អត្ថបទចលនានិស្សិត SMD
លោក ទូច វិបុល ប្រធានប្រត្តិបត្តិនៃចលនានិស្សិតដើម្បីលទ្ធិប្រជាធិបតេយ្យ (Student Movement for Democracy – SMD) ចុះហត្ថលេខាសេចក្តីថ្លែងការណ៍មួយ សំដែងការអរគុណចំពោះសេចក្តីស្នើច្បាប់របស់សមាជិកព្រឹទ្ធសភាអាមេរិក ៣ រូប ស្តីអំពីសិទ្ធិមនុស្ស និងប្រជាធិបតេយ្យនៅកម្ពុជា ដែលសំដៅដាក់ទណ្ឌកម្មមន្រ្តីគ្រាក់ៗក្នុងជួររដ្ឋាភិបាលកម្ពុជា។ សេចក្តីថ្លែងការណ៍នេះ ចេញផ្សាយនៅថ្ងៃទី ០៦ ខែសីហា ឆ្នាំ២០២១។ សូមទាញយក (Download) ឬអានខ្លឹមសារទាំងស្រុង។
សេចក្តីថ្លែងការណ៍
គាំទ្រសេចក្តីស្នើច្បាប់របស់ព្រឹទ្ធសភាសហរដ្ឋអាមេរិក ស្តីពីសិទ្ធិមនុស្ស និងប្រជាធិបតេយ្យនៅកម្ពុជា
ចលនានិស្សិតដើម្បីលទ្ធិប្រជាធិបតេយ្យ សូមថ្លែងអំណរគុណ និងគាំទ្រចំពោះលោកព្រឹទ្ធសមាជិក Ed Markey មកពីរដ្ឋ Massachusetts ប្រធានអនុគណៈកម្មាធិការការបរទេសទទួលបន្ទុកកិច្ចការអាសុីខាងកើត នៃព្រឹទ្ធសភាសហរដ្ឋអាមេរិក, លោកព្រឹទ្ធសមាជិក Dick Durbin មកពីរដ្ឋ Illinois និងលោកព្រឹទ្ធសមាជិក Marco Rubio មកពីរដ្ឋ Florida ដែលនឹងបញ្ចូនសេចក្តីស្នើច្បាប់ស្តីពីសិទ្ធិមនុស្ស និងប្រជាធិបតេយ្យនៅកម្ពុជា ដើម្បីឱ្យរដ្ឋាភិបាលកម្ពុជា នៃលោកនាយករដ្ឋមន្ត្រី ហ៊ុន សែន ទទួលខុសត្រូវចំពោះការរំលោភបំពានសិទ្ធិមនុស្ស ស្ថាប័នប្រជាធិបតេយ្យ និងអ្នកនយោបាយប្រឆាំង។
សេចក្តីស្នើច្បាប់នេះបញ្ជាក់ជាថ្មីថា សហរដ្ឋអាមេរិកមិនគ្រាន់តែគោរពឆន្ទៈពលរដ្ឋខ្មែរ ដែលប្រាថ្នាចង់បានសេរីភាព យុត្តិធម៌ និងប្រជាធិបតេយ្យប៉ុណ្ណោះទេ ប៉ុន្តែថែមទាំងបាននិងកំពុងបំពេញតួនាទីស្របច្បាប់របស់ខ្លួន ក្នុងនាមជាប្រទេសហត្ថលេខីនៃកិច្ចព្រមព្រៀងសន្តិភាពក្រុងប៉ារីស៍ ឆ្នាំ១៩៩១ ដែលមានកាតព្វកិច្ច តាមឃ្លាំមើលស្ថានភាពសិទ្ធិមនុស្ស និងដំណើរការ ប្រជាធិបតេយ្យនៅកម្ពុជា។
ការកត់សម្គាល់របស់ព្រឹទ្ធសមាជិក Markey ប្រធានអនុគណៈកម្មាធិការការបរទេសទទួលបន្ទុកកិច្ចការអាសុីខាងកើត ពិតជាមានសុភវិនិច្ឆ័យត្រឹមត្រូវណាស់ ចំពោះស្ថានភាពជាក់ស្តែងនៅកម្ពុជា ដោយបានលើកទ្បើងថា «ប្រជាពលរដ្ឋខ្មែរសមតែទទួលបាននូវអ្វីដែលបានសន្យានៅក្នុងកិច្ចព្រមព្រៀងសន្តិភាពក្រុងប៉ារីស៍ ឆ្នាំ១៩៩១ គឺប្រជាធិបតេយ្យសេរីពហុបក្ស ដែលឆ្លុះបញ្ចាំងពីឆន្ទៈប្រជាពលរដ្ឋ មិនមែនរបបដឹកនាំឯកបក្ស គាបសង្កត់នោះទេ»។
សេចក្តីស្នើច្បាប់នេះ ក៏ជាការរំឮកជាថ្មីដល់នាយករដ្ឋមន្ត្រី ហ៊ុន សែន ថាសហរដ្ឋអាមេរិក នឹងមិនបណ្តោយប្រជាធិបតេយ្យនៅកម្ពុជា ស្លាប់នោះទេ។ ព្រឹទ្ធសមាជិក Durbin មក ពីរដ្ឋ Illinois សហស្ថាបនិកនៃសេចក្តីស្នើច្បាប់ បញ្ជាក់យ៉ាងច្បាស់ដែរថា «សូមបញ្ជាក់ឱ្យច្បាស់ថា ប្រជាធិបតេយ្យដ៍ក្មេងខ្ចីនៅកម្ពុជា ស្ថិតនៅក្នុងស្ថានភាពគ្រោះថ្នាក់បំផុត។ មេដឹកនាំ គាបសង្កត់ រំលោភរដ្ឋធម្មនុញ្ញកម្ពុជា និងចាប់ចង គំរាមកំហែង ព្រមទាំងធ្វើទុក្ខបុកម្មេញដល់ក្រុមអ្នកនយោបាយប្រឆាំង និងសកម្មជនអហិង្សា»។ ព្រឹទ្ធសមាជិក Rubio មកពីរដ្ឋ Florida សហស្ថាបនិកនៃសេចក្តីស្នើច្បាប់ ក៏បានសង្កត់ធ្ងន់ថា «ក្រោមរដ្ឋអំណាចផ្តាច់ការរបស់លោក ហ៊ុន សែន កម្ពុជាបន្តធ្លាក់ចុះជាបន្តបន្ទាប់ អំពីដំណើរការឆ្ពោះទៅកាន់ប្រជាធិបតេយ្យ នៅ ប៉ុន្មានទសវត្សរ៍កន្លងមកនេះ»។ ព្រឹទ្ធសមាជិក សហស្ថាបនិកនៃសេចក្តីស្នើច្បាប់ទាំងពីររូបនេះប្តេជ្ញាចិត្តថា នឹងឱ្យលោក ហ៊ុន សែន ទទួលខុសត្រូវចំពោះការរំលោភសិទ្ធិមនុស្ស និង ប្រជាធិបតេយ្យនៅកម្ពុជា។
សេចក្តីស្នើច្បាប់របស់ព្រឺទ្ធសភា និងរដ្ឋសភាសហរដ្ឋអាមេរិក គឺជាការឆ្លុះបញ្ចាំងពីឆន្ទៈនយោបាយរបស់ពលរដ្ឋអាមេរិក ផ្ញើជូនទៅរដ្ឋបាលលោកប្រធានាធិបតី Joe Biden ថាត្រូវការពារប្រជាធិបតេយ្យនៅកម្ពុជា និងប្រជាពលរដ្ឋខ្មែរគ្រប់តម្លៃ ហើយឱ្យលោក ហ៊ុន សែន ទទួលខុសត្រូវចំពោះសកម្មភាពរំលោភសិទ្ធិមនុស្ស និងប្រជាធិបតេយ្យឱ្យខាងតែបាន។ សេចក្តីស្នើច្បាប់នេះ ក៏ជាកាយវិការម៉ឺងម៉ាត់របស់សហរដ្ឋអាមេរិក ជួយបំភ្លឺផ្លូវ ពង្រីកផ្លូវ និងលើកទឹកចិត្តដល់់ប្រជាពលរដ្ឋខ្មែរ ឲ្យកាន់តែក្លាហាន ជឿជាក់ និងប្ដេជ្ញាចិត្ត ក្នុងបេសកកម្មតស៊ូ ដើម្បីប្រជាធិបតេយ្យ នៅពេលពួកគាត់ដឹងកាន់តែច្បាស់ថា សហរដ្ឋអាមេរិកពិតជាមិនបោះបង់ប្រជាពលរដ្ឋខ្មែរឡើយ។ នេះគឺជារង្វាន់ដ៏ធំ ដែលសហរដ្ឋអាមេរិក ផ្ដល់ឲ្យប្រជាពលរដ្ឋខ្មែរ ក្នុង កាលៈទេសៈវិបត្តិជាតិដ៏ធ្ងន់ធ្ងរ។
ចលនានិស្សិតដើម្បីលទ្ធិប្រជាធិបតេយ្យ យល់ឃើញថា ដើម្បីបញ្ចៀសការប្រឈមគ្នាកាន់តែខ្លាំង រវាងប្រជាពលរដ្ឋខ្មែរដែលប្រាថ្នាប្រជាធិបតេយ្យ និងរដ្ឋអំណាចលោក ហ៊ុន សែន ព្រមទាំងជាហេតុផលពង្រីកទំនាក់ទំនងល្អ រវាងកម្ពុជា និងសហរដ្ឋអាមេរិក ដែលនឹងនាំផលប្រយោជន៍ សេដ្ឋកិច្ច និងសន្តិសុខ សម្រាប់កម្ពុជានោះ រដ្ឋាភិបាលលោក ហ៊ុន សែន ត្រូវប្រតិបត្តិឲ្យឃើញលទ្ធផលជាក់ស្ដែង នៅក្នុងឆ្នាំ២០២១ នេះ ៖
(១). បើកលំហសេរីភាពនយោបាយឡើងវិញ។
(២). ជជែកគ្នា ដើម្បីរៀបចំគណៈកម្មាធិការជាតិរៀបចំការបោះឆ្នោតឡើងវិញ។
(៣). ជជែកគ្នា ដើម្បីកែសម្រួលច្បាប់បោះឆ្នោត និងច្បាប់គណបក្សនយោបាយ ឡើងវិញ។
(៤). បើកលំហសេរីភាពប្រព័ន្ធផ្សព្វផ្សាយឡើងវិញ។
(៥). បើកលំហសេរីភាពសង្គមស៊ីវិលឡើងវិញ។
(៦). រក្សាជំហរអព្យាក្រឹត ក្នុងកិច្ចសហប្រតិបត្តិការអន្តរជាតិ។
វាជាការចាំបាច់ណាស់ ដែលកិច្ចការទាំងនេះ អាចសម្រេចទៅបានល្អ ដោយកិច្ចសហការរបស់រដ្ឋាភិបាល ជាមួយភាគីខ្មែរទាំងអស់ ទាំងសង្គមស៊ីវិល និងគ្រប់គណបក្សនយោបាយ។
រដ្ឋធានីវ៉ាសុីនតុន ថ្ងៃទី០៦ ខែសីហា ឆ្នាំ២០២១
ទូច វិបុល
ប្រធានប្រតិបត្តិចលនានិស្សិតដើម្បីលទ្ធិប្រជាធិបតេយ្យ
.