ពីសហរដ្ឋអាមេរិក ក្រុមចលនានិស្សិតដើម្បីលទ្ធិប្រជាធិបតេយ្យ (Student Movement for Democracy – SMD) បានចេញសេចក្តីថ្លែងការណ៍មួយ ចាត់ទុកថ្ងៃ ៧ មករា ជាថ្ងៃដែលវៀតណាមចូលឈ្លានពានកម្ពុជា និងទាមទារលុបចោលពីទិវាបុណ្យជាតិ។ សេចក្តីថ្លែងការណ៍នេះ ចុះហត្ថលេខាដោយលោក ទូច វិបុល ជាប្រធានប្រតិបត្តិ បានចេញផ្សាយនៅថ្ងៃទី ០៦ ខែមករា ឆ្នាំ២០២១។ សូមទាញយកសេចក្តីថ្លែងការណ៍ (Download) ឬអានអត្ថបទទាំងស្រុងខាងក្រោម។
សេចក្តីថ្លែងការណ៍
៧ មករា ជាថ្ងៃវៀតណាមឈ្លានពានកម្ពុជា ដែលត្រូវតែលុបចោល ពីទិវាបុណ្យជាតិ
ចលនានិស្សិតដើម្បីលទ្ធិប្រជាធិបតេយ្យ ចាត់ទុក ថ្ងៃ៧ មករា ១៩៧៩ ជាថ្ងៃដែល ប្រទេសវៀតណាមលើកកងទ័ពប្រមាណ ២០ម៉ឺននាក់ ចូលឈ្លានពានប្រទេសកម្ពុជា ដោយរំលោភលើច្បាប់អន្តរជាតិ។ សមាគមប្រជាជាតិអាស៊ាន និងអង្គការសហប្រជាជាតិ បានរួមគ្នាថ្កោលទោសការ ឈ្លានពានរបស់ប្រទេសវៀតណាម ហើយប្រទេសសិង្ហបុរីទំនើបនៅតែបន្តរំឭករឿងនេះ។
វៀតណាមកាត់ឆ្វៀលយកកោះត្រល់ និង ចង្កោមកោះក្រចកសេះ តាមរយៈកិច្ចព្រមព្រៀងខុសច្បាប់ ស្តីពីដែនទឹកប្រវត្តិសាស្ត្រឆ្នាំ១៩៨២។ វៀតណាមរំលោភយកទឹកដីព្រំដែនគោកកម្ពុជា តាមសន្ធិសញ្ញាកំណត់ព្រំដែនរដ្ឋខុសច្បាប់ ឆ្នាំ១៩៨៥។ វៀតណាមបញ្ជូននិគមជនរបស់ខ្លួន ខុសច្បាប់ ចូលមករស់នៅកម្ពុជា តាមសន្ធិសញ្ញាមិត្តភាពសហប្រតិបត្តិការ ឆ្នាំ១៩៧៩ និងសារចរណែនាំ ឆ្នាំ១៩៨៦។ វៀតណាមប្រមូលយកធានធានរបស់កម្ពុជា ទាំងធនធានធម្មជាតិ និង ធនធានសល់ពីសម័យមុនៗ។ វៀតណាមគ្រប់គ្រងសន្តិសុខជាតិកម្ពុជា និង ធ្វើឱ្យផ្ទៃក្នុងជាតិខ្មែរ បែកបាក់ធ្ងន់ធ្ងរ រហូតដល់សព្វថ្ងៃ និង អាចនាំគ្រោះអាសន្នដល់កម្ពុជាទៅថ្ងៃអនាគត ជាពិសេស ទឹកដីនៃប្រទេសកម្ពុជាទាំងមូល។
ចលនានិស្សិតដើម្បីលទ្ធិប្រជាធិបតេយ្យ ពិនិត្យឃើញថា ការកំណត់យកថ្ងៃ៧ មករា ជាថ្ងៃបុណ្យជាតិ គឺជាការសម្រេចឯកតោភាគី របស់គណបក្សប្រជាជនកម្ពុជា ដែលជាគណបក្សកាន់អំណាច មិនឆ្លុះបញ្ចាំងពីស្មារតីសាមគ្កីជាតិ និងឯកភាពជាតិ ពីខ្មែរគ្រប់ភាគីទ្បើយ ហើយគឺជាការលើកតម្កើងនយោបាយឈ្លានពានរបស់វៀតណាម ដែលបំផ្លាញប្រទេសកម្ពុជា។
ចលនានិស្សិតដើម្បីលទ្ធិប្រជាធិបតេយ្យ យល់ថា យើងខ្មែរ ត្រូវតែបញ្ចប់ព្រឹត្តិការណ៍ ថ្ងៃ៧ មករា ដោយឈរលើស្មារតីឯកភាពជាតិខ្មែរ ដើម្បីបញ្ចប់នូវការខ្វែងគំនិតគ្នា ក្នុងចំណោមជាតិខ្មែរតែមួយ។ យើងខ្ញុំប្រកាន់ជំហរថា ថ្ងៃ៧ មករា នេះ ត្រូវលុបចេញពីទិវាបុណ្យជាតិ ហើយយកថ្ងៃទី២៣ តុលា ជាទិវាបុណ្យជាតិជំនួសវិញ។ ថ្ងៃទី២៣ ខែតុលា ឆ្នាំ១៩៩១ ទិវាកិច្ចព្រមព្រៀងសន្តិភាពទីក្រុងប៉ារីស ជាឧបករណ៍ច្បាប់អន្តរជាតិជាធរមាន ដែលបានបញ្ចប់ការឈ្លានពានរបស់ប្រទេសវៀតណាម មកលើប្រទេសកម្ពុជា ហើយបង្រួបបង្រួមគ្រប់ភាគីជម្លោះខ្មែរ ឲ្យចូលរួមបោះឆ្នោតយុត្តិធម៌សកល ឆ្នាំ ១៩៩៣ ដែលបង្កើតបានរដ្ឋធម្មនុញ្ញជាតិ តាមគោលការណ៍ប្រជាធិបតេយ្យសេរីពហុបក្ស ជាមូលដ្ឋានគ្រឹះនៃសន្តិភាពថ្លៃថ្នូរ និងអំណាចសម្រេចចិត្តរបស់ប្រជាពលរដ្ឋខ្មែរជាម្ចាស់ប្រទេស។
ចលនានិស្សិតដើម្បីលទ្ធិប្រជាធិបតេយ្យ សង្ឃឹមយ៉ាងមុតមាំថា រដ្ឋាភិបាលកម្ពុជា និងសភាជាតិ ដែលដឹកនាំដោយគណបក្សប្រជាជនកម្ពុជា នឹងតម្កល់តម្លៃជាតិខ្មែរជាធំ ដោយប្រកាសមោឃភាពនៃសន្ធិសញ្ញានានា ដែលធ្វើទ្បើងអំឡុងឆ្នាំ១៩៧៩ ដល់ ឆ្នាំ១៩៨៩ និងសន្ធិសញ្ញាពាក់ព័ន្ធថ្មីៗបន្ថែមទៀត ព្រមទាំងត្រូវលុបចោលទិវាបុណ្យជាតិថ្ងៃ ៧ មករា ដោយដាក់ជំនួសមកវិញ នូវថ្ងៃ ២៣ តុលា ជាទិវាបុណ្យជាតិ ទើបអាចផ្តល់សច្ចធម៌ប្រវត្តិសាស្ត្រជាតិខ្មែរបាន។
រដ្ឋធានីវ៉ាសុីនតុន ថ្ងៃទី០៦ ខែមករា ឆ្នាំ២០២១
ទូច វិបុល
ប្រធានប្រតិបត្តិចលនានិស្សិតដើម្បីលទ្ធិប្រជាធិបតេយ្យ
.
.