អត្ថបទចលនានិស្សិត SMD / 28-6-2021
ប្រធានប្រតិបត្តិចលនានិស្សិតដើម្បីលទ្ធិប្រជាធិបតេយ្យ (Student Movement for Democracy – SMD) លោក ទូច វិបុល បានចេញសេចក្តីថ្លែងការណ៍ បកស្រាយខ្លឹមសារខួប ៧០ឆ្នាំនៃប្រវត្តិគណបក្សប្រជាជនកម្ពុជា ជាបក្សកាន់អំណាចសព្វថ្ងៃ។ សេចក្តីថ្លែងការណ៍នេះ បានចេញផ្សាយនៅថ្ងៃទី២៨ ខែមិថុនា ឆ្នាំ២០២១។ សូមទាញយកសេចក្តីថ្លែងការណ៍ (Download) ឬអានខ្លឹមសារទាំងស្រុងដូចខាងក្រោម៖
សេចក្តីថ្លែងការណ៍
គណបក្សប្រជាជនកម្ពុជា អាយុ៧០ឆ្នាំ កើតពីវៀតណាម បម្រើវៀតណាម បំផ្លាញខ្មែរ
កើតបាន៧០ឆ្នាំ គិតត្រឹមថ្ងៃនេះ ដោយស្នាដៃក្រុងហាណូយ គណបក្សប្រជាជនកម្ពុជា មានឈ្មោះដើម គណបក្សប្រជាជនបដិវត្ដន៍កម្ពុជា បានធ្វើគ្រប់សកម្មភាពយុទ្ធសាស្ត្រ ប្រឆាំងនឹងផលប្រយោជន៍ប្រជាជាតិខ្មែរ និងដើរផ្ទុយពីបំណងរបស់ប្រជាពលរដ្ឋខ្មែរម្ចាស់ប្រទេស។ ចាប់តាំងពីការតស៊ូដើម្បីដណ្ដើមអំណាច រហូតដល់បានឱកាសគ្រប់គ្រងអំណាចទាំងស្រុង គណបក្សនេះ ដើរតួនាទីដ៏មានប្រសិទ្ធភាព ក្នុងការបំពេញមហិច្ឆតាឈ្លានពានរបស់ប្រទេសវៀតណាម មកលើទឹកដីកម្ពុជា និង ទាញទម្លាក់កម្ពុជា ឲ្យរអិលចូលក្នុងវិបត្តិពិបាករើខ្លួនដូចសព្វថ្ងៃ។
គណបក្សប្រជាជនកម្ពុជា ជាឧបករណ៍សម្រេចបំណងលុកលុយឈ្លានពានរបស់កងទ័ពវៀតណាម ចូលកាន់កាប់ប្រទេសកម្ពុជា កាលពីថ្ងៃទី៧ ខែមករា ឆ្នាំ១៩៧៩ ឱ្យបានមុនអន្តរាគមន៍របស់អង្គការសហប្រជាជាតិ បន្ទាប់ពីវៀតណាមបានដឹងផែនការអន្តរាគមន៍របស់អង្គការសហប្រជាជាតិ ដើម្បីរំដោះប្រជាពលរដ្ឋខ្មែរ ពីរបបខ្មែរក្រហម នៅអំឡុងចុងខែមករា ឆ្នាំ១៩៧៩។ រដ្ឋាភិបាលនៃគណបក្សប្រជាជនបដិវត្តន៍កម្ពុជា ដែលជាអាយ៉ងរបស់ប្រទេសវៀតណាម បានផ្ដល់ឲ្យវៀតណាមកុម្មុយនិស្ដ ៖
- សន្ធិសញ្ញាមិត្តភាព សន្តិភាព និងសហប្រតិបត្តិការ រវាងកម្ពុជា-វៀតណាម ថ្ងៃ១៨ ខែកម្ភៈ ឆ្នាំ១៩៧៩ ទទួលស្គាល់ភាពចំណុះរបស់កម្ពុជា ដាក់ខ្លួនក្រោមការត្រួត្រារបស់វៀតណាម។
- កិច្ចព្រមព្រៀង ស្តីពីតំបន់ទឹកប្រវត្តិសាស្ត្រ ថ្ងៃ៧ ខែកក្កដា ឆ្នាំ១៩៨២ ប្រគល់កោះត្រល់ និង ចង្កោមកោះក្រចកសេះ ទៅឲ្យវៀតណាម និងបានដាក់ផ្ទៃសមុទ្រខ្មែរ ១ម៉ឺនគីឡូម៉ែត្រការេ ជាតំបន់គ្រប់គ្រងរួមគ្នា (ដែនសមុទ្រខ្មែរមានផ្ទៃសរុប ៩៥.០០០ គឺទ្បូម៉ែត្រការេ)។
- កិច្ចព្រមព្រៀង ស្ដីពីរបៀបដោះស្រាយបញ្ហាព្រំប្រទល់ដែន និងលក្ខន្តិកៈព្រំដែនគោក ថ្ងៃ២០ ខែកក្កដា ១៩៨៣ សម្រួលដល់ការហូរចូលនិគមជនវៀតណាមខុសច្បាប់មករស់នៅកម្ពុជា។
- សន្ធិសញ្ញាកំណត់ព្រំដែនរដ្ឋ ឆ្នាំ១៩៨៥ កែប្រែគំនូសព្រំដែនថ្មីរវាងកម្ពុជា និងវៀតណាម ដែលធ្វើឲ្យប្រជាពលរដ្ឋខ្មែរបាត់បង់ដីស្រែចំការតាមព្រំដែន សូម្បីតែភូមិកំណើតរបស់ លោក ហេង សំរិន ប្រធានរដ្ឋសភាសព្វថ្ងៃ ក៏ត្រូវប្រគល់ឱ្យវៀតណាមកាន់កាប់។
- សារាចរណែនាំ ថ្ងៃទី២៦ ខែកុម្ភៈ ឆ្នាំ១៩៨៦ ជួយសម្រួលលក្ខខណ្ឌរស់នៅរបស់និគមជនវៀតណាមខុសច្បាប់ ដូចជាការផ្ដល់ដីធ្លី ទីជំរក ការឧបត្ថម្ភ ការថែរក្សា ការអប់រំ និងការផ្តល់អត្តសញ្ញាណប័ណ្ណ ជាដើម។
- ការអនុវត្តផែនការ«ក៥»របស់វៀតណាម ក្រោយវៀតណាមបានលើកបន្ទុប លោក ហ៊ុន សែន ជាប្រធានក្រុមប្រឹក្សារដ្ឋមន្ត្រី (នាយករដ្ឋមន្ត្រី) កាលពីឆ្នាំ១៩៨៥ ដែលផែនការនេះ បានសម្លាប់បុរសខ្មែរពេញកម្លាំង ជាង ២០ម៉ឺននាក់។
លោក ហ៊ុន សែន តែងតែអុកឡុកកម្ពុជា មិនព្រមអនុវត្តកិច្ចព្រមព្រៀងសន្ដិភាពក្រុងប៉ារីស៍ ឆ្នាំ ១៩៩១ ហើយនៅតែឱ្យតម្លៃអនុវត្តន៍កិច្ចព្រមព្រៀង និងសន្ធិសញ្ញានានា ដែលរដ្ឋាភិបាលអាយ៉ង ដឹកនាំដោយលោក ហ៊ុន សែន ខ្លួនឯង បានចុះហត្ថលេខាខុសច្បាប់ជាមួយវៀតណាមកន្លងមក ដើម្បីបម្រើផលប្រយោជន៍វៀតណាមសុទ្ធសាធ។
- ដើម្បីតថ្លៃទាមទារអំណាច ក្រោយចាញ់ការបោះឆ្នោតយុត្តិធម៌ ដែលរៀបចំដោយអ៊ុនតាក់ (UNTAC) ឆ្នាំ១៩៩៣ លោក ហ៊ុន សែន បានគំរាមធ្វើតំបន់អបគមន៍ផ្ដាច់ទឹកដីខ្មែរ ចំនួន ៣ខេត្ត មានស្វាយរៀង ព្រៃវែង និងកំពង់ចាម (បច្ចុប្បន្ន កំពង់ចាម និងត្បូងឃ្មុំ) ទៅភ្ជាប់ជាមួយទឹកដីប្រទេសវៀតណាម។ ដោយសារមហិច្ឆតានេះរបស់ លោក ហ៊ុន សែន បានជម្រុញឱ្យមានការចែកអំណាច ធ្វើឲ្យកម្ពុជា ស្ទះដង្ហើមលទ្ធិប្រជាធិបតេយ្យ។
- ក្រោយរដ្ឋប្រហារបង្ហូរឈាម ឆ្នាំ១៩៩៧ ដែលដឹកនាំធ្វើដោយលោក ហ៊ុន សែន គាត់បានផ្ដល់ឱ្យវៀតណាម កាត់យកផ្ទៃសមុទ្រខ្មែរ ៣០.០០០ គីឡូម៉ែត្រការេ និងថៃ ក៏បានកាត់យក ៣០.០០០គីឡូម៉ែត្រការេដែរ។
- ឆ្នាំ២០០៥ លោក ហ៊ុន សែន ដឹកនាំធ្វើសន្ធិសញ្ញាព្រំដែនបំពេញបន្ថែម ទាំងបំពានរដ្ឋធម្មនុញ្ញ និងកិច្ចព្រមព្រៀងក្រុងបារីស៍ ធ្វើឲ្យខូចប្រយោជន៍ទឹកដីជាតិខ្មែរយ៉ាងធំធេង។
- ជាបន្តបន្ទាប់ ករណីព្រំដែន និងផែនទីព្រំដែនកម្ពុជា-វៀតណាម ហើយនិងជនអន្តោប្រវេសន៍វៀតណាមខុសច្បាប់ ដែលរស់នៅកម្ពុជា រដ្ឋាភិបាលលោក ហ៊ុន សែន ចាំស្ដាប់តាមការបង្គាប់បញ្ជារបស់វៀតណាមគ្រប់កាលៈទេសៈ។
គណបក្សប្រជាជនកម្ពុជា ពិតជាបានបម្រើប្រទេសវៀតណាមល្អណាស់ និង បង្កើតស្នាដៃបំផ្លាញកម្ពុជាគួរឲ្យរន្ធត់។
និគមជនវៀតណាមខុសច្បាប់រាប់លាននាក់ ទាំងអ្នកចូលមកកម្ពុជាពីមុនៗ និងពួកអ្នកមកថ្មីៗ តាំងទីលំនៅលើកទឹកដីកម្ពុជា ដោយសេរី។ ពួកគេរស់នៅកកកុញ លើផ្ទែទឹកទន្លេ និងបឹងខ្មែរ ទាំងមានកិច្ចជួយជ្រោមជ្រែងពីអាជ្ញាធរនៃ គណបក្សប្រជាជន កម្ពុជា។ វៀតណាមខុសច្បាប់រាប់សិបម៉ឺននាក់ ចូលតាមនយោបាយសម្បទានដីធ្លី។ អង្គការក្នុងស្រុកមួយ កាលពីឆ្នាំ២០១៨ បានរាយការណ៍ថា រដ្ឋាភិបាល លោក ហ៊ុន សែន បានផ្ដល់ដីសម្បទានឱ្យក្រុមហ៊ុនវៀតណាមជាង ៣៥ ម៉ឺនហិកតា។ ១ហិកតា អនុញ្ញាតឱ្យអតីតយុទ្ធជនវៀតណាម ២នាក់ ចូលទៅប្រកបការងារលើដីសម្បទានទាំងនោះ។ រដ្ឋាភិបាល លោក ហ៊ុន សែន ក៏បានផ្ដល់ដីសម្បទានឲ្យក្រុមហ៊ុនខ្មែរ ជិត ៩៦ម៉ឺនហិកតា ដែលក្រុមហ៊ុនខ្លះធ្វើអាជីវកម្មវៀតណាម ក្រោមឈ្មោះអ្នកជំនួញខ្មែរ។
ព្រៃឈើប្រណិតប្រមាណ ៤០% ទូទាំងប្រទេស ត្រូវបានបំផ្លាញ។ អំពើពុករលួយ ក្លាយជាប្រព័ន្ធប្រមូលលុយធ្វើសេដ្ឋីរបស់ គ្រួសារអ្នកដឹកនាំ និងបង្កើតបណ្ដាញការពារអំណាចគ្រួសារគណបក្ស។ ការកែទម្រង់ប្រព័ន្ធគ្រប់គ្រងជាតិជាង ៣០ឆ្នាំមកនេះ ឡើង ដល់កម្រិតតំណែងតួនាទីគ្រប់ស្ថាប័ន ត្រូវប្រកាសលក់ជាចំហ និងតែងតាំងគ្រួសារ នៃពួកអ្នកដឹកនាំតាមអំពើចិត្ត ហើយស្ថាប័នរដ្ឋ ព្រឹទ្ធសភា រដ្ឋសភា តុលាការ ក្រុមប្រឹក្សាធម្មនុញ្ញ កងកម្លាំងប្រដាប់អាវុធគ្រប់ប្រភេទ គណៈកម្មាធិការជាតិរៀបចំការបោះឆ្នោត អង្គភាពប្រឆាំងអំពើពុករលួយ … សុទ្ធតែជាសេនាធិការជួយថែទាំអំណាចរបស់គ្រួសារលោក ហ៊ុន សែន។ វិស័យអប់រំ សុខាភិបាល សង្គមកិច្ច កាកបាទក្រហម និង ប្រព័ន្ធសេវាសាធារណៈទាំងអស់ ត្រូវលោក ហ៊ុន សែន ប្រើជាអាជីកម្ម ចម្រាញ់យកចំណេញនយោបាយអំណាចរបស់គាត់។
លទ្ធផលជាក់ស្ដែង ប្រទេសជាតិធ្លាក់ខ្សោយដុនដាបគ្រប់វិស័យ ហើយឃើញរឹងមាំតែកងអង្គរក្សឯកជនរបស់លោក ហ៊ុន សែន ប៉ុណ្ណោះ។ កម្ពុជាជំពាក់បំណុលបរទេស ដល់ប្រមាណ ១មុឺនលានដុល្លារអាមេរិក ។ បរិស្ថាន និងធនធានធម្មជាតិ ខ្ទេចខ្ទាំ រីឯអ្នកការពារបរិស្ថាន ត្រូវបានធ្វើទុក្ខបុកម្នេញ និងត្រូវដាក់គុក។ ប្រជាពលរដ្ឋខ្មែរស្ទើរគ្រប់ស្រុក យំស្រែក ព្រោះត្រូវអ្នកមាន/ឧកញ៉ា និងអ្នកមានអំណាចបក្ខពួក ប្លន់យកដីស្រែចំការ។ ពលរដ្ឋខ្មែរពេញកម្លាំង ប្រមាណជាង ២លាននាក់ រត់ទៅរកការងារធ្វើនៅក្រៅប្រទេស ដែលក្នុងចំនួនភាគខ្លះ ត្រូវបង្ខំចិត្តចូលទឹកដីថៃ ដោយខុសច្បាប់ ព្រោះតែបញ្ហាក្រីក្រ និងអត់ការងារធ្វើក្នុងប្រទេសកម្ពុជា។ គ្រឿងញៀនរីកពេញស្រុកភូមិ។
ស្ថានភាពចុងក្រោយនៃកម្ពុជា គណបក្សសង្គ្រោះជាតិ ត្រូវបានរំលាយតាមទំនើងចិត្ត។ ប្រធានគណបក្សប្រឆាំង ត្រូវបានកំណត់ដែនធ្វើដំណើរ ក្នុងបណ្ដឹងក្បត់ជាតិ ហើយក្រុមមន្ត្រីជាន់ខ្ពស់នៃគណបក្សនេះ ក៏ត្រូវបានបិទសិទ្ធិធ្វើនយោបាយ។ នយោបាយជាតិគាំង។ សិទ្ធិសេរីភាពពលរដ្ឋត្រូវបានរំលោភបំពាន។ លទ្ធិប្រជាធិបតេយ្យត្រូវបានសម្លាប់។ សកម្មជននយោបាយ សិទ្ធិមនុស្ស និងប្រជាធិបតេយ្យ ប្រឈមនឹងការគំរាមសុវត្ថិភាពគ្រប់សកម្មភាព និងត្រូវចាប់ដាក់គុកយ៉ាងអយុត្តិធម៌។ បុគ្គលឆ្នើមៗក្នុងសង្គម ដូចជាលោក កែម ឡី, លោក ជា វិជ្ជា, លោក ឈុត វុទ្ធី … ត្រូវគេធ្វើឃាតក្រៅច្បាប់។ ខ្លឹមសារនៃរដ្ឋធម្មនុញ្ញ និងកិច្ចព្រមព្រៀងក្រុងប៉ារីស៍ ដែលមានគោលដៅបម្រើផលប្រយោជន៍ជាតិខ្មែរ ត្រូវលោក ហ៊ុន សែន បំភ្លេចចោល។ បញ្ហាអព្យាក្រឹតកម្ពុជា ក្លាយជាចំណោទដេញដោលរបស់មិត្តមហាអំណាច។ ក្រោមអំណាច លោក ហ៊ុន សែន បណ្តាប្រទេសធំៗ បានលើកនិយាយចំៗ អំពីការរង្កៀសចិត្តការទូត និងដកការអនុគ្រោះពាណិជ្ជកម្មពីកម្ពុជា ដូចជាករណី EBA-អឺរ៉ុប ជាដើម ដែលធ្វើឱ្យប្រជាពលរដ្ឋខ្មែរ ខាតប្រយោជន៍យ៉ាងសម្បើម។
ចលនានិស្សិតដើម្បីលទ្ធិប្រជាធិបតេយ្យ សូមទទូចឲ្យលោក ហ៊ុន សែន ដកខ្លួនពីអន្ទាក់វៀតណាម និងភ្ញាក់ រឭកងាកមកផ្សះផ្សាបង្រួបបង្រួមខ្មែរគ្រប់និន្នាការឡើងវិញ ទើបអាចដោះស្រាយវិបត្តិជាតិដ៏ធ្ងន់ធ្ងរទាំងអស់នេះបាន។
រដ្ឋធានីវ៉ាសុីនតុន ថ្ងៃទី២៨ ខែមិថុនា ឆ្នាំ២០២១
ទូច វិបុល
ប្រធានប្រតិបត្តិចលនានិស្សិតដើម្បីលទ្ធិប្រជាធិបតេយ្យ
.