អត្ថបទដោយចលនានិស្សិត SMD
ចលនានិស្សិតដើម្បីលទ្ធិប្រជាធិបតេយ្យ ដែលមានមូលដ្ឋាននៅសហរដ្ឋអាមេរិក នៅថ្ងៃទី០៣ ខែសីហា ឆ្នាំ២០២០ បានប្រតិកម្មធ្ងន់ៗទៅកាន់រដ្ឋាភិបាលកម្ពុជា និងប្រកាសច្រានចោលការបម្លែងខ្នាតផែនទីព្រំដែន ១/២៥.០០០ ដែលផ្ទុយពីខ្លឹមសាររដ្ឋធម្មនុញ្ញកម្ពុជា និងកិច្ចព្រមព្រៀងទីក្រុងប៉ារីស ឆ្នាំ១៩៩១។ សេចក្តីថ្លែងការណ៍ដែលចុះហត្ថលេខាដោយប្រធានប្រតិបត្តិ នៃចលនានិស្សិតនេះ លោក ទូច វិបុល បានធ្វើការទាមទារឲ្យមានការចូលរួមពីចម្រុះភាគីជាតិ និងអន្តរជាតិ ក្នុងការដោះស្រាយបញ្ហាព្រំដែនកម្ពុជា ជាមួយប្រទេសវៀតណាម ទាំងករណីផែនទី និងការវាស់កំណត់លើផែនដីជាក់ស្ដែង។ សូមទាញយក «សេចក្តីថ្លែងការណ៍» ឬអាចអានខ្លឹមទាំងស្រុងខាងក្រោមនេះ។
សេចក្តីថ្លែងការណ៍
ច្រានចោលការបម្លែងខ្នាតផែនទី ១/២៥.០០០ ក្នុងការបោះបង្គោលព្រំដែនកម្ពុជា-វៀតណាម ក្នុងស្ថានភាពកម្ពុជាបច្ចុប្បន្ន
ចលនានិស្សិតដើម្បីលទ្ធិប្រជាធិបតេយ្យ សូមច្រានចោលដាច់ខាត នូវការប្រើប្រាស់ខ្នាតផែនទី ១/២៥.០០០ ក្នុងស្ថានភាពបច្ចុប្បន្ន ដែលធ្វើទ្បើងដោយតំណាងរដ្ឋាភិបាលវៀតណាម លោក Le Hoai Trung អនុរដ្ឋមន្ត្រីក្រសួងការបរទេស និងតំណាងរដ្ឋាភិបាលកម្ពុជា លោក វ៉ា គឹមហុង ប្រធានគណ:កម្មាធិការចម្រុះព្រំដែនកម្ពុជា កាលពីថ្ងៃទី០១ ខែសីហា ឆ្នាំ២០២០។
ទីភ្នាក់ងារសារព័ត៌មានវៀតណាម (VNA) ថ្ងៃទី០១ ខែសីហា ឆ្នាំ២០២០ រាយការណ៍ថា៖ «ភាគីទាំងពីរបានផ្ទៀងផ្ទាត់ ពិនិត្យ និងឯកភាព លើផែនទីព្រំដែនចំនួន ៥០០ផ្ទាំង … ដោយមានការចុះហត្ថលេខាពីតំណាងនៃប្រទេស ទាំងពីរ»។ សេចក្តីរាយការណ៍នេះ បន្ថែមថា «ផែនទីទាំងនោះ គឺជាផ្នែកនៃការកំណត់ព្រំដែនគោក រវាងវៀតណាម-កម្ពុជា ដែលបានចុះហត្ថលេខា ថ្ងៃទី០៥ ខែតុលា ឆ្នាំ២០១៩ តាមមូលដ្ឋាននៃសន្ធិសញ្ញាបំពេញបន្ថែម លើសន្ធិសញ្ញាកំណត់ព្រំដែនរដ្ឋ ឆ្នាំ១៩៨៥ និងសន្ធិសញ្ញាបំពេញបន្ថែម ឆ្នាំ២០០៥»។
យើងខ្ញុំសូមបង្ហាញអំពីកំហុសនៃការបម្លែងខ្នាតផែនទី ទៅជា ១/២៥.០០០ នេះ ដូចខាងក្រោម ៖
ទី១- ផែនទីខ្នាត ១/២៥.០០០ ផ្ទុយពីខ្លឹមសាររដ្ឋធម្មនុញ្ញ នៃព្រះរាជាណាចក្រកម្ពុជា។ មាត្រា២ នៃជំពូកទី១ អំពីអធិបតេយ្យ ចែងថា «បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានដាច់ខាត ក្នុងព្រំដែន របស់ខ្លួន ដែលមានកំណត់ក្នុងផែនទី ១/១០០.០០០ ធ្វើនៅចន្លោះឆ្នាំ ១៩៣៣-១៩៥៣ ហើយដែលត្រូវបានទទួលស្គាល់ជាអន្តរជាតិ នៅចន្លោះ ននឆ្នាំ១៩៦៣-១៩៦៩»។
ទី២- រឿងបម្លែងមាត្រដ្ឋានផែនទី គឺជាកិច្ចការបច្ចេកទេស ដែលមានលក្ខណៈសុក្រឹត និងអាចទទួលយកបាន លុះត្រាតែមានការចូលរួមពីភាគីពាក់ព័ន្ធប្រវត្តិផែនទី នៃក្រុមភូមិសាស្ត្រឥណ្ឌូចិន-បារាំង ដូចជាប្រទេសបារាំង មន្ត្រី ជំនាញបច្ចេកទេសនៃអង្គការសហប្រជាជាតិ និងភាគីទំនាស់ទាំងពីរ គឺកម្ពុជា និងវៀតណាម។ ករណីផែនទីនេះ ពុំអាចគប់គិតសម្រេចធ្វើស្ងាត់ៗ ត្រឹមទ្វេភាគី តែរវាងកម្ពុជា និងវៀតណាម ហើយបោះពុម្ពនៅប្រទេសដាណឺម៉ាក ឬប្រទេសណាមួយ ស្រេចតែនឹងចិត្តនោះទេ ពីព្រោះ ៖
- កិច្ចព្រមព្រៀងក្រុងប៉ារីស៍ថ្ងៃទី២៣ ខែតុលា ឆ្នាំ១៩៩១ បានដាក់ជា«មោឃភាព» អស់ហើយនូវសន្និសញ្ញា និងកិច្ចព្រមព្រៀងឆ្នាំ១៩៧៩ ១៩៨២ ១៩៨៣ និងឆ្នាំ១៩៨៥។
- សន្ធិសញ្ញាបំពេញបន្ថែមឆ្នាំ២០០៥ និងឆ្នាំ២០១៩ ដែលជាមូលដ្ឋានសហប្រតិបត្តិការ រវាងរដ្ឋាភិបាលកម្ពុជាបច្ចុប្បន្ន និងវៀតណាម ក៏ជាការបំពានរដ្ឋធម្មនុញ្ញកម្ពុជា និងកិច្ចព្រមព្រៀងក្រុងប៉ារីស៍ ដែលវៀតណាម ជាប្រទេសហត្ថលេខីដែរ។
ទី៣- រដ្ឋាភិបាលកម្ពុជានៃ លោក ហ៊ុន សែន ពុំមានលក្ខខណ្ឌប្រតិបត្តិតម្លា ក្នុងការបោះបង្គោលព្រំដែន ជាមួយប្រទេសជិតខាង ជាពិសេសការធ្វើជាមួយប្រទេសវៀតណាម ចំនួន ៣១៥ បង្គោល (៨៤ ភាគរយ) ដែលមិនអាចជម្រះសេចក្ដីមន្ទិលសង្ស័យរបស់ប្រជាពលរដ្ឋខ្មែរជាម្ចាស់ទឹកដីបានឡើយ។ លក្ខខណ្ឌប្រតិបត្តិកន្លងមក និងបច្ចុប្បន្ន មានចរិតបិទបាំងការពិត ពីប្រជាពលរដ្ឋខ្មែរ ពីព្រោះ ៖
- ពុំបានបើកចំហឲ្យមានការចូលរួមពីចម្រុះភាគីជាតិ ដូចជាគណបក្សប្រឆាំង សង្គមស៊ីវិល អ្នកជំនាញទាំងក្នុង និងក្រៅប្រទេស និងតំណាងព្រះមហាក្សត្រ ដែលជាទីទុកចិត្តរបស់ប្រជាពលរដ្ឋខ្មែរ។
- ពុំបានបើកចំហឲ្យមានការចូលរួមពីចម្រុះភាគីអន្តរជាតិ ដូចជាអ្នកជំនាញផែនទី នៃអង្គការសហប្រជាជាតិ ឬតំណាងសហប្រធាននៃកិច្ចព្រមព្រៀងទីក្រុងប៉ារីស៍ ជាពិសេសអ្នកបច្ចេកទេសផែនទី នៃប្រទេសបារាំង ដែលជាម្ចាស់គំនូសផែនទីដើម នៃប្រទេសកម្ពុជា ជាមួយប្រទេសជិតខាង។
- កាន់តែមិនអាចទទួលយកបានទៀតនោះ ត្រង់ថា រដ្ឋាភិបាលលោក ហ៊ុន សែន តែងតែធ្វើទុក្ខបុកម្នេញប្រជាពលរដ្ឋខ្មែរទាំងឡាយណា ដែលចង់ដឹងការពិត អំពីរឿងផែនដីព្រំដែន ជាឧទាហរណ៍ជាក់ស្ដែង ការចាប់ឃុំខ្លួន លោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជា ថ្មីៗនេះ ស្របពេលអាជ្ញាធរ នៃប្រទេសវៀតណាមហ៊ានបើកចំហ ឲ្យពលរដ្ឋវៀតណាម ដឹងឮ និងចុះទៅមើលដល់បង្គោលព្រំដែន។
ចលនានិស្សិតដើម្បីលទ្ធិប្រជាធិបតេយ្យ មើលឃើញថា ការបម្លែងខ្នាតផែនទី ទៅជា ១/២៥.០០០ នេះ ទាំងខុសប្រក្រតី និងខុសកាលៈទេសៈជាតិ គឺជាការធ្វើសម្បទានថ្មីបន្ថែមទៀត ឲ្យវៀតណាម ស្ងាត់ៗ និងមិនស្មោះត្រង់ ជាមួយប្រជាជាតិខ្មែរ។ យើងខ្ញុំសូមប្រឆាំងដាច់ខាត ចំពោះការគប់គិតបម្លែងខ្នាតផែនទីនេះ ស្របពេលរដ្ឋាភិបាលកម្ពុជា នៅក្រោមឥទ្ធិពលមេដឹកនាំបក្សកុម្មុសនិស្ដវៀតណាម ទាំងនយោបាយ និងការទូត ហើយកម្ពុជា ពុំទាន់មាន តុល្យភាពយោធាជាមួយវៀតណាមនៅឡើយ។
សម្រាប់ស្ថានភាពកម្ពុជាបច្ចុប្បន្ន ដែលចាញ់ប្រៀបប្រទេសវៀតណាមយ៉ាងធំធេងលើគ្រប់វិស័យ ចលនា និស្សិតដើម្បីលទ្ធិប្រជាធិបតេយ្យ សូមទាមទារឲ្យមានការចូលរួមពីចម្រុះភាគីជាតិ និងអន្តរជាតិ ក្នុងការដោះស្រាយបញ្ហាព្រំដែនកម្ពុជា ជាមួយប្រទេសវៀតណាម ទាំងករណីផែនទី និងការវាស់កំណត់លើផែនដីជាក់ស្ដែង។
រដ្ឋធានីវ៉ាសុីតុន ថ្ងៃទី០៣ ខែសីហា ឆ្នាំ២០២០
ប្រធានប្រតិបត្តិ
(ហត្ថលេខា)
ទូច វិបុល
.
.