អត្ថបទ៖ ចលនានិស្សិត SMD
ចលនានិស្សិតដើម្បីលទ្ធិប្រជាធិបតេយ្យ បានចេញសេចក្តីថ្លែងការណ៍មួយ អំពាវនាវឲ្យរដ្ឋាភិបាល និងតុលាការកម្ពុជា ទម្លាក់ចោលបទចោទ និងដោះលែងអ្នកទោសមនសិការទាំងអស់ ឲ្យមានសេរីភាពឡើងវិញ។ សេចក្តីថ្លែងការណ៍នេះ ចុះហត្ថលេខាដោយលោក អ៊ាប សេង អនុប្រធានប្រតិបត្តិ ចេញផ្សាយនៅថ្ងៃទី១០ ខែធ្នូ ឆ្នាំ២០២០ ចំពេលដែលពិភពលោកប្រារព្ធទិវាសិទ្ធិមនុស្សអន្តរជាតិ គម្រប់ខួបទី ៧២ឆ្នាំ។ សូមអានខ្លឹមសារលំអិត ដូចខាងក្រោម៖
សេចក្តីថ្លែងការណ៍
អបអរទិវាសិទ្ធិមនុស្សអន្តរជាតិ ថ្ងៃទី១០ ធ្នូ គម្រប់ខួបលើកទី ៧២ឆ្នាំ និងសូមដោះលែងអ្នកទោសមនសិការ ដើម្បីលើកកម្ពស់ការគោរពសិទ្ធិមនុស្សនៅកម្ពុជា
ចលនានិស្សិតដើម្បីលទ្ធិប្រជាធិបតេយ្យ សូមអំពាវនាវដល់រដ្ឋាភិបាល និងតុលាការកម្ពុជា ទម្លាក់ចោលបទចោទនានា ទៅលើព្រះសង្ឃ និងយុវជន ដើម្បីលើកកម្ពស់ការគោរពសិទ្ធិមនុស្សនៅកម្ពុជា។
ក្នុងឱកាសអបអរទិវាសិទ្ធិមនុស្សអន្តរជាតិ ថ្ងៃទី១០ ធ្នូ គម្រប់ខួបលើកទី ៧២ ឆ្នាំ ដ៏មានសារសំខាន់នេះ ពិភពលោក បានអំពាវនាវឱ្យមានការចូលរួមក្នុងយុទ្ធនាការ «បញ្ចប់ការប្រកាន់ពូជសាសន៍» «ដោះស្រាយបញ្ហាគម្លាតសង្គម» និង «ក្រោកឈរដើម្បីសិទ្ធិមនុស្ស»។
រដ្ឋាភិបាលកម្ពុជា គួរយកឱកាសនេះ កែសម្រួលនូវភាពអវិជ្ជមាននានា ពាក់ព័ន្ធនឹងការអនុវត្តច្បាប់លើស កំរិតទៅលើប្រជាពលរដ្ឋ ជាពិសេសយុវជនដែលគ្រាន់តែហ្វឹកហាត់នូវសិទ្ធិស្របច្បាប់របស់ខ្លួន ដែលការពារ ដោយរដ្ឋធម្មនុញ្ញក្នុងការបញ្ចេញមតិ និងចូលរួមកិច្ចការសង្គម និងនយោបាយ។
ជាថ្មីម្តងទៀត ចលនានិស្សិតដើម្បីលទ្ធិប្រជាធិបតេយ្យ សូមអំពាវនាវដល់រដ្ឋាភិបាល និងតុលាការកម្ពុជា ទម្លាក់បទចោទនានា ទៅលើព្រះសង្ឃ និងយុវជន ដែលកំពុងជាប់ឃុំឱ្យមានសេរីភាពទ្បើងវិញ ដើម្បីធ្វើឱ្យស្ថានភាពសិទ្ធិមនុស្សនៅកម្ពុជាល្អប្រសើរទ្បើងវិញ។
អ៊ាប សេង
អនុប្រធានប្រតិបត្តិ
.
.