អត្ថបទ៖ ចលនានិស្សិត SMD
ចលនានិស្សិតដើម្បីលទ្ធិប្រជាធិបតេយ្យ (Student Movement for Democracy – SMD) ដែលមានមូលដ្ឋានពីសហរដ្ឋអាមេរិក បានចេញសេចក្តីថ្លែងការណ៍ អំពាវនាវឲ្យរដ្ឋាភិបាលលោក ហ៊ុន សែន បញ្ឈប់ការចាប់ខ្លួនក្រុមសកម្មជនប្រជាធិបតេយ្យ។ សេចក្តីថ្លែងការណ៍នេះ ចុះហត្ថលេខាដោយលោក អ៊ាប សេង ជាអនុប្រធានប្រតិបត្តិនៃចលនានិស្សិតនេះ ចេញផ្សាយនៅថ្ងៃទី ១៥ ខែមករា ឆ្នាំ២០២១។ សូមទាញយកសេចក្តីថ្លែងការណ៍ (Download) ឬអានសេចក្តីថ្លែងការណ៍ទាំងស្រុងខាងក្រោម។
សេចក្តីថ្លែងការណ៍
រដ្ឋាភិបាលកម្ពុជាត្រូវបញ្ឈប់ការចាប់ខ្លួនសកម្មជនប្រជាធិបតេយ្យ
ចលនានិស្សិតដើម្បីលទ្ធិប្រជាធិបតេយ្យ សូមអំពាវនាវដល់រដ្ឋាភិបាល នៃលោកនាយករដ្ឋមន្ត្រី ហ៊ុន សែន ត្រូវបញ្ឈប់មធ្យោបាយគំរាមកំហែងគ្រប់រូបភាព ទៅលើសកម្មជនសង្គម សកម្មជននយោបាយ និងពលរដ្ឋសកម្មទាំងឡាយ ទោះបីដោយការចាប់ខ្លួន ការបង្ខំដាក់ពន្ធនាគារ ឬតាមវិធីណាក៏ដោយ។ ទង្វើនេះគឺជាគំរូសម្លាប់ស្មារតីធម្មនុញ្ញប្រជាធិបតេយ្យជាតិ ដែលក្រុមអ្នកដឹកនាំប្រទេសត្រូវចៀសវាងដាច់ខាត។
ចលនានិស្សិតដើម្បីលទ្ធិប្រជាធិបតេយ្យ សូមរំឭករដ្ឋាភិបាលលោក ហ៊ុន សែន ថា ការចាប់ខ្លួនលោក ម៉ក់ សំអាន អតីតក្រុមប្រឹក្សាឃុំជាំក្រវៀន និងលោក ព្រៅ ចាន់ធឿន ក្រុមប្រឹក្សាឃុំមេមត់ ស្រុកមេមត់ ខេត្តត្បូងឃ្មុំ (តាមប្រភព VOD) ពីគណបក្សសង្គ្រោះជាតិ ជាការបង្កើតបញ្ហាផ្ទៃក្នុងជាតិ ឲ្យកាន់តែចាក់ស្រេះបន្ថែមទៀត។ យុទ្ធវិធីនេះ គឺជាចេតនាធ្វើឲ្យច្របល់ផ្ទៃក្នុងជាតិ រុញជាតិឲ្យលង់ក្នុងវិបត្តិយ៉ាងជ្រៅ ដោយរដ្ឋាភិបាលខ្លួនឯង ដែលកំពុងដឹកនាំជាតិ។
យើងខ្ញុំជូនយោបល់ដល់រដ្ឋាភិបាលថា សកម្មភាពដ៏ខ្មាសអៀនបែបនេះ ពុំមានមេដឹកនាំស្មោះត្រង់ ចំពោះបុព្វហេតុជាតិរូបណា អាចប្រព្រឹត្តងាយៗ ទាំងមិនខ្វល់ពីប្រតិកម្ម របស់ប្រជាពលរដ្ឋ និងសហគមន៍អន្តរជាតិ ដូចឃើញនៅប្រទេសកម្ពុជាសព្វថ្ងៃ និងនៅតាមបណ្ដាប្រទេសកុម្មុយនិស្ដផ្ដាច់ការនោះទេ។
ចលនានិស្សិតដើម្បីលទ្ធិប្រជាធិបតេយ្យ សូមបំភ្លឺរដ្ឋាភិបាលលោក ហ៊ុន សែន ថា មធ្យោបាយនាំចម្រើនជាតិ មិនមែនការបង្កើតបញ្ហាបន្ថែមឡើយ ប៉ុន្តែជាការបញ្ឈប់ផែនការ ដែលមានចេតនាបង្កទំនាស់ ហើយសម្របសម្រួលផ្សះផ្សាគ្នា ពន្លត់ជម្លោះ ក្ដីក្ដាំចាស់ៗទាំងអស់ ដោយវិធីបញ្ចៀសអំពើហិង្សាអយុត្តិធម៌។ នេះគឺជាមេរៀនយោគយល់គ្នានៃអ្នកនយោបាយចាស់ទុំ និងថ្លៃថ្នូរ តាមថ្នាលនៃអ្នកប្រជាធិបតេយ្យ ដែលចេះដាក់ខ្លួនជាអ្នកបម្រើប្រជាពលរដ្ឋម្ចាស់ប្រទេស។
ចលនានិស្សិតដើម្បីលទ្ធិប្រជាធិបតេយ្យ ក៏សូមដាស់តឿនរដ្ឋាភិបាល នៃលោកនាយករដ្ឋមន្ត្រី ហ៊ុន សែន ថា អ្នកដឹកនាំជាតិ ត្រូវមានស្មារតីដោះស្រាយបញ្ហាជាតិ និង កុំធ្វើជាអ្នកនាំរឿងដល់ប្រជាជាតិ ដើម្បីតែប្រយោជន៍អំណាចគ្រួសារបក្ខពួក។ បើពុំ ដូច្នោះទេ ក្រុមមេដឹកនាំរដ្ឋាភិបាលមុខដូចបច្ចុប្បន្ន នឹងត្រូវប្រឈមប្រតិកម្មកំហឹងជាតិ នៅថ្ងៃអនាគត។
រដ្ឋធានីវ៉ាសុីនតុន ថ្ងៃទី១៥ ខែមករា ឆ្នាំ២០២១
អ៊ាប សេង
អនុប្រធានប្រតិបត្តិនៃ ចលនានិស្សិតដើម្បីលទ្ធិប្រជាធិបតេយ្យ
.
.