អត្ថបទ The Cambodia Daily / 08th-6-2020
ចលនានិស្សិតដើម្បីលទ្ធិប្រជាធិបតេយ្យ (Student Movement For Democracy – SMD) ហៅកាត់ថា SMD ដែលជាចលនាមិនចំណុះរដ្ឋាភិបាល ត្រូវបានដាក់ដំណើរការជាថ្មីម្តងទៀត ដោយមានមូលដ្ឋាននៅសហរដ្ឋអាមេរិក។
ក្នុងសេចក្តីប្រកាសព័ត៌មានរបស់ខ្លួន កាលពីថ្ងៃទី ០៧ ខែមិថុនា ឆ្នាំ២០២០ ចលនានិស្សិតដើម្បីលទ្ធិប្រជាធិបតេយ្យ បានលើកឡើងថា អតីតស្ថាបនិក ថ្នាក់ដឹកនាំ និងសមាជិករបស់ខ្លួន សម្រេចបង្កើតស្ថាប័ននេះឡើងវិញ ដើម្បីបន្តទស្សនវិស័យ និងបេសកកម្មរបស់ខ្លួន ក្នុងបុព្វហេតុ «ចង់ឃើញកម្ពុជាមានលទ្ធិប្រជាធិបតេយ្យ យុត្តិធម៌ ឯកភាពជាតិ អធិបតេយ្យ និងបូរណភាពទឹកដីពេញលេញ»។
ក្នុងកិច្ចប្រជុំកាលពីថ្ងៃទី ០៧ មិថុនា លទ្ធផលនៃកិច្ចប្រជុំ បានជ្រើសរើស លោក អ៊ុំ សំអាន ជាប្រធាក្រុមប្រឹក្សាភិបាល នៃចលនានិស្សិតដើម្បីលទ្ធិប្រជាធិបតេយ្យនេះ និងបានជ្រើសរើស លោក ទូច វិបុល ជាប្រធានគណៈកម្មាធិការប្រតិបត្តិ នៃស្ថាប័ននេះជាផ្លូវការ ព្រមទាំងសហការីជាច្រើនរូបទៀត។
ចលនានិស្សិតដើម្បីលទ្ធិប្រជាធិបតេយ្យ បង្កើតឡើងជាថ្មីទៀត ក្រោយការផ្អាកសកម្មភាពរបស់ខ្លួនជិត ២០ឆ្នាំមកនេះ ក្នុងគោលបំណង «លើកកម្ពស់ការចូលរួមថែរក្សាស្ថេរភាព និងសន្តិភាពនៅកម្ពុជា តាមរយៈការតស៊ូមតិជាមួយស្ថាប័នជាតិ និងអន្តរជាតិ»។
ដោយឡែក បេសកកម្មរបស់ចលនានេះ នឹង«ប្រើយន្តការកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ រដ្ឋធម្មនុញ្ញកម្ពុជា ឆ្នាំ១៩៩៣ និងយន្តការអន្តរជាតិនានា»។ បន្ថែមពីនេះ «ផ្សារភ្ជាប់យុវជនខ្មែរ ជាមួយយុវជនអន្តរជាតិ ដើម្បីផ្លាស់ប្តូរបទពិសោធន៏គ្នា ទៅវិញទៅមក លើរបៀបនៃការតស៊ូមតិ ឲ្យមានប្រសិទ្ធភាពខ្ពស់, ជំរុញឲ្យមានការឯកភាពគ្នា រវាងខ្មែរ និងខ្មែរ» ព្រមទាំងយន្តការមួយចំនួនទៀត។
ចលនានិស្សិតដើម្បីលទ្ធិប្រជាធិបតេយ្យ បានបង្កើតឡើងនៅក្នុងឆ្នាំ ១៩៩៨ ដើម្បីប្រឆាំងលទ្ធផលនៃការបោះឆ្នោត និងបេក្ខភាពលោក ហ៊ុន សែន ធ្វើជានាយករដ្ឋមន្រ្តី នៅក្រោយការបោះឆ្នោតលើកទី២ នៅខែកក្កដា ឆ្នាំ១៩៩៨។ ចលនានេះ ធ្លាប់ចូលរួមប្រឆាំងតវ៉ាជនអន្តោប្រវេសន៍វៀតណាមខុសច្បាប់ នៅកម្ពុជា និងទាមទារឲ្យរដ្ឋាភិបាលកម្ពុជា លុបចោលរាលសន្ធិសញ្ញា និងកិច្ចព្រមព្រៀងខុសច្បាប់នានា ដូចជានៅឆ្នាំ ១៩៧៩, ១៩៨២, ១៩៨៣ និងឆ្នាំ ១៩៨៥ ។ ថ្នាក់ដឹកនាំរបស់ចលនានិស្សិត SMD ចាត់ទុកថា សន្ធិសញ្ញា និងកិច្ចព្រមព្រៀងទាំងនោះ បានធ្វើឲ្យបាត់បង់ទឹកដីខ្មែរដោយខុសច្បាប់ រាប់ម៉ឺនគីឡូម៉ែត្រក្រឡា ។
ជាងនេះទៅទៀត ក្រុមចលនានិស្សិតដើម្បីលទ្ធិប្រជាធិបតេយ្យ ក៏ធ្លាប់បានធ្វើសកម្មភាពតវ៉ាជាច្រើនទៀត លើបញ្ហាលទ្ធិប្រជាធិបតេយ្យ សិទ្ធិមនុស្ស និងពង្រឹងស្មារតី ដឹកនាំយុវជនជំនាន់ថ្មី ឲ្យចូលរួមទាមទារយុត្តិធម៌សង្គមផងដែរ។
នៅឆ្នាំ ២០០៥ ចលនានិស្សិតមួយនេះ បានផ្អាកសកម្មភាពរបស់ខ្លួន ដោយមេដឹកនាំសំខាន់ៗ បានរងការគំរាមកំហែងដល់អាយុជីវិត ពីសំណាក់រដ្ឋាភិបាល លោក ហ៊ុន សែន ហើយបានភៀសខ្លួន សុំសិទ្ធិជ្រកកោននៅក្រៅប្រទេស។ ទោះបែបនេះក្តី ក៏ឆន្ទៈរបស់ក្រុមនេះ នៅតែក្តៅគគុក មិនរុញរាក្នុងការតស៊ូលើកិច្ចការព្រំដែននោះឡើយ។
ថ្លែងនៅក្នុងកម្មវិធី Idea Talk នៃសារព័ត៌មានឌីខេមបូឌា ដេលី (The Cambodia Daily) កាលពីយប់ថ្ងៃទី ០៣ ខែមិថុនា ប្រធានក្រុមប្រឹក្សាភិបាលនៃ ចលនានិស្សិតដើម្បីលទ្ធិប្រជាធិបតេយ្យ លោក អ៊ុំ សំអាន បានបញ្ជាក់ថា «បេសកកម្មរបស់ចលនានិស្សិតថ្មីនេះ នឹងមិនត្រឹមតែតវ៉ារឿងព្រំដែន ជនអន្តោប្រវេសន៍ខុសច្បាប់ និងយុត្តិធម៌សង្គមនោះទេ ប៉ុន្តែក្រុមរបស់លោក នឹងទាមទារយកកោះត្រល់ របស់ខ្មែរ ត្រឡប់ពីការគ្រប់គ្រងរបស់វៀតណាម មកវិញ នៅពេលមានរដ្ឋាភិបាលត្រឹមត្រូវ មិនស្ថិតនៅក្រោមឥទ្ធិពលរបស់វៀតណាម»។ លោក អ៊ុំ សំអានបន្តថា កូនខ្មែរមិនត្រូវភ្លេចទឹកដី ដែលបរទេសឈ្លានពានយកទៅនេះទេ។
ចំណែកលោក ទូច វិបុល ប្រធានចលនានិស្សិតដើម្បីលទ្ធិប្រជាធិបតេយ្យ ដែរនោះ បញ្ជាក់ថា ការបង្កើតចលនានិស្សិតនេះឡើងវិញគឺ ដើម្បីប្រឆាំងការឈ្លានពានព្រំដែនពីប្រទេសជិតខាង និងបញ្ហាជនអន្តោប្រវេសន៍ខុសច្បាប់លើទឹកដីកម្ពុជា។
ក្រុមស្ថាបនិកនៃចលនានិស្សិត ដែលទើបបង្កើតឡើងថ្មីនេះ ប្តេជ្ញាថា ពួកគេនឹងធ្វើជាគំរូដល់ប្រជាពលរដ្ឋ និស្សិត និងបញ្ញវន្តគ្រប់រូប ក្នុងការតស៊ូមតិ ហើយត្រូវហ៊ាននិយាយការពិត ហ៊ានលះបង់ដើម្បីបម្រើជាតិមាតុភូមិ។ ជាងនេះទៀត ពួកគេក៏បានអំពាវនាវឲ្យមានការចូលរួមពីអតីតក្រុមការងារ សមាជិក និស្សិតបញ្ញវន្ត និងពលរដ្ឋគ្រប់មជ្ឈដ្ឋាន ដោយមិនប្រកាន់និន្នាការនយោបាយអ្វីនោះឡើយ៕
.