ចលនានិស្សិតដើម្បីលទ្ធិប្រជាធិបតេយ្យ (The Student Movement For Democracy “SMD”) បានចេញរបាយការណ៍ឆ្នាំ២០២០ ដោយខ្លឹមសារសង្ខេបមាន ៣ ទំព័ររបស់ខ្លួន នៅថ្ងៃទី០៣ ខែមករា ឆ្នាំ២០២១ នេះ ដែលចុះហត្ថលេខាដោយលោក អ៊ាប សេង អនុប្រធានប្រតិបត្តិនៃចលនានេះ (សូមទាញយករបាយការណ៍ – Download) មានសេចក្តីអត្ថាធិប្បាយដូចខាងក្រោម៖
របាយការណ៍សង្ខេប
បូកសរុបលទ្ធផលការងារប្រចាំឆ្នាំ២០២០
១. ប្រវត្តិ
ចលនានិស្សិតដើម្បីលទ្ធិប្រជាធិបតេយ្យ (The Student Movement For Democracy “SMD”) ត្រូវ បានបង្កើតទ្បើងលើកដំបូងនៅថ្ងៃទី០២ ខែកញ្ញា ឆ្នាំ១៩៩៨ នៅកម្ពុជា ហើយត្រូវបានរៀបចំឡើងវិញ នៅថ្ងៃទី ០៧ ខែមិថុនា ឆ្នាំ២០២០ នៅរដ្ឋធានីវ៉ាស៊ីនតោន សហរដ្ឋអាមេរិក ដោយអតីតស្ថានិកនៃចលនានិស្សិត និងក្រុមបញ្ញវន្ត ជាមួយនឹងទស្សនវិស័យ «ជម្រុញកម្ពុជាទៅកាន់លទ្ធិប្រជាធិបតេយ្យ យុត្តិធម៌ ឯកភាពជាតិ អធិបតេយ្យ និងបូរណភាពទឹកដីពេញលេញ» ។
២. សកម្មភាពការងារ ២០២០
ចលនានិស្សិតដើម្បីលទ្ធិប្រជាធិបតេយ្យ ចូលរួមតស៊ូមតិថ្នាក់ជាតិ និងអន្តរជាតិ លើការលើកកម្ពស់សិទ្ធិមនុស្ស ប្រជាធិបតេយ្យ កិច្ចការព្រំដែន និងដំណោះស្រាយនយោបាយ នៅប្រទេសកម្ពុជា។
ក). អំពីបញ្ហាព្រំដែន – ចលនានិស្សិតដើម្បីលទ្ធិប្រជាធិបតេយ្យ បានធ្វើប្រតិបត្តិការ ដូចខាងក្រោម៖
- ផ្ញើលិខិតជាផ្លូវការទៅក្រសួងការបរទេស និងសមាជិកសភាអាមេរិក ស្តីអំពីការរំលោភលើច្បាប់សមុទ្រ ឆ្នាំ១៩៨២ ពីសំណាក់វៀតណាម មកលើប្រទេសកម្ពុជា ពាក់ព័ន្ធ កោះត្រល់ និងចង្កោមកោះក្រចកសេះ។
- ផ្ញើលិខិតផ្លូវការជូននាយករដ្ឋមន្ត្រីនៃប្រទេសវៀតណាម ឲ្យរដ្ឋាភិបាលវៀតណាម ត្រូវតែគោរព និងអនុវត្ត តាមច្បាប់អន្តរជាតិ ជាដាច់ខាត ។
- ធ្វើការងារយ៉ាងសកម្មទាំងផ្នែកបច្ចេកទេស ច្បាប់ និងការទូត ជំរុញនិងទាមទារឲ្យប្រទេសវៀតណាម បញ្ឈប់រាល់គម្រោង និងផែនការអាជីវកម្ម ពាណិជ្ជកម្ម ព្រមទាំងការសាងសង់នានា នៅលើ កោះត្រល់ និង ចង្កោមកោះក្រចកសេះ ដែលនៅតែជាកម្មសិទ្ធិរបស់ប្រទេសកម្ពុជា ដោយយោងតាមសារាចររបស់ អគ្គទេសាភិបាលបារាំង លោក Brévié ឆ្នាំ១៩៣៩, អនុសញ្ញាអន្តរជាតិ ស្តីពីច្បាប់សមុទ្រ ឆ្នាំ១៩៨២, កិច្ចព្រមព្រៀងទីក្រុងប៉ារីស ឆ្នាំ១៩៩១ និងរដ្ឋធម្មនុញ្ញរបស់កម្ពុជា ឆ្នាំ១៩៩៣ ។
- ទាមទាមឲ្យរដ្ឋាភិបាលលោក ហ៊ុន សែន ដាក់មោឃភាពជាផ្លូវការ នូវច្បាប់ សន្ធិសញ្ញា កិច្ចព្រមព្រៀង និងឯកសារទាំងទ្បាយណា ដែលផ្ទុយពីខ្លឹមសារកិច្ចព្រមព្រៀងសន្តិភាពទីក្រុងប៉ារីស៍ ឆ្នាំ១៩៩១ ។
- ទាមទារឲ្យរដ្ឋាភិបាលវៀតណាម រុះរើជំរំ និងតង់យោធា ចេញតំបន់ឈរជើងនៅតាមព្រំដែនកម្ពុជា តាំងពី ពាក់កណ្តាលខែមេសា ឆ្នាំ២០២០ ដែលជាការរំលោភច្បាប់អន្តរជាតិ និងកិច្ចព្រមព្រៀងទីក្រុងប៉ារីស ឆ្នាំ១៩៩១ ក្នុងឯកសារទី២ ស្តីពីបូរណភាពទឹកដីកម្ពុជា និងបំពានគោលការណ៍នៃសមាគម អាស៊ាន។
ខាងក្រោមនេះ ជាកាលបរិច្ឆេទនៃលិខិតបទដ្ឋានរបស់ចលនានិស្សិត ដែលបានចេញផ្សាយ៖
- ថ្ងៃទី១២ ខែមិថុនា សេចក្តីថ្លែងការណ៍ ជំរុញឲ្យ«ទាហានវៀតណាម ត្រូវរុះរើជំរំ និងតង់ទាំងអស់ ចេញពីព្រំដែនកម្ពុជា»។
- ថ្ងៃទី១៣ ខែកក្កដា លិខិតចំហជូនលោក ហ៊ុន សែន នាយករដ្ឋមន្ត្រីកម្ពុជា ដើម្បីបដិសេធចោល សំណើរបស់នាយករដ្ឋមន្ត្រីវៀតណាម ដែលស្នើសុំផ្តល់ឯកសារស្របច្បាប់ ដល់ជនអន្តោប្រវេសន៍វៀតណាម ខុសច្បាប់ នៅប្រទេសកម្ពុជា។
- ថ្ងៃទី១៥ ខែកក្កដា លិខិតចំហ ស្តីពី«វៀតណាមត្រូវតែគោរព និងអនុវត្តតាមច្បាប់អន្តរជាតិ ជាដាច់ខាត» ជូនលោក ង្វៀន សួនហ្វ៊ុក នាយករដ្ឋមន្ត្រីវៀតណាម (July 15, 2020: “Vietnam must firmly respect and comply with the international laws.”. The opening letter to Mr. Nguyen Xuan Phuc, Prime Minister of the Socialist Republic of Vietnam) ។
- ថ្ងៃទី២១ ខែសីហា សេចក្តីថ្លែងការណ៍ ស្ដីពី «ច្រានចោលការបកស្រាយរបស់លោក ហ៊ុន សែន លេីបញ្ហាបូរណភាពទឹកដី ព្រំដែនគោក ដែនសមុទ្រ កោះត្រល់ និងចង្កោមកោះក្រចកសេះ»។
- ថ្ងៃទី២៧ ខែសីហា សេចក្តីថ្លែងការណ៍ ស្តីពី«ការបោះតង់ ទៅជាសាងសង់ជម្រករឹងមាំរបស់យោធាវៀតណាម អាចរុញទំនាស់ព្រំដែន ធ្លាក់ក្នុងវិបត្តិធ្ងន់ធ្ងរ»។
- ថ្ងៃទី១៤ ខែធ្នូ សេចក្តីថ្លែងការណ៍ ស្ដីពី«រដ្ឋាភិបាលកម្ពុជា ត្រូវដកខ្លួនចេញពីគម្រោងតំបន់ត្រីកោណអភិវឌ្ឍន៍ កម្ពុជា ឡាវ វៀតណាម»។
ខ). នយោបាយកម្ពុជា
ចលនានិស្សិតដេីម្បីលទ្ធិប្រជាធិបតេយ្យ បានអំពាវនាវដល់ឥស្សរជននយោបាយខ្មែរគ្រប់ភាគី វិលទៅរកការផ្សះផ្សា និង ឯកភាពជាតិ ដើម្បីស្តារស្ថានភាពនយោបាយនៅកម្ពុជា។
- ថ្ងៃទី១៧ ខែមិថុនា សេចក្តីថ្លែងការណ៍ ស្តីពី«ជំហរឯកភាពជាតិ» ។
គ). សិទ្ធិមនុស្ស និងលទ្ធិប្រជាធិបតេយ្យ
ចលនានិស្សិតដេីម្បីលទ្ធិប្រជាធិបតេយ្យ បានធ្វើកិច្ចសហប្រតិបត្តិការល្អ ជាមួយស្ថាប័នជាតិ-អន្តរជាតិ ជាពិសេស ក្រសួងការបរទេស និងសភាសហរដ្ឋអាមេរិក ។
- ថ្ងៃទី២០ ខែមិថុនា តាមប្រព័ន្ធហ្សួម (ZOOM) ថ្នាក់ដឹកនាំចលនានិស្សិត SMD បានជួបពិភាក្សាជាមួយមន្ត្រីជាន់ខ្ពស់ នៃក្រសួងការបរទេសអាមេរិក ទទួលបន្ទុកផ្នែកសិទ្ធិមនុស្ស និងប្រជាធិបតេយ្យ នៅតំបន់អាស៊ី គឺលោក Christopher Johnson និងលោកស្រី Sandra លើប្រធានបទ ស្ដីពី«ការស្តារលិទ្ធិប្រជាធិបតេយ្យ និង សិទ្ធិមនុស្សនៅកម្ពុជា។
- ថ្ងៃទី០៧ ខែកក្កដា ធ្វើសេចក្តីថ្លែងការណ៍ ស្ដីពី«ខួប៤ឆ្នាំ ឃាតកម្មលោកបណ្ឌិត កែម ឡី» ស្នើក្រសួងយុត្តិធម៌ បង្ហាញភស្តុតាងតម្លាជាសាធារណៈ និងបេីកការស៊ើបអង្កេតឡេីងវិញ លេីករណីឃាតកម្មលោកបណ្ឌិត កែម ឡី។
- ថ្ងៃទី០៩ ខែកក្កដា ធ្វើសេចក្តីបំភ្លឺទៅលោក ជិន ម៉ាលីន អ្នកនាំពាក្យក្រសួងយុត្តិធម៌ ជុំវិញសេចក្តីថ្លែងការណ៍របស់ចលនានិស្សិត SMD ក្នុងខួប ៤ឆ្នាំ នៃឃាតកម្មបណ្ឌិត កែម ឡី» ដោយបំភ្លឺបញ្ជាក់ថា «ចលនានិស្សិត SMD ពុំមែនធ្វើអាជីវកម្មនយោបាយ ដូចការពោលរបស់លោក ជិន ម៉ាលីន ទេ»។
- ថ្ងៃទី០៨ ខែកញ្ញា ធ្វើលិខិតផ្ញើជូនសមាជិកព្រឹទ្ធសភាអាមេរិក លោក លីនសី ក្រាហាំ (Linsey Graham) «បេះដូងពលរដ្ឋខ្មែរ មើលឃើញថា សហរដ្ឋអាមេរិក ជាអ្នករំដោះ” (September 8, 2020, letter to Senator Linsey Graham “Cambodian people’s hearts see the United State of America as a liberator” ។ ថ្ងៃទី០៨នេះ យើងខ្ញុំក៏បានផ្ញើលិខិតស្រដៀងគ្នានឹងលិខិតខាងលើ ទៅកាន់សមាជិករដ្ឋសភាអាមេរិក លោក អាឡិន ឡូវ៉ិនថល (Allen Lowenthal) និងផ្ញើជូនរដ្ឋមន្រ្តីក្រសួងការបរទេសអាមេរិក លោក ម៉ៃ ផុមពីអូ (Mike Pompeo)។ ខ្លឹមសារនៃលិខិតទាំងនេះ ស្នើដល់ សហរដ្ឋអាមេរិក ជម្រុញអាជ្ញាធរកម្ពុជា ឲ្យដោះលែងអ្នកទោសមនសិការទាំងអស់ ព្រមទាំងសកម្មជននយោបាយ សិទ្ធិមនុស្ស បរិស្ថាន និងសកម្មជនព្រំដែន។
- ថ្ងៃទី២៨ ខែកញ្ញា ធ្វើញត្តិជូនរដ្ឋមន្ត្រីក្រសួងការបរទេសសហរដ្ឋអាមេរិក «ពលរដ្ឋខ្មែរមានក្តីសង្ឃឹមថ្មី និងមិនឯកការ ដោយការយកចិត្តទុកដាក់របស់សហរដ្ឋអាមេរិក ពីសម្លេងសុំអន្តរាគមន៍របស់ពលរដ្ឋខ្មែរ (September 28, 2020, Petition to the US Secretary Of State “Cambodian people have new hope and not alone)» ។
- ថ្ងៃទី២៨ ខែកញ្ញា ផ្ញើ «ញត្តិជូនរដ្ឋាភិបាលកម្ពុជា» ស្នើឲ្យមានការដោះលែងអ្នកទោសមនសិការ និង អ្នកទោសនយោបាយទាំងអស់ តាមរយៈលោក ជុំ សុន្ទរី ឯកអគ្គរាជទូតកម្ពុជា ប្រចាំសហរដ្ឋអាមេរិក។
- ថ្ងៃទី២៦ ខែវិច្ឆិកា ជំរុញ«តុលាការកម្ពុជា ត្រូវទម្លាក់ចោលបទចោទលេីក្រុមសកម្មជន» គឺត្រូវដោះលែងអ្នកទោសមនសិការទាំងអស់ ដោយឥតលក្ខខណ្ឌ។
- ថ្ងៃទី១០ ខែធ្នូ ធ្វើសេចក្តីថ្លែងការណ៍ «អបអរទិវាសិទ្ធិមនុស្សអន្តរជាតិ ថ្ងៃទី១០ ធ្នូ គម្រប់ខួបលេីកទី៧២ ឆ្នាំ» ស្ដីពីការជំរុញរដ្ឋាភិបាលលោក ហ៊ុន សែន ឲ្យដោះលែងអ្នកទោសមនសិការ ដេីម្បីលេីកកម្ពស់ ការគោរពសិទ្ធិមនុស្សនៅកម្ពុជា។
- ថ្ងៃទី១៤ ខែធ្នូ ជំរុញ«រដ្ឋាភិបាលកម្ពុជា ត្រូវដកខ្លួនចេញពីគម្រោងតំបន់ត្រីកោណអភិវឌ្ឍន៍ កម្ពុជា ឡាវ និង វៀតណាម» ដេីម្បីបញ្ជៀសហានិភ័យធ្ងន់ធ្ងរ ដល់ប្រទេសជាតិខ្មែរ នៅថ្ងៃអនាគត។
៣. លទ្ធផលការងារ និងទិសដៅបន្ត
រាល់សេចក្តីថ្លែងការណ៍ និងសារលិខិតរបស់ ចលនានិស្សិតដើម្បីលទ្ធិប្រជាធិបតេយ្យ បានទទួលការឆ្លើយតប និងគាំទ្រយ៉ាងទំហឹងអំពីស្ថាប័នជាតិ និងអន្តរជាតិ ជាពិសេសពីក្រសួងការបរទេសសហរដ្ឋអាមេរិក។ ដោយឡែក រដ្ឋាភិបាលលោក ហ៊ុន សែន មិនបានឆ្លេីយតបជាផ្លូវការ ដល់ការស្នើសុំរបស់ចលនានិស្សិតដេីម្បីលទ្ធិប្រជាធិបតេយ្យ ឡើយ។
ចលនានិស្សិតដេីម្បីលទ្ធិប្រជាធិបតេយ្យ ប្តេជ្ញាបន្តបេសកកម្មឆ្ឆ្នាំថ្មី ២០២១ ដេីម្បី«ស្វែងរកឯកភាពជាតិ និងសន្តិភាពថ្លៃថ្នូរ, ពង្រឹងការគោរពសិទ្ធិមនុស្ស និងប្រជាធិបតេយ្យ, ការពារទឹកដីព្រំដែន និងដោះស្រាយបញ្ហាអន្តោប្រវេសន៍ខុសច្បាប់, ជម្រុញគោលដៅយុត្តិធម៌សង្គម និង នីតិរដ្ឋស្អាតស្អំ» ជូនប្រជាពលរដ្ឋខ្មែរទូទៅ។
យេីងខ្ញុំសូមថ្លែងអំណរគុណ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងសកម្មជននៃចលនានិស្សិត ដើម្បីលទ្ធិប្រជាធិបតេយ្យ ព្រមទាំងបងប្អូនខ្មែរ និងមិត្តភក្ដិអន្តរជាតិទាំងឡាយ ដែលបាននិងបន្តគាំទ្រយើងខ្ញុំ។
រដ្ឋធានីវ៉ាស៊ីនតោន ថ្ងៃទី០៣ ខែមករា ឆ្នាំ២០២១
អ៊ាប សេង
អ្នកធ្វើរបាយការណ៍ និងអនុប្រធានប្រតិបត្តិ
.
.