អត្ថបទ៖ ចលនានិស្សិត (SMD)
ចលនានិស្សិតខ្មែរ ដែលមានមូលដ្ឋាននៅសហរដ្ឋអាមេរិក នៅថ្ងៃទី២៦ ខែវិច្ឆិកា នេះ បានអំពាវនាវឲ្យរដ្ឋាភិបាល និងតុលាការកម្ពុជា ទម្លាក់ចោលបទចោទប្រកាន់ ទៅលើក្រុមសកម្មជនបក្សប្រឆាំង និងសង្គម។ ការអំពាវនេះ ធ្វើឡើងក្នុងសេចក្តីថ្លែងការណ៍មួយ ចុះហត្ថលេខាដោយលោក អ៊ាប សេង អនុប្រធានប្រតិបត្តិនៃ ចលនានិស្សិតដើម្បីលទ្ធិប្រជាធិបតេយ្យ ស្របពេលដែលតុលាការទីក្រុងភ្នំពេញ បើកសវនការជំនុំជំរះក្តី លើមនុស្សជាង ១០០ នាក់ នៅថ្ងៃទី២៦ ខែវិច្ឆិកានេះ។
ជំវិញការជំនុំជំរះក្តីដែរ តុលាការបានសម្រេចលើកពេល ទៅជំនុំជំរះសំណុំរឿងខាងលើ ទៅថ្ងៃទី១៤ ខែមករា និងថ្ងៃទី០៤ ខែមីនា ឆ្នាំ ២០២១ ក្រោមហេតុផលថា «ត្រូវរៀបចំនីតិវិធីបន្ថែម»។ ចំណែកក្រុមអ្នកឃ្លាំមើលសង្គម និងនយោបាយកម្ពុជា វាយតម្លៃថា «ជារឿងនយោបាយ និងគ្មាននីតិវិធីត្រឹមត្រូវ»។
/ (អត្ថបទបន្ថែមដោយលោក ម៉ែន ណាត)
ខាងក្រោមនេះ គឺជាខ្លឹមសារទាំងស្រុងនៃសេចក្តីថ្លែងការណ៍ ៖
សេចក្តីថ្លែងការណ៍
តុលាការត្រូវទម្លាក់ចោលបទចោទទៅលើក្រុមសកម្មជន
ចលនានិស្សិតដើម្បីលទ្ធិប្រជាធិបតេយ្យ អំពាវនាវដល់រាជរដ្ឋាភិបាលកម្ពុជា និងតុលាការ ទម្លាក់បទចោទនានា ទៅលើក្រុមសកម្មជននយោបាយ និងសង្គម។
កាលពីថ្ងទី០៦ ខែតុលា ឆ្នាំ២០២០ សាលាដំបូងរាជធានីភ្នំពេញ បានចេញសេចក្តីប្រកាសថា នឹងចាប់ផ្តើមបើកសវនាការ លើសំណុំរឿងរបស់ក្រុមសកម្មជនចំនួន ១២៩ នាក់ នៅថ្ងៃទី២៦ ខែវិច្ឆិកា ឆ្នាំ២០២០ ស្តីពីបទចោទ «ចូលរួមគំនិតក្បត់» និង «ញុះញង់បង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម»។
ចលនានិស្សិតដើម្បីលទ្ធិប្រជាធិបតេយ្យ ចាត់ទុកបទចោទទៅលើសកម្មជនទាំងនោះ មានចរិតនយោបាយយ៉ាងពិតប្រាកដ និងជាការរំលោភលើសិទ្ធិស្របច្បាប់របស់ពលរដ្ឋខ្មែរ ដែលការពារដោយរដ្ឋធម្មនុញ្ញ នៃព្រះរាជាណាចក្រកម្ពុជា ក្នុងការចូលរួមសកម្មភាពនយោបាយ ឬសំដែងមតិដោយសន្តិវិធី។
ជាថ្មីម្តងទៀត ចលនានិស្សិតដើម្បីលទ្ធិប្រជាធិបតយេ្យ ទទូចដល់រាជរដ្ឋាភិបាលកម្ពុជា និងតុលាការ ទម្លាក់បទចោទ និងផ្តល់សេរីភាពពេញលេញដល់សកម្មជនទាំងអស់នោះទ្បើងវិញ ដើម្បីស្តារមុខមាត់កម្ពុជា នៅលើឆាកអន្តរជាតិ ជាពិសេសដើម្បីការផ្សះផ្សាជាតិ និងបង្រួបបង្រួមជាតិ ជាប្រយោជន៍ដល់សង្គម កម្ពុជា និងសេចក្តីសុខសាន្តរបស់ប្រជាពលរដ្ឋខ្មែរ។
រដ្ឋធានីវ៉ាស៊ីនតោន ថ្ងៃទី២៦ ខែវិច្ឆិកា ឆ្នាំ២០២០
អ៊ាប សេង
អនុប្រធានប្រតិបត្តិចលនានិស្សិតដើម្បីលទ្ធិប្រជាធិបតេយ្យ
.
.