសិដ្ឋ ពីលិកា, ព្រះសង្ឃ សំ ប៊ុនធឿន, លោក ឱម រដ្ឋសាឌី, លោក ជា វិជ្ជា, លោក ឈុត វុទ្ធី, កញ្ញា ទូច ស៊ុននិច, អ្នកស្រី តាត ម៉ារ៉ារីណា, លោក រស់ សុវណ្ណារេត, លោក ហ៊ី វុទ្ធី, លោក ឃឹម សំបូរ, លោក ធន់ ប៊ុនលី, លោក ឈរ ចិត្រធារិទ្ធ និងជនរងគ្រោះឯទៀត។
ចលនានិស្សិតដើម្បីលទ្ធិប្រជាធិបតេយ្យ សូមអំពាវនាវដល់តុលាការ និងអាជ្ញាធររដ្ឋាភិបាលកម្ពុជា ត្រូវ ស្តាប់សំឡេងពលរដ្ឋជាម្ចាស់ប្រទេស និងបំពេញកាតព្វកិច្ចរបស់ខ្លួនតាមច្បាប់ ឲ្យឆ្លើយតបនឹងសេចក្តីត្រូវការ របស់ពលរដ្ឋខ្មែរ ជាពិសេសក្រុមគ្រួសារជនរងគ្រោះដែលកំពុងទទូចរកយុត្តិធម៌យ៉ាងពិតប្រាកដ។
រដ្ឋធានីវ៉ាស៊ីនតុន ថ្ងៃទី០៧ ខែកក្កដា ឆ្នាំ២០២០
(ហត្ថលេខា)
ទូច វិបុល ប្រធានប្រតិបត្តិ
.