អត្ថបទ៖ ចលនានិស្សិត SMD
ចលនានិស្សិតដើម្បីលទ្ធិប្រជាធិបតេយ្យ (Student Movement for Democracy – SMD) បានចេញសេចក្តីថ្លែងការណ៍មួយ ទាមទារឲ្យរដ្ឋាភិបាលកម្ពុជា នៃលោក ហ៊ុន សែន ត្រូវដកខ្លួនចេញពីគម្រោង«តំបន់ត្រីកោណអភិវឌ្ឍន៍ (Cambodia, Laos, Vietnam – CLV» នៅតំបន់កន្ទុយនាគ ជាការទប់ស្កាត់ការហូរចូលជនជាតិវៀតណាម មកកម្ពុជា និងបញ្ចៀសមហិច្ឆតាឈ្លានពានពីប្រទេសវៀតណាម បន្ថែមទៀត លើដែនអធិបតេយ្យ និងបូរណភាពទឹកដីរបស់កម្ពុជា។ សេចក្តីថ្លែងការណ៍ (សូមទាញយក / Download) ចុះហត្ថលេខាដោយលោក ទូច វិបុល ប្រធានប្រតិបត្តិនៃចលនានិស្សិតនេះ ដែលបានចេញផ្សាយនៅថ្ងៃទី១៤ ខែធ្នូ ឆ្នាំ២០២០។ សូមអានខ្លឹមសារលំអិត ដូចខាងក្រោម៖
សេចក្តីថ្លែងការណ៍
«រដ្ឋាភិបាលកម្ពុជាត្រូវដកខ្លួនចេញពីគម្រោងតំបន់ត្រីកោណអភិវឌ្ឍន៍ កម្ពុជា ទ្បាវ វៀតណាម»
ចលនានិស្សិតដើម្បីលទ្ធិប្រជាធិបតេយ្យ ទាមទាររដ្ឋាភិបាលកម្ពុជា ត្រូវដកខ្លួនចេញពីគម្រោង «តំបន់ត្រីកោណអភិវឌ្ឍន៍ កម្ពុជា ទ្បាវ វៀតណាម» ដើម្បីធានាការពារអធិបតេយ្យភាព បូរណភាពទឹកដីខ្មែរ និងធនធានធម្មជាតិរបស់កម្ពុជា។ គម្រោង «តំបន់ត្រីកោណអភិវឌ្ឍន៍ កម្ពុជា ទ្បាវ វៀតណាម» ដែលព្រមព្រៀងគ្នាដោយប្រមុខរដ្ឋាភិបាលនៃ ប្រទេសទាំងបី នៅក្នុងកិច្ចប្រជុំកំពូល លើកទី១១ កាលពីថ្ងៃទី៩ ខែធ្នូ ឆ្នាំ២០២០ ដូចការផ្សាយនៃទីភ្នាក់ងារព័ត៌មាន វីអិនអេ (VNA) វៀតណាម ហើយដែលរដ្ឋាភិបាលកម្ពុជា ព្យាយាមលាក់បាំងប្រជាពលរដ្ឋ និងបណ្ដាញព័ត៌មានខ្មែរនោះ នឹងនាំទុក្ខបំផ្លាញជាតិខ្មែរដ៏ជ្រាលជ្រៅ។
គំម្រោង«តំបន់ត្រីកោណអភិវឌ្ឍន៍ កម្ពុជា ទ្បាវ វៀតណាម» នឹងនាំគ្រោះអាសន្នធំណាស់ ដល់អនាគតនៃទឹកដីកម្ពុជាចំនួនបួន(៤) ខេត្តភាគឦសាន (រតនគីរី មណ្ឌលគីរី ក្រចេះ ស្ទឹងត្រែង) នៅពេលដែលលក្ខខណ្ឌនៃការអភិវឌ្ឍន៍នេះ បើកទូលាយឲ្យជនជាតិឡាវ និងវៀតណាម ចេញចូលសេរីក្នុងខេត្តខ្មែរទាំងបួន រហូតដល់អាចកាន់កាប់កម្មសិទ្ធិដីធ្លី ក្នុងខេត្តខ្មែរទាំងនេះ ក្នុងឈ្មោះចូលធ្វើអាជីវកម្មក្នុងតំបន់អភិវឌ្ឍន៍។ វៀតណាម នឹងគ្រប់គ្រងខេត្តខ្មែរទាំងបួនយ៉ាងណែន តាមរយៈនយោបាយប្រជាសាស្ត្រជនជាតិវៀតណាម ដែលនឹងប្រើសិទ្ធិចូលធ្វើការ និងសិទ្ធិបង្កើតជំនួញក្នុងតំបន់ខេត្តខ្មែរ ពីព្រោះក្នុងផែនការគម្រោងតំបន់ត្រីកោណអភិវឌ្ឍន៍នេះ ខេត្តខ្មែរបួន(៤) ដ៏ធំល្វឹងល្វើយ មានពលរដ្ឋខ្មែរសរុបប្រមាណតែ ៥០ ម៉ឺននាក់ប៉ុណ្ណោះ ស្របពេលខេត្តឡាវបួន(៤) មានប្រជាជន ៧០ ម៉ឺននាក់ ខណៈខេត្តវៀតណាមប្រាំ(៥) មានប្រជាជន រហូតដល់ ប្រាំពីរ(៧)លាននាក់ឯណោះ។
ឧបមាថា បើប្រទេសវៀតណាម គ្រាន់តែបញ្ជូនប្រជាជនរបស់ខ្លួនត្រឹមតែមួយ(១)លាននាក់ ចូលធ្វើការ និងរកស៊ី ក្នុងខេត្តខ្មែរ រតនគីរី មណ្ឌលគីរី ក្រចេះ និងស្ទឹងត្រែង ដែលមានពលរដ្ឋខ្មែរសរុបត្រឹមតែ ៥០ ម៉ឺននាក់ ក៏ជនជាតិវៀតណាម ច្រើនជាងពលរដ្ឋខ្មែរពាក់កណ្ដាលទៅហើយ ដូច្នេះពេលនោះ វៀតណាម ចង់ធ្វើអ្វីលើទឹកដីខ្មែរ ក៏ងាយបំផុត។ ហើយចុះ បើជនជាតិវៀតណាម ដល់ពីរ(២)លាននាក់ ឬបី(៣)លាននាក់ ចូលក្នុងខេត្តខ្មែរទាំងបួន(៤)នេះវិញ តើទៅជាការបង្កើត គ្រោះថ្នាក់ប៉ុនណាដល់ជាតិកម្ពុជា ពេលវៀតណាមនៅតែចិញ្ចឹមមហិច្ឆតា ឈ្លានពានកាន់កាប់កម្ពុជាជាប់មិនដាច់ ?
នៅចំពោះមុខស្ថានភាពដ៏គួរឲ្យបារម្ភនេះ ចលនានិស្សិតដើម្បីលទ្ធិប្រជាធិបតេយ្យ ទាមទាររដ្ឋាភិបាលកម្ពុជា ត្រូវដកខ្លួនចេញពីគម្រោង «តំបន់អភិវឌ្ឍន៍ត្រីកោណ កម្ពុជា ទ្បាវ វៀតណាម» ដើម្បី ៖
១. បញ្ចៀសគ្រោះនៃការបង្ហូរចូល នៃជនជាតិវៀតណាមដ៏ច្រើនលើសលប់បន្ថែមទៀត មករស់នៅក្នុងប្រទេសកម្ពុជា ក្រោមលេសអនុវត្តន៍គម្រោងតំបន់ត្រីកោណអភិវឌ្ឍន៍នេះ។
២. បញ្ចៀសគ្រោះនៃការបាត់បង់បូរណភាពទឹកដីខ្មែរបន្ថែមទៀត ពីនយោបាយឈ្លានពានរបស់វៀតណាម ក្រោមលេសអភិវឌ្ឍន៍សេដ្ឋកិច្ចពាណិជ្ជកម្មរួម។
៣. បញ្ចៀសគ្រោះនៃការបំបែកខេត្តខ្មែរតូចៗបន្ថែមទៀត ចេញពីខេត្តខ្មែរតំបន់ភាគឦសានទាំងបួន ក្រោមលេសបង្កើតរដ្ឋបាលមូលដ្ឋាន ដើម្បីងាយគ្រប់គ្រងតំបន់ត្រីកោណអភិវឌ្ឍន៍ ប៉ុន្តែអាចវិវត្តទៅជាការគប់គិតគ្នា ផ្ដល់ឱកាសឲ្យជនជាតិកំណើតវៀតណាម ដែលចេះភាសាខ្មែរ ទៅត្រួតត្រារដ្ឋបាលខ្មែរ ដែលអាចនឹងពុះច្រៀក បង្កើតជាតំបន់តូចៗថ្មីៗនោះ។
៤. បញ្ចៀសគ្រោះនៃការបង្កអសន្តិសុខក្នុងទឹកដីខ្មែរ ដោយជនជាតិវៀតណាម ដែលតែងតែមានវប្បធម៌បង្កជម្លោះ មិនគោរពពលរដ្ឋខ្មែរម្ចាស់ប្រទេស។
៥. បញ្ចៀសគ្រោះនៃការហិនហោចព្រៃឈើ រ៉ែ មច្ឆា និងធនធានធម្មជាតិខ្មែរផ្សេងៗ ពីរបៀបរកស៊ីបែបបំផ្លាញ របស់ជនជាតិវៀតណាម ដូចដែលពលរដ្ឋខ្មែរទូទៅធ្លាប់ឃើញរាប់មិនអស់កន្លងទៅ។
រដ្ឋាភិបាលនៃប្រទេសកម្ពុជា ត្រូវធ្វើប្រជាមតិឲ្យបានត្រឹមត្រូវ ឆ្លុះបញ្ចាំងពីឆន្ទៈរបស់ពលរដ្ឋខ្មែរ មុននឹងសម្រេចអនុវត្តគម្រោងអភិវឌ្ឍន៍ដ៏គ្រោះថ្នាក់នេះ។ បើមិនដូច្នោះទេ ផែនការអភិវឌ្ឍន៍នេះ មានន័យស្មើនឹងរៀបក្បួនឲ្យ វៀតណាម គ្រប់គ្រងទឹកដីខេត្តខ្មែរភាគឦសាន ដោយជៀសមិនផុត។
រដ្ឋធានីវ៉ាស៊ីនតុន ថ្ងៃទី១៤ ខែធ្នូ ឆ្នាំ២០២០
ទូច វិបុល (ហត្ថលេខា)
ប្រធានប្រតិបត្តិចលនានិស្សិតដើម្បីលទ្ធិប្រជាធិបតេយ្យ
.
.